Ma̱te̱yo̱ 26
26
Orong alaata cik Ya̱u̱do̱ ku̱ru̱we̱t Ye̱su̱
(Marko 14:1-2; Lu̱ka̱ 22:1-2; Jon 11:45-53)
1Baling edeca Ye̱su̱ de̱mzi̱ne̱t kaal ne̱ke̱ do̱o̱k, kar zin kizek nuyak ciginnek ne, 2“Eci niga a̱gga̱yyu̱ akate atin I̱i̱te̱n wa Va̱rda̱ngi̱nto̱,#26:2 I̱i̱te̱n wa Va̱rda̱ngi̱nto̱: A̱a̱dda̱ olli Ya̱u̱do̱ i̱i̱te̱n bali arike ji̱ji̱ti̱gge̱k bi̱ye̱ tatuget cigge̱k kar Ta̱mu̱ta̱dde̱n ka̱va̱rda̱ng ce̱e̱zi̱ cigge̱k lo̱o̱ce̱ ci Masiro ke̱. Een i̱i̱te̱n cu i̱i̱te̱n bali adahe nege umunet balik iróng amukcari ke̱. Een i̱i̱te̱n cu ci i̱ye̱la̱ i̱i̱te̱n ci a̱kku̱nne̱ atin Ye̱su̱ ki Nyoon ci Ta̱mu̱ta̱dde̱no̱, eci bi̱ye̱ta̱ ciginnek utunyca mu̱nye̱n cigga̱c. IkebLu̱ge̱z 12:17-28; Marko 14:12; Lu̱ka̱ 22:7; Jon 1:9-35; 1 Ko̱ri̱nto̱ 5:7; 1 Peturu 1:19. ming kedecca naga i̱i̱nya̱ rama, kar anna Ngerrti E̱e̱to̱ adawana atin ol annita kar kotodoyang annit keet wa een ta̱la̱ke̱c.”
3Imma zin i̱i̱te̱n neci, u̱lu̱tte̱ alaata cik olli wawaco ki lo̱ddi̱ki̱re̱ cik ollu ce̱e̱ze̱ ci alaan ci a̱ddi̱ki̱re̱ wawaco#26:3 Alaan ci a̱ddi̱ki̱re̱ wawaco: Ommog alaani ci a̱ddi̱ki̱re̱ wawaco ko̱ alaat cik olli wawaco eci een nonno do̱ ṯok ci gon i̱i̱zo̱ Ce̱e̱z wa Ta̱mu̱ta̱dde̱no̱ Ngin wa A̱li̱le̱ Oroot e̱rki̱ta̱ lak co̱de̱. Anyaha enne bi̱ye̱ cik kar kutuny mu̱nye̱n cigge̱k. Aave Ta̱mu̱ta̱dde̱n di̱ngdi̱ngo̱nta̱ Ngin wa A̱li̱le̱ Oroot, zoz zin ci iróng alaani ci a̱ddi̱ki̱re̱ wawaco ko̱ i̱i̱zo̱ ngintu i̱i̱te̱n imma e̱rki̱ta̱. IkebLeviticus 16; I̱bu̱ru̱ 9:1-7. ci een zara Kaipas, 4kar zin nege kozozit zoz ci adawe Ye̱su̱ orong ka̱gga̱mi̱t nonno lo̱mu̱k kar ku̱ru̱we̱ ka̱da̱k. 5Izeto ne, “Abarik iróng een i̱i̱te̱n ci kwo̱o̱ro̱ icima anyike atin zu̱we̱ kutuburret nong kize nyi̱li̱.”
Avud ngaa imma Ye̱su̱ o̱rge̱ ci een Bethany maala
(Marko 14:3-9; Jon 12:1-8)
6Baling ngen Ye̱su̱ aave o̱rge̱ ci een Bethany ce̱e̱ze̱ ci e̱e̱t ci een zara Si̱mo̱ne̱ wa bali anyak dhovo ko̱, 7i̱ki̱ya̱k ngaa imma nonno ci anyak gi̱i̱ ci ogon ki de̱e̱re̱#26:7 Gi̱i̱ ci ogon ki de̱e̱re̱: Adimana ol gi̱i̱ cu biye ci een zara alabaster. a̱zi̱ze̱ oroot anyak maal ci ongooli laala atala ol o̱ro̱bi̱ya̱i̱ cik meelek oroot kar zin ku̱du̱te̱k oo ci Ye̱su̱ ngati adahe enne da̱i̱ne̱t cik i̱yo̱mo̱na̱k. 8Baling icinnet nuyaha cik Ye̱su̱ zoz ci ogon ngaa necu niko, utuburet zin nege nong oroot, kar kizeto ne, “Aminye ngaa necu o̱ro̱bi̱ya̱ niko nya? 9Utene weda enne maal necu o̱ro̱bi̱ya̱i̱ cik meelek giir kar zin kaanyik o̱ro̱bi̱ya̱ ol cik amati.”
10A̱gga̱ Ye̱su̱ zoz necu kar kizek nogo ne, “Nya ming aminyu ngaa necu ko̱? Ogonika enne annita gi̱i̱ ci a̱zi̱ze̱. 11Abakku atin gon niga ki ol cik amati odohize, ma̱i̱je̱ anna iróng atin karume ki i̱ge̱t gon ngatu u̱u̱mu̱c. 12Imma baling u̱ddu̱te̱k enne maal ele cinanni ke̱, een necu gool ci adimane enne ele cinanni kize ci ovvo ol abungnyan lo̱o̱wa̱. 13Ka̱du̱wa̱kku̱ng zin zoz ci een de̱de̱, ming ovvo atin ol uwahek ol kaviyak cik abunna lo̱o̱co̱we̱ do̱o̱k, imma gi̱i̱ ci u̱tu̱gu̱ enne a̱du̱ya̱i̱ atin kize zoz ci aadane ol nonno.”
Elema Judasi o̱ro̱bi̱ya̱ cik kar kadawai Ye̱su̱
(Marko 14:10-11; Lu̱ka̱ 22:3-6)
14Uk zin Judas Iskariyot wa een nuyait ci Ye̱su̱ co̱de̱ nuyahe wak een omoto ki rama rok alaat cik olli wawaco Ce̱e̱ze̱ wa Ta̱mu̱ta̱dde̱no̱. 15Kar ki̱jji̱n nogo, “A̱ru̱we̱ka̱ng o̱ro̱bi̱ya̱ izong kar anna ki̱ye̱le̱u̱ng gool ci a̱gga̱mnyu̱ niga Ye̱su̱?” Kar zin nege kanycik nonno o̱ro̱bi̱ya̱ moten i̱i̱yo̱ cik een ziik. 16Akate zin Judasi i̱nya̱we̱ ne̱ke̱ ele, orong gool ci kar enne ka̱gga̱me̱k nogo Ye̱su̱.
Adak Ye̱su̱ ki nuyak da̱i̱ne̱t cik Va̱rda̱ngi̱nto̱
(Marko 14:12-21; Lu̱ka̱ 22:7-13; Jon 13:21-30)
17Imma i̱i̱te̱ne̱ wa akane Kwo̱o̱r wa Umunet wak iróng Amukcari,#26:17 Kwo̱o̱r wa Umunet wak iróng Amukcari: Adak olli Ya̱u̱do̱ kwo̱o̱r necu gwo̱o̱nya̱ turgerem, aadane nege i̱i̱te̱n bali eelanne Ta̱mu̱ta̱dde̱n ji̱ji̱ti̱gge̱k Masira. Aara nogo ngati e̱e̱ggi̱nne̱ du̱cca̱k. Akane kwo̱o̱r I̱i̱te̱ne̱ wa Va̱rda̱ngi̱nto̱. IkebLu̱ge̱z 12:17-20. i̱vi̱tta̱k zin nuyaha Ye̱su̱ kar ki̱jji̱nne̱t, “Orongnyet kidimanta da̱i̱ne̱t cik I̱i̱te̱n wa Va̱rda̱ngi̱nto̱ nga?”
18U̱du̱wa̱k zin Ye̱su̱ nogo, azi ne, “Ming ovvo niga ovvoyyu orgato acinnu atidic e̱e̱t imma, u̱du̱ktta̱k nonno izet ne, azi de̱me̱zo̱i̱ti̱ ne, ‘Utubte annit gwo̱o̱ya̱ kar kadakta ki nuyak cigannik da̱i̱ne̱t cik I̱i̱te̱n wa Va̱rda̱ngi̱nto̱ ce̱e̱ze̱ cunne.’” 19U̱tu̱gu̱zzo̱ zin nuyaha zoz neci ki bali ming u̱du̱wa̱k Ye̱su̱ nogo ke̱, kar zin kidimanit I̱i̱te̱n wa Va̱rda̱ngi̱nto̱.
20Baling ize yo̱mo̱n, a̱vvu̱ zin Ye̱su̱ lo̱o̱ta̱ ki to̱ni̱a̱k ciginnek omoto ki rama, iliktek da̱i̱ne̱t orgen. 21Imma bali da̱i̱nte̱, iizek zin Ye̱su̱ nogo ne, “Ka̱du̱wa̱ zoz ci een de̱de̱, anyak e̱e̱t imma ngatinno̱ng ci okko atin adawanan.”
22Baling iziyyet to̱ni̱a̱ha̱ zoz ci Ye̱su̱ niko, omozte oroot, kar zin ki̱jji̱nne̱t nonno e̱co̱de̱, e̱co̱de̱ azi ne, “De̱de̱ Manyi, iróng een annita?”
23O̱bo̱de̱k zin Ye̱su̱ nogo, “Anyak e̱e̱t co̱de̱ ngatinno̱ng ci kadaina nga̱to̱de̱ ngatu ko̱ loza ci atin adawanan. 24Eci Ngerrti E̱e̱to̱ a̱da̱i̱ atin ki bali ming u̱du̱ya̱i̱ zoz cinne Warage ci Ta̱mu̱ta̱dde̱no̱. O̱lle̱ bai atin cik e̱e̱t ci adawa Ngerrti E̱e̱to̱, agano weda ming iróng enne a̱rri̱ta̱i̱!”
25Imma zin Judas ci atin okko adawa nonno ko̱ kizek Ye̱su̱ ne, “De̱de̱, iróng een annita, De̱me̱zo̱i̱t?”
Kar zin Ye̱su̱ kobodek nonno, “I̱i̱ny, i̱nne̱ta̱ ele.”
Da̱i̱ne̱t cik Manyi vu̱rrto̱
(Marko 14:22-26; Lu̱ka̱ 22:14-23; 1 Ko̱ri̱nto̱ 11:23-25)
26Baling ngen nege adakce, idima zin Ye̱su̱ umune kar zin ki̱jji̱n Ta̱mu̱ta̱dde̱n ka̱mu̱yu̱k. Kar zin ku̱du̱l kizeto idice kar kaanyik nuyak, kar kize ne, “Idimtta adait een necu ele cinanni.”
27Kar zin kidima uduc ci anyak vi̱no̱ kar kaanyik Ta̱mu̱ta̱dde̱n zany. Aanyik zin nogo kar kize ne, “Uudet niga do̱o̱k, 28eci e̱e̱ggi̱n ne̱ko̱ bi̱ye̱ cigannik olomo#26:28 Bi̱ye̱ cigannik olomo: Uuny bi̱ye̱ta̱ cik Ye̱su̱ ol mu̱nye̱n kar kanyik nogo kaganto ki Ta̱mu̱ta̱dde̱n. Aanyik Ta̱mu̱ta̱dde̱n olli Israilo kapaktek wawa cik o̱le̱nya̱ ki eeza kar bi̱ye̱ta̱ kutunyet nogo mu̱nye̱ne̱ cigge̱k. I̱ye̱la̱ wawa ne̱ko̱ daiz ci Ye̱su̱ Ki̱ri̱sto̱ ta̱la̱ke̱ca̱, eci enne een Nyoon ci Ta̱mu̱ta̱dde̱no̱. Alalnek atin bi̱ye̱ta̱ ciginnek lak co̱de̱ ol wak elemtta nonno mu̱nye̱ne̱ cigge̱k do̱o̱k. IkebLu̱ge̱z 24:8; Leviticus 16:11-19; Marko 14:24; I̱bu̱ru̱ 9:15-22. ci Ta̱mu̱ta̱dde̱no̱ ki ol ciginnek. A̱vvu̱ bi̱ye̱ta̱ ne̱ko̱ abunna aara ol cik meelek mu̱nye̱n. 29Ka̱du̱wa̱kku̱ng zoz ci een de̱de̱, iróng atin anna kaudi vi̱no̱ ki i̱ge̱t nga̱to̱de̱ uduce necu zee bak kovvo kaude ki i̱ge̱t atin ba̱a̱li̱nte̱ ci Baba.”
30Baling e̱be̱nni̱t nege tegel kar zin koot Biye ci I̱ngi̱ro̱u̱.
U̱du̱wa̱ Ye̱su̱ zoz ci okko atin Peturu etezine nonno
(Marko 14:27-31; Lu̱ka̱ 22:31-34; Jon 13:36-38)
31U̱du̱wa̱k zin Ye̱su̱ to̱ni̱a̱k ciginnek zoz cu: “Aburnang atija niga do̱o̱k annit, eci e̱he̱rye̱ Warage ci Ta̱mu̱ta̱dde̱no̱ azi ne:
“‘Ka̱ru̱i̱ atin tuwayoit,
kar atin a̱zza̱ kazante.’#Zakaria 13:7
32Ma̱i̱je̱ ming kitinga daiza, kokko atin anna o̱o̱we̱ cunno̱ng o̱rge̱ ci een zara Ga̱li̱li̱.”
33Itinga Peturu, a̱nne̱k Ye̱su̱ ne, “Ming utungtei nuyaha i̱nne̱t do̱o̱k lo̱o̱c, iróng anna kungneki lo̱o̱c udut.”
34O̱bo̱de̱k zin Ye̱su̱ Peturu, “Ka̱du̱wa̱ki̱ zoz ci een de̱de̱, etezinna atija i̱nna̱ annita lak i̱i̱yo̱ ming ngen tuulici kogok.”
35Abariz Peturu dee, kar kize ne, “I̱llo̱i̱, iróng anna kungneki lo̱o̱c udut, ma wo̱ye̱ nu̱nu̱n ming ize daiz, ka̱da̱i̱ ki i̱nne̱t nga̱to̱de̱.” Kar zin bo̱do̱k nuyaha do̱o̱k kizeto niko bu̱k.
Ala Ye̱su̱ Ta̱mu̱ta̱dde̱n
(Marko 14:32-42; Lu̱ka̱ 22:39-46)
36Oot zin Ye̱su̱ ki nuyak ciginnek rok nginti een Gethsemane, kar enne kizek nogo ne, “A̱vvu̱t ngatu, ming ngen anna kokko kala Ta̱mu̱ta̱dde̱n.” 37Uwe zin enne Peturu ki doolik e̱e̱t ci een Zebedee rama, Je̱mi̱s ki Jon, kar zin ki̱vi̱r nonno zinin oroot. 38U̱du̱wa̱k zin nogo, azi ne, “Abbize annit zinin matiz kize daiz. A̱vvu̱t ngatu, kicinte naga do̱o̱k.”
39Uk zin enne reena idic niko, kar ku̱lu̱le̱ kicin lo̱o̱c, ala Ta̱mu̱ta̱dde̱n, azi ne, “Baba! Ming elema i̱nna̱ aara uduc ci piryanzeto ngatinanni. Korongi anna zoz cunne ku̱tu̱gu̱we̱ iróng een cinanni.”
40Kar zin enne ki̱mi̱re̱ kuk ngati nuyak ciginnek, amuda nogo a̱ta̱gu̱zzo̱ ne veelek. “Iróng niga aavtiyyu kar icintang annit i̱i̱ co̱de̱ ṯok?” I̱jji̱n zin enne Peturu, 41“Cinno kar la Ta̱mu̱ta̱dde̱n gerza ming i̱i̱na̱k timaninet. Elemi vongizi cunne, imma ele iróng uule.”
42Utungek bo̱do̱k nogo kar kuk kala Ta̱mu̱ta̱dde̱n, azi ne, “Baba! Ming iróng i̱nna̱ aara uduc ci piryanzeto ngatinanni, tu̱gu̱ ki ci orongi i̱nna̱.”
43Baling i̱mi̱ro̱zi̱k enne nogo, amuda enne nogo bo̱do̱k ming adunge dee, eci iróng nege oo ebere cigge̱k. 44Kar zin enne ki̱mi̱re̱ bo̱do̱k kuk kala Ta̱mu̱ta̱dde̱n lak i̱i̱yo̱, a̱du̱wa̱ zoz wanai oowa ke̱ dee.
45Kar zin enne ki̱mi̱ro̱zi̱k nuyak ciginnek kar kize ne, “Ngen oginnu niko? Utube i̱i̱ ci kar Ngerrti E̱e̱to̱ ka̱gga̱mo̱zi̱k ol cik mu̱nye̱nu̱. 46Itingazzo kotozzo. Icinnet, i̱ki̱ya̱ e̱e̱ti̱ ci okko adawanan.”
E̱ce̱bi̱t ol Ye̱su̱
(Marko 14:43-50; Lu̱ka̱ 22:47-53; Jon 18:3-12)
47Baling ngen ozoz Ye̱su̱ niko, i̱ki̱ya̱ zin nuyaiti ci Ye̱su̱ co̱de̱ een zara Judas ki ol cik meelek giir, anyak ki ilanya ki co̱o̱li̱t. I̱tto̱na̱ nogo alaata cik olli wawaco ki lo̱ddi̱ki̱re̱ cik ollu. 48U̱du̱wa̱k zin Judasi nogo gool ci ovvo nege a̱gga̱me̱ e̱e̱t neci, kar kize ne, “A̱gga̱yyu̱ atin e̱e̱t neci ming kuwa anna kar kizza nonno, e̱ce̱bi̱t zin e̱e̱t neci.” 49I̱ki̱ya̱k zin Judasi Ye̱su̱ kar kizza kize ne, “Kizzayyo, de̱me̱zo̱i̱t!” Kar kizza nonno.
50O̱bo̱de̱k zin Ye̱su̱ nonno, “Goona, tu̱gu̱ gi̱i̱ ci a̱kku̱nne̱ i̱nna̱ ko̱.”
A̱gga̱mi̱t zin ol ne̱ke̱ Ye̱su̱ kar ke̱ce̱bbi̱t. 51Uvuca zin e̱e̱ti̱ co̱de̱ ci orkor ki Ye̱su̱ ko̱ nya̱tu̱ba̱t kar ketteda itat ci du̱ca̱i̱t ci alaan ci a̱ddi̱ki̱re̱ wawaco.
52A̱nne̱k zin Ye̱su̱ nonno ne, “Bilo, mi̱ro̱i̱ nya̱tu̱ba̱t necu, eci e̱e̱ti̱ ci a̱ru̱k ol nya̱tu̱ba̱ta̱, a̱da̱i̱ atin enne bu̱k nya̱tu̱ba̱ta̱. 53Iróng a̱gga̱yyu̱ ka̱jji̱nni̱ wo̱ye̱ Baba ta̱mu̱-kenga kar ki̱tto̱nna̱ anjilonya ciginnek Ta̱mu̱ta̱dde̱no̱ meelek giir? 54Ming ku̱tu̱gu̱ anna niko, akati wo̱ye̱ zoz ci Ta̱mu̱ta̱dde̱no̱ e̱he̱rye̱ Warage cinne azi ne, ogonika ol annit ko̱ mo̱o̱le̱t ku̱?”
55Iizek zin Ye̱su̱ koole ne, “Ke̱e̱ni̱ anna ddi̱ki̱ryo̱i̱t ci kokkoye ol zara koorto ki gaala, a̱vvu̱nnu̱ ilanyai ki co̱o̱li̱te̱ ovvo a̱gga̱mnya̱ng annita? Kaave gon anna odohize reene ci Ce̱e̱z wa Ta̱mu̱ta̱dde̱no̱, kedemze, ngen zin a̱gga̱mta̱ng. 56A̱vvu̱ kaala ne̱ko̱ do̱o̱k abunna zoz bali ozoz a̱ri̱tto̱wa̱ Warage ci Ta̱mu̱ta̱dde̱no̱ ke̱ kakat mo̱o̱le̱t.” Kar zin nuyaha do̱o̱k ko̱do̱te̱k nonno lo̱o̱c kar ki̱vi̱re̱t.
O̱o̱tte̱ ol Ye̱su̱ lo̱ki̱ka̱
(Marko 14:53-65; Lu̱ka̱ 22:54-55,63-71; Jon 18:13-14,19-24)
57O̱o̱tte̱ zin ol balik eceb Ye̱su̱ ke̱ ce̱e̱ze̱ ci e̱e̱t ci een zara Kaipas, alaan ci a̱ddi̱ki̱re̱ wawaco, alute da̱ de̱me̱zzo̱wa̱ wak lo̱ti̱nno̱k wak Musesi ki lo̱ddi̱ki̱re̱ cik ollu ce̱e̱ze̱ neci. 58Abarik Peturu unu nonno vu̱rrta̱ zee rok ce̱e̱z ci alaan ci a̱ddi̱ki̱re̱ wawaco. I̱tto̱ enne uk a̱vvu̱ lo̱o̱ta̱ orong kicin gi̱i̱ ci ogonik ol Ye̱su̱.
59Imma alaata cik olli wawaco ki ol cik lo̱ki̱ko̱ do̱o̱k orong kurubta zoz ci een volong, kar zin koot ku̱ru̱we̱t Ye̱su̱ ka̱da̱k. 60Abarik iróng zin nege amuda gi̱i̱ imma ci abaci enne, ming a̱du̱wa̱ bbacaha cik meelek zoz volonga nu̱nu̱n. Imma vu̱rrta̱, i̱vi̱ta̱ zin bbacaha uggak cik een rama, 61a̱nne̱k ol ne, “Azi Ye̱su̱ ne, ‘Kazanni wo̱ye̱ anna Ce̱e̱z wa Ta̱mu̱ta̱dde̱no̱ kar bo̱do̱k keteeheny gwo̱o̱ya̱ cik een i̱i̱yo̱.’”
62Itinga zin alaani ci a̱ddi̱ki̱re̱ wawaco Ce̱e̱ze̱ wa Ta̱mu̱ta̱dde̱no̱ je̱e̱na̱ kar kizek Ye̱su̱ ne, “Yo, anyai zoz ci abarizi zo̱ze̱ ci a̱du̱wa̱ ol ne̱ko̱ ko̱? Du̱wa̱ di̱ zoz ci a̱du̱wa̱ ol ciko obod ki i̱nne̱ta̱?” 63Ma̱i̱je̱ Ye̱su̱ ijakce li̱i̱m.
Iizek alaani ci a̱ddi̱ki̱re̱ wawaco nonno ne, “Ka̱jji̱ni̱n zare cik Ta̱mu̱ta̱dde̱n wa aruge, du̱wa̱kke̱t ming e̱e̱ni̱ i̱nna̱ Ki̱ri̱sto̱, Ngerrti Ta̱mu̱ta̱dde̱no̱.”
64O̱bo̱de̱k zin Ye̱su̱ nonno, a̱nne̱k ne, “I̱i̱ny, ogon ki i̱yo̱ko̱ ming a̱du̱wa̱ i̱nna̱ ko̱. Abarik ka̱du̱wa̱kku̱ng, acinnang atin annita Ngerrti E̱e̱to̱ aave a̱tte̱ ci a̱zzo̱ Ta̱mu̱ta̱dde̱no̱, nginti anyak doiz, kar koboda di̱i̱za̱ ta̱mu̱-kenga.”
65Ming okko aziye alaani ci a̱ddi̱ki̱re̱ wawaco zoz necu, utubur nong niko, kar kerec ru̱u̱ma̱ni̱ ciginnek, kar kize ne, “Odom enne Ta̱mu̱ta̱dde̱n. Nya korong bo̱do̱k naga bbacak u̱gge̱ ko̱? Iziktu niga zoz ci odome enne Ta̱mu̱ta̱dde̱n. 66I̱yo̱ko̱ zin i̱no̱nnu̱ niga nya?”
O̱bo̱dde̱k ol, izeto ne, “Agano enne ki daiz.”
67Uturttek zin nege Ye̱su̱ amut ebere, kar ku̱lu̱ma̱nni̱t nonno. Kar bo̱do̱k uggak kapannit nonno dee, 68kar ol uggak kizettek ne, “Du̱wa̱ da̱ e̱e̱t ci a̱ru̱ki̱ i̱nne̱ta̱ Ki̱ri̱sto̱?”
Etezine Peturu Ye̱su̱
(Marko 14:66-72; Lu̱ka̱ 22:56-62; Jon 18:15-18,25-27)
69Ngen Peturu aave reena, i̱ki̱ya̱ zin du̱ca̱i̱ti̱ ci nga̱a̱ye̱ kar kizek nonno ne, “E̱e̱ni̱ i̱nna̱ e̱e̱t bali gon orkoryyu ki Ye̱su̱ lo̱o̱ce̱ ci Ga̱li̱li̱ ko̱.”
70Etezo zin Peturu orgene ci ollu do̱o̱k. A̱nne̱k du̱ca̱i̱t neci ne, “Iróng anna ka̱gga̱ zoz ci ozozi i̱nna̱ ko̱.”
71Baling okko Peturu okko tatuga, icin du̱ca̱i̱ti̱ imma ci nga̱a̱ye̱ nonno, kar kizek ol ne̱k abile ki nonno ojonun ke̱ ne, “Orkor ba̱li̱ye̱ e̱e̱ti̱ cu ki Ye̱su̱ wa orog ci Nazereti.”
72Etezoi Peturu orkori cinne ki Ye̱su̱ bo̱do̱k kar ki̱tto̱n zar cik Ta̱mu̱ta̱dde̱no̱, azi ne, “Iróng anna bu̱k ka̱gga̱ e̱e̱t neci.”
73Imma nginti dicilim niko, i̱vi̱tta̱k ol ne̱k abile nginati ke̱ Peturu kar kizettek nonno ne, “E̱e̱ni̱ i̱nna̱ bu̱k e̱e̱t co̱de̱ olle wak Ye̱su̱, eci i̱nna̱ ozozonnu ki ol cik Ga̱li̱li̱.”
74Utuwak zin Peturu ele to̱ri̱ne̱t kar ki̱tto̱n zar cik Ta̱mu̱ta̱dde̱no̱ ngatinne̱ng, ize ne, “Kogonni olom zare cik Ta̱mu̱ta̱dde̱no̱, iróng anna ka̱gga̱ e̱e̱t neci.”
Ataman niko orok tuulici. 75A̱a̱dda̱ zin Peturu zoz bali u̱du̱wa̱ Ye̱su̱ ke̱, azi ne, “Ming ngen tuulici korok, etezinna atin i̱nna̱ annita lak i̱i̱yo̱.” Kar zin enne kuk reena, u̱tu̱lu̱ oroot.
Currently Selected:
Ma̱te̱yo̱ 26: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.