OSEAS 10
10
1Israelcunaca, fanga junda uvas yurashnami, ashtaca granocunata paicunapajllata fucuchinajun. Ashtaca granocunata charishcashnallatami, altarcunatapash mirachinajurca. Paicunapaj alpacunapi ashtaca granocuna fucushcashnallatami, yanga dioscunatapash mirachinajurca. 2Paicunapaj shungupipash, ishcai yuyaihuanmi causanajun. Paicunaca, cunanmi llaquichi tucuna ricuringa. Paicuna rurashca altarcunata, yanga dioscunataca, Mandaj Diosmi urmachishpa ñutushpa tucuchinga.
3Chaimandami cunanga, cashnatapacha ninajunga: “Ñucanchica, Mandaj Diosta na manllashcamandami, jatun mandajtapash na charinchi. Jatun mandajca ñucanchimandaca, ¿imatashi ruranman?” ninajungami. 4Ari nishpa juramentushpapash, yanga llullashpallami chashna ninajushca. Chaimandami llaquicunaca, huachushca alpacunapi jayaj ajenjoshna ashtahuan miranga.
5Samaria pueblopi causajcunaca, Bet-avén shuti pueblopi tiaj shicu dioscunamandami manllarinajunga. Chai pueblopi causajcunaca, chai shicu diosmandami huacanajunga. Chai dios juyailla cajpi cushijuj curacunapash, ninandami huacanajunga. Chai juyailla cashcapash, tucuchi tucungami. 6Chai shicu diosca, Jareb shuti jatun mandajman carangapajmi, Asiria llactaman apai tucunga. Chaimandami Efraín ailluca, pingaichi tucunajunga. Israelcunapash, paicunallata nali yuyaita cushcamandami, pingai tucunajunga. 7Samaria pueblota jatun mandajca, yacupi huambujuj putsujushnami chingarca. 8Avén shuti pueblo lomacunapi tiaj altarcunapi, israelcuna juchata ruranapash tucuringami. Chai altar jahuacunapica cashacuna, tsinicunami viñanga. Chaimandami urcucunatapash, lomacunatapash: “Ñucanchita llapishpa quilpahuaichiyari” nishpa caparinajunga.
9“Israelcunalla, Gabaa shuti pueblopi causanajui punllamandapachami juchata ruranajunguichi. Chaipimi quedanajurca. Gabaa pueblopica, nalita rurajcunataca, macanajuica na japircachu. 10Paicunataca, ñuca munashca horasmi llaquichisha. Paicuna yapa nalita rurashcahuan huatarishcashna causanajujpipash, shuj gentecuna tandanajushpami llaquichij shamunga.
11Efraín ailluca, trillanatalla munaj, mansayachishca malta shicushnami. Ashtahuangarin paicunapaj juyailla cunga tullupica, ñucami sarushpa yalisha. Efraín aillumanllatami, yugota apachisha. Judá shuti runapaj miraicunami yapunga, Jacobopaj miraicunaca curpacunatami ñutunga. 12Cangunaca, tarpunshna imatapash cashcatapacha ruraichi. Dios llaquinataca, cozechanshna japichi. Tarpungapaj alpata alichinshnami, alichirina canguichi. Cunanga, Mandaj Dios shamushpa imatapash cashcatapacha ruranata cangunata yachachina punllacaman, paita mascana punllacunami chayamushca. 13Cangunaca, yapunshna nalita rurashpa Diosta na manllashcamandami, cozechanshna nalitallata japircanguichi. Llulla shimicunatami, imapash fucushcata micunshna chasquinguichi. Canguna nalita rurashpa causashcata, ninan shinlli ashtaca runacunata yariashpa causashcamandami, chashna tucunguichi. 14Chaimandami, cangunapaj gente purapica, ninanda caparinajui jataringa. Shinlli torrecunatapashmi, tucuilla urmachishpa tucuchinga. Bet-arbel shuti pueblopi causajcunahuan macanajui punllapi, Salmán shuti jatun mandaj tucuchishcashnami tucuchinga. Chaipimi mamaca, paipaj huahuacunandi tucuchi tucurca. 15Bet-el shuti pueblopi causajcunalla, canguna yapa nalita rurashcamandaca, chashnallatami llaquichinga. Israelcunata jatun mandajpash, narapash ali pacarijpillatami huañuchi tucunga.
Currently Selected:
OSEAS 10: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.