Sakalia 8
8
Toe laga mo le tapuakina o Iselaele
1Na toe fakasa loa le folafola a le Eteleno o kau tau, o pati :
2E folafola le Eteleno o kau tau, o pati : Kua kau finenonofo ki Sione i se finenonofo lasi, ti kua kau sausaua lasi o tupu ko ia.
3Koia e folafola ai le Eteleno, o pati : Kua kau toe liliu mai ki Sione, ti kua kau loto ke kau nofo i loto malie o Selusalemi. E fakaigoa loa Selusalemi ko le kolo agatonu, ti e fakaigoa loa le mauga o le Eteleno o kau tau ko le mauga maokioki.
4Koia e folafola ai le Eteleno o kau tau, o pati : E toe tonatona loa ni kau matua mo ni kau finematua i ala o Selusalemi mo olatou toko i lima, o tupu ko le lasi o olatou fetuu. 5E apele loa a ala o le kolo i tamaliki mo taineliki e manonogi.
6Koia e folafola ai le Eteleno o kau tau, o pati : Kapau e mata fakapunamauli le nea lena ki le toega o le kakai lena i aso ana, pe mata fakapunamauli a ia kiate au ?
7Koia e folafola le Eteleno o kau tau, o pati : Ko leinei, e kau saofaki loku kakai mei le fenua o le sopoaga o le laa ti mo le fenua o le viloaga o le laa.
8E kau aumai loa latou, ti e lotou nonofo loa i loto malie o Selusalemi ; e lotou liliu loa ko loku kakai, ti e kau liliu loa ko lolatou Atua i le maoki mo le faitotonu.
9Koia e folafola ai le Eteleno o kau tau, o pati : Kotou fakamakeke okoutou lima, koutou ala e logo i le aso leinei ki folafola anei mei le gutu o polofeta ala na sa i le temi leia na fakatafito ai le fale tapu o le Eteleno o kau tau, i le temi leia na kamata fakatuu ai le fale tapu. 10Talie i mua o le temi lena, na leaise maua se fakapale o le gaoi a le tagata, ti na noa le totogi o manu ; na leaise tokamalie kia latou ala na ulu ki loto ti ulu ki fafo o le kolo, o tupu ko le fili, ti na kau tuku a tagata fuli ke lotou fetauaki ia latou. 11E folafola le Eteleno o kau tau, o pati : I le aso nei e leaise kau toe fai loa ki le toega o le kakai leinei pe le temi kua sili. 12Talie e mauli loa a pulapula ala na to, ti e fua loa le vite, ti e soli loa e le kele ona fua, ti e tuku loa e le lagi lona sasau ; e kau fakafiafia loa le loto o le toega o loku kakai ki nea fuli ana. 13Fale o Suta, fale o Iselaele, ofaipe lokoulua liliu ki atu puleaga ko ni nea fakatupu malaia i mua, koia e kau saofaki ai loa koulua ti e kolua liliu loa ko se tapuakina. Aua na kolua i, kae ke kolua fakamakeke okoulua lima !
14Talie e folafola le Eteleno o kau tau, o pati : Na kau manatu ke tuku koutou ki le malaia, o tupu ko okoutou tamana ala na fakatupu ia loku sausau, ti ke aua na kau toe maliu mei laku manatu lena, 15kae i le aso nei, kua kau fakakaukau ke kau fai se nea malie ki Selusalemi mo le fale o Suta. Aua na kotou i ! 16E folafola le Eteleno, o pati : Ko leinei le nea leia e tonu ke kotou fai : Kotou tasi fakasa le maoki ki lona oloi ; kotou fakamaau o mulimuli ki le maoki, ke maua le tokamalie ;
17Aua na maua e se tasi i lona loto se manatu veli ki lona oloi, ti ke aua na kotou fakamaoki loi, talie e kau fakalialia ki nea fuli ana.
18Na fakasa loa le folafola a le Eteleno o kau tau kiate au, o pati :
19E folafola le Eteleno o kau tau, o pati : E liliu loa le sesunio o le fa o masina, mo le sesunio o le fitu o masina, ti mo le sesunio o le kau agafulu o masina ki le fale o Suta ko ni aso lalasi mo ni aso fiafia, ko ni aso apele i le fiafia mo ni fakafiafia. Kae ke kotou alofa ki le maoki mo le tokamalie.
20E folafola le Eteleno o kau tau, o pati : E toe au loa ni kakai toka api mo ni iki ala na nonofo i ni kolo kesekese. 21E ano loa ni kakai o se tasi a kolo ki se tasi ake a kolo, o pati : Tou ano o faikole ki le Eteleno ti mo afa le Eteleno o kau tau ! E motou ano loa ! 22Ti e au loa ni kakai toka api mo ni puleaga mauke o afa le Eteleno o kau tau i Selusalemi mo faikole ki le Eteleno.
23Koia e folafola ai le Eteleno o kau tau, o pati : I aso ana, e too loa e ni tagata e tino agafulu mei masau kesekese fuli o atu puleaga se tagata Sutea e toka tasi i le tapatapa o lona kofu, o pati : E motou ano loa mo koe, talie kua motou iloa kua nofo le Atua mo koutou.
Currently Selected:
Sakalia 8: FB2000
Highlight
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020