MARIKO 8
8
Yesu aliisia abandu ebikhumila bine
(Mat. 15:32-39)
1Ebise ebio, lwomukanda kwabandu omukhongo kwali nikwikhung'asiye halala khandi, ne shibali nende eshiabalia ta, Yesu yalanga abeechibe ne nababoolela ari, 2“Endolelanga abandu bano tsimbabasi, shichila babeele ninasi bulano khulwa tsinyanga tsitaru ne shibali nende eshia balia ta. 3Kho nebaseebula mbu batsie nango wabwe nibali inzala bario, banyala okhuula khunjila botoshelela, okhuba abandi khubo barulile ehale!”
4Mana abeechibe nibamureeba bari, “Omundu yakhaliisia arie abandu bano boosi ebiokhulia mana bekure mushitsiimi mwa khuli muno?”
5Naye nabareeba ari, “Muli nemikaate chinga?” Nibakalusia bari, “Musafu.”
6Kho nalaka abandu abo boosi okhwikhala hasi. Mana nabukula emikaate musafu echio, nakhupila Nyasaye orio, nachisonyola nahelesia abeechibe okhukabulila abandu, nabo abeechi abo nibakhola bario. 7Khandi balikhwo norunyeni orutiiti rutuutu. Yesu narusabila ikhabi ne nalaka abeechibe mbu, okhuula rwosi khandi rukabulilwe abandu. 8Mana buli mulala khubo yalia niyekura, ne bali abandu abahela ebikhumila bine (4,000). 9Mana abeechibe nibabunjelesia ebitonye ebiatong'a nibitsula ebimwelo musafu. 10Kho Yesu nabaseebula, ne habwene nahabwene niyenjila muliaro lwangu halala nabeechibe nibatsia mungongo tsia Dalimanutsa.
Abafarisayo benya mbu Yesu akholekhwo eshilolelo shiamangaliimwa
(Mat. 16:1-4)
11 #
Mat. 12:38; Luka 11:16 Mana Abafarisayo bandi nibetsa khu Yesu ne nichaaka okhuyingana ninaye. Nibamureeba mbu, akholekhwo eshilolelo shiamangaliimwa, nibamureka okhwenya okhumanya nikali mbu ali nobunyali okhurula khu Nyasaye. 12#Mat. 12:39; Luka 11:29Nebutswa Yesu niyeshia amahumo amasiro, ne naboola ari, “Mbushiina abandu bolwibulo luno benyanga eshilolelo shiamakana? Emuboolela toto mbu, eshilolelo shiamakana shishilamanyibwakhwo abandu bolwibulo luno tawe.”
13Mana nabalekha, niyenjila muliaro, ne niyambukha natsia injelekha undi weinyanza.
Limela lia Abarisayo nende elia Herode
(Mat. 16:5-12)
14Ne abeechibe bali nibebiliile okhubukula emikaate echibahela, bali butswa nende omukaate mulala kwonyene muliaro. 15#Luka 12:1Yesu nabachetsiyia naboola ari, “Mube meeso, nimwiliinda abeene okhurula khwimela elia Abafarisayo nende elia Herode.”
16Nabo nibachaaka okhuboolelana abeene khu beene bari, “Shikhulikhwo nemikaate tawe.”
17Yesu yali namanyile akabali nibaboolanga, ne nabareeba ari, “Mureebananga murie mbu, shimulikhwo nemikaate ta? Mushili kata okhumanyilisia okhuula khushisina ta? Emioyo chienywe chishiumilaane butswa? 18#Yer. 5:21; Ezek. 12:2; Mrk. 4:12Muli netsimoni ne shimulolanga ta? Muli namarwi ne shimuhulilanga ta? Khandi inywe shimwitsulilanga ta? 19Olwa ndasonyola emikaate chirano khulwa abandu ebikhumila biraano (5,000), mwabunjelesia ebitonye nibitsula ebimwelo binga biosi halala?” Nibakalusia bari, “Biali ebimwelo ekhumi nabibili.”
20“Khandi olwa ndasonyola emikaate musafu khulwa abandu ebikhumila bine (4,000), mwabunjelesiye ebitonye nibitsula ebimwelo binga biosi halala?” Nibakalusia bari, “Musafu.”
21Khandi nabareeba ari, “Kata okhuula bulano mushili okhumanyilisia ta?”
Yesu ahonia omubofu owa Betsisaida
22Mana niboola Betsisaida, ne abandu bandi nibareerera Yesu omubofu nibamusaaya mbu nachama, amutiilekhwo amakhonoke. 23Kho Yesu natiila omubofu oyo omukhono namurusia mwitaala. Ne olwa yali nafutsile amare khumoni tsiomubofu oyo, Yesu yamala natsitiilakhwo amakhono, ne namureeba ari, “Ololangakhwo eshindu shiosi shiosi?” .
24Mana omundu oyo nahenga ikulu ne naboola ari; “Endolanga abandu habula balolekhanga shinga emisaala echichendanga.”
25Kho Yesu khandi natiila amakhonoke khumoni tsiomundu oyo, ne bulano omundu oyo nahenga niyomisia tsimonitsie mana nitsihona, ne nalola ebindu biosi obulayi. 26Mana Yesu namuseebula mbu akalushe nangowe shilunji, nende okhumulachilisia ari, “Shiolenjilakhwo kata mwitaala lia Betsisaida tawe.”
Petero arumbula Yesu okhuba Kristo
(Mat. 16:13-20; Luka 9:18-21)
27Mana Yesu narula nabeechibe, nibatsia mumataala ka Kaisaria Filipi. Nibali khuluchendo olwo, Yesu nabareeba ari, “Mboolelekhwo, abandu baboolanga mbu, nisie wina?” 28#Mrk. 6:14,15; Luka 9:7,8Nabo nibamukalusia bari, “Baboolanga mbu niwe Yohana Omubatiisi, abandi mbu niwe omulakusi Eliya, nabo abandi bari, oli mulala khubalakusi.” 29#Yoh. 6:68,69Ne nabareeba ari, “Nenyu muboolanga mbu nisie wina?” Petero nakalusia ari, “Niwe Kristo.” 30Naye nabakaania obutinyu mbu shibalaboolelakhwo omundu yesi yesi tawe.
Yesu aboola khukokhunyakhana, okhufwa nokhulamukhakhwe okhurula mubafu
(Mat. 16:21-28; Luka 9:22-27)
31Mana Yesu nachaaka okhubeechesia ari, “Omwana womundu okhuula alabirira mumatinyu amanji, ne alalobwa nabakhulundu babesaaliisi nende abahandichi bamalako. Aleerwa, nebutswa khunyanga yakhataru alalamukha.” 32Yesu yaboola amakhuwa ako habulafu obulabisakhwo tawe. Mana Petero naye nayila Yesu halubeka ne nachaaka okhukondeshela nende okhumukaania. 33Nebutswa Yesu yashiukhana, nahenga abeechibe, nakondeshela Petero namukania naboola ari, “Rula ahendi, iwe Setani! Okhuba shioli owelubeka lwa Nyasaye ta, habula oli elubeka lwabandu.”
34 #
Mat. 10:38; Luka 14:27 Mana Yesu nalanga abomukanda, nabeechibe mbu betse khuye. Ne nababoolela ari, “Omundu yesi owenya okhunondakhwo, okhuula yekane omwene, yetuushe omusalabakwe, mana yanondekhwo. 35#Mat. 10:39; Luka 17:33; Yoh. 12:25Okhuba owenya okhuhonia obulamubwe omwene, alabukosia. Nebutswa oukosia obulamubwe khulwanje nende khulwa Injiili, alabuhonia. 36Nakeinganga shiina omundu okhunyoola eshialo shiosi, ne, akosie obulamubwe? 37Shiakhaba shiina eshiomundu yakhahaana mushilenje shiobulamubwe? 38Kho omundu yesi yesi oufimbilwa isie omurwe khandi oufimbilwa omurwe amakhuwa kanje mulwibulo luno olwobuyilani khandi olwobwonooni, Omwana womundu naye alamufimbilwa omurwe olwa yetsa muluyali lwa Samwana, halala nende olwa abamalaika abatakatifu.”
Currently Selected:
MARIKO 8: OLUPR
Highlight
Share
Copy
Want to have your highlights saved across all your devices? Sign up or sign in