SEKHARAÏAH 13
13
1“Ha kata ka sngi, kan long ka pukri um ba la tih ïa ka ïing u Dabid bad ïa ki nong Jerusalem, ïa ka pop bad ka jingbymkhuid.
2“Te ha kata ka sngi,” ong U Trai ki paid, “ngan pyndam noh ïa ki kyrteng jong kita ki dur bleithaw na ka ri, bad yn ym kynmaw shuh ïa ki: bad ngan beh noh ïa ki nongïathuhlypa bad ïa ki mynsiem bymkhuid na ka ri. 3Bad kan jia ba, haba uno uno shuh un ïathuhlypa, te u kpa jong u bad ka kmie jong u kiba la kha ïa u kin ong ha u, ‘Men ym ïoh im shuh; naba me la kren ïa ka lamler ha ka kyrteng U Trai’: te u kpa jong u bad ka kmie jong u kiba la kha ïa u kin sum ïa u haba u dang ïathuhlypa.
4“Te kan jia ha kata ka sngi, ba ki nongïathuhlypa kin lehrain uwei uwei baroh ïa la ka jingithuhpaw, haba u ïathuhlypa; lymne kin ym phong ïa ka jaiñkup shñiuh ban shukor; 5hynrei, un ong, ‘Ngam long u nongïathuhlypa, nga long u nongrep; naba la pynlong mraw ïa nga naduh dang samla.’ 6Te uno uno un ong ha u, ‘Kiei kine ki jingmong hapdeng ki ksang'ti jong me?’ Ynda kumta, un ïathuh, ‘Kine ïa kiba la pynmong ïa nga ha ïing ki lok jong nga.’ ”
Kaba pom ïa u nongaplangbrot
7 #
Mat. 26:31; Mrk. 14:27. “To khie, ko waitlam,
pyrshah ïa u nongaplangbrot
jong nga,
bad pyrshah ïa uta u briew
uba long u lok u jong nga,”
ong U Trai ki paid.
“To pom ïa u nongaplangbrot,
te yn pynsakma ïa ki langbrot;
te ngan pynphai la ka kti
ha kiba rit.
8Te kan jia ha ka ri baroh,”
ong U Trai,
“ba ar bynta ha ka kin duh noh
bad kin ïap noh;
hynrei, shi bynta
yn pynsah ha ka.
9Te ngan ïalam
ïa kata ka shi bynta
lyngba ïa ka ding,
bad ngan pynkhuid ïa ki
kumba pynkhuid ïa ka rupa,
bad ngan phrang ïa ki
kumba phrang ïa ka ksiar:
kin khot ïa ka kyrteng jong nga,
bad ngan shahshkor ïa ki:
nga ngan ong,
‘U long u paidbah jong nga’;
ki ruh kin ong,
‘U Trai u long U Blei
jong nga.’ ”
Currently Selected:
SEKHARAÏAH 13: KHB
Highlight
Share
Copy
Want to have your highlights saved across all your devices? Sign up or sign in
The Bible Society of India