MATIU 7
7
Ta Duma ma Ụshɛrɛya Bụtụ o
(Luk 6:37,38,41,42)
1Ta duma ma ụshɛrɛya bụtụ o, iwɛ maa kede a jɛmɛ du ụshɛrɛya hiŋ o.#Rom 2:1; 14:10 2Iwɛnɛ po ụshɛrɛya na ahia dumangana bụtụ, ubwa du ɛɛ zhɛ ma hi dumangana. Umudu na kaa ahia mangangana atwa iyi, nu bwa du ɛɛ zhɛ ma hi mangangana iyi.#Mak 4:24 3Iwɛmbe po aba ngbaraka bụmbɛrɛ na shiyeni ne rishe ri yɛu-bino bu, ebi heŋshi shi iwɛ ugbogolo na shiyeni ne rishe rụ bụụ? 4Kwo kaa iwɛmbe po ɛbɛ hiɛŋ yɛu-bino bu, Me ci ba, mɛ bu vwɛ bụmbɛrɛ ata shiyeni ne rishe rụ bụ, ebi heŋshi shi iwɛ ugbogolo ata te shiyeni ne rishe rụ bụụ? 5Gabụ bụtụ tɛnda-te-eshe, vwa tugwo ugbogolo ata shiyeni ne rishe rụ bụ hiiŋ, nazhɛ ɛbi zhɛ ba kwụba uhwaŋna tebiye maa vwɛ ya bụmbɛrɛ ata shiyeni ne rishe ri yɛu-bino bu.
6Ta pana ma shiwawa iyi tijilo, ta 'wanga ma kaa nkomu ikwɛmbɛ ibiye o, ɛ zhɛ a fwundaka iŋ no ogwogwozwo aba, nazhɛ ɛɛ yinjɛ a hi dwatwaga sasana.
Lụpa ma, Jalakaka ma, Pa ma Ukpa Iyi
(Luk 11:9-13)
7Lụpa ma, nazhɛ ɛɛ zhɛ ma hi pana. Jalakaka ma, nazhɛ ɛhi zhɛ hia ta ugbe. Pa ma ukpa iyi, nazhɛ ɛɛ zhɛ ma hi kapɛshɛngana. 8Bụtụ be elele na ba lụpa, ubwa ɛɛ zhɛ a pana. Bụtụ be elele na kaa ba jalakaka, ubwa zhɛ ba ta ugbe. Bụtụ na kaa ba pa ukpa iyi, ubwa ɛɛ zhɛ a kapɛshɛngana. 9Gaaba namɛ na ashashɛ hiŋ i shɛ maa yɛu ibwɛ lụpɛ bụ ukara, bɛɛ zhɛ ba pana iŋ utayɛɛ? 10Kwo kaa yaa shɛ bijana baa lụpɛ bụ, maa pana bụ uhwaa? 11Yaa shɛ ahiɛba na hiɛ shɛ atwa awɛ, ehi mepi gana na maa hi na pana miaụŋ mi hiŋ iyi ibiye, asha Bishi hiŋ na namɛ na azuba tubaa, shɛ ubwa suu zhɛ ba pana atwa na a lụpa Bụ iyi ibiye ihi hwuri.
12Iyi elele nɛ ahia jala maa ga atwa na hi ndana, na ndana ma du atwa vwɛ hiŋ gana ata. Iyi nɛ oo 'nywotwo nu Undwa keeni iyi nɛ egesere 'nywotwo ta.#Luk 6:31
Odubo Tumwee
(Luk 13:24)
13Tono ma no odubo tumwee, iwɛnɛ tu uhwaŋna ata heri kpotoo zhe nu ufwu tɛnda. Atwa na kaa to uhwaŋna ata, aba gembi ufwugwo. 14Ama uhwaŋna na zhe nu uraiŋ namɛ mwee, atwa na kaa to uhwaŋna ata twa sụ ufwugwo.#Jɛrɛ 21:8
Ụ'wụ'wụ na Tụ'walụ tu Bwa
(Luk 6:43,44)
15Na nda ma pece iwɛ egesere tukata, a na e ci pi hiŋ gana agwụdụ, ama shɛmɛ sha aba kaa shɛ shɛ shɛmɛ sho ogwusu na imunɛ iri.#Izik 22:27; Mat 24:11; Jon 10:12; 1 Jon 4:1 16Hi zhɛ hia mapa aŋ tedure na tụ'walụ ta aba. Atwa eri o two suu tụ'walụ ta afwafwa nu ukondongwu? Okwo hi kwụbwa suu te e cwi tụ'walụ to owowo nu ukolokwu-shɛngala? 17Gobwonu du ụ'wụ'wụ ubiye we elele wa 'wala tụ'walụ ti biye, ama ụ'wụ'wụ ụwɛ wa 'wala du tụ'walụ tụ wɛ. 18Ụ'wụ'wụ ubiye eri shi wa 'wala tụ'walụ tụ wɛ o, gobwonu du ụ'wụ'wụ ụwɛ eri shi wa 'wala tụ'walụ ti biye o. 19Ụ'wụ'wụ we elele na kaa 'weri shi tụ'walụ ti biye, ɛ zhɛ a jaja uŋ a kala nu ulwa.#Mat 3:10; Luk 3:9 20Iwɛbɛ po ɛhi zhɛ hia mapa aŋ tedure na tụ'walụ ta aba.#Mat 12:33
N Te Hi Mepi shi Kwukwuŋ
(Luk 13:25-27)
21Shɛ atwa kpaaŋ na mɛ n hiɛŋ, Agwangwama, Agwangwama zhɛ o tono Cɛnjɛ-ta-tugwama ta azuba o, semi bụtụ na ba nda ukwulana Bishi mi na namɛ na azuba.#Luk 6:46 22Atwa ofwugwo zhɛ mɛ n hiɛŋ hwuŋ nụ ụjita ata, Agwangwama, Agwangwama, shɛ ni izeci bu suu ata duma la tigesere? Shɛ ni izeci bu suu ata bacɛnga la atumwa-ibiri? Okwo shɛ ni izeci bu suu ata nda la ugondu ukpahiŋŋ ufwugwo? 23Nazhɛ Ngɛɛ zhɛ mɛ jishijɛ aŋ, mɛ hiɛŋ, N te hi mepi shi la kwukwuŋ. Ishɛga ma no olugwo na Ngaa namɛ, ahiɛba na hia nda la ugondu u tugworozwo! #Shɛzu 6:8
Omo-tuma eyebi
(Luk 6:47-49)
24Bụtụ be elele na ba hwuga iwɛ gɛ Ama duma, yaa shɛ baa nda iŋ, N zhɛ ma manga bụ na bụtụ na incɛ, na mo umwono ubwa nu utayɛ-tubala. 25Eshilo ngbi, erefu zhagajɛ, mpiala mɛ njɛ mee zhingeci uŋ. Umwono ata kaa hwuŋzwo su o, iwɛnɛ te e shiri la ukoshilo ubwa nu utayɛ-tubala. 26Ama bụtụ be elele tuba ba hwuga iwɛ gɛ Ama duma, yaa shɛ baa njɛ shɛ iŋ, N zhɛ ma manga bụ na bụtụ na lagwụmɛ, na mo umwono ubwa nu uhwayɛ. 27Eshilo ngbi, erefu zhagajɛ, mpiala mɛ njɛ mee zhingeci umwono ata, woo hwuŋzwo, tuhwuŋzwo tu bwa kaa ti gembi duwa.
Ụhwada Jisus
28Aka na ti ge Jisus hwuwi iwɛ gɛ tụdụma hwɛɛ, nazhɛ imbisegeni ibwɛ dama ufwugwo wa atwa ata.#Mak 1:22; Luk 4:32 29Iwɛnɛ ti bee mbisegeni aŋ nụ ụhwada na baa 'yajɛ, shɛ gana na Embisegeni Undwa o mbisogono, bee mbisegeni aŋ o.
Currently Selected:
MATIU 7: RBT
Highlight
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008