MATIUS 13
13
”Ap ekhe awi feik lakfilik lagaikhe,” iluk oba lirogo yagaisasikhe wene
(Mrk. 4:1-9; Luk. 8:4-8)
1O andi sambul he, at Yesus oloba nen wulibi wagaikhesik he, i Galilea yenggelek a'nogo esanggoma hurek were'ma, 2afuni esa hokhorogoat Yesus oba wagaukwama re, it inebe i esanggoma mendek werek kwelek fisaluk he, at ebe e so elema hu'lasi kwisikhe.#Luk. 5:1-3 3Hu'lasi kwisikhesik, yi mene ti meneba lithigik wene hokhorogo yagaisikhi lagaikhe. Ekhe mel yagaisasikhe: ”Ap ekhe yabu waganogo awi yaterek mene awi feik lakfeigeluk wulifikhe. 4Wulifikhesik, feik lakfilik lagunem he, enggen ekhe kwe ebekhalem pilik lagaikhe. Pugunem he, sue wagaikhesik felelenghogo mondok nasikhe. 5Nen, enggen ekhe re, helep oba kweang endebatma pilik lagaikhe mene, kweang endebat andi nen he, weak-weagat fulelhikhe. 6Meneat he, o mo lakfei wagaikhemo, omanggen yati'legen, sawet agaikhesik pugagaikhe. 7Nen, enggen ekhe panggi were'ma pilik lagaikhe mene re, panggi andi mene hokho aga logolik he, awi fano mene yago a'nogo palogo pelafikhemo khanggil agaikhe. 8Nen, enggen ekhe kweang fanoma pilik lagaikhe mene re, fulelhikhesik ebe hokho agaikhesik enggen hokhorogo itikhe. Ero ekhe enggen 100 nen itikhe. Ero ekhe enggen 60 nen itikhe. Nen, ero ekhe enggen 30 nen itikhe. 9Hit hinesanggo holugun halok he, furogo holini o,” iluk yagaisasikhe.
Yesus nen he, ”Wene oba lithigik yagahisikhi lagi andi, ebe yi faget,” iluk yagaisasikhe wene
(Mrk. 4:10-12; Luk. 8:9-10)
10At Yesus nen a'nogo yagaisasikhemo re, at agoromi ane wanhi lagaukwa mene omanogo oba wagaukwasik he, mel yagatukwa: ”Haren afuni yoma wene yi mene ti meneba lithigik yagaisegen a'nogo nenahalok,” iluk yagatukwama re, 11at Yesus nen he, ”Allah nen awe a'ma fisikherek wene andi, at endawimo hinago welagaikhe mene, hit enek he, hinelu asubagaigeluk, fakhogo yagahisagain anggasikhe meneat he, it afuni ekhe andi nek he, fakhogo yagaisagain lek, anggasikhe. 12Sa nen agarek werek mene andi, Allah nen hobuk oba loukhogo wogosumo re, at enggimo hokho asigin o. Nen, sa nen agarek lek halok he, endebat enek logogin mene andi, Allah nen ambotkwe telogo helamo re, elagaik asigin o.#Mat. 25:29; Mrk. 4:25; Luk. 8:18, 19:26 13A'nogo hilingisigin andi nen he, an wene oba lirogo it andi yagaisigi o. It afuni andi re, ineilenggen hili'lagwi meneat he, furogo higi'lek. Nen, inesanggo holi'lagwi meneat he, furogo futfili'lagwi legat. 14It afuni inobabut ariginik mene andi faget he, at Yesaya nen mel isikhe:
Inesanggo holhi logogun
meneat he, fanorogo holhi
logogun lego.
Nen, hineilenggen hikhi logogun
meneat he, furogo hikhi
logogun legaro.#Yes. 6:9-10
15It afuni yi ineilenggen higik,
inesanggo holhik,
inendawimo ebetik, ilugen he,
inobabut hebelumo hobuk
an nen fanorinabinogo iluk he,
iren inendawimo pugagik,
inesanggo tagum agik,
ineilenggen mum agik,
ineranenat ineilenggen
pugetfigik, hilingitukwa o, iluk Allah nen isikhemo Yesaya nen lisu palogo fesikhe andi higit asuageluk yagaisikhi lagi o.
16Meneat he, hit enek he, hineilenggen higik, hinesanggo holhik, ikhi lagep andi nen he, hinendawimo hinagaiyek anggikhi logoni o.#Luk. 10:23-24 17Hit hineilenggen hikhi lagep mene andi re, it ap Allah ane yagaisikhi lagaukwa mene inom, inobabut higit mene inom, inebe hokhorogo ren he, ”Eigo! Nineilenggen helo e,” ikhi lagaukwa meneat he, ineilenggen higi'legat welagaukwa. Nen, hinesanggo holhi lagep mene andi, it andi nen, ”Ninesanggo holilo e,” ikhi lagaukwa meneat he, inesanggo holhi'legat welagaukwa, iluk eberogoat yagahisigi o, iluk yagaisasikhe.
At Yesus nen, ”Ap ekhe enggen feik lakfilik lagaikhe, iluk yagahisigi a'nogo re, ebe yi'nogo,” iluk yagaisasikhe wene
(Mrk. 4:13-20; Luk. 8:11-15)
18A'nogo yagaisasikhesik, ekhe mel yagaisasikhe: ”Wene ap ekhe feik lakfilik lagaikhe iluk oba lirogo yagahisigi a'nogo, ebe yagahisagain yi futfeni o. 19Awi feik ekhe ebekhalem lakfesikhe andi ebe re, it afuni ekhe Allah awe a'ma fisikherek wene andi inesanggo holharesigat he, ebe furogo futfigi'lek halok, at obabut weak mene a'nogo wagaresik he, wene inendawinggenma awi yago mene andi henegeisogo helaluk lagarek andi aro. 20Nen, awi feik ekhe helep oba lakfesikhe andi ebe re, it afuni ekhe Allah ane andi inesanggo holharesik he, inendawimo inagaiyek hikhi logolik weak-weagat wanharesigenat he, 21wene andi inendawinggenma omanggen yati'legen he, endebat were'ma nen, afuni ekhe nen Allah ane andi faget yi enggin ti enggin inoba figik, weagerinafik, ugunem he inendawimo fageat puk agaresik wene andi herakfisaluk wulifarek andi aro. 22Nen, awi feik ekhe panggi hokhorogo were'ma lakfesikhe andi ebe re, it afuni ekhe Allah ane andi inesanggo holharesigenat he, inendawimo nen, ”Yogondak ya faget ninggi'nogo hilingisigin he,” iluk menenei ebetik, ”Nangge hokhorogo logoilebe,” iluk inendawimo ebetik, inonggwaregen laligik, agarek andi nen he, wene andi ero kanggil agaresik he, enggen iterek lek andi aro. 23Nen, awi ekhe kweang fanoma feik lakfesikhe andi ebe re, it afuni ekhe Allah ane andi inesanggo holharesik he, ebe furogo futfugunem, wene andi enggen iterego. Ero ekhe nen enggen 100 itik, ero ekhe nen enggen 60 itik, ero ekhe nen enggen 30 itik, iterek andi aro,” iluk yagaisasikhe.
”Awi weak mene inom, fano mene inom, misi'mo fulelhikhe,” iluk oba lirogo yagaisasikhe wene
24At Yesus nen wene a'nogo yagaisasikhesik he, wene ekhe oba lirogo mel yagaisasikhe: ”Allah nen awe a'ma fisikhere'ma andi ebe re, ap ekhe awi fano mene yatikhe andi hangge aro. 25A'nogo yatikhe meneat he, it afuni nogo ugu kwelek he, ap ekhe ap awi yatikhe mene andi emberek weak mene wagaikhesik he, gandum awi fano mene yatikhe a'nogo anggele'ma awi weak mene yakfilik lagaikhe. 26A'nogo yakfilik lagaikhemo, gandum awi a'nogo fulelhikhesik he, enggen itu kwelek, weak mene awi a'nogo fulelogo engga weinamat agaikhe. 27Weinam agaikhemo re, at ap eabu eisewerek a'nogo amingmingengge omanogo oba wagaukwasik he, mel yagatukwa: Noe. Hat heabumo omanogo awi fano mene yaten anggigi. I nogo a? Engga weak mene andoma ka nen wagasik fulelhe, iluk yagatukwama re, 28aren he, ”Lego. Andi, at ap nemberek weak mene a'nogo nen yatemo higi o,” iluk yagaisasikhemo re, it amingmingengge mene omanogo nen he, ”Halok he, henegeisogo misi'mo fembik wulakfisa logoin anggegen a?” iluk yagatukwama, 29aren he, ”Lego. Engga weak mene andi henetunem he, gandum fano mene andi inomat hene'lasu hak andi nen he, henesi lagubo. 30Gandum enggen oan palhi'le'ma re, inom a'nogo mangorogo lagakhi logouwago. Nen, enggen palugun higit aga halok he, an nen it ap enggen palharek mene yagaisikhi logolik: Engga weak mene andi endu nolfisouwogen he, andi tak henegeisogo hele homagaisogo fembigen, fano mene andi andogorogo figirek oba andoma feni o,” iluk yagaisagain, iluk amingmingengge mene omanogo yagaisasikhe,” iluk Yesus nen yagaisasikhe.
Kibi-kibi enggen oba lirogo yagaisasikhe wene
(Mrk. 4:30-32; Luk. 13:18-19)
31-32At Yesus nen a'nogo yagaisasikhesik he, hobuk wene ekhe oba lirogo mel yagaisasikhe: ”At Allah nen awe a'ma fisikherek andi ebe re, kibi-kibi enggen hangge o. Ap ekhe nen kibi-kibi eabumo feik lakfesikhe. Yi mene ti mene awi andi endebat meneat he, kibi-kibi awi andi nek he, mondok endebat hago. Mene re, kibi, wundat inom, ekhe mene inom, fulelheresik he, obakhe endebat hak lagaikherek. Meneat he, kibi-kibi awi andi nek he, mondok hokhoat lagaikheresik e hangge hilinglagunem he, sue tarogo nikherek mene we'luk he, kibi-kibi andi enggibene awi wusi wagarek andi hangge aro,” iluk yagaisasikhe.
Enggen roti fiterek mene oba lirogo yagaisasikhe wene
(Luk. 13:20-21)
33A'nogo yagaisasikhesik he, wene ekhe oba lirogo mel yagaisasikhe: ”Allah nen awe a'ma fisikherek andi ebe re, enggen sumburu roti mene elonggoma fugunem fiterek andi hangge aro. He ekhe nen gandum sagalek tepung wul hangge mene 40 liter yalelogo waluk, enggen roti fisuageluk elonggoma pelak fuluk misi'mo mulelogo hilingitikhemo re, ebe mondogat fitikhe andi hangge aro,” iluk yagaisasikhe.
”Nenahalok Yesus nen wene oba lirogo yagaisikhi lagaikhe nogo,” iluk isikhe wene
(Mrk. 4:33-34)
34Afuni hokhorogo omanogo yagaisikhi logolik he, wene ekhe fakhogo yagaisikhi lagaikhe lek. We, oba lithigik enek yagaisikhi lagaikhe. 35A'nogo hilingiti lagaikhe andi re, ap ekhe Allah ane yagaisikhi lagaikhe mene nen ikhi logolik:
”An wene yagaisikhi logolik he,
oba lirogo nek yagaisikhi logogin o.
Allah nen kweang yi elalhikhe huli nen
wene hinago mondok welagaikhe
mene fakhogo yagaisagain o,” iluk isikhe andi higit asuageluk, Yesus nen a'nogo yagaisikhi lagaikhe.#Mzm. 78:2
Awi weak mene oba lirogo yagaisasikhe a'nogo, ebe pilingisogo yagaisasikhe wene
36A'nogo yagaisasikhesik he, afuni hokhorogo omanogo andoma werek kwelek, at Yesus ebe oloba kwisikhemo re, at agoromi ane wanhi lagaukwa mene omanogo oba kwisukwasik he, mel yagatukwa: ”Awi weak mene yabumo fulelhikhe iluk oba lirogo yaganisegen a'nogo ebe pilingisogo yaganisan o,” iluk yagatukwa. 37A'nogo yagatukwama, at Yesus nen he: ”Ap ekhe nen awi fano mene yatikhe igi a'nogo ebe re, an abat ta'lasi wagagi a'nogo nebe yi aro. 38Nen, yabu andi ebe re, o kweangma yi awi ti awi mondogat andi aro. Nen, awi fano mene andi ebe re, afuni Allah awe a'ma welagaikharek mene inebe andi aro. Nen, awi weak mene andi ebe re, at ap obabut mondok weak mene againafuri andi aro. 39At ap yabu eisewerek emberek weak logolik, awi weak mene yatikhe andi ebe re, at Iblis andi aro. Enggen palugun higit andi ebe re, o wurep oba fageraro. Nen, it ap enggen palharek mene andi ebe re, it malaikat Allah pogoroba nen yonggo pelakfisa wagarek mene andi aro. 40Nen, it afuni nen engga weak mene andogorogo fuluk endu nolharek andi hak, o wurep oba a'nogoat hilingisigin o. 41An abat ta'lasi wagagi a'nogo nen nagoromi malaikat Allah pogoroba nen yonggo lakfisa wagarek mene yonggo lakfisa wagunem, iren he, Allah awe a'ma fisikhere'ma andoma nen, yi mene ti mene afuni nen weak hilingisuageluk hilinginafarek mene inom, yi afuni ti afuni weak hilingitarek mene inom, andogorogo fisaluk, 42mondogat endumo lakfisamo logolik, inaik himbirogo li ago le ago mondok logogun o. 43Nen, it afuni Allah endawimo anggikherek mene higithogo hilingitarek mene andi nek he, inebe o mo selekhogo yaterek hak, ineisena Allah awe a'ma logogun o, iluk hinesanggo holugun halok he, fanorogo holini o,” iluk yagaisasikhe.
”Ap ekhe nen onggo hokho mene hinago were'ma heratikhe,” iluk oba lirogo yagaisasikhe wene
44A'nogo yagaisasikhesik he, ekhe mel yagaisasikhe: ”At Allah nen awe a'ma fisikherek andi ebe re, mel hangge. Fano mene onggo hokho mene yabumo kweangma salek hinago were'ma re, ap ekhe nen herakfuluk he, endawimo agaiyek anggasikhesik he, ambotkwe kweang salogo hinakfuluk aiba lagaikhesik, agarek yi mene ti mene it ekhe inoba onggo palogo waluk, fano mene andi helageluk ambotkwe wagaikhesik yabu andi onggo fesikhe andi hangge aro,” iluk yagaisasikhe.
”Ap ekhe nen salenggen hangge fano mene heratikhe,” iluk oba lirogo yagaisasikhe wene
45A'nogo yagaisasikhesik he, ekhe mel yagaisasikhe: ”At Allah nen awe a'ma fisikherek andi ebe re, mel hangge. Ap ekhe yi mene ti mene onggo palherek mene nen salenggen hangge fano mene herarik nikhi logolik he, 46ebe onggo hokho mene ekhe hera'lugen, aiba laluk agarek yi mene ti mene it ekhe inoba onggo palogo waluk he, hobuk salenggen hangge fano mene andi wanhikhe andi hanggearo,” iluk yagaisasikhe.
Su ikan wanharek mene oba lirogo yagaisasikhe wene
47A'nogo yagaisasikhesik he, ekhe mel yagaisasikhe: ”At Allah nen awe a'ma fisikherek andi ebe re, mel hangge. Ikan wanuogeluk su ikan su i laut hokho andi yenggele'ma elonggoma pelafunem yi ikan ti ikan yinik-hunik mondok elonggoma kwalaga halok, 48su ikan su andi elonggoma peterogo ambem pete ugunem, i aik oba wulibi we'luk hurek logolik he, ikan fano mene halok tegelogo waruk elema kwalikhi logolik he, weak mene halok hebisagarek andi hak, 49o wurep oba a'nogo hilinglasigin o. It malaikat Allah pogoroba nen yonggo pelakfisa wagarek mene omanogo wesimbik he, afuni inobabut weak mene omanogo it afuni Allah endawimo anggikherek mene higithogo nek hilingitarek mene inom misikwe were'ma inanggele'ma nen kigilogo wulakfisaluk, 50endu ai'mo lakfisamo inaik himbirogo li ago le ago mondok logogun o,” iluk yagaisasikhe.
”Ap kain mene agarek attak mene inom, ket mene inom, wulabi wagarek,” iluk yagaisasikhe wene
51A'nogo yagaisasikhesik he, ekhe mel yagaisasikhe: ”Wene andi arat futfegeba? Lega,” iluk yagaisasikhemo re, iren he, ”I o. Futfogoaro,” iluk yagatukwa. 52A'nogo yagatukwama, at Yesus nen he, ”Halok he, it ap Allah ane lisu palek inelu mene omanogo nen, Allah nen awe a'ma fisikherek a'nogo wene yagaisugu halok he, andi mel hangge ugun. Ap kain mene agarek endawinggen hundik mene fakhikherek oba nen, ket mene wulabi wagik, attak wulabi wagik, hobugalep wulabi wagarek hagaro,” iluk yagaisasikhe.
Afuni o Nasaret mene nen, Yesus ninabit iluk inendawimo anggasukwa wene
(Mrk. 6:1-6; Luk. 4:16-30)
53At Yesus nen wene oba lirogo arat yagaisasikhesik he o andoma herakfisaluk, 54at onggwarek aiba eroba lagaikhesik, o afuni Yahudi mene samban agarek oba kwisikhesik wene yagaisugunem it afuni inesanggo holhukwa mene nen he, mel isukwa: ”Egi! Nailo e. Ap yi endawimo mondok kagalek andi, wene ka nen yanggulhesik waga. Nen, yi wene ti wene elalinat hilingirik nikho andi, koma nen yanggulhesik hilingirik nikho. 55Ap yi re, ap o wuterek mene a'nogo amlogo lek? Nen, agaisa enu Maria a'nogo lek? Nen, agoromi ombo'ne mene re, Yakobus inom, Yusuf inom, Simon inom, Yudas inom, omanogo lek? 56Nen, at erugwi re, nit ninom mondogat welago yoma lek? Wene andi ka nen waluk wagasik ili'logo,” iluk inendawimo inabiret fesukwa. 57Inabiret fesukwama re, at Yesus nen he, mel yagaisasikhe: ”It ap Allah ane yagaisagarek mene andi re, o yi awi ti awi lagunem, afuni ekhe nen mondok agaukhogo fogerinafarek meneat he, inonggwarek inaiba eroma lagunem inogogwi inagoromi inom misi'mo welagaikharek mene nen he, agaukhogo yagaisagarek lego,” iluk yagaisasikhe.#Yoh. 4:44 58A'nogo yagaisasikhe andi, it afuni o Nasaret mene andoma nen, inendawinggen Yesus oba himbiret figi'lek, inendawimo inabiret fuluk welagaukwa andi nen he, at o andoma logolik hilingisu lek mene elalinat hokhorogo hilingiti'lek, we, endebat enek hilingitikhe andi.
Currently Selected:
MATIUS 13: inohap
Highlight
Share
Copy
Want to have your highlights saved across all your devices? Sign up or sign in