SEKHARAÏAH 12
12
Ka jingpyllait ïa ka Jerusalem
1Ka jingkit ka ktien U Trai ïa ki Israel. Kumne u ong U Trai, uba siang ïa ki bneng, bad uba seng ïa ka nongrim ka khyndew, bad uba pynlong ïa ka mynsiem u briew hapoh jong u: 2“Ha khmih, ngan pynlong ïa ka Jerusalem ka khuri pynshad lyngwit ha ki paidbah baroh kiba baroh sawdong, bad halor ki Judah ruh kan long ha kata ka jingker kut ïa ka Jerusalem. 3Te kan jia ha kata ka sngi, ba ngan pynlong ïa ka Jerusalem u maw bakhia ïa ki paidbah baroh; baroh kiba pynkit ïa ka ha ki yn pynmong sat ïa ki; bad ki jaid bynriew baroh ka khyndew kin ïalum lang pyrshah ïa ka. 4Ha kata ka sngi,” ong U Trai, “ngan shoh ïa u kulai baroh da ka jinglyngngoh, bad u nongshong jong u da ka jinglamwir: bad ngan peit la ki khmat halor ka ïing Judah, bad ngan shoh ïa u kulai baroh jong ki paidbah da ka jingmatlah. 5Bad ki nongïalam jong ki Judah kin ong ha la ka dohnud, ‘Ki nong Jerusalem ki long ka bor jong nga ha U Trai ki paid U Blei jong ki.’ ”
6“Ha kata ka sngi, ngan pynlong ïa ki nongïalam jong ki Judah kum ka pliang ba don ding hapdeng ki dieng, bad kum ka jingtbeh ding hapdeng ki jingsong Kew; bad kin bam duh ïa ki paidbah baroh kylleng sawdong, sha kamon bad sha kadiang; bad ka Jerusalem kan dang shong pat ha la ka jong ka jaka, ka Jerusalem keiñ. 7U Trai un pynim shuwa ruh ïa ki ïingjaiñ ki Judah, khnang ba ka burom ka ïing u Dabid bad ka burom ki nong Jerusalem kin ym leh khraw halor ki Judah. 8Ha kata ka sngi, U Trai un da ïa ki nong Jerusalem; te ha kata ka sngi, uta uba tlot bor hapdeng jong ki un long kum u Dabid; bad ka ïing u Dabid kan long kum U Blei, kum u angel U Trai ha shuwa jong ki. 9Bad ha kata ka sngi, ngan pyrshang pynduh ïa kita ki jaid bynriew baroh kiba wan ïaleh ïa ka Jerusalem.
10 #
Ïoan. 19:37; Jpw. 1:7. “Te ngan theh buk buk halor ka ïing u Dabid, bad halor ki nong Jerusalem, ïa ka mynsiem ka jingaiei bad ka jingkyrpad; bad kin khmih ha nga ïa uba ki la sum; bad kin ïambriew ïa u, kumba uno uno u ïambriew ïa la u khun marwei, bad kin sngewkthang namar jong u, kumba uno uno u sngewkthang namar uba la kha nyngkong jong u. 11Ha kata ka sngi, kan long kaba ïambriew kaba khraw ha Jerusalem, kum ka jingïambriew Hadad-rimmon ha ka them Megiddon. 12Bad ka ri kan ïambriew, kawei kawei ka kur kyrpang; ka kur ka ïing u Dabid kyrpang, bad la ki tnga kyrpang; ka kur ka ïing u Nathan kyrpang, bad la ki tnga kyrpang; 13ka kur ka ïing u Lebi kyrpang, bad la ki tnga kyrpang; ka kur ka ïing ki Shimei kyrpang, bad la ki tnga kyrpang; 14ki kur baroh kat kiba sah, kawei kawei ka kur kyrpang, bad la ki tnga kyrpang.”
Currently Selected:
SEKHARAÏAH 12: KHB
Highlight
Share
Copy
Want to have your highlights saved across all your devices? Sign up or sign in
The Bible Society of India