Sakalia 7
7
Le sesunio maoki mo le sesunio loi
1I le fetuu fa o le sau ko Taliusi, na tuku loa le folafola a le Eteleno kia Sakalia, i le aso fa o le masina iva, leia ko le masina o Kiseleu.
2Na kakau loa e le kakai o Petele a Saletesele mo Lekemi-Meleki ti mo ni iki ake ke ano o faikole ki le Eteleno, 3mo vesili ki le kau tagata faisakilifisio o le fale o le Eteleno o kau tau, ti mo le kau polofeta : Pe tonu ke kau tagi mo sesunio i le masina lima, ofaipe le nea leia na kau fai i ni fetuu mauke ?
4Ti na tuku mai loa kiate au le folafola a le Eteleno o kau tau, o pati : 5Pati ki le kakai katoa o le fenua ti mo le kau tagata faisakilifisio : I lakoutou sesunio mo fetagisi i le masina lima mo le masina fitu, talu mei fetuu e kau fitu, pe na kotou sesunio kiate au ? 6Ti ka kotou kai mo inu, pe leaise ko koutou ala na kai ti mo inu ?
7Pe leaise kotou iloa a folafola ala na fakasa e le Eteleno i ana kau polofeta mua, i le temi leia na nofoi ai mo fimalie ai Selusalemi mo ona kolo liliki fuli, ti na nofoi ai foki mo le potu saute mo le potu toafa o le fenua ?
8Ti na tuku loa le folafola a le Eteleno kia Sakalia, o pati :
9Na folafola le Eteleno o kau tau, o pati :
Ke kotou fakamaau i le faitotonu,
Ti ke kotou maua le agamalie mo le manavaalofa ia koutou.
10Aua na kotou fakamakeke le fafine lokonui mo le fanau sala matua, mo le matapule, ti mo le mativa,
Ti aua na kotou fakakaukau i okoutou loto se nea veli ia koutou.
11Kae na lotou patigataa o leaise lotou fakalogo, ti na lotou titua o tapono olatou taliga ke aua na lotou logo. 12Na lotou fakafefeka olatou loto ofaipe se fa taimane, ke aua na lotou fakalogo ki le lao mo folafola ala na fakasa kia latou e le Eteleno o kau tau i lona Laumalie i ana kau polofeta mua. Koia na ula ai le sausau lasi o le Eteleno. 13Ka kalaga loa le Eteleno, na leaise lotou fakalogo : Koia e pati ai le Eteleno : na leaise kau fakalogo kia latou mo ka lotou kalaga mai kiate au. 14Koia na kau fakamavete ai loa latou i lotolotoga o puleaga fuli ala na leaise lotou iloa. Koia na kau maumaui ai le fenua i olatou muli, ti na leaise toe ano loa se tasi i ai. Ti na liliu loa le fenua fulumalie lena ko se toafa.
Currently Selected:
Sakalia 7: FB2000
Highlight
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020