MATIUS 14
14
Yohanes ima pelaginafi lagaikhe mene a'nogo ebe watukwa wene
(Mrk. 6:14-29; Luk. 9:7-9)
1O andem higit he, at Herodes o Galilea tonggwe kain enupogot welagaikhe mene andi, Yesus nen hilingiti lagaikhe mene abok holhikhesik he, 2at agoromi mel yagaisasikhe: ”Yohanes ima pelaginafi lagaikhe mene ebe watimo wa'laga a'nogo hobuk eluk agasik andi nen he, hilingisu lek mene elalinat hilingirik nikho andi,” iluk ebe Yesus hilingiti lagaikhe meneat isikhe andi. 3-5At Herodes nen Yohanes attagat watikhe andi re, wene yi'nogo. At kain Herodes nen he, agot Filipus agwe Herodias andi telogo wanhikhe andi nen, at Yohanes nen he, Herodes mel yagatikhe: ”He Herodias wanu lek mene wanhen andi, waganek logogin elo'lego,” iluk yagatikhe andi nen he, Yohanes ebe enggi hele warogo re, o inenggi hele warogo fisagarek oba kwelakfesikhesik wasigeluk isikhe meneat he, it afuni nen he, ”Yohanes andi Allah ane yagaisikherek mene,” iluk ikhi lagaukwama re, wasu ailo agaikhe.#Luk. 3:19-20 #Im. 18:16, 20:21
6Meneat he, o at Herodes andi ebe ta'lagaikheba higit asi wagaikhemo re, pesta hilingiti logolik, at he Herodias eak silerik mene andi, afuni hokhorogo inanggele'ma nen wuni ouwak founalhi logolik hilik-holokhogo watunem he, at kain Herodes andi endawimo agaiyek agaikhe. 7Endawimo agaiyek agaikhesik Allah enu hombuk palogo helenggerek a'nogo yagati logolik he, ”Haren nena mene kino yaganeten halok, wokhesigin aro. Halok he, ekhe kino yaganom o,” iluk yagatikhe. 8A'nogo yagatikhemo, helenggerek andi agaisa nen arat komoratikhemo andi nen he, mel yagatikhe: ”Neisena, at Yohanes ima pelaginaferek mene a'nogo ungguloak palogo re, lemesak oba earogo wo'ne'nogo,” iluk yagatikhe. 9A'nogo yagatikhemo, at kain Herodes a'nogo endawimo weak agaikhe meneat he, ”An nen Allah enu hombuk palogo abok yagatunem afuni hokhorogo pesta isago nouwogeluk andogosi wagaikha mene yoma inesanggo arat holha oma re,” iluk, agoromi nen helenggerek a'nogo nen isikhe higithogoat hilingisogo wogosi loageluk yagaisasikhe. 10A'nogo yagaisasikhemo lagaukwasik he, Yohanes a'nogo afuni inenggi hele warogo fisagarek oba were'ma kwisukwasik he, alonggop tekhogo watukwa. 11Alonggop tekhogo warogo, ungguloak palek lemesak oba earogo hele silerik a'nogo wogosi wagaukwama re, aren he, agaisa wogosi lagaikhe. 12A'nogo hilingitukwama re, at Yohanes agoromi wagaukwasik he, ebe warek a'nogo kweangma salfuluk he, abok Yesus yagasi lagaukwa. A'nogo hilingitukwasik logolik, at Herodes nen Yesus abok holhikhesik, ”Yohanes eluk agasik nikho higi,” iluk isikhe andi.
Yesus nen afuni inebe 5.000 mene sumburu sik-pikhogo wogisasikhe wene
(Mrk. 6:30-44; Luk. 9:10-17; Yoh. 6:1-14)
13Afuni ekhe nen he, ”Herodes nen Yohanes wate,” iluk isukwama Yesus esanggo holhikhesik, o andoma hebisaluk he, e so warogo alegat tegelogo o afuni inelokhe le'ma andoma lagaikhemo, afuni inebe mondok hokhorogo inesanggo holhukwasik he, inawi sili lombogen i aik esanggokwe nen ombo'ne lagaukwa. 14It attagat lagaukwasik were'ma, at Yesus e so warogo laga lagaikhesik inoba wulifikhesik he, eilenggen yerisaluk endawirafikhesik it ekhe ou weak mene nek higirinafikhe.
15A'nogo higirinafu kwelek, o arat hubagaikhemo re, at ane wanhi lagaukwa mene omanogo Yesus oba wagaukwasik mel yagatukwa: ”Nit o yoma afuni inebe mondogat le'ma, o arat liok ikhe yoma re, afuni hokhorogo yoma inamburu onggo paloagen he, o yoma esanggokwe lakfisan o,” iluk yagatukwama, 16at Yesus nen he, ”It andi logoin lego. Hirenat sumburu melagisani o,” iluk yagaisasikhe. 17A'nogo yagaisasikhemo, iren he, ”Nit he, sumburu roti mene 5 nen. Nen, ikan he, pire. We, andem enek fisogo welago o,” iluk yagatukwa. 18A'nogo yagatukwama, at Yesus nen he, ”Andemat wo'nesi we'ni o,” iluk yagaisasikhe. 19Yagaisasikhemo re, wogosi wagaukwama, at Yesus nen afuni hokhorogo omanogo mel yagaisasikhe: Pumbuk ebene andoma hu'larik lani o, iluk yagaisasikhemo hu'larik lagaukwama re, sumburu roti mene 5 nen aremnogo inom, ikan pire aremnogo inom, enggim wanhikhesik he, eilenggen pogoroba liakhasikhesik Allah hai warogo kurogo re, agoromi ane wanhi lagaukwa mene omanogo nen sumburisoageluk he, wogisasikhemo sumburisasukwa. 20Sumburisasukwama, it inebe mondogat inalabut ninghogoat nasukwasik tindelogo re, mul ugu 12 nen ambem peterogo kwalogo fesukwa. 21Afuni inebe mondogat nasukwa mene andi, yenggerugwi inom, hemi inom, inenggi wenaginafi'lek. We, ap inaluendek mene nek he, inebe 5.000 nen wenaginafukwa.
Yesus eisok i agum ebene filik wagaikhe wene
(Mrk. 6:45-52; Yoh. 6:16-21)
22A'nogo arat nasukwama nen he, at Yesus nen at agoromi ane wanhi lagaukwa mene omanogo mel yagaisasikhe: ”An afuni hokhorogoat yoma lakfisagen he, hit tak e so elema kwimbik he, i aik elikwe wulifi logoni o,” iluk ane ninghogo yagaisasikhe. 23A'nogo yagaisasikhemo, wulibi wagu kwelek, at Yesus nen afuni hokhorogo omanogo arat lakfisaluk he, at Yesus alegenek punuba samban igeluk lagasikhesik ugu were'ma o hubagaikhemo re, alegenek andoma welagaikhe. 24Werek kwelek, agoromi omanogo e so warogo yatmaat i enggen tulem asi wagaukwasi'mo nen, aninirogo inelokhe kwe nen funha wagaikhemo, i esinggen foinalogo hokhorogo lagakhi logolik, e so a'nogo abel enden-fenden hikhi lagaikhe. 25A'nogo hilingitunem, o wei igeluk hil mogolhu kwelek, at Yesus eisok i agum ebene filik inoba wagaikhe. 26A'nogo eisok i agum ebene filik wagunem, it agoromi ane wanhi lagaukwa mene omanogo ineilenggen yethasukwasik he, ina'manggen hokhorogo lagaukwasik inailo nen he, ”Eiga! Munggwat waga ari a,” iluk, inane ngai-wai isukwa.
27A'nogo isukwama re, at Yesus nen he, ”Nagoromi, hinailo agubo. An nebeat waga lagi.” iluk yagaisasikhemo re, 28at Petrus nen he, ”Noe. Hat hebeat halok he, an hoba i agum ebene wesigen he, eme o, iluk yaganom,” iluk yagatikhemo re, 29at Yesus nen he, ”Eme o,” iluk yagatikhemo, at Petrus a'nogo e so elema nen wulifikhesik he, i agum ebene nen he Yesus oba lagaikhe. 30Lagunem he, sogoi funha wagaikhemo, eilenggen hasikhesik i elema ubukhogo pigin oma nailo e iluk, ane ngai ikhi logolik, ”Eige! Noe! Telnabime o,” ugunem aremnogoat he,
31Yesus nen enggi fagaisogo menfikhi logolik he, ”Hat hendawinggen eberogoat iluk noba himbiret figi'lek, hendawinggen pire welagen andi nenahalok,” iluk yagatikhesik he,
32It emberek e so elema kwisukwama re, sogoi a'nogo palagaikhe. 33Palagaikhemo re, it e so elema welagaukwa mene omanogo nen Yesus fogerati logolik he, ”Hat eberogoat Allah amlogo heogo o,” iluk yagatukwa.
Yesus nen afuni o Genesaret mene ou higirinafikhe wene
(Mrk. 6:53-56)
34A'nogo hilingitukwasik, e so warogo wulibi waga lagaukwasik he, o Genesaret andem higit asi wagaukwa. 35Wagunem he, it afuni andoma mene nen Yesus ebe arat futfesukwasik he, at abok o sili lombok yagaisilik lagaukwa. Yagaisilik lagaukwama re, afuni ou warek mene mondogat woginarek Yesus oba wagaukwama re, 36iren he, ”Yesus, hasu we wurep enek ninenggi fakfou a,” iluk inane inelagaik ane yagatukwasik, it at asu inenggi fakfesukwa mene nek inoba fano agaukwa.
Currently Selected:
MATIUS 14: inohap
Highlight
Share
Copy
Want to have your highlights saved across all your devices? Sign up or sign in