Ma̱te̱yo̱ 27
27
Ovvoye ol Ye̱su̱ ngati Pilato
(Marko 15:1; Lu̱ka̱ 23:1-2; Jon 18:28-32)
1Bali nge̱rre̱t ingani, odolta alaata cik olli wawaco ki lo̱ddi̱ki̱re̱ do̱o̱k kar ku̱ru̱we̱t Ye̱su̱ ka̱da̱k. 2E̱ce̱bi̱t zin nege Ye̱su̱ kar ko̱o̱tte̱ ngati Pilato ddi̱ki̱ryo̱i̱t ci gaala cik Romi.
Daiz ci Judasi
(Buk wa To̱ni̱a̱u̱ 1:18-19)
3Baling izik Judasi etteddek ol Ye̱su̱ daiz, u̱u̱c zin nonno zinin oroot. Obodai zin o̱ro̱bi̱ya̱ cik een ziik balik een moten i̱i̱yo̱ i̱mi̱ro̱i̱ uk aanyik alaat cik olli wawaco ki lo̱ddi̱ki̱re̱. 4A̱nne̱k nogo ne, “Kabaca anna, ku̱tu̱gu̱ mu̱nye̱n, eci kadawa e̱e̱t ci abunna.”
O̱bo̱dde̱k zin nege, a̱nne̱k ne, “Iróng naga kedeconika zoz necu, een necu zoz cunne.”
5U̱ju̱ke̱k zin Judasi o̱ro̱bi̱ya̱ lo̱o̱c Ce̱e̱ze̱ wa Ta̱mu̱ta̱dde̱no̱, kar kuk reena kuk kadal ele cinne.
6Idimtta zin alaata cik olli wawaco ko̱ o̱ro̱bi̱ya̱ ne̱ke̱. Kar kizeto ne, “Iróng karike o̱ro̱bi̱ya̱ ne̱ko̱ de̱he̱r wa Ce̱e̱z wa Ta̱mu̱ta̱dde̱no̱, eci akaka ming karike o̱ro̱bi̱ya̱ cik a̱vvu̱ bi̱ye̱te̱.” 7Kar zin kodolta nege do̱o̱k, atalta zin o̱ro̱bi̱ya̱i̱ ne̱ke̱ ma̱na̱ ci e̱e̱t ci gon eenyet i̱jjo̱nyya̱, kar kaanycik kize ilomi ci adawe ol cik een e̱re̱nno̱k. 8Zoz zin ci awu ol ilomi neci kize Nginti Bi̱ye̱tu̱ rok i̱yo̱ko̱ niko ko̱ necu. 9Akat zin zoz bali u̱du̱wa̱ a̱ri̱to̱i̱ti̱ ci zoz ci Ta̱mu̱ta̱dde̱no̱ een Jeremiah ke̱ mo̱o̱le̱t, azi ba̱li̱ye̱ ne, “O̱o̱tte̱ nege o̱ro̱bi̱ya̱ moten i̱i̱yo̱ cik een ziik, o̱ro̱bi̱ya̱ cik ataline olli Israilo nonno. 10Atalta zin o̱ro̱bi̱ya̱i̱ ne̱ke̱ lo̱o̱c ci e̱e̱t wagon eenyet i̱jjo̱nyya̱, ki bali ming i̱lo̱ti̱ka̱ Manyi annit ke̱.”#Zakaria 11:12-13; Jeremiah 19:1-13; 32:6-9
A̱jji̱n Pilato Ye̱su̱
(Marko 15:2-5; Lu̱ka̱ 23:3-5; Jon 18:33-38)
11Ibil zin Ye̱su̱ ngati ddi̱ki̱ryo̱i̱t Pilato, i̱jji̱n zin enne Ye̱su̱, a̱nne̱k ne, “E̱e̱ni̱ i̱nna̱ alaan ci ol cik een Ya̱u̱d?”
O̱bo̱de̱k zin Ye̱su̱ nonno, azi ne, “I̱i̱ny, ogon ki i̱yo̱ko̱ ming a̱du̱wa̱ i̱nna̱ ko̱.”
12Baling ovolonggit alaata cik olli wawaco ki lo̱ddi̱ki̱re̱ zo̱ze̱ ci Ye̱su̱, ijahe zin enne li̱i̱m. 13Iizek zin Pilato nonno ne, “Iziyu i̱nna̱ zo̱zzo̱k cik meelek a̱du̱wa̱ki̱ nege i̱nne̱t ko̱?” 14Imma Ye̱su̱ ijahe li̱i̱m, iróng obodonik zoz ci a̱jji̱nne̱ Pilato nonno ko̱.
Etteddek ol Ye̱su̱ daiz
(Marko 15:6-15; Lu̱ka̱ 23:13-26; Jon 18:39-19:16)
15Imma wagon la̱du̱n anyak Pilato kaale cinne ci gon ming ovvo nege adak I̱i̱te̱n wa Va̱rda̱ngi̱nto̱, oog Pilato e̱e̱t co̱de̱ lagama ci orong zu̱we̱ koogyai. 16Anyak da̱ e̱rki̱te̱ neci e̱e̱t ci een i̱rki̱ryo̱i̱t lagama, een zara Barabas. 17Baling ovvo ol alute ce̱e̱ze̱ ci Pilato nge̱rre̱t, i̱jji̱n zin enne ol, a̱nne̱k ne, “Orongnyu ngene kar anna kaaraung lagama? Orongnyu Barabas icima Ye̱su̱ wa een zara Ki̱ri̱sto̱ ko̱?” 18Eci enne a̱gga̱ emederan ol ne̱ke̱ ba̱li̱ye̱ Ye̱su̱ kar kecebit kanyaktak nonno.
19Baling ngen aave Pilato lecere cinne lo̱ki̱ka̱, i̱tto̱na̱ zin ngaa cinne zoz cu: “Ma ogonik gi̱i̱ ci gerze e̱e̱t ci abunna eceb ol gaganiko ko̱, eci anna kipira o̱no̱zo̱we̱ cik a̱vvu̱na̱ka̱ zo̱ze̱ cinne.”
20Ma̱i̱je̱ alaata cik olli wawaco ki lo̱ddi̱ki̱re̱ u̱du̱ktta̱k zu̱we̱ abunna ming ooga Pilato Barabas, kar kanycik Ye̱su̱ ku̱ru̱we̱ ta̱la̱ke̱ca̱. 21I̱jji̱nno̱ Pilato dee, “Ngene olle cik een rama ko̱ ci orongnyu niga abunna koogakkung?”
O̱bo̱dde̱k zin zu̱we̱ nonno, “Barabas!”
22I̱jji̱n zin bo̱do̱k Pilato nogo, a̱nne̱k ne, “Ming kaara anna Barabas do̱, ku̱tu̱gu̱we̱k Ye̱su̱ wa een Ki̱ri̱sto̱ ko̱ nya?”
Egerenyit nege do̱o̱k, “Otodoyyek nonno keet wa een ta̱la̱ke̱c!”
23O̱bo̱de̱k bo̱do̱k Pilato nogo, a̱nne̱k ne, “Nya? U̱tu̱gu̱ enne nya ci gerze?”
Abarik zu̱we̱ egereny oroot, “Otodoyyek nonno ta̱la̱ke̱c!”
24Baling icin Pilato okkom zoz ci oogane enne Ye̱su̱, abarik orong nyi̱li̱ kitinga, idima zin enne maam uduca kar kutuny azzin ciginnek ngati acine ol do̱o̱k. Kar kizek ne, “Kabunna anna, iróng atin bi̱ye̱ta̱ cik e̱e̱t necu adaka annita. Ize necu zoz cunno̱ng!”
25Egerenyit zu̱we̱ do̱o̱k, izeto ne, “Anyik bi̱ye̱ ciginnek kadaktet ki dooli cigga̱k!”
26Oogak zin Pilato nogo Barabas. Aanyik zin enne nogo Ye̱su̱ ki̱bi̱ce̱ a̱lle̱ne̱ kar ko̱o̱tte̱ ovvo ododike keet ci een ta̱la̱ke̱c.
Adacit aciiri Ye̱su̱
(Marko 15:16-21; Jon 19:2-3)
27O̱o̱tte̱ zin aciiri cik Pilato Ye̱su̱ rok nginti abahe nege, kar aciiri do̱o̱k kuburuwet nonno. 28Aarta ru̱u̱ma̱ni̱ ciginnek kar kuburucek nonno ru̱u̱m ci ma̱ri̱. 29Idimanit zin luluk biilane kar kaarttek oo cinne. Kar bo̱do̱k kaarttek yaya a̱zzi̱t cinne a̱zzo̱. A̱ka̱tte̱k aciiri u̱zu̱ngti̱nne̱ ngati aminye nonno azi ne “Eehi, e̱e̱ni̱ i̱nna̱ alaan ci Ya̱u̱do̱.”#27:29 Alaan ci Ya̱u̱do̱: Aaim Alaata ru̱u̱ma̱ni̱ cik ma̱ri̱k kar bo̱do̱k aaim lulukwa cik riilik i̱ye̱la̱ doiz ci alaano. 30Kar zin kuturtek nonno amut, idimtta yaya a̱tte̱ cinne kar ku̱ru̱we̱t nonno oo lak cik meelek giir. 31Baling udduwet aciiri nonno, Aarta zin ru̱u̱m bali anyike nege nonno ke̱, kar zin ki̱ti̱mtte̱k ru̱u̱ma̱ni̱ balik ninne ke̱, kar ko̱o̱tte̱ ovvo ododek ta̱la̱ke̱c.
Otodoyyek ol Ye̱su̱ ta̱la̱ke̱c
(Marko 15:22-32; Lu̱ka̱ 23:27-43; Jon 19:17-27)
32Baling ovvo nege goola, u̱ru̱mto̱ ki e̱e̱t ci orog ci een zara Cyrene, een zara Si̱mo̱ne̱, adangttek zin nonno kodong ta̱la̱ke̱c#27:32 Ta̱la̱ke̱c: Ododek olli Romi ol ta̱la̱ke̱c ci een keet abunna ming edez u̱ce̱zi̱ e̱e̱t idic idic zee ka̱da̱k e̱e̱ti̱. ci Ye̱su̱.
33U̱zu̱cca̱ zin nginti azi zara Gologota, azi ungec cinne utuge cinne̱ng ne, “Nginti aave oo ci e̱e̱t ci adaha.” 34Imma nginati aanycik zin Ye̱su̱ merte kuud, ongotane ki ya̱ni̱; ma̱i̱je̱ baling atar enne, utubur zin. 35Baling otodoyyek aciiri Ye̱su̱ ta̱la̱ke̱c, engeret zin nege ru̱u̱ma̱ni̱ ciginnek ngati ovoce bibi azi ne ngene ci amuda.#Caliwon 22:18 36Baling a̱vvu̱to̱ lo̱o̱ta̱, ngen egelem ebek nonno dee niko. 37Imma ta̱la̱ke̱ca̱ o̱o̱we̱ cinne eteherit zoz cu: Een necu Ye̱su̱, Alaan ci Ya̱u̱do̱. 38Otodoyyek ogoryak cik e̱e̱ggi̱n rama bu̱k ki Ye̱su̱, aave co̱de̱ a̱tte̱ ci a̱zzo̱, okko co̱de̱ a̱tte̱ ci angeto.
39Imma ol cik ovvo goola abanyca, odomit nonno, a̱ku̱le̱k je̱e̱n ngati omone o̱o̱tti̱, 40kar kizeto ne, “I̱nna̱ e̱e̱ti̱ ci azi ne, okko egerzanni Ce̱e̱z wa Ta̱mu̱ta̱dde̱no̱ kar teheeny i̱i̱nya̱we̱ cik een i̱i̱yo̱, ti̱ri̱z da̱ ele cunne. Aara ele cunne ta̱la̱ke̱ca̱ ming e̱e̱ni̱ i̱nna̱ Ngerrti Ta̱mu̱ta̱dde̱no̱.”
41Udduwet zin alaata cik olli wawaco ki de̱me̱zzo̱k wak lo̱ti̱nno̱k ki lo̱ddi̱ki̱re̱ nonno bu̱k niko. 42Izektek zin bo̱do̱k nonno ne, “Eela enne ol u̱gge̱, iróng enne eela ele cinne. Ming een enne alaan ci Israilo, anyik nonno kulucai ta̱la̱ke̱ca̱ kar atin naga kelemtta zoz cinne. 43Arike enne zinin cinne Ta̱mu̱ta̱dde̱n. Anyik Ta̱mu̱ta̱dde̱n kaara nonno i̱yo̱ko̱ niko, ming orong enne nonno, eci azi enne ne, ‘Ke̱e̱ni̱ Ngerrti Ta̱mu̱ta̱dde̱no̱.’” 44Odomit zin bo̱do̱k ogoryaha ne̱k odode ta̱la̱ke̱ca̱ ki nonno ke̱ nonno bu̱k.
Daiz ci Ye̱su̱
(Marko 15:33-41; Lu̱ka̱ 23:44-49; Jon 19:28-30)
45Ize looci mu̱hu̱ra̱ baling okko i̱i̱ aave orgena, ki̱gi̱nge̱ yo̱mo̱na̱. 46Baling okko i̱i̱ iginge yo̱mo̱na̱, u̱tu̱lu̱ Ye̱su̱ muluwe ci a̱ppwe̱, “Eloi, Eloi, lama sabachthani?” Azi ungec ci zoz necu ne, “Ta̱mu̱ta̱dde̱n wananni ye̱i̱, Ta̱mu̱ta̱dde̱n wananni ye̱i̱, utungeya i̱nna̱ annit lo̱o̱c nya?”#Caliwon 22:1
47Baling iziyyet ol balik abile nginati ke̱ niko, izeto ne, “Awu enne a̱ri̱to̱i̱t ci zoz ci Ta̱mu̱ta̱dde̱no̱ een E̱li̱ja̱#27:47 E̱li̱ja̱: Een E̱li̱ja̱ a̱ri̱to̱i̱t ci olli Ya̱u̱do̱ bali okkoye Ta̱mu̱ta̱dde̱n nonno rugetet ta̱mu̱-kenga ke̱. A̱rri̱ta̱i̱ enne ba̱li̱ye̱ e̱rki̱nya̱i̱ cik een obet torkoc (900) baling ngen Ye̱su̱ ki̱ti̱rra̱i̱. Ikeb I Alaat 17-21; 2 Alaat 1-3..”
48Ataman niko, i̱vi̱r e̱e̱ti̱ co̱de̱ ngatinne̱ng uk anyaha ru̱u̱m kar kocowek merte kar kaarik morok bak arike utug ci Ye̱su̱ kuud. 49Izeto zin ol uggak ne, “Tung e̱e̱t necu, anyik nonno ka̱vvu̱ do̱. Kicinnet ming okko atidic E̱li̱ja̱ eela nonno.”
50Baling u̱tu̱lu̱ Ye̱su̱ bo̱do̱k oroot, kar zin ketteda zinin niko uk vongizi ngati Ta̱mu̱ta̱dde̱no̱.
51Imma i̱i̱te̱n neci a̱da̱kne̱ Ye̱su̱ ke̱, erece ru̱u̱m ci gon enger Ce̱e̱z wa Ta̱mu̱ta̱dde̱no̱ orgena ecito,#27:51 Ru̱u̱m ci enger Ce̱e̱z wa Ta̱mu̱ta̱dde̱no̱: Enger ru̱u̱m necu Nginti A̱li̱le̱ oroot ngati aave Ta̱mu̱ta̱dde̱n di̱ngdi̱ngo̱nta̱. I̱i̱zo̱ alaani ci a̱ddi̱ki̱re̱ wawaco ngin neci do̱ lak co̱de̱ e̱rki̱ta̱, kar kanyik wawac Ta̱mu̱ta̱dde̱n abunna unya mu̱nye̱n cik ollu do̱o̱k. IkebLeviticus 16; Marko 15:38; Lu̱ka̱ 23:45; I̱bu̱ru̱ 6:19-20; 9:1-7. akane ta̱dde̱na̱ kuk rok lo̱o̱c. Otomowe looci kize ki̱rki̱ri̱k, apakte biyena. 52I̱li̱btte̱ bak o̱o̱ye̱ ilometa cik ol cik meelek a̱li̱le̱ balik a̱da̱i̱to̱ ke̱, kar zin kitingazzo daiza kuruget. 53Iyokta ilomete, baling itinga Ye̱su̱ daiza, oot zin nege rok Jerusalem kar zin ki̱ye̱lte̱k e̱le̱tti̱ ol cik meelek.
54Baling icin ddi̱ki̱ryo̱i̱ti̱ ci aciiru ki aciir balik ebek Ye̱su̱ ko̱ ki̱rki̱ri̱k ki kaal ne̱k ogone ke̱ do̱o̱k, o̱to̱ngo̱o̱ltte̱ nege lo̱o̱c oroot, kar kizeto ne, “Een ette enne de̱de̱ Ngerrti Ta̱mu̱ta̱dde̱no̱.”
55Ma̱i̱je̱ nginati, anyak ngaai cik meelek balik eela Ye̱su̱ Ga̱li̱li̱ya̱ annu nonno, egelem nonno reena. 56Imma ngaane ne̱ke̱ owoye ciko, Ma̱ri̱ya̱ Madalina ki Ma̱ri̱ya̱ e̱e̱ti̱ Je̱mi̱si̱ ki Yosevo, ki bo̱do̱k ngaa ci Zebedee, e̱e̱ti̱ Je̱mi̱si̱ ki Jon.
Dawinet ci Ye̱su̱
(Marko 15:42-47; Lu̱ka̱ 23:50-56; Jon 19:38-42)
57Baling ize yo̱mo̱n, i̱ki̱ya̱ e̱e̱ti̱ imma ci een jaitot, een zara Yosevo ci a̱kku̱ o̱rge̱ ci een Arimatiya, ize enne bu̱k nuyait ci Ye̱su̱. 58Uk i̱jji̱n Pilato abunna ming aanyik nonno ele ci Ye̱su̱ kar kuk ka̱da̱. Utu zin Pilato ol ciginnek abunna ming anyike nonno daizoit neci. 59Idima zin Yosevo ele ci Ye̱su̱, kar ku̱lu̱ce̱k ru̱u̱m ci abunna, 60kar zin kaarik ilomi ci een jor adiman da̱ enne ngi̱lo̱ma̱, kar kiyotek bee ci a̱ddi̱ki̱re̱ ku̱bu̱ng ilomi kar kuk. 61Ma̱i̱je̱ Ma̱ri̱ya̱ wa Madalina ki Ma̱ri̱ya̱ imma bo̱do̱k aavtte ilomi neci o̱to̱ne̱ co̱de̱ ke̱.
Ebek aciiri ilomi ci Ye̱su̱
62Imma nge̱rre̱ti̱n ci reng, I̱i̱te̱ne̱ wa Yu̱bze̱nto̱, oot alaata cik olli wawaco ki olli Varacis rok Pilato. 63Izeto ne, “Ddi̱ki̱ryo̱i̱t, ka̱a̱da̱nna̱ zoz bali azi volongnyoiti baling ngen aruge, azi ne, ‘Ming edeccai i̱i̱nya̱ cik een i̱i̱yo̱, kingazi atin dee daiza.’ 64I̱yo̱ko̱ anyik ol kebeit ilomi kedecca i̱i̱nya̱ cik een i̱i̱yo̱ balik u̱du̱wa̱ enne ke̱, icima a̱vvu̱ atin nuyaha ciginnek ki̱vi̱ta̱ kogorozit ilomi ko̱o̱tte̱ ele cinne, kar kizettek ol ne itinga enne daiza. Okko atin volong cinne̱ng a̱ppwa̱ oroot kommog bali u̱du̱wa̱ enne ke̱.”
65A̱nne̱k Pilato nogo ne, “Aanycik zin aciir koot kebeit ilomi ju̱rru̱m ki i̱yo̱ko̱ ming a̱gga̱yyu̱ niga ko̱.” 66Kar koot kidimanit ilomi necu ju̱rru̱m, a̱di̱l nege kar kutungttek ol kebeit.
Currently Selected:
Ma̱te̱yo̱ 27: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.