OSEAS 12
12
Llullashcamanda, llaquichishpa charishcamandami, Efraín aillutaca shinllita tacurishca
1Efraín ailluca, huairata michinshnami purijun. Rupajlla huairata catinshnami rijun. Llullanapash, macanajushpa tucuchinapash, catilla catillami ashtahuan mirajun. Asiriocunahuanmi ari ninajurca. Aceitetapash, Egiptomanmi apanajun.
2Jacobopaj miraicuna imashna causashcashnallata llaquichingapajmi Mandaj Diosca, Judá llactapi causajcunahuanga, shinllitapacha rimarinata charin. Paicuna imata rurashcashnallatami, paicunaman cunatallata cunga. 3Jacoboca, paipaj mamapaj vijsa ucumandallatami, paipaj huauquipaj chaqui talonbi charirishpa huacharirca. Angelhuan macanajushpapash, paipaj ushaihuanmi misharca. 4Jacoboca, angelhuan ninanda macanajushpa mishashpami huacashpa, ninanda mañajurca. Jacobotaca, Bet-el shuti pushtupimi tuparirca. Chaipimi, ñucanchihuanga parlajurca. 5Ashtahuangarin Mandaj Diosca, tucuicunapaj Taita Diosmi. Paica, Mandaj Dios shutimi. 6Cangunaca, cangunapaj Taita Diospajman tigrarichi. Shujcunata llaquishpa imatapash cashcatapacha rurashpa causaichi. Cangunapaj tucui causaipi, cangunapaj Taita Diostalla yariashpa causaichi.
7“Randishpa jatuj runaca, nali pezaj balanzatami charin. Paica, llaquichinatallami munan. 8Shinamandami Efraín ailluca, cashna nijurca: ‘Ñucanchica, ninandapachami charijyashcanchi. Ñucanchica, tucuitami ashtacatapacha charinchi. Pipash ñucanchitaca, na juchachi ushangachu. Ñucanchi imata rurashcapica, ima juchatapash na taringachu’ ninajurcami. 9Shina cajpipash Egipto llactamanda llujchimushca punllamandapachami, cangunata Mandaj Taita Dios cani. Cangunataca, fiesta punllacunapishnallata carpacunapi causachun saquisharami.
10Ñucaca, ñuca ima nishcata villajcunamanmi villachircani. Ñuca villashcatapashmi, ashtahuan mirachircani. Ñuca ima nishcata villajcunahuanllatami, imahuambash chimbapurashpa parlanacunata villachircani. 11¿Galaad shuti llactapi causajcunaca nalicunallachu? Paicunaca, yangacunapachami tucushca. Gilgal shuti pueblopica, huagracunatami dioscunaman cushpa huañuchinajurca. Paicunapaj altarcunaca, huachushca pambapi rumita mundunashcashnami” nircami.
12Ashtahuangarin Israel nishca Jacoboca, Aram llactamanmi pacajushpa rirca. Paica, huarmihuan cazarangapajmi servishpa causarca. Huarmihuan cazarangapajmi, llamacunata michishpa causarca. 13Mandaj Diosca, pai ima nishcata villaj shuj runahuanmi israelcunataca, Egiptomanda vichai pushamurca. Profeta shuj runahuanmi, paicunataca cuidajurca. 14Efraín ailluca, Taita Diostami ninandapacha llaquichijurca. Shinamandami, paicuna huañuchishpa yahuarta jichashcapash, paicunapaj jahuallata canga. Paicunallata nalicachishpa rimashcamandami Jatun Diosca, cuna cashcata cunga.
Currently Selected:
OSEAS 12: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.