Ma̱te̱yo̱ 25
25
Zoz ci atubek Ye̱su̱ ki dooli omoto
1Ize zin bo̱do̱k Ye̱su̱ ne, “Katubzeke wo̱ye̱ ba̱a̱li̱ne̱t ci ta̱mu̱-kengo ki dooli cik nga̱a̱ye̱k een omoto ngen ka̱ta̱gu̱zzo̱ ki e̱e̱t imma ko̱, balik adima lombonya kar koot ku̱ru̱mtte̱k rucait gool. 2Imma zin doolinne ne̱ke̱, tarbale cik een tu̱r, ovvo cik een tu̱r egenyi. 3Ovvoye dooli cik een tu̱r tarbalik ko̱ lombonya cigge̱k ollin i̱llo̱i̱ maal. 4Ma̱i̱je̱ dooli cik egenyi een tu̱r ko̱ ovvoye maal jirkinyai ki lombonya. 5Baling iróng rucaiti ngen a̱kku̱ ataman, a̱vvu̱to̱ zin nege do̱o̱k lo̱o̱ta̱ a̱gga̱mtta̱ unyaha kar ka̱ta̱gu̱zzo̱.
6“Imma ba̱a̱li̱n kenga, ozoz mului ci azi ne, ‘Icu rucait ngatu, i̱vi̱ta̱ u̱ru̱mtte̱k nonno gool!’
7“Itingazzo zin dooli wak ere rucait ko̱ do̱o̱k kar zin katalanyccek lombonya cigge̱k. 8A̱nne̱k zin dooli wak tarbalik gonoggi ne, ‘Eelawet maale ciggo̱k eci lombonya cigga̱k oot i̱di̱tte̱.’
9“O̱bo̱dde̱k zin gonogga nogo, a̱nne̱k ne, ‘Iróng naga kanyaka maal ci eleno ki agit veelek. Abarik oot ngati ol wak gon utene maal kar ataltta maal nginati.’
10“Imma baling ovvo nege uuta maal dukana, i̱ki̱ya̱ zin rucaiti. Oot zin dooli balik e̱re̱ye̱ nginati ke̱ i̱tto̱zzo̱ ki nonno ce̱e̱z ci a̱ru̱we̱ ol eezen. Kar zin tatug kunyuge.
11“Imma vu̱rrta̱, i̱vi̱ta̱ zin dooli wak tarbalik ko̱. Kar kizettek rucait ne, ‘Nger, owet tatug!’
12“Imma enne abariz zin, ‘Ka̱du̱wa̱kku̱ng zoz ci een de̱de̱, iróng anna ka̱gga̱yyu̱ng!’
13“I̱yo̱ko̱ zin, e̱re̱yyo̱ ju̱rru̱m, eci niga iróng a̱gga̱yyu̱ i̱i̱te̱n icima i̱i̱ ci okko Ngerrti E̱e̱to̱ obodak lo̱o̱c.”
Zoz ci atubuzek Ye̱su̱ du̱cca̱k cik een i̱i̱yo̱
(Lu̱ka̱ 19:11-27)
14Azi bo̱do̱k Ye̱su̱ ne, “Katubek ba̱a̱li̱ne̱t ci ta̱mu̱-kengo ki e̱e̱t ci eroni. Utu zin enne du̱cca̱k ciginnek do̱o̱k, kar kaanyik nogo o̱ro̱bi̱ya̱ abunna ming utene nege kaal cik ataline ming ngen enne eroni. 15Aanyik du̱ca̱i̱t co̱de̱ lodet tu̱r cik dhahabo,#25:15 Lo̱do̱ ci dhahabo: A̱li̱ngli̱ng wo̱ye̱ e̱e̱ti̱ e̱rki̱nya̱ omoto ki tu̱r kar ku̱ru̱k o̱ro̱bi̱ya̱ cik een Lo̱do̱ ci dhahabo. okko bo̱do̱k co̱de̱ anyike lodet rama cik dhahabo, kar bo̱do̱k ci vu̱rrto̱ kanyik lo̱do̱ co̱de̱ ci dhahabo. Anyik enne e̱e̱t go̱o̱le̱ ci uule e̱e̱ti̱. Kar zin enne kuk eroni cinne. 16Idima du̱ca̱i̱ti̱ wa a̱gga̱m lodet cik dhahabo een tu̱r ko̱ o̱ro̱bi̱ya̱ ciginnek kar ki̱li̱ngli̱ng bak otorye kize lodet tu̱r. 17Uwe bo̱do̱k du̱ca̱i̱ti̱ wa anyak lodet rama cik een dhahab ko̱ lodet ne̱ke̱ uk i̱li̱ngli̱nge̱, bak otorye lodetta cik een dhahab ko̱ kizeto lodet we̱c. 18Ma̱i̱je̱ du̱ca̱i̱ti̱ bali anyak lo̱do̱ co̱de̱ ci een dhahab ke̱, a̱da̱ lo̱o̱k kar ku̱lu̱gu̱ny lo̱do̱ ci ddi̱ki̱ryo̱i̱t cinne ko̱.
19“Imma bali e̱rki̱to̱we̱ u̱gge̱ oboda ddi̱ki̱ryo̱i̱ti̱ cinne̱ng kar ki̱ki̱ya̱ kedeca ki nogo zoz ci lodet balik dhahabo anyak nege ke̱. 20Ize zin du̱ca̱i̱ti̱ bali aanyik enne lodet cik e̱e̱ggi̱n dhahab tu̱r ke̱ ne ‘Ddi̱ki̱ryo̱i̱t, aanya ba̱li̱ye̱ i̱nna̱ annit lodet tu̱r, i̱yo̱ko̱ zin izeto lodetta do̱o̱k omoto.’
21“O̱bo̱de̱k zin ddi̱ki̱ryo̱i̱ti̱ a̱nne̱k ne, ‘Abunna oroot, e̱e̱ni̱ i̱nna̱ du̱ca̱i̱t ci abunna, kar bo̱do̱k nyak zinin ci alali. A̱gga̱mu̱ i̱nna̱ lodet cik kidik ko̱ zinine ci alali, i̱yo̱ko̱ zin kaanyi atin gga̱m kaal cigannik meelek. I̱jja̱ ozolit talninet ki ddi̱ki̱ryo̱i̱t cunne.
22“I̱ki̱ya̱ bo̱do̱k du̱ca̱i̱ti̱ bali anyak lodet cik e̱e̱ggi̱n rama een dhahab ko̱, a̱nne̱k ne, ‘Ddi̱ki̱ryo̱i̱t, aanya i̱nna̱ annit ba̱li̱ye̱ lodet rama, izeto zin lodetta we̱c.’
23“Ize zin ddi̱ki̱ryo̱i̱ti̱ ne, ‘Abunna oroot, du̱ca̱i̱t cinanni abunna kar kalal zinin. Alali i̱nne̱t zinin ngati a̱gga̱me̱ lodet cikidik, i̱yo̱ko̱ zin kaanyi ize ddi̱ki̱ryo̱i̱t ci abali kaal cik meelek. I̱jja̱ zin kozolit talninet ki ddi̱ki̱ryo̱i̱t cunne nga̱to̱de̱!’
24“I̱ki̱ya̱ zin bo̱do̱k du̱ca̱i̱ti̱ bali anyak lo̱do̱ co̱de̱ ci een dhahab ke̱. Kar kize ne, ‘Ddi̱ki̱ryo̱i̱t, ka̱gga̱yi̱ ming e̱e̱ni̱ i̱nna̱ gu̱lu̱zo̱i̱t, orongi i̱nna̱ dak kaal cik a̱li̱ngli̱nga̱ ol kar luta labi cik eeva ol uggak ci ngen i̱nna̱ u̱u̱me̱k a̱zzi̱t. 25Ko̱ngo̱o̱le̱ ba̱li̱ye̱ anna kar zin kadawek lo̱do̱ cunne een dhahab ko̱ lo̱o̱c. Cinno, icu lo̱do̱ cunne.’
26“O̱bo̱de̱k zin ddi̱ki̱ryo̱i̱ti̱ cinne, a̱nne̱k ne, ‘E̱e̱ni̱ i̱nna̱ du̱ca̱i̱t ci vangvangi, kar ize gu̱u̱r. I̱no̱ni̱ i̱nna̱ ke̱e̱ni̱ anna gu̱lu̱zo̱i̱t, kaluta gon anna kaal cik ngen anna ki̱li̱ngli̱nga̱? 27Abunna, a̱li̱ngli̱nge̱ weda i̱nna̱ lodet cigannik ko̱ ataline kaal kar ki̱ti̱rre̱t, ming kokko anna ka̱kku̱ni̱ karuba weda i̱ti̱rre̱ta̱.
28“‘Idimtta lo̱do̱ ngatinne kar aanycik du̱ca̱i̱t ci anyak lodet omoto ko̱. 29Eci e̱e̱ti̱ ci anyak gi̱i̱ imma, anyonik atin nonno cik meelek, kar atin enne kanyak cik meelek. Imma e̱e̱ti̱ ci iróng anyak gi̱i̱ imma, a̱gga̱mnya̱i̱ atin ci anyak enne cidici ko̱ bu̱k. 30Ottoit du̱ca̱i̱t ci gerze ko̱ kuk reena, ngati mu̱hu̱ri̱, nginti a̱lu̱we̱ ol nyigite cik lo̱o̱tu̱.’
I̱i̱ ci okko Ta̱mu̱ta̱dde̱n edeze ol wak abure nonno
31“Ming okko Ngerrti E̱e̱to̱ a̱kku̱ di̱ngdi̱ngo̱nte̱ cinne ki anjilonya cik Ta̱mu̱ta̱dde̱no̱ do̱o̱k, okko atin enne aave lecere wa alaanzetinu, di̱ngdi̱ngo̱nte̱ ci a̱kku̱ ta̱mu̱-kenga. 32Alutai atin ol cik lo̱o̱tu̱ do̱o̱k ki̱vi̱ta̱k nonno, kar enne kenger nogo kiwagon ming enger e̱e̱ti̱ a̱zza̱ eezai. 33Arike atin enne a̱zza̱ ka̱vvu̱to̱ a̱tte̱ ci a̱zzo̱, kar eezena ka̱vvu̱to̱ a̱tte̱ ci angeto.
34“Kar zin alaani atin kizek ol wak aavtte a̱tte̱ ci a̱zzo̱ ko̱ ne, ‘I̱vi̱ta̱, niga ol balik u̱mu̱yu̱ng Baba ke̱, o̱o̱tte̱ kaal cik aragizu niga ba̱a̱li̱nte̱ ci ta̱mu̱-kengo bali adimanekkung enne baling ngen eenyce enne lo̱o̱c ke̱. 35Eci ba̱li̱ye̱ adaka magiz, kar zin niga aanycang da̱i̱ne̱t. A̱ru̱ka̱ ba̱li̱ye̱ koor, kar zin niga aanycang maam. Ke̱e̱ni̱ ba̱li̱ye̱ e̱re̱nno̱i̱t o̱rge̱ cunno̱ng kar zin niga aanycang nginti kabaheke onyit lo̱o̱c. 36I̱llo̱i̱ annit ba̱li̱ye̱ ru̱u̱ma̱ni̱, aanycang zin niga annit ru̱u̱ma̱ni̱. Komori ba̱li̱ye̱, i̱ti̱ri̱za̱ng zin niga annita. Kaave ba̱li̱ye̱ lagama, kar zin niga a̱vvu̱nnu̱ ovvo i̱vo̱nna̱ng.’
37“O̱bo̱de̱k zin atin ol wak abunna ko̱ nonno, a̱nne̱k ne, ‘Manyi, kacinni da̱ i̱nne̱t vonga ming adaki magiz kar zin kanyci da̱i̱ne̱t? Icima a̱ru̱ki̱ koor kar zin kanyci maam cik udentak? 38Kacinni vonga ming e̱e̱ni̱ e̱re̱nno̱i̱t kar zin kanyci nginti ungnyahu? Icima aave nga̱dhi̱ri̱r kar zin kanyci ru̱u̱ma̱ni̱? 39Kacinni da̱ vonga ming omori i̱nna̱, icima aave lagama kar zin ki̱vo̱nti̱ i̱nne̱ta̱?’
40“Kar zin alaani kabarizek nogo, azi ne, ‘Ka̱du̱wa̱kku̱ng zoz ci een de̱de̱, ming u̱tu̱gu̱we̱u̱ i̱nna̱ kaal ne̱ko̱ gotonogga icima ngonogga cik iróng ol edeconik ko̱, U̱tu̱gu̱we̱ya̱ i̱nna̱ annita!’
41“Kar zin atin alaani ukce kicin ol wak aavtte a̱tte̱ ci angeto kar kize ne, ‘Ma a̱vvu̱na̱kka̱ng annita, niga ol balik otorteu ke̱, oot udut gwo̱o̱ye̱ bali idimane kar kize ci lo̱rye̱ni̱t ki anjilonya ciginnek! 42Eci adaka ba̱li̱ye̱ magiz, iróng niga aanyang da̱i̱ne̱t. A̱ru̱ka̱ ba̱li̱ye̱ koor, iróng niga aanyang maam cik kaudi. 43Ke̱e̱ni̱ ba̱li̱ye̱ e̱re̱nno̱i̱t, iróng niga a̱ti̱ri̱za̱ng ce̱e̱zi̱nne̱ ciggo̱k. Kaave ba̱li̱ye̱ nga̱dhi̱ri̱r, iróng niga aanyang ru̱u̱ma̱ni̱. Komori anna ba̱li̱ye̱ kecebje lagama, iróng niga ovvo i̱vo̱nna̱ng.’
44“Ovvo atin bo̱do̱k nege abarizek nonno, ‘Manyi kicinti i̱nne̱t nga ngati adaki magiz icima ngati a̱ru̱ki̱ koor, icima e̱e̱ni̱ e̱re̱nno̱i̱t o̱rge̱ cinna̱ng icima owo ollin i̱llo̱i̱ ru̱u̱ma̱ni̱, icima omori, icima aave lagama iróng zin naga ngen keelani ko̱?’
45“Kar atin enne kobodek nogo, azi ne, ‘Ka̱du̱wa̱kku̱ng zoz ci een de̱de̱, ming aburnnu niga iróng eelannu gotonogga ki ngonogga cik iróng ol edeconik ko̱, aburnnu niga iróng eelannang annita.’
46“Kar atin ol ne̱ko̱ koot piryanzete ci aalna udut, ma̱i̱je̱ ol cik abunna ovvo baize ci aave udut.”
Currently Selected:
Ma̱te̱yo̱ 25: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.