Zakaria 11
11
1LEBANONA lö, khong ut je homagouleny me me he meic ka thong degecâ ânyâm je arasi. 2Kop lö, kuku tenge thö, anyin a ta but arasi, kʼame kong ut je ûö ae hmanenang: je iwajoiny Basana lö, kuku tenge thö, anyin ae hnyikânâ but uhnyot ae hwege. 3Wale ûkuku tengeiny tavat tuö mamoe! anyin ae kong ut anyidra hmanenang: ûkukuiny je nak liona! anyin ae kong ut hmanenanginy Joridano. 4Walang hna ha hnö Iehova Khonguk, ka habe, Han ju hnahat mamoe hnân hlingâ; 5haba tavat a haledra adre me hlingʼ ödra, kʼ adre ca ûnykûme a ka ödra kong can e; ke haba tavat adre me ûcû ödra, me adre me ha, ka habe, Ole kö Iehova anyin a iny tren dut omjeû: ke ame ca betenge gadrin je latuhödrin. 6Anyin oge me ca he hmetu ka betenge ge tavat adre me labâ hnyei, haingö Iehova: ke wâ bi oge me he ka ve hna tavat ka hnyi hnyamen je lahanödra, ke ka hnyi hnyamen tuhan: me adre me he ka kot hnyei, ke oge me ca he ka omeli ödra ûnyi hnyi je hnyamödrin. 7Waleling me oge me han hnahat mamoe hnân hlingâ, a ta je mamoe ae ti kong hnyi hnahat. Ke oge me hom li uci; haba khaca oge me hwenyi ien, me Hmanenang, ke oge me hwenyi ien khaca, me Je wen; ke oge me han hnahat mamoe. 8Ke oge me subâ degecâ hnyat tuö mamoe a kun hnyi tehi a khaca; ke vec hnyekuk gadrin, kʼ ame hûkötiö nya ge ta je hnyekudrin. 9Me haingök, ka habe, Oge me ca he bi nya ka ha ö ʼbun: haba at ame he bi ka mok, me ame ka e bi ka mok; ke haba at adre me he ka subâ degecâ, me adre me ka he bi ka subâ degecâ; ke haba kolon, me so ame he ka ve an vidrin hnen keihen. 10Ke oge me hom anyik uci wale Hmanenang, me thu e, mʼ oge me he ka ohmetro ûhihinyköu, waleji oge me ânyâ me ta je hnyei hia. 11Ke ame hmetru thö hnyi bong eling: ke e khana but hnahat mamoe ae vec ut, tavat adre me tevehlöng könya a wale hofuc ho Iehova. 12Me haingök kodra, ka habe, A ne so köbun hö jem hwabök; ke a ne ba, hna ju. Me adre me tuluto hwabök a thote je sileva. 13Ke Iehova ame ha könya, ka habe, Khûâ thö e ka at ame up kaia, wale hwaban adre me ha me hwabök. Me oge me hom je sileva a thote, me khûâ hnyi uma umo Iehova ka at ame up kaia. 14Ke haba ke uci, me oge me thu e, wale Je wen, mʼ oge me he ka ohmetro hwakecin liamekeiny, a Juda me Isaraela.
15Ke Iehova ame ha könya, ka habe, Hom dö hmetu je omjehen at ae monu a at tuö mamoe. 16Anyin a wâ bi, oge me he ka oâ at ame tuö mamoe hnyi hnyei, at ame ca he ka senʼ ödra wale adre subâ degecâ, ke e ame ca he ka elâm je mamoe adre ve se but, me ometo je aat; ke e ame ca he ka han je mamoe ae hwege, ke e ame he ka an viny ae pipikhenya, me kia amemâ je boûjimödrin. 17Ekölö ge at ame ca ti tuö mamoe, at ame hna degecâ hnahat mamoe! ame he hele vat ka ta hon benyin, ke emakan a metân: ame be ka meleca benyin, ke ti lit emakan a metân.
Currently Selected:
Zakaria 11: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society