Zakaria 9
9
1WALANG hok, wale a hofuc ho Iehova hnyi hnyei i Haderaka, kʼ ame he ka menâ bi hnyi Damaseko: anyin ame bwele kö Iehova emakan at ke emakan ta je tribu Isaraela hia: 2ke Hamath minya wale ûtangköu më: ke Turo me Sidona anyin e gan hmâ metâiny. 3Ke haba Turo, me ame ka op hnabâ, me ûkhö-ûnâ sileva helâ me sesâ, ke gol ae so helâ me hmudrainy gethen. 4Wâ bi, ame he Than ka obâ e, me kot maniny man hnyi köiö; ke adre me he ka thong degecâ e ge meic. 5Ame he Asekelona ka wâ e, me ot; ke Gaza, me ame he ka vec gan hmâ; ke Ekerona; anyin a e ame he ka hmehma ge hnen hna gejon: ke ame he ka hia than hnyi Gaza, ke adre me ca he bi ka labâ Asekelona. 6Ke ame he atkanyua ka laba hnyi Asedoda, ke oge me he bi nya ka subâ degecâ bi ganiny at Filisiti. 7Ke oge me he ka hom dren ûnyi hnyi hnyimen, ke ta je ûnyi ae ikiki e ame oloû; kʼ ame he biju ka kolon hobi kâu Khonguta: ke e ame he ka helâ me taben hnyi Juda, kʼ ame he Ekerona ka helâ me at Jebusi. 8Ke oge me he ka hunuma igigilo umök uma, ûcon iwahnaihmiony, me me ca he ke at ka he me hmetu: ke ame ca he hmetu at ûöveci ka he hnyi wanbödra: anyin a walang ang inya oge me wâ ge li emakök.
9Senyin gan hmâ thö u hluiny Ziona; kuku thö u hluiny Jerusalema: wâ bi ame he ka he but köu Tuhâm: e at ae wisa, ke tren ûhomeli; at ae ilemuk, ame tabö asina, me nak asina a nokon asina. 10Ke oge me he ka subâ degecâ kariota ûnyi Eferaima, me hors ûnyi Jerusalema, ke adre me he ka subâ degecâ cafanainy vat; ke e ame he ka ha ûsoköu ka ta je hnyei: ke e ame he ka musi hwân hnyi ke köiö, ke ne o but ka hnyi ke köiö, ke hwân hnyi Wagewe ke ne o but ka hnyi je can hmeledrany. 11Ke haba u, can dren ûhihinyköu möu, me oge hia but kunâ tavat adre ca gam ûnyi hnyi thop ae ba köien. 12Hmetu ju ka hnyi hnabâ, öbun tavat adre ca a tavat gejon: inya oge me ha hnyi bong ang a oge me he, ka ibi olo ham köu. 13Anyin oge hia but lau Juda hobi könya, me ip Eferaima hon cafana; ke oge me he ka obwebwelâ le lakom, Ziona, lö, ûcon je lakon Heleni, me oge me he ka wiö u helâ me hele vat anyin at ae hwege. 14Ke ame he Iehova ka manen hudrin, ke ame he anyin fana ka gâ helâ me hucuce: ke ame he Than Iehova ka tûâ trutru, me he hnyi je höu ûheny hnyi hwaiöu. 15Ame be Iehova tuhan sabaoth ka sing ödra; ke adre me he ka han me uto je veto adre kûlûec; ke adre me he ka ic me mede helâ me tavat adre ic waina: ke adre me he ka unöngöt helâ me kaia, me helâ me je kopiny taben hut. 16Ke ame he Iehova Khongudrin ka omeli ödra hnyi bong eling helâ me hnahat mamoe wale lakeiny: anyin adre me he ka helâ me vetoiny korona adre kap goranyai hon iny hnyei. 17Anyin ae ti gan hmâ anyin so, ke ti gan hmâ anyin hmanenang! ame he ka sot wahidröu ge hwit, ke wahlu minya ge waina.
Currently Selected:
Zakaria 9: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society