MARIKO 9
9
1Khandi Yesu nababoolela ari, “Emuboolela toto mbu, baliho abandi khubasinjiile hano, shibakhafwekhwo ta, okhuula olwa bakhabe nibaluutsi Obwami bwa Nyasaye nibwitsile nende oluyali.”
Okhukalulwa khwelikoondo lia Yesu
(Mat. 17:1-13; Luka 9:28-36)
2 #
2 Pet. 1:17,18 Kho olunyuma lwetsinyanga tsisasaba, Yesu yabukula Petero, Yakobo, nende Yohana, nabemilila nibanina khushikulu eshiraambi ewa bali butswa bonyene. Mana nakalulwa likondolie imbeli wabwe. 3Kho ebifwalobie nibing'inang'ina, nibiba ebilafu tswe okhushilakhwo shinga lwomundu wokhushialo khuno anyala okhubiosia nibilaba. 4Mana Eliya nende Musa nibabaloleshela, ne bali nibaboolanga nende Yesu. 5Kho Petero naboolela Yesu ari, “Omwami, nobulayi shila khuli hano! Lekha khumbashe hano amatili kataru, elala elilio, elala elia Musa, nelindi elia Eliya.” 6Petero yaboola ario shichila shiyali namanyile eshianyala okhuboola tawe, okhuba bali nali nende oburi obunji muno.
7 #
Mat. 3:17; Mrk. 1:11; Luka 3:22 Mana lileesi nilitsa nilibafwimba nibaba mushiinikha shialio, nakwo omwoyo nikurula mwileesi elo nikuboola kuri, “Uno niye Omwana wanje omuheelwa, mumuhulilenje!” 8Mana khandi olwa bahenga bwangu, shibalolakhwo omundu yesi yesi nali ninabo ta, habula balola Yesu yenyene.
9Ne olwa bali nibakholomokhanga okhurula khushikulu, Yesu yabakaania mbu balaboolelakhwo omundu yesi yesi aka bali nibaluutsi tawe, okhuula olwa Omwana womundu yakhabe nalamuushe okhurula mubafu.
10Kho nabo nibaholeela nelikhuwa lienelo bonyene, nibarebana abeene khu beene bari, “Eshisina shielikhuwa mbu, ‘Okhulamukha okhurula mubafu’ nishiina?” Ne shibaboolelakhwo omundu yesi yesi likhuwa elo tawe. 11#Mal. 4:5; Mat. 11:14Nibareeba Yesu bari, “Shichila shiina abahandichi bamalako baboolanga mbu okhuula omulakusi Eliya aranjilile okhwitsa?”
12 #
Sira 48:10
Naye Yesu nabakalusia ari, “Toto mwene Eliya aranjilila okhwitsa okhukaasia narechekha ebindu biosi. Ne kakhahandikwa karie khu Omwana womundu mbu, okhuula abirire mumatinyu amanji khandi mbu alobwe nabandu? 13Nebutswa isie emuboolela mbu, Eliya oyo yamala okhwitsa, ne abandu bamukholela koosi kabeene balola mbu namalayi okhumukholela, shinga olwa Amahandiko kahandikwa khuye.”
Yesu ahonia omusiani owali neshishieno
(Mat. 17:14-21; Luka 9:37-43a)
14Ne olwa bachelela ewa abeechibe bandi bali, balola omukanda kwabandu omukhongo nikubotokhaane abeechi abo. Ne abahandichi bamalako bali nibayingananga ninabo. 15Ne habwene nahabwene olwa abomukanda abo balola Yesu, besundukha muno, nibatsia tsimbilo ewa yali okhumushiesia. 16Mana Yesu nabareeba ari, “Eshia muyingananga ninabo nishiina?”
17Kho Mulala khubomukanda abo namukalusia naboola ari, “Omwechesia, ekhureerere omusiani wanje, shichila ali neshishieno shiokhwikala amarwi. 18Buli lwosi olwa shimutiilanga shimukhupanga hasi, lifilo lirula mumunwakwe, alumasia ameenoke halala, ne omubilikwe kwosi kuumilana kaka kaka okwolanyala okhufumba tawe. Ne embooleele abeechibo okhushirusia, nebutwa bakhayilwe.”
19Mana Yesu nabakalusia ari, “Oo, inywe olwibulo lubula obusuubili luno! Ndalabetsanga ninenywe okhuula liina? Ndalamwisumilisilia okhuula liina? Ndeerere omwana tsana oyo!” 20Kho nibareerera Yesu omusiani oyo.
Ne olwa eshishieno eshio shialola Yesu, habwene nahabwene shiatechesia omusiani oyo, nishimukwisia hasi nishimukalakasia, ne lifilo nilirula mumunwakwe. 21Mana Yesu nareeba Samwana omwana oyo ari, “Noluhoono shiina olwa amalile nali ari nanwa?”
Naye samwana omwana nakalusia ari, “Okhurula niyebulwa. 22Ne akhandi akhanji shimukhupanga mumulilo nende mumaatsi, nishienya okhumwiira. Ne noba nonyala okhukholakhwo eshindu shiosi, khulolelekhwo tsimbabasi mana okhukhoonye.”
23Yesu namuboolela ari, “Noba nonyala! Ebindu biosi binyalikha khumundu ousuubila.”
24Habwene nahabwene samwana omwana nayiiba naboola ari, “Esuubiile! Khoonyakhwo obulasuubila bwanje!”
25Ne Yesu olwa yalola mbu, abomukanda betsanga nibelukha, yakondeshela eshishieno eshio nashiboolela ari, “Iwe eshishieno eshiokhwikala amarwi nende eshiokhuhanda olulimi, ekhulaka mbu, orule mumwana uno ne olamwinjilamwo khandi tawe.”
26Ne olunyuma lwokhwayula obutinyu, eshishieno eshio shiakwisia omusiani oyo hasi nishimurulamwo, ne nalambaala hasi shinga oufwile. Kho abanji khubaliho nibaboola bari, “Afwile.” 27Nebutswa Yesu yamutiila omukhono namubuusia, ne omusiani oyo nasinjila.
28Ne olwa Yesu yali niyenjiile munzu, abeechibe nibamureeba mabiswi bari, “Shichila nishiina ifwe nikhukhaywa okhurusia eshishieno eshio?”
29Naye nabakalusia ari, “Eshishieno shieimbia eyo shishinyala okhurusibwa nende eshindu shindi shiosi shiosi ta, habula amasaayo nende okhwiyima ebiokhulia khulwa okhusaaya.”
Yesu aboola khandi khukokhufwakhwe
(Mat. 17:22-23; Luka 9:43b-45)
30Yesu nabeechibe nibarulaho nibabirira mu Galilaya. Ne nalenya mbu omundu yesi yesi amanye aha yali tawe, 31okhuba yali niyechesinjia abeechibe, nababoolela ari, “Omwana womundu yetsa okhuhaanwa mumakhono kabandu ne balamwiira. Ne olwa alaba niyeerirwe namalile tsinyanga tsitaru, alalamukha.”
32Nebutswa shibamanya eshisina shiamakhuwa ako ta, mana nibaria okhumureeba.
Ouli omukhongo mubwami bwa Nyasaye niwiina?
(Mat. 18:1-5; Luka 9:46-48)
33Yesu nabeechibe niboola Kaperinaumu. Ne olwa yali niyenjiile munzu, yareeba abeechibe ari, “Muyingaanenje shiina khunjila?”
34 #
Luka 22:24
Nebutswa baholeela, shichila bali nibayingaanenje abeene khu beene mbu, omukhongo muno okhushila boosi niwiina? 35#Mat. 20:26,27; 23:11; Mrk. 10:43,44; Luka 22:26Ne yamala niyekhala hasi, nalanga abeechibe ekhumi nababili ne nababoolela ari, “Omundu yesi yesi niyakhenya okhuba owambeli, okhuula abe owokhumalilikha muboosi khandi okhuula abe omukhalabani wa boosi.” 36Kho nabukula omwana omutiiti namura hakari wabwe, namutiila mumakhonoke nababoolela ari, 37#Mat. 10:40; Luka 10:16; Yoh. 13:20“Omundu yesi yesi owinjisia omwana shinga uno muliira lianje, aba niyanyinjisia isie. Ne omundu yesi yesi ounyinjisia, shiyanjisia isie sienyene ta, habula yenjisiye isie nende owaruma.”
Oulakhwikaana ifwe ta, nowokhulubeka lwefwe
(Luka 9:49-50)
38Yohana naboolela Yesu ari, “Omwechesia, khwalutsi omundu undi narusinjia ebishieno muliiralio, nikhumukaania, shichila shiyali owomukanda kwefwe tawe.”
39Ne Yesu nababoolela ari, “Shimulamukaanie ta, shichila abulaho omundu yesi yesi oukhola akamangaliimwa muliira lianje, ne niyakhamala okhukakhola, akalukhane habwene nahabwene okhuboola amakhuwa amabi khwisie tawe. 40#Mat. 12:30; Luka 11:23Okhuba oulali omusuku wefwe ta nowolubeka lwefwe. 41#Mat. 10:42Okhuba emuboolela toto mbu, omundu yesi yesi oumuhelesia eshikombe shiamaatsi, shichila muli abalondi banje, shiyakhakosiekhwo eshihaanwashie kata nahatuutu tawe.
Amateemo akenjisinjia omundu mubwonooni
(Mat. 18:6-9; Luka 17:1-2)
42“Ne omundu yesi yesi naba nachila mulala khubaana abatiiti abasuubilanga mwisie, okhwonoona, bwakhabeele obulayi khu watsana oyo okhubohwa lichina likhongo mwikosilie ne nasukunwa munyanza. 43#Mat. 5:30Ne omukhonokwo, nikuba nikukhukhola okhwonoona, okukhalache kuruleho. Nobulayi okhwinjila mubulamu bweinziayo nobula omukhono mulala, okhushila okhutsia mumulilo kulasimanga ta noli nemikhono chibili.
[ 44“Ebweneyo ‘Tsinyende etsibalitsanga shitsifwitsanga ta, khandi omulilo okubasambanga, shikusimibungwa tawe.’] 45Ne eshilenjeshio nishiba nishikhukhola okhwonoona, oshikhalache shiruleho. Shichila nobulayi okhwinjila mubulamu bweinziayo neshilenje shilala, okhushila okhutsia mumulilo kulasimanga ta nebilenje bibili.
[ 46“Ebweneyo, ‘Tsinyende etsibalitsanga shitsifwitsanga ta, khandi omulilo okubasambanga, shikusimibungwa tawe.’] 47#Mat. 5:29Ne khandi imoniyo niyiba niyikhukhola okhwonoona, ochitsomole ochirusie, nobulayi okhwinjila Mubwami bwa Nyasaye noli neimoni ndala, okhushila okhutsia mumulilo noli netsimoni tsibili. 48#Isa. 66:24Ebweneyo ‘Tsinyende etsibalitsanga shitsifwitsanga ta, khandi omulilo okubasambanga shikusimibungwa tawe’.
49“Okhuba buli mundu yakhasiiywe nomulilo shinga lwomusango omusambe kusiiyungwa nomunyu. 50#Mat. 5:13; Luka 14:34,35Omunyu nomulayi, nebutswa nikuba nitsinziba, wakhakalusiamwo orie eshinosi shiakwo eshio? Mube nomunyu mwinywe khandi mube nomulembe abeene khu beene.”
Currently Selected:
MARIKO 9: OLUPR
Highlight
Share
Copy
Want to have your highlights saved across all your devices? Sign up or sign in