MATIUS 9
9
Yesus nen ap ekhe enggi eisok wut warek mene higitikhe wene
(Mrk. 2:1-12; Luk. 5:17-26)
1A'nogo yagatukwama re, at Yesus e so elema kwisikhesik, e so warogo re, i aik elikwe wulifikhesik o sili at aiba lagaikhe hak he, 2ap ekhe enggi eisok mondok wut warek welagaikhe mene e talek oba wengik werek kwelek yerogo waluk oba wagaukwama, at Yesus nen he, ”It andi inendawinggen an noba himbiret fagasigen waluk wagaikha higi,” iluk, eilenggen enegat isasikhesik he, ap enggi eisok wut warek mene a'nogo mel yagatikhe: ”Namlogo e. Hendawimo hagaiyek ame o. Hat weak hilingiti lagen mene re, an nen sebelogo legetfisigi,” iluk, yagatikhe. 3A'nogo yagatikhemo re, it ap Allah ane lisu palek inelu mene ekhe inendawimo nen he: ”Eige! Ap yi Allah endawimo seramet fuluk enu weaget fili'logo,” iluk anggasukwa.
4A'nogo anggasukwama, at Yesus nen inobabut enegat palhikhesik he, mel isikhe: ”Hit hinendawimo nen wene weak mene ebeti lagep andi nenahalok? 5An nen ap yi wene yagasigin he, se hangge ki anggegep.
Hat weak hilingiti lagen mene andi arat sebelogo legetfisigi, iluk yagati andi se hangge mene yagati anggegeba? I a, athe,
Hebe menla'luk lan o, iluk yagasigin se hangge anggegeba. Lego. Hebe menla'luk lan, iluk yagasumo enggin aro. 6Enggin meneat he, an abat ta'lasi wagagi andi, kweangma yoma logolik afuni yi weak ti weak hilingitarek mene anenat sebelogo legetfisikhi logouwageluk Allah nen eisewerek nobagaikhe andi futnobagauwak,” iluk he, ap enggi eisok wut warek mene a'nogo mel yagatikhe: ”Hebe menla'luk he, halit talogo nogo ikhi lagen mene ari helaluk haiba lan o,” iluk yagatikhe.
7Yagatikhemo re, ap a'nogo menlagaikhesik aiba lagaikhe. 8A'nogo hilingitikhemo re, it afuni omanogo ineilenggen hasukwasik inailo agaukwasik he, ”Allah nenat afuni mene nen yi'nogo hilingiti logouwageluk menfesikhemo andi nailo e,” iluk, Allah fogeratukwa.
Yesus nen Matius ayonggo fesikhe wene
(Mrk. 2:13-17; Luk. 5:27-32)
9At Yesus o andoma herakfisaluk laga logolik, ap ekhe enu Matius, kantor uang pemerintah faget waganogo fikhi lagaukwaba hurek were'ma, eilenggen hasikhesik, ”Nombo'ne eme o,” iluk yagatikhemo re, menlagaikhesik he, ombo'neat lagaikhe.
10Lagaikhesik, at aiba Yesus emberek kwisukwasik sumburu nuogeluk hurek were'ma re, it ap uang pemerintah faget kino iluk wanhi lagaukwa mene ekhe inom, it ekhe afuni mondogaren inabok weak ikhi lagaukwa mene inom hokhorogoat kwi wagaukwasik, at Yesus ebe inom, agoromi ane wanhi lagaukwa mene omanogo inomat misi'mo hu'lagaukwasik sumburu ninggi lagaukwa.#Luk. 15:1-2 11A'nogo nunggu were'ma, it ap Farisi mene nen ineilenggen kwelagisasukwasik he, it ap Yesus ane wanhi lagaukwa mene omanogo mel yagaisasukwa: ”Hit hinoe wene yagahisili'logo mene ari, it ap uang pemerintah faget kino iluk wanharek mene inom, it ekhe afuni nen inabok weak agarek mene inom, sumburu misi'mo nili'lagwi yi nenahalok,” iluk yagaisasukwa. 12A'nogo yagaisasukwama, at Yesus esanggo holhikhesik, mel yagaisasikhe: ”It afuni ekhe inoba fano mene, dokter lagen ou higirinabuageluk inayonggo fogoin nogo? Lego. We inoba ou werek halogat dokter lak inayonggo fogoin o. 13Allah ane ekhe mel isikhe:
An Allah nendawimo re, afuni nen
inanggo wa'netarek andi nabiro.
We, it afuni ekhe hinendawirogo
logogun andiat namolo.
Iluk isikhe wene andi furogoat futfei lani o. An wagagi andi re, afuni inobabut fano hilingitarek mene inayonggo feigeluk wagagi fuk. Lego. We, afuni inobabut weak hilingitarek mene andi inayonggo feigeluk wagagi o,” iluk yagaisasikhe.#Hos. 6:6; Mat. 12:7
Samban uogeluk sumburu ninggi'lek welagaikharek wene
(Mrk. 2:18-22; Luk. 5:33-39)
14A'nogo yagaisasikhesik oba nen he, it Yohanes agoromi ane wanhi lagaukwa mene Yesus oba wagaukwasik he, mel yagatukwa: ”Nit inom, it ap Farisi mene inom, samban hundik-handik uogeluk, sumburu ninggi'lek welagorek meneat he, it ap hat hane wili'lagwi mene yoma nek he, a'nogo hilingiri'lagwi lek andi nenahalok,” iluk yagatukwa. 15Yagatukwama re, at Yesus nen he, mel yagaisasikhe: ”Ap ekhe agwe ikhikhi logolik he, at erugwi agaila'lak inomat logolik he, it inendawimo wiik-weakhogo logogun nogo? Lego. A'nogo meneat he, erugwi agaila'lak fisaluk, ap andi waluk logoin oba weregaro. A'nogo waluk lamo nek he, it andi inenggi ekhe sumburu ninggi'lek sambanat ikho logogun aro,” iluk yagaisasikhe.
16A'nogo yagaisasikhesik, ekhe mel yagaisasikhe: ”Afuni nen, su attak laberi'lagwi mene tilibikhe halok, kain ket meneba seleben esumo, hobuk kain ket mene andi hesimorogo kwikhi logolik, su andi hokhoat tilibilik lagain o. 17Andi hangge, afuni nen anggur enggen perelogo amusu ket mene iwak wam agap mene fageat hilingitarek mene elema hinatarek lek. A'nogo hinatu halok he, iwak andi yenggalaga logolik he, anggur enggen amusu andi kweisalogo alomat lagik, iwak andi halokhogo alomat lagik, inogoluk he, anggur enggen amusu ket mene halok he, iwak ket fano hilingitarek mene halogat elema hinasugun o. A'nogo hinasumo re, pireat fano logogun,” iluk yagaisasikhe.
Yesus nen Yarius a'logo inom, he ekhe inom, ou higirinafikhe wene
(Mrk. 5:21-43; Luk. 8:40-56)
18A'nogo yagaisugunem, ap ekhe o afuni Yahudi mene samban agarek oba eisewerek logolik kain welagaikhe mene andi Yesus oba wagaikhesik, eindep awi yagaisogore mel yagatikhe: ”An na'logo yogondagat wa'laga meneat he, haren henggi fakha lamo re, eluk asimbik fano asuageluk hayonggo wagi,” iluk yagatikhe.
19A'nogo yagatikhemo re, at Yesus ebe inom, ap a'nogo inom, it ap Yesus ane wanhi lagaukwa mene omanogo inom, mondogat lagaukwa.
20-21Lagunem he, he ekhe amep lago mondok werek kwelek 12 tahun hilinglagaikhe mene, inombo'ne laga logolik endawimo nen he, ”Yesus andi asu nenggi fakhamo re, namep palasigin o,” iluk, Yesus asu wurep enggi fakhasikhe. 22Enggi fakhasikhemo re, at Yesus nen elokhe hebekhogo eilenggen ambotma kwelakhasikhesik he, mel yagatikhe: ”Na'logo e! Hendawimo hagaiyek ame o. Hendawinggen noba himbiret fegen andi nen fano agen o,” iluk, ugu kwelek aremnogoat he, he a'nogo arat fano agaikhe.
23A'nogo hilingirik-hilingirik he, at ap kain Yesus ayonggo wagaikhe mene a'nogo aiba lagaukwa hak he, afuni le aga logolik pinggong watarek mene watik, le ngai-wai hokhorogo agik, ugunem eilenggen isasikhesik he, 24mel yagaisasikhe: ”Helenggerek andi wa'lagi'lek. We, nogo ili'logo. Halok he, wulibi lani o,” iluk yagaisasikhe mene re, it afuni hokhorogo omanogo nen he, endo hokhorogo agaukwa. 25Endo hokhorogo agaukwama, inebe wulakfisasikhesik he, helenggerek a'nogo welagaikheba kwisikhesik enggi fagaisogo menfesikhemo eluk agaikhe. 26A'nogo hilingitikhemo re, ”Yesus nen eluget fikhe o,” iluk, o tonggwe andoma abok mondok wialik lagaukwa.
Yesus nen ap inebe pire ineilenggen mum mene higirinafikhe wene
27At Yesus o andoma nen lagunem ap inebe pire ineilenggen mum mene ombo'ne laga logolik inane hokhorogo mel yagatukwa: ”Ap Daud en tagongge mene noe a! Hendawit ninabin o,” iluk yagatukwa. 28A'nogo yagatukwama, at Yesus ebe oloba kwisikhesik were'ma, it ap inebe pire ineilenggen mum mene aremnogo oba kwisukwa. Kwisukwama re, at Yesus nen, mel yagaisasikhe: ”Hit hinendawimo nen he, Aren elok higitninabigin iluk anggikhi lageba?” iluk yagaisasikhemo re, iren he, ”I o. Ninoe. Elogat higitninabigin anggikhi lago,” iluk yagatukwa. 29A'nogo yagatukwama re, at Yesus nen ineilenggen a'nogo enggi fagisikhi logolik he, mel yagaisasikhe: ”Hinendawinggen noba himbiret fegep higithogoat higithinabigin. Halok, fano a'ni o,” iluk yagaisasikhe. 30A'nogo yagaisugu kwelek aremnogoat ineilenggen a'nogo fano agaukwa. Fano agaukwama re, at Yesus ane ninghogoat yagaisikhi logolik he, ”An nen higithinafi mene yi, afuni ekhe inelu asinogo iluk he yagaisagubo,” iluk yagaisasikhe.
31A'nogo yagaisasikhe meneat he, it afuni omanogo nen o andoma at abok mondok yagaisilik nikhi lagaukwa.
At Yesus nen ap ekhe ane mondok lek mene higitikhe wene
32O andoma nen wulifunem he, it afuni ekhe nen ap ekhe munggwarengge obabut weak mene endawimo kwisikhemo ane lek mondok welagaikhe mene Yesus oba waluk wagaukwa. 33Waluk wagaukwama re, at Yesus nen munggwarengge obabut weak mene ap a'nogo endawimo kwisikhesik were'ma henegeisogo wulakfesikhemo, ap a'nogo ane huakhogo isikhe. A'nogo hilingitikhemo re, it afuni hokhorogo welagaukwa mene nen Yesus fogerati logolik he, mel isukwa: ”Nit afuni Israel mene ekhe nen yi'nogo hilingitunem nineilenggen isogorek lek mene nailo e,” iluk fogeratukwa.
34A'nogo fogeratukwa meneat he, it ap Farisi mene omanogo nen he, mel isukwa: ”At Yesus nen Iblis agoromi inoe kain a'nogo omameba munggwarengge obabut weak mene afuni inendawimo kuluk were'ma henegeisogo wulakfisili'logo,” iluk isukwa.#Mat. 10:25, 12:24; Mrk. 3:22; Luk. 11:15
At Yesus nen afuni endawirinafi logolik yagaisasikhe wene
35At Yesus o sili hokho kwe endep kwe, ya kwigik ta kwigik, nikhi logolik, o samban agarekwe kwilik laga logolik fano wene nineisena Allah nen awe a'ma inobagagin wene a'nogo yagaisigik, yi ou ti ou inoba werek mene inom, inomame lek maben mene inom, fano higirinafik ilik nikhi lagaikhe.#Mat. 4:23; Mrk. 1:39; Luk. 4:44 36A'nogo higirinabik nikhi logolik he, afuni hokhorogo eilenggen yerisasikhesik he, ”Wam domba konharek hak, it yoma koninabu mene legen hesangge sak-pakhogo set kwalogo nikho yoma nendawilage,” iluk endawirinafikhe.#Bil. 27:17; 1Raj. 22:17; 2Taw. 18:16; Yeh. 34:5; Za. 10:2; Mrk. 6:34 37Endawirinafikhesik he, at agoromi ane wanhi lagaukwa mene omanogo mel yagaisasikhe: ”Enggen ugu hokhorogo werek meneat he, afuni enggen ebe palugun mene inebe endebaro.#Luk. 10:2 38Andi nen he, Ap eabu eisewerek mene a'naga nen afuni enggen palugun mene ekhe lakfisoagen, At ayonggo fikhi logoino,” iluk yagaisasikhe.
Currently Selected:
MATIUS 9: inohap
Highlight
Share
Copy
Want to have your highlights saved across all your devices? Sign up or sign in