MATIU 8
8
Ge Jisus Nɛnjɛ Bụtụ na 'Yajɛ ụngwụ-uwaŋna
(Mak 1:40-45; Luk 5:12-16)
1Aka na ti ge Jisus zwe ishɛmɛ ɛtɛ, nazhɛ atwa ofwugwo ụ'wụtụ 'wa bụ. 2Nazhɛ bụtụ bu ko na 'yajɛ ụngwụ-uwaŋna#8:2 ụngwụ-uwaŋna: Ụngwụ ga wo bogwu la bụtụ na atwa ihwɛ ibwɛ cala maa bụtụ ata nama na ambɛ. Alamu oko a suyana ụngwụ ufwugwo na wa nama atwa na tu'waba maa ụngwụ-uwaŋna, asha kaa shɛ ụngwụ-uwaŋna waa shɛ hwɛɛ o. zhajɛ, bee kwuzeni bu, bɛɛ hiɛŋ bụ, Agwangwama, yaa shɛ ebi ge leni, bi ge eri bu ma nɛnga maa ma nama shɛshɛshɛ.#Mat 9:18; 15:25; 18:26; 20:20; Jon 9:38 3Ge Jisus nderishinji u'ala ubwa, bee timengeni bụtụ ata, bɛɛ hiɛŋ bụ, N leni, zhɛmanana maa nama shɛshɛshɛ. Gunu ata ụngwụ-uwaŋna ụ bụtụ ata hwuwowu ko. 4Ge Jisus tɛtaganɛ bụ unu, bɛɛ hiɛŋ bụ, To mbiso bụtụ be elele o, ama zhaga meme mbiseni onongbo, shɛkana aŋ du umpwaŋ ata go Moses ihi peni la unu ubwa, iwɛ maa ubu le tiseyida no ofwo aba.#Liv 14:2-32; Mak 3:12; 5:43; 7:36; 8:30; 9:9
Ge Jisus Nɛnjɛ Yɛu Uhiu wa Asaza Dipi-yebi
(Luk 7:1-10)
5Aka na ti ge Jisus teni Kapanaum, ibɛ uhiu uko wa asaza dipi-yebi zhajɛ pu bwa, baa lụpɛ bụ, bɛɛ hiɛŋ, 6Agwangwama, yɛu mi ugondu weci ba nu umwono, tu'waba tu bwa tu 'wegeni, ụngwụ ata kaa iri bu tebiye. 7Ge Jisus hiɛŋ bụ, Gamba ta me ci maa ma nɛnga bụ. 8Ibɛ po uhiu ata wa asaza dipi-yebi jishijɛ bụ, bɛɛ hiɛŋ, Agwangwama, N lanɛ shɛ maa teni ihwɛ mi o, ama dumana iwɛ kwakwa, i zhɛ ya nɛnga bụ. 9N shɛ du bụtụ na namɛ ni i'ɛlɛ ụhwada, Ngaa 'yajɛ kaa du asaza na Ngaa untanganɛ. Yaa shɛ Ngɛɛ hiɛŋ bụtụ bu ko, Zhaga peye, bi zhɛ ba zha, Ngɛɛ hiɛŋ kaa bụtụ bi yebi, Zhajɛ epe, bi zhɛ ba zhajɛ; Ngɛɛ hiɛŋ kaa bujama mi, Nda ijɛ, bi zhɛ ba nda iŋ ga. 10Aka na ti ge Jisus hwụjɛ iwɛ ɛtɛ, yaa dama bụ, bɛɛ hiɛŋ atwa na 'wa bụ, Iwɛ-tɛkana Omo hi mbiso maa, N ta kwụbɛ shɛ rishe-tɛtɛtana ri ci gana ga ugombo na amɛ bụtụ be elele ni Isrɛl o. 11Mo hi mbiso iwɛ-tɛkana, maa atwa zhɛ a bananjɛ hwuŋ geri bu uwaŋna-banụ keeni uwaŋna-twonuo, ɛɛ zhɛ a gɛgaga, maa a yɛ iyimɛyɛ na Abraham keeni Azik, keeni Jekob na Cɛnjɛ-ta-tugwama ta azuba.#Shɛzu 107:2,3; Ayiz 9:12; Luk 13:29 12Ama ɛ zhɛ a bacɛnga tuba miaụŋ mɛ cɛnjɛ-ta-tugwama tu ga, ɛɛ zhɛ o tono ne tishi tu na tu namɛ no tupohondo, apata u'wo-tutwa keeni ene tiya zhɛ a nama.#Mat 22:13; 25:30; Luk 13:28,29 13Ge Jisus hiɛŋ uhiu ata wa asaza dipi-yebi, Zhaga; ga ibu namana gana na te rishe-tɛtɛtana rụ bụ rụ namɛ. Ibɛ po yɛu ibwɛ ugondu zhɛmananɛ gunu ata aba.
Ge Jisus Nɛnjɛ Atwa Ofwugwo
(Mak 1:29-34; Luk 4:38-41)
14Aka na ti ge Jisus teni nu umwono Pita, baa kwụbɛ te e'uji Pita weci, iwɛnɛ tu mpiala mɛ shɛ bụ. 15Ge Jisus timengeni u'ala ubwa, nazhɛ mpiala ma ata mi genji bu gunu ata, bɛɛ ishijɛ, baa ndanɛ bụ iyi. 16Aka na tụ ụrụmɛ shɛ, ee suje atwa ofwugwo a na atumwa-ibiri namɛ na shɛmɛ sha aba pu bwa, ge Jisus dumanɛ iwɛ, bee unzhi mpiala ma ata mụ wɛ, baa nɛnjɛ du agwumashɛ ata kpaaŋ. 17Bɛ njɛ ijɛ iwɛ maa iwɛnɛ bigesere ga Ayizaya dumwa la sɛ, inɛ hiɛŋ,
Ubwa ni ikɛnyi ibwɛ suji ụngwụ tu,
baa 'waŋnɛ kaa igwumɛgwumɛ tu.#Ayiz 53:4
Atwa na Hiɛŋ Jisus, N Zhɛ ma Bụ 'Wa
(Luk 9:57-62)
18Aka na ti ge Jisus kwụbɛ ta atwa ofwugwo ụ'wụtụ rungwutwonu bu, bee peni eseshi-iyi ubwa unu maa ge keshi hileniye ukwokwo ata. 19Aka na te bimbisegeni bu Undwa bu ko zhajɛ pu bwa, bɛɛ hiɛŋ bụ, E-Bimbisegeni, N zhɛ ma bụ 'wa no ofwo elele na ɛbi zhɛ. 20Ge Jisus hiɛŋ bụ, N-nyonyo mi 'yajɛ a'ibwa na moo woto, shanụnụ shɛ na sha hila kaa shɛ 'yajɛ tuhwurugwo, ama Yɛu Bụtụ tuba zasa ofwo elele na maa shilo uhiuhiu ubwa o.
21Nazhɛ biseshi-bi-iyi bi nya bu ko hiɛŋ bụ, Agwangwama, lono maa mo gwulo me ne tugwo bishi mi.
22Ge Jisus hiɛŋ bụ, N 'wa, ganga n'wo maa mi ni n'wo ma aba.#Mat 9:9; Jon 1:43; 21:19
Ge Jisus Tezhigeni Mpiala mu Uvwugo Keeni Adanga
(Mak 4:35-41; Luk 8:22-25)
23Aka na ti ge Jisus teni nụ ụhaŋtụ, eseshi-iyi ubwa 'wa bụ. 24Uvwugo ụ'wụtụ kwuni tɛnda, adanga o zwogono ụhaŋtụ, ge Jisus kaa bo woto malabụ. 25Eseshi-iyi ubwa zhajɛ pu bwa, ɛɛ zhingicinjɛ bụ, ɛɛ hiɛŋ, Agwangwama, iti bicinji! Atuba na ti zhɛ to ubwo.
26Bɛɛ hiɛŋ aŋ, Ahiɛba atwa ga rishe-tɛtɛtana ru twa sụ, iwɛmbe po ahia nda inyɛsɛɛ? Nazhɛ ge Jisus ishijɛ, bee tezhigeni uvwugo ata, ta adanga ata, nazhɛ uvwugo keeni adanga ata hwuwowu saiiŋ.#Mat 6:30; 14:31; 16:8 27Iwɛ ɛtɛ dama atwa ata, ɛɛ hiɛŋ, Bụtụ bu gana ebe naa? Okwo mpiala mu uvwugo keeni itekwu a hwụjɛ-unu ubwa.
Ge Jisus Nɛnjɛ Atwa eyebi a na Atumwa-ibiri Zweni na Shɛmɛ sha Aba
(Mak 5:1-20; Luk 8:26-39)
28Aka na ti ge Jisus keshi hileniye ata, bee teni na cɛnjɛ ta atwa Gadara,#8:28 Gadara: Abayiburu oko hiɛŋ, Gɛgɛsa, kwo kaa Gɛrasɛ. nazhɛ atwa eyebi anaa na atumwa-ibiri zweni na shɛmɛ sha aba bananjɛ ne e'uye, aa twa nu bwa. Atwa ata 'yajɛ abwagara tebiye, i zasa bụtụ be elele eri ba kashɛka nu uhwaŋna ata kwukwuŋ. 29Nazhɛ atwa ata uganɛ, ɛɛ hiɛŋ bụ; E-Jisus Yɛu ya Agwatana, imbe bwa shɛ inee tu na bụụ? Bi zhajɛ suu epe maa na tu pana ụbaụta tobwolo aka te ci shi?
30Nkomu mu ufwugwo kaa mi teleni taa dụlụ na aba, maa yaga. 31Ibɛ po atumwa ata ibiri tabwa Jisus, ɛɛ hiɛŋ, Yaa shɛ ebi ti becinji hwayɛ, asha lono maa to tono na shɛmɛ sho nkomu ma ata.
32Ge Jisus hiɛŋ aŋ, Zhaga ma. Aa bananjɛ ga, ee teni na shɛmɛ sho nkomu ma ata. Nazhɛ nkomu ma ata kpaaŋ mi gezhiji, mee zwi nu ugbongboro, maa 'waŋ ni itekwu ɛtɛ, mee ileni kpaaŋ.
33Ibɛ po atwa na ga biga nkomu ma ata gezhiji, ee zhe nụ ụshɛpwụ ata, ee mbishe atwa ụshɛpwụ ata iyi nɛ teni kpaaŋ, ti iwɛ atwa ata atumwa-ibiri ge zweni na shɛmɛ sha aba. 34Ibɛ po atwa ụshɛpwụ ata kpaaŋ bananjɛ, ee zhegeni Jisus. Aka na ta a kwụbɛ bụ, aa tabwa bụ, maa ga bana na cɛnjɛ ta aba.
Currently Selected:
MATIU 8: RBT
Highlight
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008