Zakaria 10
10
1SUMATÖ Iehova thö ge we hnyi ûen we a biliny, Iehova at ame mâdrâ je hucuce; me e ame he ka ham we ae gan kodra me me ve hu gadra önyinginy hnyei. 2Anyina a hia but ha thoi je idola, ke haba tavat bi khong adre hia but wâ thoi; ke adre hia but ha je bwi ae thoi, e ûnyi baû bi hnödra hna otubwelâ: anyin a wale adre me vheno je dedra helâ me je mamoe, adre me vec anyin ae ba at ame tuʼ ödra. 3Ame ubâhlâ thö anyik hmonyin ka tavat tuö mamoe, ke oge me he ka bi hwaban ka je got baga: anyin a hia but Iehova tuhan sabaoth senâ hnahat haleny wale a lap anyi Juda, ke e ame he ka wiʼ ödra helâ me haleny je hors ae mec hnyi vat. 4Ame he ka o ûnyi gan veto hnân kopiny, ke ûnyi gan minya matalafi, me cafanainy vat, ûnyi gan ame he tavat musi hia. 5Ke adre me he ka helâ me tavat hwege, tavat adre me uto je iwahnaihmiony hnyi hmudrainy gethen hnyi vat; ke adre me he ka vat, anyin a e unyidra Iehova: ke ame he tavat tabö hors ka hlohlo. 6Ke oge me he ka ha hwegien lap anyi Juda, me omelö lap anyi Josefa, me ohmetu ödra, anyin oge me betenge gadra; ke adre me he ka helâ ke mʼ oge me ca digic ödra: anyin a inya Iehova Khongudrin, ke oge me he ka ling ödra. 7Ke ame he at Eferaima ka helâ me at ae hwege, ke ame he je hnyekudra ka senyin helâ me tavat adre ic waina: eke, ame he je lakudra ka wâ me senyin; ame he je hnyekudra ka hobâ kö Iehova. 8Oge me he ka hûlûhwajû ködra, me ûkhacaköu ödra anyin oge hia but ûcû melidra: ke adre me he ka si helâ me hwakecin ûsehiaidra. 9Ke oge me he ka te ödra unyin je hnyei; ke adre me he ka ûnykûme könya hnyi je dok ae sâkâû: ke adre me he ka tha möt hmetu me je lakudra. 10Ke oge me he ka ohmetu ödra ûnyi hnyi hnyei Aigupito, me ûkhacaköu ödra ûhedra Asuria; ke oge me he ka hum ödra ka hnyi hnyei Gileada me Lebanona; ke adre me ca he ka wâ dok hobi kodra. 11Ke e ame he ka vheno köien ûöveci, me kot je waköiöiny köiö, ke ame he je dok ae dit hnyi Nail ka mada: ke adre me he ka ohnyikânâ bi gan anyin Asuria, ke ame he ka hia hnyi Aigupito uciny musi. 12Ke oge me he ka ha hwegiödra ûnyi ga Iehova; ke adre me he ka ngenu ûnyi ge ien e haingö Iehova.
Currently Selected:
Zakaria 10: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society