MATIUS 12
12
Afuni Yahudi mene Allah faget weat werek kwelek, Yesus agoromi inom gandum enggen palogo nilik lagaukwa wene
(Mrk. 2:23-28; Luk. 6:1-5)
1O andem sambul he, it afuni Yahudi mene inenggi sabit oba Allah faget weat werek kwelek, at Yesus agoromi ane wanhi lagaukwa mene omanogo inom gandum yagokwe laga logolik, agoromi sumburu nele nen he, gandum enggen palogo nilik-nilik lagaukwa.#Ul. 23:25 2Palogo nilik lagunem he, it ap Farisi mene nen ineilenggen isasukwasik he, Yesus mel yagatukwa: ”Yethan! Ninenggi sabit oba Allah faget weat logolik he, a'nogo hilingisugun lek, iluk wene palek werek meneat he, hat hagoromi gandum enggen palogo nilik wagaikha yi ri,” iluk yagatukwama re, 3at Yesus nen he, ”At Daud agoromi ombo'ne lagaukwa mene inom sumburu inaik fesikhemo, aren hilingitikhe mene Allah aneba lisu palek a'nogo hiren enu salhi'lek welagep nogo? Enu salhi lagebaro.#1Sam. 21:1-6 4At Daud Allah awi wuri'mo kwisikhesik he, sumburu roti Allah faget fisagarek mene it ap Allah eisewerek mene inalegat enek ninggi logogun. Meneat he, at Daud ebe inom, it ap at ombo'ne lagaukwa mene inom, inom nogoin lek mene wanhukwasik nasukwa iluk Allah ane lisu palek werek a'nogo hit hikhi lagep lek nogo?#Im. 24:9 5Nen, ninenggi sabit oba Allah faget weat logolik yi mene ti mene hilingiti'lek weat logogun meneat he, it ap Allah eisewerek mene nek, Allah awi wuri'mo kuluk, it hilingisu mene hilingitunem wene inoba fagarek lek, iluk Allah ane lisu palek werek a'nogo enu salhi'lek welagep nogo?#Bil. 28:9-10 6Halok he, an nen wene yi yagahisak. Allah awi wurik andi elo'lek hak. Meneat he, an yoma welagi yi nek he, mondok esin hangge aro. 7Allah ane lisu palek a'nogoba, wene mel iluk werek: An Allah nendawimo nen he, afuni nen inanggo wa'netarek andi nabiro. We, afuni ekhe inebe inendawirinafi logogun andiat namolo o, iluk isikhe mene andi, hiren futfeilepma re, it yoma weak hilingiti'lek meneat wene inoba feilep lego.#Hos. 6:6; Mat. 9:13 8Ninenggi sabit oba Allah faget weat welagorek andi, eisewerek he, an abat ta'lasi wagagi nebe yi aro,” iluk yagaisasikhe.
Allah faget weat werek kwelek, Yesus nen ap ekhe enggi hambelek mene higitikhe wene
(Mrk. 3:1-6; Luk. 6:6-11)
9-10At Yesus o andoma nen lagaikhesik he, o it afuni Yahudi mene samban agarek oba kwisikhesik, ap ekhe enggi fenakwe hambelek mene were'ma eilenggen hasikhemo, it ap fena nen wene Yesus oba fuogeluk anema wanhi logolik he, mel yagatukwa: ”Allah faget weat logolik ou higirinabumo re, elok nogo?” iluk yagatukwama re, 11at Yesus nen he, ”Hit Allah faget weat logolik he, ap hit mene ekhe anggo domba misigat enek were'ma, ebe kiling elema pumo re, lisogo liakfei wesugun lek nogo? Liakfei wesugun aro.#Luk. 14:5 12Mene re, wam domba andi mene elo'lek hago. Afuni inebe andi onggo hokho aro. Halok he, Allah faget weat logolik, fano higirinabumo, elogaro,” iluk yagaisasikhe. 13A'nogo yagaisasikhesik he, ap a'nogo mel yagatikhe: ”Henggi pisathan,” iluk yagatikhemo, enggi a'nogo pisat hugunem he, enggi fenakwe emberek higirat fano mondok agaikhe. 14A'nogo hilingitikhemo re, it ap Farisi mene omanogo olulu wulifukwasik he, Yesus wasuogeluk weim abok isukwa.
Allah nen, ”Yesus an nen ayonggo fuluk lakfei wagagi,” iluk isikhe wene
15Weim abok a'nogo ugunem, at Yesus nen inobabut enegat futfisasikhesik he, o andoma nen lagunem afuni inebe hokhorogo, at ombo'ne lagaukwa. Lagaukwama re, ou weak mene mondogat higirinafikhesik he, 16”An nen higithinafi yi re, nabok afuni ekhe mondok yagaisagubo,” iluk komorogo yagaisasikhe. 17A'nogo hilingitikhe andi re, at Yesaya Allah ane yagaisikhi lagaikhe mene a'nogo nen isikhe higithogoat hilinglasuageluk hilingitikhe andi. 18At Allah nen he,
”Yethani! At andi re,
An namingmingengge logouwageluk
nonggwaregen wenagaisogo menfigi o.
An nen wenagaisogo figirik
nendawinggen hundik welagi mene re
at andi aro.
An Nareagun at wogosumo
oba louk umo re, an nen afuni
wene inoba figik, kotik,
higithogoat hilingisigin andi faget,
aren it afuni endakwe mene
wene fakhogo yagaisikhi logogin o.#Yes. 42:1-4
19Aren afuni inom wene palhik,
ane puk weak wenagisigik,
afuni kwe hokho yagokwe lagunem
ane holuageluk hokhorogo yagaisigik,
ikhi logogin lego.
20O wurep oba aren wene afuni
inoba figik, kotik, higithogoat
hilingiti logolik, at omame asigin
oba andi oan werek kwelek,
findayo oak kwanirek mene
aren sombologo lakfisigik,
nen, esage amulok lagagi'lek
hule nek lagaikhe halok he,
aren nagulisigik igin legaro.
21Nen, it afuni endakwe mene
nen he, at enu iluk,
Aren fanotninabigin o, iluk ugun,” iluk isikhe mene werek andi higithogoat hilinglasuageluk hilingitikhe andi.
”At Yesus andi, Beelzebul oba loukse'ma hilingirik nikho,” iluk isukwa wene
(Mrk. 3:20-30; Luk. 11:14-23)
22A'nogo hilingitikhesik oba nen, hobuk ap ekhe munggwarengge obabut weak mene endawimo kwisikhemo nen eilenggen mum agik, ane legagik, isikhe mene Yesus oba waluk wagaukwama re, aren fanorogo higitikhemo eilenggen mum mene fano agik, ane lek mene huak igik, isikhe. 23A'nogo hilingitikhemo re, it afuni era'lu andogorek welagaukwa mene omanogo nen fogerati logolik, ”Eigi! Daud amlogo wesigin iluk ikhi lagaukwa a'nogo ebe yi he a,” isukwa.
24A'nogo ugunem, it ap Farisi mene omanogo inesanggo holhukwasik he, mel isukwa: ”Ap yi munggwarengge obabut weak mene inoe kain enu Beelzebul a'nogoat at oba louksek were'ma andi nen he, munggwarengge at agoromi hangge inobabut weak mene afuni inendawimo kuluk were'ma henegeisogo wulakfisili'logo,” iluk ugunem he,#Mat. 9:34, 10:25 25at Yesus nen it inendawimo anggasukwa mene enegat futfisasikhesik he, mel yagaisasikhe: ”Ap kaindek inenupogot inagoromi inawe a'ma ferinarek welagaikharekwe lombok, it-it inom hulit fakhaluk, inom weak logogun halok he, maben asugun o. Nen, afuni inawi sili lombok misigat mene inom, ap inebe lombok inagainafuri inom, hulit fakhaluk inom weak logogun halok, weak asugun aro. 26Andi hak, at Iblis onggwarek agoromi munggwarengge inobabut weak mene inom hulit fakhaluk, fena nen fena mugusogo wulakfiselepma, at agoromi ferinarek welagarek mene ninggi'nogo omame logoilep? Elo'lego. 27An nen Beelzebul andi omameba, at agoromi inobabut weak mene afuni inendawimo kuluk were'ma henegeisogo wulakfisikhi lagi halok he, hit hinagoromi nen munggwarengge inobabut weak mene it ekhe inendawimo nen henegeisogo wulakfisili'lagwi andi, sa omameba henegeisogo wulakfisili'lagwi anggegep? Hinagoromi nen a'nogo hilingiri'lagwi andiba, iren he,
Wene at Yesus faget egep andi re, weak egebo, iluk wene hinoba fou hak hilingiri'lagwi o. 28Meneat he, an nen Neisena Areagun omameba munggwarengge inobabut weak mene andi afuni inendawimo kuluk were'ma henegeisogo wulakfisikhi lagi halok he, Allah nen awe a'ma inobagagin a'nogo arat hinoba asi waga o. 29Ap ekhe omame hokho mene enggi hele warogo figi'lek he, agarek yi mene ti mene inenggi abisak elok wani kugun anggegep? Elo'lego. We, enggi hele warogo fuluk enek he, elok wani kugun o.”
30”Nen, sa nen ebe an werekwe agi'lek halok he, at andi an nemberek weim palek mene aro. Nen, sa nen an nemberek afuni andogerinafi lago lek mene halok he, at andi nenat pugulogo wulakfisili'logo o,” iluk yagaisasikhe.#Mrk. 9:40
31A'nogo yagaisasikhesik wene ekhe mel yagaisasikhe: ”Wene a'nogo egep andi nen, an wene yi yagahisak. Afuni nen yi weak ti weak hilingiri'lagwi mene inom, inendawimo nen it ekhe sebelfisaluk inaneba nen inabok pali'lagwi mene inom, at Allah nen elok sebelogo legetfisagain meneat he, Allah Areagun andi nek inendawimo nen sebelfuluk abok palhu halok he, elok sebelogo legetfisagain mondok lego. 32Sa nen an abat ta'lasi wagagi a'nogo endawimo sebelnobagaluk nabok ekhe weak palhu halok he, weak hilingisigin mene andi Allah nen elok sebelogo legetfisagain meneat he, Allah Areagun andi endawimo sebelfuluk abok weak palhu halok he, weak hilingisigin mene andi, Allah nen yogondak inom, o wurep oba arat hilinglasigin oba nen logogun oba inom, sebelogo legetfisagain mondok lego,” iluk yagaisasikhe.#Luk. 12:10
”E enggen iterek oba nen ero enegat futfagarek wene,” iluk yagaisasikhe wene
(Luk. 6:43-45)
33A'nogo yagaisasikhesik ekhe mel yagaisasikhe: ”E ero fano mene nen enggen fano meneat iterek. Nen, ero weak mene andi, enggen weak meneat iterek. A'nogo iterek andiba, e enggen yi fano mene enggen igik, yi weak mene enggen igik, enegat futfikhi lagebo.#Mat. 7:20; Luk. 6:44 34Hit hinebe kisu nen tagongge mene yoma sani! Afuni nen yi wene ti wene inambeba nen agarek andi re, inendawimo peterek logolik kagalogo lagai wagunem agarek andi nen he, hit he, hinobabut weagat logolik wene fano mene ikhi logogun nogo? Elo'lego.#Mat. 3:7, 15:18, 23:33; Luk. 3:7, 6:45 35Afuni inobabut fano mene re, inendawimo fano mene peterek logolik, kagalogo lagai wagunem he, wene fano meneat wulabi wagaikharego. Mene re, afuni inobabut weak mene, inendawimo weak mene peterek logolik, kagalogo lagai wagunem he, wene weak meneat wulabi wagaikharego. 36Halok he, an wene yagahisagain mene yi eberek logoino. Hobuk Allah nen inanema waganogo wene inoba figik, kotik, igin andi sambul he, afuni inane we tulemat agarek mene andi faget wene inoba fagain aro. 37Hit hinonggwarek hinane ikhi lagep mene higithogoat Allah nen wene hinoba figik, kotik, igin aro,” iluk yagaisasikhe.
”Niren futhobagauwogen haren elalin mene ekhe hilingisin o,” iluk yagatukwa wene
(Mrk. 8:11-12; Luk. 11:29-32)
38A'nogo isikhemo re, it ap Allah ane lisu palek inelu mene ekhe inom, it ap Farisi mene ekhe inom, inomen Yesus mel yagatukwa: ”Noe. Niren futhobagauwogen haren elalin mene ekhe hilingitunem nineilenggen hogoin ninamolo nen yagaheto,” iluk yagatukwama re,#Mat. 16:1; Mrk. 8:11; Luk. 11:16 39at Yesus nen he, ”Hit afuni o yogondak welagep mene yoma re, hinobabut weak enek hilingirik nikhi logolik Allah hinom lombokhogo welagep lek mene yoma ri! A'nogo logolik, hiren he, ”Niren futhobagauwogen he, haren elalin mene ekhe hilingisin he,” iluk yaganeti lagep meneat he, an nen elalin hunogoat mene ekhe hilingisigin lego. We, at Yunus Allah ane yagaisikhi lagaikhe mene nen afuni ekhe futfouwageluk elalinat hilingitikhe andi hak enek an nen hobuk ekhe hilingitunem hineilenggen neogoin o.#Mat. 16:4; Mrk. 8:12 40At Yunus andi ikan alabutmo werek kwelek, o hubagik, wei igik, ugu kwelek enggi henagan welagaikhe andi hak he, an abat ta'lasi wagagi a'nogo re, kweang a'ma o hubagik, wei igik, ugu kwelek enek, nenggi henaganat logogin o.#Yun. 1:17 41At Yunus andi nen it afuni o Niniwe mene andoma Allah ane yagaisikhi lagaikhemo re, inobabut hebelagaukwasik, yi weak ti weak hilingiti lagaukwa mene herakfisasukwa o. Mene re, at Yunus andi enu endep sebelek hak. We, an yoma welagi yi nek he, esinat andi nen he, o wurep oba Allah nen afuni wene inoba figik, kotik, igin andi sambul he, afuni o Niniwe mene andoma inebe menlasimbik, hit afuni o yogondak welagep mene yi mel yagahisogoin: Hit weak, hinenggali, iluk yagahisogoin o.#Yun. 3:5 42Andi hak, at he kain mene awi o i ambutmo higit o pogot erokwe yatma andoma nen at ap Salomo andi endawimo mondok kagalek logolik hilingiti lagaikhe wene andi esanggo holigeluk wagaikhe. Mene re, at Salomo andi elo'lek hak. Meneat he, an yoma welagi yi nek he, mondok esin andi nen he, hobuk o wurep oba Allah nen afuni wene inoba figik, kotik, igin andi sambul, at he kain andi ebe menlasimbik he, hit o yogondak welagep mene yi mel yagahisagain: ”Hit weak, hinenggali, iluk yagahisagain o,” iluk yagaisasikhe.#1Raj. 10:1-10; 2Taw. 9:1-12
”Munggwarengge obabut weak mene ambotkwe wagarek,” iluk yagaisasikhe wene
(Luk. 11:24-26)
43A'nogo yagaisasikhesik ekhe mel yagaisasikhe: ”Munggwarengge obabut weak mene andi afuni inendawimo nen wuliferesik he, an naiba komakwe logoigen lak he, iluk set walogo logogin oba obuluk herarik, lei puparekwe i mondok le'ma andoma nikherek-nikherek he, herakhikherek mondok lek. 44Mondok legen, aren he, mel ikherek: An naiba attak welagiba a'nogo nambotkwe lambik kwigin o, iluk wagarek. Wagaresik kwikherek he, o a'nogo inebe lek, foluk meneat he, lelem wulagaisogo tegelek were'ma ha wagaresik he, 45hobuk ambotkwe wulibi lagaresik, munggwarengge ekhe inobabut at obabut hangge lek. Athe, inobabut mondok weak mene inebe 7 nen, inayonggo lagaresik, woginarek o a'nogo kwi wagaresik, ap andi endawimo kwagaresik welagaikharego. A'nogo kuluk were'ma re, ap andi attak he, obabut fano hak welagaikhe meneat he, hobuk obabut mondok weagat hilinglagarek. Andi hak he, hit afuni o yogondak ya hinobabut mondok weak hilingiti lagep mene yi a'nogoat hilingisugun o,” iluk yagaisasikhe.
Yesus agaisa inom, agoromi inom, at ebe herarik wagaukwa wene
(Mrk. 3:31-35; Luk. 8:19-21)
46At Yesus afuni hokhorogo inom logolik wene yagaisugunem he, at agaisa inom, agoromi inom, wene yagasuogeluk oba wagaukwasik he, olulu welagaukwa. 47Were'ma ap ekhe nen he, ”Yesus, yethan! Hat hagaisa inom, hagoromi inom, wene yagahesuogeluk herakhabik wagaikhasik olulu werego,” iluk yagatikhemo re, 48at Yesus nen he, ”An nagaisa nagoromi andi sani nogo,” iluk yagatikhesik, 49it ap agoromi ane wanhi lagaukwa mene omanogo enggi tum inoba fesikhesik he, ”An nagaisa nagoromi, it yi aro. 50Sa nen an Neisena pogoroba mene endawimo anggikherek mene higithogo hilingiterek halok, at andi an nagot, nerei, nagaisa werego,” iluk yagatikhe.
Currently Selected:
MATIUS 12: inohap
Highlight
Share
Copy
Want to have your highlights saved across all your devices? Sign up or sign in