MATIUS 11
11
1It ap Yesus ane wanhi lagaukwa mene inebe 12 nen omanogo wene komorogo fisaluk he, afuni inawi sili lombok wene fano wene a'nogo yagaisigik, komorinafik, igeluk he, o andoma nenat lagaikhe.
Yesus nen Yohanes ima pelaginafi lagaikhe mene faget yagaisasikhe wene
(Luk. 7:18-35)
2At Yohanes ima pelaginafi lagaikhe mene a'nogo enggi hele warek were'ma, afuni nen he, ”Kristus yi'nogo hilingiri'logo,” iluk ugunem esanggo holhikhesik he, at agoromi ane wanhi lagaukwa mene Yesus oba heinok wanuageluk lakfisa wagaikhe. 3Lakfisa wagaikhemo wagaukwasik he, ”Ap ekhe wesigin iluk ikhi lagaukwa a'nogo re, harara? I a, athe, hunogoat mene ekhe yerogo logogun a?” iluk yagatukwama re, 4at Yesus nen he, mel yagaisasikhe: ”Hit he, an yi'nogo ti'nogo hilingitunem hineilenggen niigik, wene ugunem hinesanggo holhik, egep mene andi, at Yohanes furogo yagasi lano o. 5Ineilenggen mum mene fenggenogo fano agik, inawe wut warek mene kwe lagik, inoba henanggo hangge inailo mene were'ma higirinafunem fano agik, inesanggo tagum mene inesanggo huakhogo holhik, warek mene inelugerinafik, it ekhe inagarek lek mene fano wene yagaisigik, ugunem hineilenggen neegep a'nogo furogo yagasi lan o.#Yes. 35:5-6, 61:1 6Nen, hiren an hilingiti lagi mene andoma hinabiret nobakhi lagep lek halok he, hinendawimo hinagaiyek hikhi logogun o. iluk yagasi lani o,” iluk lakfisasikhe.
7A'nogo isikhemo, it Yohanes agoromi omanogo lagaukwama re, at Yesus nen afuni hokhorogo omanogo Yohanes abok mel yagaisasikhe: ”Hit he, o leimo afuni le'ma andoma nena mene hineilenggen houwogeluk laga lagep nogo? Findayonggen sogoien funhogo lagik-wagik ugunem houwogeluk laga lageba? 8I a, athe, nena mene houwogeluk laga lagepsik. Ap ekhe asu fano mondok mene laberek were'ma houwogeluk laga lagep yet hani! Inasu fano mene laberagarek andi, kaindek inenu werek mene inaiba logolik halogat laberagarek. 9Halok he, nena mene houwogeluk lagepsik. I a, athe, ap Allah ane yagaisikherek mene ekhe were'ma hineilenggen houwogeluk laga lagepsiga? Eberogoat, andi aro. An nen yagahisak. It ap Allah ane yagaisikhi lagaukwa mene ekhe welagaukwa meneat he, it andi elo'lek hak. At Yohanes andi nek he, enu werek esinaro. 10At Allah nen mel isikhe:
Namlogo e. Hat hobuk hanggwe
ebekwe lagainkwe yakhafi
logouwageluk,
ap ekhe ayonggo fembik attak
lakfagain o.#Mal. 3:1
11Halok he, an nane eberogoat yagahisak. Afuni mondogat inagaisalagen taginabik wagaukwa meneat he, inenu we endep hak werego. Meneat he, at Yohanes ima pelaginaferek mene andi nek he, enu lego werego. A'nogo meneat he, at Allah awe a'ma fisikhere'ma andoma, at Yohanes enu endep hak meneat he, it afuni ekhe inenu lek mene andi re inenu legoat werego. 12At Yohanes ima pelaginafi laga andi huli nen he, yogondak ya huli, it inobabut weak asialoksek mene nen, nineisena Allah nen awe a'ma fisikherek a'nogo inabiren mabenet fisuogeluk inomamerogo walhili'lagwi.#Luk. 16:16 13At Yohanes ebe oan wagi'lek werek kwelek, wene Allah nen komorinafikhe wene a'nogoba inom, Allah ane yagaisikhi lagaukwa mene a'nogoba inom, hobuk hilinglasigin andi mene fakhogo yagaisikhi lagaukwa a'nogo 14hinendawinggenma furogo wanhep halok he, ap Elia ebe wesigin iluk abok isukwa a'nogo re, ebe Yohanes wagaikhe andi aro.#Mal. 4:5; Mat. 17:10-13; Mrk. 9:11-13 15Hinesanggo holugun halok he, fanorogo holini o.
16Afuni o yogondak werek yaba re, nena meneba lirogo yagahisak. Yi meneba lirogo ik. It andi re, yenggerugwi pasar oba hurek logolik, inagaila'lak inom wene lakfigik, wakfigik, ikhi logolik:
17Nit endawi wathinobagauwogeluk elugun wulafo meneat he, hiren hunikhe lagi'lek. Nen, le asuogeluk, le wuni elugun wulafo meneat he, hiren le ebe agi'lek, iluk agarek a'nogo hagat hilingiri'lagwi o. 18At Yohanes andi sumburu inom, anggur enggen amusu inom ninggi'lek herakfisaluk welaga andi faget, it afuni nen he,
At andi munggwarengge obabut weak mene endawimo kwikhesik werego, iluk ili'lagwi. 19Mene re, an abat ta'lasi wagagi a'nogo re, sumburu inom, anggur enggen amusu inom nilik wagagimo re, afuni nen nabok ikhi logolik, sumburu inom, anggur enggen amusu inom, ambe lagalek weak nili'logo yi, ap pemerintah faget uang kino iluk wanharek mene inom, weak hilingirik nikharek mene inom, inom hunet fakhaluk nikho yi hani, iluk ili'lagwi andi re, Allah endawinggen kagalogo hilingiterek andi nen he, fanot fugunem ineilenggen hambik he,
Higit, iluk futfogoin aro,” iluk yagaisasikhe.
It afuni inawi sili lombok wene eberogoat iluk futfigi'legen yagaisasikhe wene
(Luk. 10:13-15)
20A'nogo yagaisasikhesik he, afuni inawi sili lombok aren hilingisu lek mene elalinat hilingitunem ineilenggen hikhi lagaukwa meneat he, inendawimo futfigi'lek logolik, yi weak ti weak hilingiti lagaukwa mene herakfisigi'lek welagaukwa mene wenagisikhi logolik he, mel yagaisasikhe: 21”Hit afuni o Korazim mene inom, o Betsaida mene inom, eige! Nendawilage. Afuni nen hilingisu lek mene an nen elalinat hit ninom logolik hilingiti lagi a'nogo, o Tirus Sidon andoma hilingiti logoilema re, it afuni o andoma mene heang fuluk hilingitarek hak, inasu weak mene laberigik, wul fesi inunggul oba yuguligik, ikhi logolik he, weak hilingiti lagaukwa mene andi hebisaluk inobabut fageat hebela'lep meneat he, hit he, a'nogo hilingisu hinabit andi nen weaget hinabigin o!#Yes. 23:1-18; Yeh. 26:1–28:26; Yl. 3:4-8; Am. 1:9-10; Za. 9:2-4 22Meneat he, an nane eberogoat yagahisak. Hobuk o wurep oba Allah nen wene hinoba figik, kotik igin andi sambul he, it afuni o Tirus Sidon andoma wene inoba fembik serogo hak inoasigin meneat he, hit enek he, mondok engginhogo hak hinoasigin o, iluk yagahisigi. 23Nen, hit afuni o Kapernaum mene yi hinendawimo nen he,
Allah nen pogoroba liak ninobagambik esinet ninobagagin, iluk fogerakhikhi lageba? Mondok lego. We, afuni wa'la'luk lagaikhare'ma andoma mondok pelakhinobagagin o. Afuni nen hilingisu lek mene an nen elalinat hit ninom logolik hilingiti lagi a'nogo o Sodom andoma hilingiti logoilema re, it andoma inebe lek agi'lek yogondak ya mondok hundigat logoilebo.#Kej. 19:24-28; Yes. 14:13-15 24Hobuk Allah nen wene inoba figik, kotik igin andi sambul he, it afuni o Sodom welagaukwa mene wene inoba fembik serogo hak inoasigin meneat he, hit enek he, mondok engginhogo hinoasigin andi nen he futfeni o,” iluk yagaisasikhe.#Mat. 10:15; Luk. 10:12
”Hit set walobagaigen noba we'ni o,” iluk yagaisasikhe wene
(Luk. 10:21-22)
25-26A'nogo yagaisasikhesik he, o andi sambul he, at Yesus nen samban oba eisena Allah yagati logolik he, ”Allah Neisena o! Pogot kweang eisewerek menere hararo! Wene mondogat andi re, it afuni inendawimo kagalek mene inom, yi wene ti wene inelu mene inom, inelu asinogo iluk hinakfuluk he, it inobabut yenggerugwi ketago mene hangge nek he, fakhogo yagaisegen andi hendawimo hamolo anggegendigenat yagaisegen andi nen hai wathafi lagi o, Neisena,” iluk yagatikhe. 27A'nogo yagatikhesik, it afuni omanogo mel yagaisasikhe: ”An neisena nen yi mene ti mene mondogat eisewerek logouwageluk wo'netikhe. Nen, an Allah amlogo yi afuni mondogat inonggot meneat he, neisena Allah amuat enek elu welagarek. Andi hak he, an neisena Allah andi, afuni mondogat inonggot meneat he, amlogo an namuat enek nelu welagirego. Nen, Allah amlogo anenat nendawimo anggaluk neisena ebe afuni ekhe inelu asuageluk fakhogo yagaisugunemat inelu agaikharego.#Yoh. 3:35, 1:18, 10:15
28Hit hinoba enggin-fenggin hikhi logolik set kwil-kwalhogo hilingiti lagep mene andi, an nen hinoba korogo hinobagagin enggere noba we'ni o. 29-30An nasungge kwalek su a'le sakhore'ma re, fano kwalogo wokhisamo se weagat hogoin andi nen he, hinomoloba waluk, an nobabut enago logolik inawe a'ma hak welagirek a'nogo furogo yagaisilik nikhi logoino o. A'nogo nikhi logogun halok, hinendawinggen hambuk igin o,” iluk yagaisasikhe.#Yer. 6:16
Currently Selected:
MATIUS 11: inohap
Highlight
Share
Copy
Want to have your highlights saved across all your devices? Sign up or sign in