LUKA 2
2
Okhwibulwa khwa Yesu Kristo
(Mat. 1:18-25)
1Mutsinyanga etsio, omuruchi Agusito wa Roma yahaana lilako naboola mbu, abandu boosi abali hasi woburuchi bwa Roma babalwe. 2Khuno khwali okhubalwa khwambeli, okhwakholwa olwa Kurenio yali omukafuna wa Siria. 3Mana abandu boosi nibatsia okhuhandichisibwa khulwa okhubalwa, buli shiamulala mwitookho lia yebulwamwo. 4Mana Yosefu yesi narula mwitaala lia Nazareti elili mu Galilaya, natsia mwitookho lia Daudi, elia Betselehemu elili mu Yuda, okhuba Yosefu yali womulwibulo lwa Daudi. 5Yosefu yatsia okhwihandichisia halala nende Mariamu omukhasiwe, owa yali niyenyanga okhuteshia. Ne Mariamu yali nali inda. 6Ne olwa bali nibali Betselehemu, inyanga ya Mariamu okhwibula niyula. 7Niyebula omwana omusiani omwikulanda, ne namukanyila mungubo tsiomwana omutoro, namwalisia mulwelo, okhuba obwiyangu shibwalikhwoho munzu yabacheni tawe.
Abaayi nende abamalaika
8Ne mulukongo olwo balimwo abaayi abekhalanga mushiayo eshilo shiosi nibalindanga emiruko chiabwe. 9#Tob. 5:4Mana omumalaika owa OMWAMI Nyasaye nabaloleshela, ne oluyali olwa OMWAMI Nyasaye nilubaashila tsimbeka tsiosi. Nabo nibaria muno. 10Nebutswa omumalaika oyo nababoolela, ari, “Shimularia ta! Okhuba lole, emuleereere amakhuwa amalayi akokhwikhoya akalareera omwikhoyo omukhongo khubandu boosi. 11Shichila leelo luno mwitookho lia Daudi, mwibuliilwe omuhonia wenywe, niye Kristo Omwami. 12Eshilolelo eshilamumanyia amakhuwa kano njieshino mbu, mulanyoola omwana omutoro nakanyiilwe mungubo tsiabaana abatoro, ne niyalisiibwe mulwelo.” 13Mana nibetsukhana butswa omukanda omukhongo okwabamalaika bomwikulu nikuli halala nende omumalaika oyo, nibetsoominjia Nyasaye nibaboola bari,
14“Oluyali lube khu Nyasaye ikulu mwikulu,
nakwo omulembe kube khushialo, mubandu abamuchamisinjia.”
15Ne olwa abamalaika abo barulaho nibakalukha mwikulu, abaayi abo baboolelana abeene khubeene bari, “Chende khutsie Betselehemu, khulole amakhuwa kekholeeshe kano, aka Omwami akhumanyiye.” 16Mana nibatsia bwangu, ne nibanyoola Mariamu nende Yosefu nende omwana owali niyalisiibwe mulwelo. 17Ne olwa abaayi bali nibaluutsi omwana oyo, baboolela Mariamu nende Yosefu amakhuwa koosi aka omumalaika oyo yali naboolile khumwana oyo. 18Boosi abahulilakhwo amakhuwa kabaayi abo bahuka muno. 19Nebutswa Mariamu yatsiililila okhuyililisia amakhuwa ako koosi mumwoyokwe. 20Abaayi nabo nibakalukha ewabwe nibembanga nibetsoomia Nyasaye, khulwa koosi aka bali nibahuliile khandi nibaluutsi, shichila kali butswa shinga lwomumalaika oyo yali nababooleele. .
Okhukulikhwa khwomwana Yesu
21 #
Abal. 12:3;
Luka 1:31
Ne olunyuma lwetsinyanga munane, lwomwana tsana oyo yali nashebilwe, yakulikhwa eliira mbu, Yesu, eliira eliomumalaika yali niyamukulikha Mariamu nashili kata okhuhela inda.
Yesu ayilwa muhekalu
22Ne tsinyanga tsiola etsia Yosefu nende Mariamu okhukhola omulukha kwokhusiiywa khwabwe, shinga olwa lilako lia Musa liali. Kho nibabukula omwana Yesu nibatsia Yerusalemu, nibamuhaana imbeli owa OMWAMI Nyasaye, 23#Okhur. 13:2,12shinga olwa kahandikwa mumalako aka OMWAMI Nyasaye mbu, “Buli eshikulanda eshisaatsa okhuula shihaanilwe OMWAMI Nyasaye.” 24#Abal. 12:6-8Khandi bali nibatsiile okhukhola omusango shinga olwa amalako aka OMWAMI Nyasaye kaboola mbu, amahusi kabili noho amakuuku amaraaka kabili.
25Mutsinyanga etsio, yaliho omundu owalangwa mbu, Simoni, owali niyamenya Yerusalemu. Yali omundu omulunjishi khandi owahelesinjia Nyasaye oluyali, ne yali nalindililanga okhuhonibwa khwa Isiraeli, ne Roho Omutakatifu yali muye. 26Ne Roho oyo yamusuubisia mbu, shiyakhafwekhwo nashili okhulola Kristo, owa OMWAMI Nyasaye yali niyasuubisia tawe. 27Simoni niyemililwe nende Roho, yenjila muhekalu. Ne olwa abebusi bomwana Yesu bamureera muhekalu okhumukholela shinga olwa amalako kenyanga, 28Simoni yabukula omwana mumakhonoke, namwitsoomia Nyasaye naboola ari,
29“Bulano, OMWAMI Nyasaye, wusiye indakanoyo,
kho lekha isie omukhalabaniwo efwe mumulembe.
30Okhuba isie omwene emalile okhulola obuhoniabwo,
31obwa warechekha mbu buloleshe khubandu boosi.
32 #
Isa. 42:6; 49:6; 52:10 Khandi obwa wakhola okhuba obulafu obwokhufwimbula injilayo khubamahanga,
nende obwokhureera oluyali
khubandubo ba Isiraeli.”
33Ne samwana omwana nende nyina omwana bahuchisibwa muno khulwa amakhuwa ka Simoni yaboola khumwana oyo. 34Simoni nabasabila ikhabi naboolela Mariamu nyinamwana Yesu ari, “Omwana uno aloboolwe nende Nyasaye khulwa okhusasibwa nende okhuhonibwa khwabandu abanji mu Isiraeli. Alaba eshilolelo eshirula khu Nyasaye, eshia abandu abanji balifukula, 35khandi eshiokhubisula amabiso kamayililisio kabwe. Nawe wakhabe neshibeela eshikhongo mumwoyokwo eshiakhakhusaalisie shinga oufimiirwe nolukanga olumemu.”
36 #
Yudt. 8:4,5 Ne yaliho omulakusi omukhasi oweliira mbu, Ana, omwenoyo yali omukhaana wa Fanueli, owomuluyia lwa Asheri. Yali omushiele muno, khandi yali niyamenya nomusaatsawe emiyika musafu okhurula nateeshibwa. 37Khandi yamenya nali omulekhwa khulwemiyika amakhumi munane nachine. Nebutswa emiyika echio chiosi, yamenyanga butswa muhekalu. Yenamilanga OMWAMI Nyasaye eshilo neshiteere, nahonga inzala nende okhusaaya. 38Ebise bienebio, yakhupila Nyasaye orio, ne naboola khukomwana oyo khuboosi abali nibalindililanga Nyasaye okhununula Yerusalemu.
Okhukalukha Nazareti
39 #
Mat. 2:23
Ne olwa Yosefu nende Mariamu bali nibamalile okhukhola akamalako aka OMWAMI Nyasaye yalaka, bakalukha Galilaya mwitaala liabwe lia Nazareti. 40Mana omwana oyo nakhula khandi naba owamaani, khandi niyetsulamwo obuchesi naye Nyasaye namuhelesia ikhabi.
Omuraaka Yesu Muhekalu
41 #
Okhur. 12:1-27; Okhuk. 16:1-8 Ne buli khumuyika abebusi ba Yesu batsitsanga Yerusalemu khulwa lisabo lia Pasaka. 42Ne olwa Yesu yali niyolile emiyika ekhumi nachibili, abebusibe batsia ninaye khulwa lisabo elo, shinga olwa bakholanga buli lwosi. 43Mana olwa lisabo liahwa, bachaaka okhukalukha nango wabwe, ne omuraaka Yesu natong'a Yerusalemu abebusibe nibalamanyile tawe. 44Bapaara mbu ali mumukanda, kho nibachenda oluchendo lweshiteere eshilamba, ne nibachaaka okhumukhaaba mubekho nende mubetsa babwe. 45Nebutswa shibamunyoola ta, kho nibakalukha Yerusalemu okhumukhaabayo. 46Khunyanga yakhataru, bamunyoola nali muhekalu niyekhaale nende abeechesia ba Abayahudi, nahulilanga akababoola naye nabareebanga amareebo. 47Ne boosi abamuhulila bahuchisibwa nende obuchesibwe khandi nende amakalusioke. 48Ne olwa abebusibe bamulola bahuka, mana nyinamwana namuboolela ari, “Mwana wanje, mbushiina nokhukhola orio? Papawo ninasi khukhukhaabilenje nikhuhenda omwoyo muno.”
49Naye nabakalusia naboola ari, “Muukhaabilenje mbushiina. Shimumanyilekhwo mbu ekhoyile okhuba munzu ya Papa wanje tawe?” 50Nabo nibalamanyilisia eshisina shiamakhuwa aka yababoolela ako tawe.
51Mana natsia ninabo, nibakalukha Nazareti, naye naba omuhulili khubo, naye nyinamwana natsiililila okhuyililisia amakhuwa ako koosi mumwoyokwe. 52#1 Sam. 2:26; Tsinj. 3:4Mana Yesu natsiililila okhukhula mumubili nende mumachesi, ne naba noluyali imbeli wa Nyasaye nende abandu boosi.
Currently Selected:
LUKA 2: OLUPR
Highlight
Share
Copy
Want to have your highlights saved across all your devices? Sign up or sign in