MATIU 6
6
Imbisegeni iwɛ Tụpana
1Na nda ma pece maa kede hi na nda iyi hiŋ i tiririri ne eshe atwa maa a na hi kwụba o, shibwonu hi zha shɛ hia lashɛga hwuŋ ule hiŋ ne Bishi hiŋ na namɛ na azuba o.#Mat 23:5 2Aka na aba pana okofwo apwaŋ, ta na ananga, gana na atwa na a nda tɛnda-te-eshe a nda no shimwono shɛ Tụ'ụlwatagwụ sha aba keeni ni ihwɛŋnɛ, maa atwa na dumanga aŋ o. Iwɛ-tɛkana Omo hi mbiso maa, o loshigwo ule wa aba. 3Ama aka na aba pana okofwo apwaŋ, to lono maa u'ala bụ ugwulwo mepi iyi nɛ u'ala bụ ubiye wa nda o, 4iwɛ maa ga apwaŋ na aba pana okofwo a shɛ ne tusweci, iwɛ maa tuba Bishi bu na ba kwụba iyi ne tusweci ubu peni hwuŋ ule bu.#Kolo 3:23,24
Imbisegeni iwɛ Adua Tɛnda
(Luk 11:2-4)
5Aka na ahia nda adua, ta na nda ma gana na atwa na a nda tɛnda-te-eshe a nda o. Iwɛnɛ to o lubo tishikono no shimwono shɛ tu'ulwa keeni shiseshi shi ihwɛŋnɛ, iwɛ maa atwa na kwụba aŋ. Iwɛ-tɛkana Omo hi mbiso maa, o loshigwo ule wa aba.#Mak 11:25; Luk 18:10-14 6Ama aka na ɛbi zhɛ ba nda adua, tono taa na amɛ umwono bu maa kepi odubo bu, maa njɛ adua bụ pe Bishi bu na namɛ ne tusweci, iwɛ maa Bishi bu na ba kwụba iyi ne tusweci ubu peni ule bu.
7Aka na aba nda adua, ta na dumanga n-ndumwa mu tusashɛ gana na atwa na tɛtanɛ shɛ rishe a nda o. Iwɛnɛ te e heŋshi maa iwɛ n-ndumwa mu ufwugwo mu na aa dumanga, ibɛ po ɛɛ zhɛ a hwuga iwɛ aba.#1 Shɛgwu 18:25-29 8Ta sha ma gana aba o, Bishi hiŋ mwopwo iyi nɛ ukekeshi ibɛ ma hi nda tobwolo hi ta lụpɛ shɛ bụ iŋ o. 9Ama gana i shɛ maa hi na nda adua na:
Bishi tu na namɛ na azuba,
Ge izeci bu jirimi,
10Ga Cɛnjɛ-ta-tugwama tụ bụ ti zhɛ,
Ga a na nda ụkwụlana bụ,
Nu unyizo, gana na aa nda ụŋ na azuba.
11Iti peni iyimɛyɛ nɛ i tu to ukekeshi hwayɛ ga.
12Iti gengeni tu'wanganga tu tu, gana na otu gongwonuo
atwa na utu 'wanganɛ.
13To tu tocingo na tumanga o, ama na tu lashɛga ni i'ɛlɛ bụtụ bụ wɛ.#6:13 bụtụ bụ wɛ: N-ndumwa me elele mu kwuni ya, (Iwɛnɛ po…Ami). mu zasaba na abayiburu ofwugwo, ibɛ po aa jilaganɛ n-ndumwa ma ata ijɛ ɛtɛ tikerede kerede no tukwuno keeni tukwunanga ta muba.
[Iwɛnɛ po gabụ bɛ 'yajɛ Cɛnjɛ-ta-tugwama, nu ukpahiŋ, nụ ụjɛrụma unyizo-nom Ami].#Jon 17:15; 2 Tɛsɛ 3:3
14Yaa shɛ ahia gangana atwa tu'wanganga ta aba, nazhɛ Bishi hiŋ na namɛ na azuba zhɛ ma hi gangana du tu'wanganga ti hiŋ.#Mat 18:35; Mak 11:25; Ɛfɛ 4:32; Kolo 3:13 15Ama yaa shɛ ehi gengeni shi atwa tu'wanganga ta aba, asha Bishi hiŋ zha shɛ ma hi gangana du tu'wanganga ti hiŋ o.
Imbisegeni iwɛ Ezumi Tɛnda
16Aka na ahia nda ezumi, ta na ta ma usumbu gana atwa na a nda tɛnda-te-eshe o. Iwɛnɛ ta a hashagana shishe sha aba maa atwa na mapa maa a nda ba ezumi. Iwɛ-tɛkana Omo hi mbiso maa, o loshigwo ule wa aba.#Ayiz 58:5 17Ama aka na abu ta nda ezumi bu, na sụkwụtwa uhiuhiu bu manɛbɛ, na fwata du eshe bu, 18iwɛ ma kede atwa mepi maa ba nda ba ezumi o, semi ga shɛ Bishi bu na namɛ no ofwo tusweci, maa ma bụ pana ule bu.#Mat 6:4,6
Uduciya Tuswaka na Azuba
(Luk 12:33-34)
19To no momo tulonono ma uduciya nu unyizo ga, no ofwo na a'nyasụ, keeni tukwocikwolwo ti zhɛ ta nda ụŋ ufwu o, kwo kaa ofwo na ozundo o bwugo, oo tono maa o no zundo uŋ o.#Jem 5:2,3 20Ama no momo tulonono ma uduciya na azuba, no ofwo na a'nyasụ, keeni tukwocikwolo ti zha shɛ ta nda ụŋ ufwu keeni ofwo na ozundo kaa eri shi o bwugo maa e zunji o. 21Ofwo elele na uduciya bụ namɛ, apata du ahaŋsa bụ namɛ hwɛɛ.
Ụsụtụla Tu'waba
(Luk 11:34-36)
22Eshe, aba shɛ ụsụtụla tu'waba. Yaa shɛ eshe bu namɛ ndaụụ, asha tu'waba tụ bụ ti zhɛ ta sha uhioko-uhwaŋna hwɛ hwɛɛ. 23Ama yaa shɛ eshe bu zasa ndaụụ, asha tu'waba tụ bụ ti zhɛ ta sha tishi hwɛ hwɛɛ. Ama kaa yaa shɛ uhioko-uhwaŋna na namɛ na amɛ bụ shɛ tishi, asha tishi ta ata tu hwuri ugombo.
Agwatana ni Iyi-ti'yaga
(Luk 16:13; 12:22-31)
24I zasa bụtụ be elele na eri ba ndana shɛgwangwama shi yebi iyi o. Asha bi zhɛ bo imo bu ko bɛɛ zhɛ bo lubo bu na bi yebi, kwo kaa maa muna bu ko ụjɛrụma, maa ngbaraka bu na bi yebi cwɛŋ. Hi eri shi hi na ndana Agwatana iyi hi na ndana uduciya iyi o.
25Iwɛbɛ po Omo hi mbiso maa, Kede iwɛ uraiŋ hiŋ ihi tɛtaga, iwɛ iyi nɛ ɛhi zhɛ hia ya keeni iyi nɛ ɛhi zhɛ hia swa, okwo iwɛ iyi nɛ ɛhi zhɛ hio urugono na tu'waba ti hiŋ o. Shɛ uraiŋ suu uhwuri iyimɛyɛ? Shɛ tu'waba suu tu hwuri tugwuno? 26Hioko ma shanụnụ shɛ na sha hila, shɛ bɛrɛ shɛ iyimɛyɛ, shi gwubi shi, shi zweni shi iyimɛyɛ nu urubwu o, ama Bishi hiŋ na namɛ na azuba ubwa ba biga shụ. Shɛ ahiɛba suu hi 'yaganɛ bụ ule uhwuri shu duwa? #Mat 10:29 27Gaaba namba na ashashɛ hiŋ eri ba kaana uraiŋ ubwa ụnjɛswa#6:27 ba kaana uraiŋ…ụnjɛswa: Kwo kaa uzoto. iwɛnɛ yaa tɛtajɛ bụụ? #Shɛzu 39:5-7 28Iwembe po ya iwɛ tugwuno ma hiɛ tɛtagaa? Na haŋsa ma tebiye gana na modwodwo ma waŋna na ambɛ. Mɛ njɛ shɛ ụbaụta, mu mama nanɛ shɛ kaa tugwuno. 29Ama Mo hi mbiso maa, Okwo go Sụlụmụn nu ụjɛrụma ubwa kpaaŋ, bu urigeni shi iyi elele nɛ pilanụ gana modwodwo mu ga okwo mu ko.#1 Shɛgwu 10:4-7; 2 Shɛrụ 9:3-6 30Yaa shɛ Agwatana eri a nda ambɛ ehilo a na namɛ hwayɛ ga, a na ɛɛ zhɛ o hwoŋzhingo beyi nu ulwa tisemberi, asha bi zha shɛ suu mo hi urugono tugwuno uhwuri mu, ahiɛba na hiɛ tɛtanɛ bụ rishe cwɛŋ? #Mat 8:26; 14:31; 16:8 31Iwɛ inɛ ɛtɛ, kede i na hi tɛtaga maa hi nɛ hiɛŋ, Imbe ɛti zhɛ ta yaa, imbe ɛti zhɛ ta swaa? Kwo kaa imbe ɛti zhɛ to urugonoo? 32Ijɛ ibɛ atwa na tɛtanɛ shɛ rishe a jalakaka kpaaŋ. Bishi hiŋ na namɛ na azuba kaa mepi maa ukekeshi ijɛ kpaaŋ ma hi nda. 33Ama na jalakaka ma cɛnjɛ-ta-tugwama tu bwa keeni tiririri tu bwa hiiŋ, nazhɛ bɛɛ zhɛ ma hi kaana ijɛ ɛtɛ kpaaŋ.#Mat 19:28; Mak 10:29,30; Luk 18:29,30 34Iwɛ inɛ ɛtɛ kede iwɛ beyi ihi tɛtaga ya o, iwɛnɛ ti beyi zha 'yaga tɛtɛtaga ti ikɛnyi ibɛ. Ụjita we elele 'yagawa tɛtɛtaga tu na ti gembi uŋ.
Currently Selected:
MATIU 6: RBT
Highlight
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008