SEKHARAÏAH 11
11
1To plie la ki jingkhang,
ko Lebanon,
ba ka ding kan jliah
ïa ki dieng Kedar jong me.
2To lynñiar, ko dieng Kseh,
naba u dieng Kedar
u la kyllon,
namar la lute ïa kiba donburom:
to lynñiar,
ko dieng Sning Bashan,
naba ka 'law bah ba bniap
ka la hap.
3Ka jingsawa ka jinglynñiar
ki nongsharai!
naba la lute ïa ka burom
jong ki:
ka jingsawa ka jingkyrhuh
ki sing samla!
naba la lute ïa ka jingsarong
ka Jordan.
Ki nongsharai kiba bieit
4Kumne u la ong U Trai U Blei jong nga: “To bsa ïa ka kynhun ka jingpynïap; 5kiba ki trai jong ki, ki pynïap ïa ki, te kim ñiew pop ïa lade; bad kita kiba die noh ïa ki, ki ong, ‘Long ba la kyrkhu ïa U Trai, namar nga la riewspah’: bad ki nongsharai jong ki hi kim isynei ïa ki. 6Naba ngan ym isynei shuh ïa kiba shong ha ka ri,” ong U Trai: “hynrei, ha khmih, ngan ai noh ïa ki briew uwei uwei baroh ha ka kti u paramarjan jong u, bad ha ka kti u syiem jong u: te kin pom ïa ka ri, bad ngan ym pyllait ïa ki na ka kti jong ki.
7“Kumta, nga bsa ïa ka kynhun ka jingpynïap, shisha keiñ, ïa ki basniew jong ka kynhun. Bad nga la shim ha nga ar tylli ki diengduh; ïa uwei nga la kyrteng ‘Ka Jingitynnad’, bad ïa uta uwei nga la kyrteng ‘Ki Jingteh’; bad nga la bsa ïa ka kynhun. 8Te nga la pynïap lai ngut ki nongsharai ha uwei u bnai; naba ka mynsiem jong nga ka la sngewbtai ïa ki, bad ka mynsiem jong ki ruh ka la isih ïa nga.” 9Ynda kumta, nga la ong, “Ngan ym bsa ïa phi: kata kaba ïap, ai kan ïap; bad kata ka ban duh noh, ai kan duh noh; bad kita kiba la pynsah noh ai kin bam kawei kawei ïa ka doh jong kawei pat.” 10Bad nga la shim la u diengduh “Ka Jingitynnad”, bad nga la kdiah ïa u, khnang ba ngan ïoh pynkheiñ ïa la ka jutang kaba nga la lah teh bad ki jaid bynriew baroh. 11Te la pynkheiñ ïa ka ha kata ka sngi: kumta, kine kiba lanot ka kynhun kiba la sngap pyrkhat ïa nga ki la tip ba ka la long ka ktien U Trai. 12#Mat. 26:15; 27:9,10.Te nga la ong ha ki, “Lada phi ibit, to ai ha nga la ka bainong; lymda kumta te, to ieh.” Kumta, ki la thew ïa ka bainong jong nga laiphew ki sbai rupa. 13U Trai te u la ong ha nga, “To bred noh ïa ka ha u nongthaw khiew”, kata ka dor ka babha kaba ki la kheiñ dor ïa nga. Te nga la shim ïa kita ki laiphew ki sbai rupa, bad nga la noh ïa ki ha u nongthaw khiew, ha ka ïing U Trai. 14Ynda kumta, nga la kdiah ïa uta uwei u diengduh jong nga, “Ki Jingteh” keiñ, khnang ba ngan ïoh pynkheiñ ïa ka jingïateh para hapdeng ki Judah bad ki Israel.
15Bad U Trai u la ong ha nga, “To shim ha me pat ïa ki tiar u nongsharai uba bieit. 16Naba ha khmih, ngan pynmih ïa u nongsharai ha ka ri, u ban ym khmih ïa kita kiba la pynduh noh, lymne un ym wad ïa kiba la pynsakma, lymne pynkhiah ïa kata kaba la mong; lymne un ym bsa ïa kata kaba sahkut, hynrei, un bam ïa ka doh jong ki basngaid, bad un pynlwet ïa ki khnap jong ki.
17“Kordit ïa uta u nongsharai
uba thala
uba iehnoh noh ïa ka kynhun!
ka waitlam kan long
ha ka ksang'ti kamon
jong u,
bad ha ka khmat kamon jong u:
ka ksang'ti jong u
kan tyrkhong khait,
bad ka khmat kamon jong u
kan dum tiaw.”
Currently Selected:
SEKHARAÏAH 11: KHB
Highlight
Share
Copy
Want to have your highlights saved across all your devices? Sign up or sign in
The Bible Society of India