Kutwula 22
22
1Mundu na a va ni yiba ing'ombe, kinga ligondi, ni yiita, kinga na a gulidza; a la leta tsing'ombe tsitano kigira ing'ombe, na magondi gane kigira ligondi. 2Mwivi na a loleka na a hudulanga, na a kuywa kuduka likudza, si a la vanzirwa masahi gege mba. 3Liuva ni li twuliye kuye, a la vanzirwa masahi gege; ga mu dukira kuhaana mitungu kudukana: na a va na a ta veye nekindu, a la gulidzirwe kigira ubwivi bwibwe. 4Na kindu kiibwa ni ki nyoleka mu mukono gwigwe, ni kiri mwoyo, ni i va ing'ombe, kinga isukiri, kinga ligondi; a la tunga hali kaviri.
5Mundu na a kola mulimi, kinga mulimi gwamazabibu kulibwa, na a leka mutugu gwigwe kugendagenda, nagwo ni gu lia mulimi gwomundu wundi; a la tunga ku vindu vyomulimi gwigwe mwene, noku vyamazabibu gege vi veye vilahi kuvita.
6Muliru ni gu hamba, nokugumira amafwa, kuduka ku maboho gobuswage, kinga ku bu kikiri kugeswa, kinga mulimi ni gu hya; uyu wa hambidza muliru, ligali a la tunga.
7Mundu na a ha wundi ifetha, kinga vindu vindi, a mu lindire, navyo ni vibirwa mu inyumba yeye, mwivi na a nyoleka, a la tunga hali kaviri. 8Na mwivi na a vula kunyoleka, mwene inyumba a lisunda imbiri wa Nyasaye, kulola na a veye iye wa nyira mukono gwigwe kuvugula viju vyowakye, naho si a li iye. 9Ku mahyolo gosi, ni ga veye kigira ing'ombe, kinga isukiri, kinga ligondi, kinga ingubo, kinga ku vindu tsingano tsyosi vi goti, kya mulala a vola, Ni yiki, likuva lyavandu vombi li la letwa imbiri wa Nyasaye; na uyu wa Nyasaye a kalagira kuva muhyoli a la tunga wakye hali kaviri.
10Mundu na a va na a ha wakye isukiri, kinga ing'ombe, kinga ligondi, kinga mutugu ku gyosi, a ki linde; na ki kudza, kinga ki salira, kinga ki kungwa, na mundu a vula kukilola: 11lisuha lya Yahova li la va hagati havo vombi, na a va ni ya nyira mukono gwigwe kuvugula kindu kya wakye naho mba; na uyu mwene kindu a la bugirira, na si a la mwiranyira. 12Navutswa ni ki va ni kibiwa kuye a liranyira mwenekyo litunga li dukana. 13Ni ki va ni kya donyanywa, a ki lete ki ve kilolekidzu; si a la tunga mba kya donyanywa.
14Mundu ni yekopa kindu kyomutende ni kyoneka, kinga ki kudza, na mwene na a ta li halala nakyo, ligali a la tunga. 15Navutswa mwene na a va na a veye halala nakyo, si a la tunga mba: na a va na a veye mutungwa, litungwa lilye li la gota.
16Mundu na a va na a volidza mukana mugima u kikiri kukwebwa, na a va halala naye, ligali a la haana enko kigira uyu kuva mukali wewe. 17Dada wewe na a sula ligali kumuha, a la tunga ifetha kudukana nevindu vyenko vyavakanavagima.
18U ta leka mukali mukumu kuva mwoyo.
19Ku vosi mundu na a gona nomutugu ligali a liitwa.
20Uyu wiita isadaka ku munyasaye wundi, na a ta li Yahova ying'ine, a dividzwe ligali. 21U ta tindira mugeni, kandi u ta mu kolera kirage: kigira mwinye mwa li avageni mu kivala kya Egepeti. 22U ta kupidza kivi mukunzakali wekikali, kinga mwana mbisandu. 23Nu u va nu u va kupidza kivi mu kindu ku vyosi, navo ni vanira inze kali hakuzu, ligali nda hulira lilira lyavo; 24nobutima bwange bu laaka muliru, na nda mwiita nekivavi; na avakali venyu va la va avakunzakali, na avana venyu avabisandu.
25Nu u va nu u hambidza kivete, mundu mudaka ku avandu vange va u veye halala navo, u ta va kuye kuli u mbanzanga; kandi u ta vika kuye kyambeti. 26Nu u va nu u vugula ingubo yowakvo kuva kihambiriru, ga ku dukira kwirannya inyinga liuva li kikiri kuyera: 27kigira ingubo i veye kyokwefuma kikye kyeng'ine, i veye ingubo yeye yeligodo lilye: a la gonera ki? Na ga la duka lwa a lanira inze, nda hulira; kigira mbeye netsimbabasi.
28U ta legeridza Nyasaye, kandi u ta laama munene wavandu vovo. 29U ta lindagira kuleta ku vigese vivyo, kinga ku vyokunwa vivyo. Wa tanga kwivulwa ku avana avayai vovo u la mpa. 30Kandi u la kola ndiyo ku tsing'ombe tsitsyo, noku magondi gogo: u la vi leka madiku gatano na gaviri halala na mama wavyo; na lidiku li kola gatano na gavaka u la mpa. 31Mu ve avatakatifu ku inze: kigira yaga mu ta lia inyama ya tsinyama tsyomigendinyama tsya donyanya; mu he tsimbwa.
Currently Selected:
Kutwula 22: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967