OSEAS 11
11
Pai agllashcacuna na cazujpipash, Taita Diosca llaquishcami
1Israelcunataca, chairalla viñaicunashna cajpica ninandami juyarcani. Ñuca churitaca, Egiptomandami cayarcani. 2Shina cayajujpipash, ñucamandaca ashtahuanmi caruyanajurca. Baal shuti dioscunamanrami, animalcunata cushpa huañuchinajurca. Yanga dioscunamanmi, sahumeriocunata carashpa cushnichinajurca. 3Shina cajpipash Efraín aillutaca, paicunatapacha rigramanda aisashpami, ali ñambi purichun yachachircani. Ashtahuangarin paicunaca ñuca cuidajushcataca, na yacharcachu. 4Ñucaca, paicunataca huascahuan aisanshnami, juyashpa ñucapajman pushamurcani. Paicunapaca, cunga tullumanda yugota anchuchij runacunashnami anchuchircani. Micunatapash, paicunapaj ñaupajpimi churarcani. 5Egipto llactamanga, na tigrangachu. Ashtahuangarin Asiria llactapi causajcunami, paicunapaca jatun mandaj tucunga. Ñucapajman tigraringapaj na munashcamandami, chashna tucunga. 6Paicunapaj pueblocunapi causajcunatapash, paicunapaj muyundi llactacunapi causajcunatapashmi, espadahuan tucuchinajunga. Paicunallata, nalita yarishpa imatapash rurashcamandami, chashna tucuchinajunga. 7Ñuca agllashcacunaca, ashtahuan ashtahuan jariyashca tucushpami, ñucata na cazunajun. Jahua pachapi causajuj Dios ninajushpapash, napacha ñucataca pipash jatunyachingapaj munanllu.
8Efraín aillu gentecunalla, ¿cangunataca imashnata jichushpa saqui ushashayari? Israelcunalla, cangunataca ¿shujcunapaj maquipichu saquisha? Cangunataca, ¿imashnata Adma shuti pueblotashna, na cashpaca Zeboim shuti pueblotashna llaquichishayari? Ashtahuangarin cangunataca, tucui shungu nanarishpami, tucui juyaihuambacha juyani. 9Ñuca fiñashpa llaquichinataca, na cachamushachu. Efraín ailluta llaquichingapajpash, na tigrarishachu. Ñucaca na runachu cani, ashtahuangarin Taita Diosmi cani. Cangunapaj chaupipica, jucha illajmi causajuni. Cai pueblomanga, na yaicushachu.
10Paicunaca, Mandaj Diosta catishpami causanajunga. Paica, león huacanshnami rimanga. León huacanshna rimashcata uyashpami paipaj huahuacunaca, indi huashajun ladomandaca, chujchushpa shamunajunga.
11Egiptomandaca alasyu animalshnami, ñapash ñucapajman shamunajunga. Asiria llactamandaca, palomashnami shamunajunga. Paicunataca, paicunapaj huasicunapillatami causachun saquisha” ninmi Mandaj Diosca.
12Efraín ailluca, llullahuanmi muyundi churahuashca. Israelcunapash, umachinahuanmi chashna churahuashca. Judá llactapi causajcunaca, Taita Dioshuan mandanajunrami. Diospajlla causajcunatapash cazunajunrami.
Currently Selected:
OSEAS 11: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.