Sakalia 9
9
Maumau o fili o Iselaele ;
sau o le Mesia
1Folafola kikite, folafola a le Eteleno ki le fenua o Atalake ;
E kaku foki lana folafola ki Tamaso,
Talie e tuku e le Eteleno ona mata ki tagata fuli
Ofaipe lana tio ki faasiga fuli o Iselaele ;
2E tuu foki a ia i Amate, i le koiga mo Tamaso,
I Tile mo Sitone, logo ai lola poto lasi.
3Kua fakatuu e Tile se kolo tau kiate ia ;
Kua tanaki e ia le paaga ofaipe le efu,
Ti mo le aulo ofaipe le pela o ala.
4Ko leinei, e too loa a ia e le Aliki,
E ti loa e ia lona makeke ki le tai,
Ti e tutu loa a ia e le afi.
5E tio loa ki ai Asekaloni, ti e i loa a ia.
Ti mo Kasa foki, e too loa a ia e se i lasi ;
Ti mo Ekeloni foki, talie e puli loa lana amanaki malie.
E puli loa le sau i Kasa,
Ti e leaise toe nofoi loa Asekaloni.
6E nofo loa le matapule i Asetoti,
Ti e kau taai loa ki lalo le fia nealasi o le kau Filisitini.
7E kau too loa le toto i lona gutu,
Ti mo nea fakalialia i ona nifo ;
E kau loa mo ia foki ki lotatou Atua,
Ti e fai loa a ia pe se pule i Suta,
Ti e fai loa Ekeloni pe le kau Sepusi.
8E kau nofo loa o takatakai loku fale o puipui a ia i se solia,
Meia latou ala e ano ti au,
Ti e leaise toe fakalaka loa le tagata fakaveliveli i tafa o loku kakai ;
Talie i le temi nei e tio mau oku mata kiate ia.
9Ke ke nekenekea, taine o Sione !
Ke ke fai ni kalaga fakafiafia, taine o Selusalemi !
Ko leinei, e au lou sau kiate koe.
E faitotonu a ia mo malo,
E agamalu a ia ti e eke a ia i se asino,
I se asino, le uviki o se asino fafine.
10E kau maumaui loa a saliote o Efalaimi, ti mo osi o Selusalemi ;
Ti e too loa a kalolo tau.
E fakasa loa e ia le tokamalie ki atu puleaga,
Ti e pule loa a ia mei le tai ki le tai,
Mei le vaitafe o kaku ki potupotu o le malama nei.
11Kae kiate koe, o tupu ko lau sai na fakamaoki ki le toto,
E kau fakamavae loa lau kau popula i le popoko leia e leaise maua ai se vai.
12Kotou toe liliu ki le kolo makeke, kau popula kua apele i le amanaki malie !
I le aso nei foki e kau fakasa maoki,
E kau toe soli loa kiate koe o liuga lua.
13Talie e kau fakamakona loa a Suta ofaipe se kalolo,
E kau fai loa ki Efalaimi laku gasau,
Ti e kau lagai loa au fanau, ei Sione,
Ki au fanau, ei Savani !
E kau fakaliliu loa a koe ofaipe le seleta a se tagata toa.
14E sa loa le Eteleno i aluga o latou,
Ti e makamu loa lana gasau ofaipe le uila.
E pupusi loa e le Aliki, le Eteleno, le fakatagi pupusi,
E au loa a ia i le asesio o le potu saute.
15E puipui loa latou e le Eteleno o kau tau ;
E lotou kai loa, e lotou malo loa i fatu o le makamaka ;
E lotou iinu loa, e lotou logoa loa ofaipe ni nea kua konana i le vino ;
E lotou apele loa ofaipe se ipu, ofaipe poko o le aletale.
16E fakamauli loa latou e le Eteleno, lolatou Atua i le aso lena,
Ofaipe le kau manu o lona kakai ;
Talie ko latou ko ni fatu mauiga o se pala fakasau,
Ala e gigila loa i lona fenua.
17Io ! Kua lasi ai lona manuia ! Kua lasi ai lona fulumalie !
E tupu lalasi loa a tamaliki tupulaga i le fulumeto,
Ti taineliki tupulaga i le vino.
Currently Selected:
Sakalia 9: FB2000
Highlight
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020