LUKA 1
1
Akaranjilila
1Yule khu owoluyali Tseofilo.
Abandu abanji bateema aka banyala koosi okhuhandika amakhuwa kekholekha mwifwe. 2Bahandika khu aka khwahulila okhurula khu abakalola nikekholekha okhurula mukhuchaaka khwako mana khandi nibakayaala. 3Khulweshio, okhuba isie omwene ndarunilisiye obulayi amakhuwa ako koosi okhurula mukhuchaaka khwako, ne lindoleshela siesi khandi nilili lilayi mbu, ekhuhandichile obulayi iwe owoluyali Tseofilo, nekhwinoosia shinga olwa kekholekha. 4Ekholanga endio kho mbu iwe omanyile elala obwatieli bwamakhuwa kawechesibwa.
Omumalaika Gaburieli arumbula akokhwibulwa khwa Yohana Omubatiisi
5 #
1 Akak. 24:10
Mutsinyanga tsia Herode yali omuruchi weshialo shia Yuda, yaliho omwisaaliisi owalangwa mbu Zakaria, owomulwibulo lwobwisaaliisi lwa Abiya. Omukhasiwe yalangwa mbu Elisabeti, owomulwibulo lwa Haroni. 6Boosi bali abalunjishi imbeli wa Nyasaye, khandi bamenyanga okhulondana nende amalako nende amechesio aka OMWAMI Nyasaye nibalalikhwo neshikha shiosi shiosi tawe. 7Habula shibalikhwo nende omwana ta, okhuba Elisabeti yali omukumba khandi boosi bali abakofu muno.
8Olundi, olwa inyanga ya Zakaria, eyokhukhalabana muhekalu emilimochie chiobwisaaliisi yola, 9Zakaria yalobolwa munjila yokhukhupa ikha, okhutsia muhekalu eya OMWAMI Nyasaye okhusamba obubane khushimalilo shiemisango, shinga olwa eshiima shiobwisaaliisi shialinji. 10Olwa obubane bwali nibusabungwa, abandu abanji bali elwanyi nibasaayanga.
11Omumalaika owa OMWAMI Nyasaye, owali nasinjiile khulubeka lwomukhono musaatsa kweshimalilo shiemisango shiobubane, yaloleshela Zakaria. 12Ne olwa Zakaria yamulola, yesundukha muno, mana oburi nibumutiila. 13Nebutswa omumalaika oyo yamuboolela ari, “Shiolaria ta, Zakaria! Nyasaye ahuliile amasaayoko, ne omukhasiwo Elisabeti nakhwibulile omwana omusiani. Nawe nomukulishe eliira mbu, Yohana. 14Niwikhoye notsaatsahala, khandi abandu bandi abanji nibekhoye lwomwana oyo nabe niyebuulwe. 15#Obub. 6:3Okhuba Yohana aliba omundu omukhongo mumoni etsia OMWAMI Nyasaye. Shiyakhanywekhwo idivai, kata eshiokhunywa shindi shiosi shiosi eshiokhumeesia tawe. Khandi niyetsulemwo Roho Omutakatifu kata nashili munda mwa nyinamwana. 16Ne nakhole abandu ba Isiraeli abanji okhumukalushila OMWAMI Nyasaye wabwe. 17#Mal. 4:5,6; Sira 48:10,11Ne niyetsuulemwo Roho Omutakatifu nende obunyali shinga bwomulakusi Eliya yali nabwo, naranjilile okhutsia okhusaasania abasamwana abaana nende abaana babwe halala nende okhukalusia abakhayi, nabakhola okhuyililisia akobulunjishi, Yesu mwene nashili okhwitsa. Ne alirecheshela Omwami Yesu abandu, Yesu mwene nashili okhwitsa.”
18Mana Zakaria nareeba omumalaika oyo ari, “Nishiina eshilachila emanye mbu amakhuwa ako nakobwatoto? Okhuba isie endi omukofu, ne khandi omukhasi wanje nomushiele muno.” 19#Dan. 8:16; 9:21; Tob. 12:15Omumalaika oyo namukalusia naboola ari, “Nisie Gaburieli, ousinjilanga imbeli wa Nyasaye. Isie erumilwe okhuboola ninawe nende okhukhureerera amakhuwa amalayi ako. 20Ne okhuba shiokasuubililiile ta, lola, olulimilwo lulahanda ne khandi shiolanyalilwa okhuboola ta, okhuula olwa amakhuwa kanje kekhubooleele ako, kakhoosibwe ebise biako nibiakhoola.”
21Abandu abali nibali elwanyi weihekalu, nibashilindililanga Zakaria bahuka muno shichila yali nashindile muhekalu. 22Ne olwa yarulamwo, shiyali ounyala okhuboola ninabo ta, ne nibamanya mbu, amanyibwe lilolelo muhekalu. Yabachelela butswa amakhuwa namakhonoke, okhuba shiyali ounyala okhuboola tawe.
23Ne olwa tsinyangatsie tsiokhukhalabana muhekalu tsiali nitsihwele, Zakaria yarula natsia ingowe. 24Ne olunyuma lwetsinyanga tsindiiti, omukhasiwe Elisabeti yahela inda, mana khulwemiesi chirano nalarulakhwo elwanyi tawe. Yebisa butswa munzumwe ne naboola mumwoyokwe ari, 25“Bulano, Omwami yanzitsuliile, ne yarusiyekhwo tsisoni mubandu!”
Omumalaika Gaburieli arumbula akokhwibulwa khwa Yesu
26Mumwesi kwakhasasaba okhurula olwa Elisabeti yali nahelile inda, Nyasaye yaruma omumalaika Gaburieli mwitookho lilangwa mbu, Nazareti, mulukongo lwa Galilaya. 27#Mat. 1:18Nyasaye yamuruma okhutsia khumukhaana omushisila, owali nashikhwebungwa nende omusaatsa, owalangwa mbu Yosefu, owomulwibulo lwa Daudi. Ne eliira liomukhaana omushisila oyo liali, Mariamu. 28Omumalaika oyo natsia naboolela omukhaana oyo ari, “Omulembe kube khwiwe! Omwami ali ninawe khandi akhuhelesiye tsikhabi tsinyinji!”
29Mariamu yesundukha muno khulwa amakhuwa aka omumalaika oyo yali namubooleele, okhuba shiyamanya eshisina shiamakhuwa ako tawe. 30Mana omumalaika oyo namuboolela ari, “Shiolaria ta, Mariamu, okhuba OMWAMI Nyasaye akhukoosiye. 31#Mat. 1:21Ne lola, olahela inda, ne olebula omwana omusiani, mana olamukulikha eliira mbu, Yesu. 32#2 Sam. 7:12,13,16; Isa. 9:7Omwana tsana oyo yakhabe omundu woluyali khandi yakhalangwe mbu, Omwana wa Nyasaye, ouli Omukhongo Muno. OMWAMI Nyasaye Yakhamukhole okhuba Omuruchi, shinga olwa Daudi kuukanyene yali. 33Ne yakhabe omuruchi khubolwibulo lwa Yakobo okhuula inziayo. Khandi oburuchibwe shibwakhabekhwo neshiakamo tawe!”
34Mariamu naboolela omumalaika oyo ari, “Ako kakhanyalikha karie, olwa isie eshili omushisila?” 35Naye Omumalaika oyo namukalusia ari, “Roho Omutakatifu alakhwitsila, nabwo obunyali bwa Nyasaye ouli Omukhongo Muno bulaba khwiwe. Khulweshio, omwana oulebulwa oyo alalangwa mbu, omutakatifu, Omwana wa Nyasaye. 36Ne lola, kata omwikhowo Elisabeti mubushielebwe yesi ali inda yomwana omusiani, eyemiesi chisasaba, ne abandu bali nibamanya mbu nomukumba. 37#Obucha. 18:14Okhuba khu Nyasaye, buli shindu shinyalikha.”
38Mariamu naboola ari, “Esie endi omukhalabani owa OMWAMI Nyasaye, lekha kekholeshe khwisie shinga olwoboolile.” Mana omumalaika oyo narulaho natsia.
Mariamu acheniha Elisabeti
39Olunyumakhwo, Mariamu yarula natsia bwangu mwitookho liomushialo shiomubikulu, eshia Yuda. 40Niyenjila munzu mwa Zakaria, nashiesia Elisabeti. 41Ne olwa Elisabeti yahulila amashiesio aka Mariamu, omwana yerunda mundamwe, mana Elisabeti niyetsulwamwo Roho Omutakatifu, 42#Yudt. 13:18ne naboola nomwoyo omukhongo ari, “Oli oweikhabi muno mubakhasi boosi, khandi omwana owolebula noweikhabi muno! 43Ne likhuwa likhongo lino linzitsiile lirie mbu, nyinamwana Omwami wanje yetsile okhunjeniha? 44Okhuba lola, olwa embuliile amashiesioko, ne omwana niyerunda munda mwanje khulwa okhwikhoya. 45Oli oweikhabi okhuba osuubile mbu, aka Omwami yakhuboolela kaloosibwa!”
Olwimbo lwa Mariamu lwokhwitsoomia Nyasaye
46Mana Mariamu naboola ari,
“Omwoyo kwanje kwitsoomia Omwami,
47khandi kwikhoyela Nyasaye,
omuhonia wanje.
48 #
1 Sam. 1:11
Shichila yanzitsuliile isie
omukhalabaniwe omuholo!
Okhurula bulano abandu boosi
balananga mbu, oweikhabi.
49Shichila Nyasaye owobunyali,
yakholeele akamakana,
eliiralie nalio nilitakatifu.
50Tsimbabasitsie tsibetsangaho khubenabo
abamuriitsanga okhuula khutsinzibulo tsiosi.
51Yakholile akamakana mubunyalibwe,
nasalaasia abechinjimisi mubuyililisi bwomumioyo chiabwe.
52 #
Ayub. 5:11; 12:19; Sira 10:14 Yayiniye abaruchi khubifumbi biabwe bioburuchi,
ne niyemekha abaholo.
53Abali inzala yabekusiye nende ebindu ebilayi,
nabo abayinda yabaseebuule amakhono amakhaya.
54Yayetsuliile obusuubisiebwe bwetsimbabasi khubakuuka befwe
ne nahabina Abaisiraeli, abakhalabanibe.
55 #
Obucha. 17:7
#
1 Sam. 2:1-10
Yayetsuliile aketsimbabasitsie
khu Aburahamu nende abolwibulolwe ebisoni nebisoni!”
56Mana Mariamu namenya nende Elisabeti khulwemiesi chitaru, ne nakalukha ewuwe.
Okhwibulwa khwa Yohana Omubatiisi
57Mana induukho ya Elisabeti okhwibula omwana niyula. Ne niyebula omwana omusiani. 58Abamenyanibe nende abekhobe nibahulila shinga olwa OMWAMI Nyasaye yali namuhelesiye tsikhabi tsinyinji, ne boosi nibekhoya halala ninaye. 59#Abal. 12:3Mana khunyanga yomunane, nibetsa okhusheba omwana tsana. Ne bali nibenya okhumukulikha eliira lia samwana mbu, Zakaria. 60Nebutswa, nyinamwana nakaana naboola ari, “Tawe. Alalangwa mbu, Yohana.”
61Nibamuboolela bari, “Shimulikhwo nomwikho mwinywe oweliira elo ta!” 62Kho nibachelela samwana namakhono okhumureeba mbu, aboole eliira liomwana akhoyile okhukulikhwa.
63Naye Zakaria nabasaba akhabao khokhuhandikakhwo, nahandikakhwo ari, “Alalangwa mbu, Yohana.” Mana boosi nibahuka muno. 64Habwenaho olulimilwe nilubohololokha, nachaaka okhuboola khandi, ne niyetsoomia Nyasaye. 65Abamenyanibe nibaba noburi obunji, mana amakhuwa ako nikasalaana mutsingongo tsiomushialo shiomubikulu eshia Yuda eshio shiosi. 66Boosi abakahulilakhwo, nibakayililisia mumioyo chiabwe nibeereeba bari, “Omwana uno aliba owambia shiina?” Okhuba obunyali obwa OMWAMI Nyasaye bwali muye.
Olwimbo lwa Zakaria
67Roho Omutakatifu niyetsula mu Zakaria, samwana Yohana, mana niyetsoomia Nyasaye naboola ari,
68“Khwitsoomie OMWAMI Nyasaye,
Nyasaye wa Isiraeli,
okhuba yacheniihe abandube khandi nabanunula.
69Yakhuhelesiye omuhonia wobunyali,
okhurula mulwibulo lwomukhalabaniwe Daudi.
70Yalachilisia khale okhubirira
mubalakusibe abatakatifu mbu,
71alikhuhonokosia okhurula mubasuku befwe,
nende okhurula
khubunyali bwabakhusila ifwe.
72Yaboola mbu, alibeela abakuuka befwe tsimbabasi,
nende okhuliinda indakanoye indakatifu.
73Okhubirira mushitsubo eshiayetsubila Aburahamu kuuka wefwe,
74yasuubisia mbu, alikhuhonia okhurula khubasuku befwe,
mana khumukhalabanile nikhubula oburi,
75kho mbu, khube abatakatifu khandi
khube abalunjishi imbeliwe mubulamu bwefwe bwosi.
76 #
Mal. 3:1
“Nawe iwe mwana wanje, olalangwa mbu,
omulakusi wa Nyasaye, Omukhongo Muno.
Olaranjilila okhutsia okhukaasia tsinjila etsia Omwami Yesu abirirakhwo,
omwene nashili okhwitsa,
77okhuboolela abandube mbu,
balahonibwa khulwa okhuleshelwa obwonooni bwabwe.
78Nyasaye wefwe nowetsimbabasi khandi nomuholo,
yakhakhole obulafu obuyia bwobuhonia okhukhwashila ifwe,
79 #
Isa. 9:2
ne bwakhaashe okhurula mwikulu,
khuboosi abamenyanga
mushiilima shielifwa,
nende okhukhwimilila khunjila yomulembe.”
80Mana omwana oyo nakhula, niyemeeta amaani mumubili nende muroho. Namenya mushitsiimi okhuula khunyanga eya yalolekha habulafu khubandu ba Isiraeli.
Currently Selected:
LUKA 1: OLUPR
Highlight
Share
Copy
Want to have your highlights saved across all your devices? Sign up or sign in