MATIUS 10
10
Yesus agoromi inebe 12 nen inayonggo fesikhe wene
(Mrk. 3:13-19; Luk. 6:12-16)
1Inenggi ekhe sambul he, at Yesus nen agoromi ane wanhi lagaukwa mene inebe 12 nen omanogo andogosi wesuageluk wolisasikhemo wagaukwama re, iren afuni ekhe munggwarengge inobabut weak mene inendawimo kwisukwasik were'ma henegeisogo wulakfisigik, yi ou ti ou inoba werek mene higirinafik, inomame lek maben mene inomamerinafik, ilik loageluk omame wogisasikhe. 2Ap inebe 12 nen andi inenu yi: attak he, Simon enu ekhe Petrus ikhi lagaukwa mene a'nogo agot Andreas inom, Zebedeus amlogo Yakobus a'nogo agot Yohanes inom, 3Filipus inom, Bartolomeus inom, Tomas inom, Matius pemerintah faget uang kino iluk wanhi lagaikhe mene a'nogo inom, Alfeus amlogo Yakobus inom, Tadeus inom, 4Simon ”O Kanaan yoma ninawi werek mene nek logouwogo,” iluk ikhi lagaikhe mene a'nogo inom, Yudas Iskariot Yesus wasuageluk yonggo lagaikhe mene a'nogo inom, inenu andem menfisasikhe.
At Yesus nen agoromi inebe 12 nen omanogo yabu hilingiti logogun mene faget komorinafikhe wene
(Mrk. 6:7-13; Luk. 9:1-6)
5At Yesus nen it ap inebe 12 nen andi sumburogo lakfisageluk he, yi'nogo komorinafikhe: ”It afuni endakwe mene inawilokwe lagubo. Nen, it afuni o Samaria mene inawilokwe laluk kugubaro. 6Menere, afuni Israel mene wam domba nong agarek hak, nong agaikhasik werek andi inawilokwe heraginabi lano. 7Laga logolik he, mel yagaisilik lano: Nineisena Allah Enupogot awe a'ma ninobagagin oba a'nogo yogondak arat horogasi waga, iluk, yagaisilik lano.#Luk. 10:4-12 8It afuni ou inoba werek halok higirinafik, wa'lagaikha halok inelugerinafik, henanggo hangge inailo mene inoba werek halok higirinafik, munggwarengge obabut weak mene inendawimo kuluk were'ma henegeisogo wulakfisigik, ilik nikhi logoino. An nen onggo lek wokhisigi andi hak he, hiren a'nogoat onggo lek wogisilik lano. 9-10Afuni ekhe yabu wogisugunem inamburu wogisagarek andi hak, hiren higirinabik lagunem he, iren wokhisikhi logogun iluk, uang emas mene inom, perak mene inom, tembaga mene inom, hinoua'ma kwalogo wanhi'legat, nen su kwalugun mene inom, hinasu laberek mene pirendek inom, hineisok a'makwe labesugun mene inom, sige tomuk inom, waluk lagi'legat hinebe nek lani o.#1Kor. 9:14; 1Tim. 5:18
11Nen, hit o sili hokhoma, endepma, kwi lagep halok sa nen hai warogo hinebe wokhinafe halok he, obabut palfuluk, at andiat hinom logombik o ekhema louwogeluk halok he, wilibimbik he lano. 12Nen, it ekhe inaiba kwegep halok he, it inawi werek mene andi hai warinabino o. 13Nen, it afuni andoma inobabut fano nen wokhinafu halok he, hai hinane agaukhogo warinabugun andiba, Allah nen agaugwerinabigin aro. A'nogo meneat he inobabut weak halok hai warinabugun mene andi hinane oak wanino. 14Nen, it andoma nen hinebe wokhinafi'lek logolik hinane wanhi'lek herakfisaga halok he, o andoma herakfisaluk hinambotkwe wulibi waga logolik he, hineisok aling horogo pelakfisaluk wulibi we'no.#Kis. 13:51 15Yogondak he, an nane eberogoat yagahisak. Hobuk Nineisena Allah pogoroba mene nen wene inoba figik, kotik, igin andi sambul he, it afuni o Sodom Gomora mene andoma re, wene inoba fembik weagerinabigin meneat he, se hangge aro. Meneat he, it afuni o sili hit wokhinafi'lek herakhinobagagun mene andi nek he, wene enggin mene inoba fembik mondok weagerinabigin o,” iluk yagaisasikhe.#Kej. 19:24-28; Mat. 11:24
Afuni ekhe nen weagerinafu kwelek, ”An Yesus agoro,” iluk ikhi logogun wene
(Mrk. 13:9-13; Luk. 21:12-17)
16A'nogo yagaisasikhesik he, ekhe mel yagaisasikhe: ”An nen, hit hinobabut wam domba obabut hangge mene, it afuni inobabut mene olo mene obabut weak andi hangge mene inanggele'ma heakhogo lakhinobagagin andi re, hinobabut kisu obabut hibil-hebelhogo hilingiterek andi hak hilingitik, sue pel obabut enago welagarek andi hak welagik, ikhi logoino.#Luk. 10:3 17Afuni nen it ap wene ero pilingitare'ma inoba wokhinarek lagik, o samban agare'ma andoma nen yei hinoatik, ugun a'naga re, hinebe hebelogo logoino o.#Mrk. 13:9-11; Luk. 12:11-12, 21:12-15 18A'nogo hilinghinabugun andi ero an nebe fagerat, ap inenupogot mene inom, kaindek mene inom, inoba wokhinarek lagunem, hiren it ap andi ineilhanem an hilingitunem hineilenggen niikhi lagep mene a'nogo fakhogo it yagaisigik, afuni endakwe mene yagaisigik, yagaisoageluk fano asuak hinanema wanugun a'naga o. 19Hinanema a'nogo wanuageluk wokhinarek lagaikha halok he, hiren onggo yagaisogoin andi sambul at Allah nenat hinendawimo kagaligin. Halok he, onggo ninggi'nogo yagaisogoin iluk hinendawinggen fitubo. 20Wene onggo yagaisogoin andi re, hiren hinendawimo nen kagalogo ugun lek. We, hineisena Allah Areagun hinendawimo logolik he, yi'nogo ini o, iluk yagahisugu kwelek ugun o.
21Agailak ekhe nen he, at onggwarek agailak ekhe wasuageluk waluk lagik, eisena nen he, amlogo wasuageluk waluk lagik, inagainafuri nen he, ineisena inagaisa inabit a'luk he, inoasuageluk inabok palhik, ugun aro.#Mrk. 13:12; Luk. 21:16 22Nen, afuni mondogaren an nenu iluk, hit he, at agoromi iluk inabiret hinobagakhi logogun o. Meneat he, sa nen afe morogo logogin halok he, o wurep oba Allah nen teligin o.#Mat. 24:9, 13; Mrk. 13:13; Luk. 21:17 23O sili ekhe nen weaget hinabuogeluk ugu halok he, heise o sili ekhe lano. It afuni Israel mene inawi sili fena oan wene yagaisigi'lek werek kwelegat he, an abat ta'lasi wagagi a'nogo hobuk wesigin o, iluk, nane eberogoat yagahisigi.
24It guru lak wene yagaisagarek mene sebelek hak werek kwelegat he, it inagainafuri yagaisagarek mene andi lego hak po ya welagaikharek mondok lego. Andi hagat he, it ap kaindek sebelek hak werek kwelek, inamingmingengge mene andi re, lego hak welagaikharek mondok legaro.#Luk. 6:40; Yoh. 13:16, 15:20 25Mene re, it yenggerugwi andi ineisena guru andi inom higit hilinglagik, nen, it inamingmingengge mene andi ineisenalak inom higit hilinglagik umo re, higiraro. It afuni inoe o eisewerek mene andi weak iluk enu Beelzebul ugu halok, it at agoromi inom misi'mo mene andi, a'nogoat inenu weak hokhoat ikhi logogun o,” iluk yagaisasikhe.#Mat. 9:34, 12:24; Mrk. 3:22; Luk. 11:15
”Hineisena Allah andiat hinailorogo logoin o,” iluk yagaisasikhe wene
(Luk. 12:2-7)
26A'nogo yagaisasikhesik, ekhe mel yagaisasikhe: ”Hobuk Allah nen, yi mene ti mene sebelek mene andi weinamet figik, hinago mene andi sele'mat figik, igin enek andi nen he, hiren, it afuni faget hinailorogo logogubo.#Mrk. 4:22; Luk. 8:17 27Nen, an nen hit o mum oba yagahisigi mene, hiren o selek oba ikhi logoino. Nen, hinesanggoma nane samik-samok yagahisigi mene andi, hiren o weinam oba lagaluk he hinane fakhogo yagaisikhi logoino o. 28Afuni nen hinareagun inom hinoasugun elo'lek. We, hinebe nek hinoasugun andi nen he, hinailorogo logogubo. Meneat he, at Allah nek he, hinareagun inom, hinebe inom, elok mondok warogo endu ai'mo lakhinobagagin werek andi nen he, at Allah oba nek hinailorogo logoino. 29Sue wulue andi onggo miren palharek nogo. Ebe pire mene onggo uang sen mondok endebat mene misigat oba wanharek anggigi. A'nogo meneat he, hineisena Allah pogoroba mene nen, sue andi pokhogo puago, iluk oan igi'lek werek kwelek, ekhe kweangma pokhogo pikherek lego. 30Hit he, hinesi hinungguloa'ma mondogat he at Allah nen enggi wenago welagarego. 31Allah nen sue wulue andi ebe hokhorogoat mene, esin hangge anggikherek fuk. Afuni hinebeat esin mondok anggikherego. Andi nen hinailo lekhogo logoino o,” iluk yagaisasikhe.
Afuni ineilhanem, ”Yesus an noe,” iluk inane fakhogo ugun wene
(Luk. 12:8-9)
32A'nogo yagaisasikhesik, ekhe mel yagaisasikhe: ”Sa nen, Yesus andi an noe o, iluk, afuni ineilhanem ane fakhogo ugu halok he, an nen ogo re, at andi An nagoro, iluk neisena pogoroba mene eilhanem, nane fakhogo igin aro. 33A'nogo meneat he, sa nen Yesus andi an nonggoro, iluk afuni ineilhanem labelhe halok he, an nen ogo re, at andi an nonggoro, iluk neisena pogoroba mene eilhanem fakhogoat igin o,” iluk yagaisasikhe.#2Tim. 2:12
Yesus nen, ”Afuni it-it minggil-minggil loageluk wagagi,” iluk yagaisasikhe wene
(Luk. 12:51-53, 14:26-27)
34-35A'nogo yagaisasikhesik he, ekhe mel yagaisasikhe: ”Hit hinendawimo nen he, At wagaikhe andi re, kweangma yoma weim lioligeluk wagaikhe, iluk anggagubo. An wagagi andi re, eisena nen amlogo emberek weagagik, agaisa nen eak emberek weagagik, oan nen a'logo emberek weagagik, it-it inom weagarik loageluk wagagi o.#Mi. 7:6 36Wene ebe hokho mene minggilasugun a'nogo re it inawi misi'mo mene nen aro.
37Nen, an nebe re, hinabit hak anggikhi logolik he, hineisena hinagaisalak hinendawi welagep halok he, an nagoromi asugun lego. Nen, an nebe hinabit hak logolik hinagainafuri inom, hina'logomi inom, hinendawi welagep halok he, an nagoromi asugun legaro. 38Eba menfisaluk inoatarek mene a'nogo, hinagayo lombok hinomoloba wanimbik an nombo'ne waluk wagi'lek halok, an nagoromi asugun legaro.#Mat. 16:24; Mrk. 8:34; Luk. 9:23 39Sa nen onggwarek ebe elele helagain halok he, ebe wa'lasimbik nong asigin o. Meneat he, sa nen an faget wa'lasigin halok he, ebe elele helagain o,” iluk yagaisasikhe.#Mat. 16:25; Mrk. 8:35; Luk. 9:24, 17:33; Yoh. 12:25
”Afuni inobabut hilingitarek higithogoat, Allah nen onggo wogisagain o,” iluk yagaisasikhe wene
(Mrk. 9:41)
40”At sa nen hinebe wokhinabigin halok he, an nebeat wo'nabigin o. Nen, an nebe wo'nabigin andi, an neisena laknobagai wagaikhe mene a'nogo ebeat wanigin o.#Mrk. 9:37; Luk. 9:48, 10:16; Yoh. 13:20 41At sa nen, ap yi Allah ane yagaisikherek mene, iluk ebe wanigin halok he, it ap Allah ane yagaisagarek mene onggo helagarek higithogoat helagain o. Nen, ap yi higithogo hilingiterek mene iluk ebe wanigin halok he, it higithogo hilingitarek mene onggo helagarek hagat helagain aro. 42At sa nen,
Yenggerek magenggelak mene yi Yesus ane wanherek mene, iluk, i min mene ekhe wogete halok he, Allah nen onggo wogosigin mene heligi'lek nong asigin lego, iluk eberogoat yagahisigi o,” iluk yagaisasikhe.
Currently Selected:
MATIUS 10: inohap
Highlight
Share
Copy
Want to have your highlights saved across all your devices? Sign up or sign in