Ma̱te̱yo̱ 24
24
Ṯurnenet ci lo̱o̱tu̱ ki li̱be̱ne̱t ci Ce̱e̱z wa Ta̱mu̱ta̱dde̱no̱
(Marko 13:1-2; Lu̱ka̱ 21:5-6)
1Baling okko Ye̱su̱ iyowa Ce̱e̱ze̱ wa Ta̱mu̱ta̱dde̱no̱, i̱ye̱lte̱k zin nuyaha ciginnek nonno ce̱e̱zi̱ cik meelek aburuk Ce̱e̱z wa Ta̱mu̱ta̱dde̱no̱. 2A̱nne̱k zin enne nogo ne, “Acinnu niga ce̱e̱zi̱ ne̱ko̱ do̱o̱k? Ka̱du̱wa̱kku̱ng zin zoz ci een de̱de̱, i̱llo̱i̱ bee co̱de̱ ci atin ungnonik ngintu, a̱ju̱ko̱ni̱k atin do̱o̱k tu̱!”
U̱du̱wa̱ Ye̱su̱ no̱ngi̱tto̱n cik ovvo i̱i̱na̱k lo̱o̱c
(Marko 13:3-13; Lu̱ka̱ 21:7-19)
3Imma bali vu̱rrta̱, a̱vvu̱ Ye̱su̱ lo̱o̱ta̱ Biye ci I̱ngi̱ro̱u̱. I̱vi̱tta̱k zin nuyaha ciginnek nonno do̱ kar ki̱jji̱nne̱t, a̱nne̱k ne, “Akane atin zoz ci ozozi i̱nna̱ ko̱ atinga? Ming okko i̱nna̱ obodak lo̱o̱c, nya ci a̱kku̱ oowa kar ki̱ye̱la̱ ṯurnenet ci lo̱o̱tu̱?”
4Abariz Ye̱su̱: “Icinnet ju̱rru̱m, ma anyikku e̱e̱t imma ku̱lu̱ttu̱ng. 5Eci a̱vvu̱ atin ol cik meelek zare cigannik, azi ne, ‘Ke̱e̱ni̱ anna Ki̱ri̱sto̱.’ A̱ddu̱t atin nege ol cik meelek. 6Aziknnu atin niga du̱wa̱ du̱wa̱ cik oronnou ki oronnok cik aavtte ojonun ki cik aavtte reena, abarik zin, ma o̱ngo̱o̱li̱nnu̱. Eci kaala a̱vvu̱ arrak atin, ma̱i̱je̱ ṯurnenet ci lo̱o̱tu̱ okko atin annuwa vu̱rrta̱. 7Ooro atin ol lo̱o̱co̱we̱, kar bo̱do̱k alaanzet cu ooro ki alaanzet ci. I̱i̱na̱k atin lo̱o̱c magizzowa ki ki̱rki̱ri̱k o̱ro̱gjo̱k cik aavtte do̱ do̱. 8Abarik een ne̱ko̱ ulla wu̱ce̱zi̱ ci ngen akane arrak oowa kiwagon wu̱ce̱z ci ngaa ci orong ukcai.
9“Kar zin atin ol kecebtung i̱ge̱t, a̱gi̱ddu̱ng kar ku̱ru̱ktu̱ng a̱da̱i̱to̱. Amarinnung atin ol lo̱o̱co̱we̱ do̱o̱k zo̱ze̱ cinanni. 10Imma i̱i̱te̱ne̱ neci, ovvo atin ol cik meelek abure tu̱we̱ne̱t zoz ci Ta̱mu̱ta̱dde̱no̱, kar atin kadayya gonoggi bak amarno nege e̱le̱tti̱ne̱. 11A̱vvu̱ atin a̱ri̱tto̱wa̱ cik meelek volongak, ovvo a̱ddu̱t ol cik meelek. 12Eci otorye ol cik gerzek, iróng zin atin ol ngen irez gonoggi. 13Ma̱i̱je̱ e̱e̱ti̱ ci abile ju̱rru̱m tu̱we̱nta̱, a̱ti̱ri̱z atin Ta̱mu̱ta̱dde̱n nonno. 14Kar zin kaviyaha cik abunna obod ki ba̱a̱li̱ne̱t ci ta̱mu̱-kengo kuwaktozik lo̱o̱cco̱k do̱o̱k, bak aziye ol lo̱o̱co̱we̱, kar zin atin ṯurnenet ci lo̱o̱tu̱ ki̱ki̱ya̱.”
Gi̱i̱ ci gerze oroot
(Marko 13:14-23; Lu̱ka̱ 21:20-24)
15“Ming acinnu kaal balik u̱du̱wa̱ a̱ri̱to̱i̱ti̱ ci zoz ci Ta̱mu̱ta̱dde̱no̱ azi zara Daniel,#24:15 Daniel: Een enne bali a̱ri̱to̱i̱t ci Ta̱mu̱ta̱dde̱no̱, wa bali e̱ce̱bje̱ o̱rge̱ ci a̱ddi̱ki̱re̱ een Babilon bali ngati azan alaani ci een Nebuchadnezzar ol Jerusalema. A̱kku̱ ba̱li̱ye̱ zoz necu e̱rki̱nya̱i̱ cik e̱e̱ggi̱n obet tu̱r moten turgerem (570) bali ngen Ye̱su̱ ki̱ti̱rra̱i̱. Ikeb 2 Alaat 24-25; Daniel 1:1-7. azi ne, ‘Acinnu atin Gi̱i̱ ci Gerze’#24:15 Acinnu atin Gi̱i̱ ci Gerze: Ozoz bali Danieli zoz ci obod ki i̱te̱le̱ ci ta̱mu̱ta̱dde̱n wa een Zeus wa bali alaani wa Gi̱ri̱yo̱ een zara Antiochus Epiphanes, aronik Ce̱e̱ze̱ wa Ta̱mu̱ta̱dde̱no̱ Jerusalema. Een bali gi̱i̱ necu ci ongoronyan Ce̱e̱z wa Ta̱mu̱ta̱dde̱no̱. I̱i̱na̱ bali zoz necu ngati obod ki e̱rki̱nya̱ cik e̱e̱ggi̱n o̱bo̱n co̱de̱ ki moten torkonom ki turgerem (167) bali ngen Ye̱su̱ ki̱ti̱rra̱i̱. Ozoz Ye̱su̱ zoz ci obod ki gi̱i̱ imma ci gerze atin aronik Ce̱e̱ze̱ wa Ta̱mu̱ta̱dde̱no̱ Jerusalema. I̱i̱na̱ zoz cu bali olli Romi ovvo illa Jerusalema kar egerzanit Ce̱e̱z wa Ta̱mu̱ta̱dde̱no̱. I̱i̱na̱ zoz cu ngati obod ki e̱rki̱nya̱ moten we̱c vu̱rrta̱ ngati a̱da̱k Ye̱su̱ kar bo̱do̱k kitinga daiza. IkebDaniel 9:27; 11:31; 12:11. abile Ngati A̱li̱le̱ Ce̱e̱ze̱ wa Ta̱mu̱ta̱dde̱no̱. Ming ikebtu niga ngintu, abunna ming a̱gga̱yyu̱ ungec cinne ju̱rru̱m! 16Kar zin anyik ol ne̱k abak lo̱o̱ce̱ ci een Ju̱de̱ya̱ ko̱ ki̱vi̱re̱t koot biyene. 17Ming aave e̱e̱ti̱ ce̱e̱za̱ ojonun i̱i̱te̱n neci, ma anyik ki̱tto̱ loruhun ta̱dde̱na̱#24:17 Loruhun ta̱dde̱n: Imma bali i̱i̱nya̱ ne̱ke̱ adiman ol ce̱e̱zi̱ cigge̱k cik anyak loruhun ci ogon ki le̱be̱le̱ ta̱dde̱na̱ kar gon nege koot ta̱dde̱na̱ loruhuna kar ku̱tu̱gu̱zzo̱ kaal cigge̱k. kar kuk kuluta i̱jjo̱ ce̱e̱za̱ ecito. 18Ming aave e̱e̱ti̱ manato, ma a̱mi̱ro̱ni̱k ru̱u̱m cunne. 19Gerza atin oroot i̱i̱te̱ne̱ neci ngati ngaai wak anyak maam kengtinne ki ngaai wak orokte. 20Alac Ta̱mu̱ta̱dde̱n abunna iróng vi̱ra̱ cunne een tagiza,#24:20 Tagiz: Een icu i̱i̱te̱n ci e̱rki̱to̱ okkomi kak ming olli Israilo orong keronit eci ngatinne̱ng aṯile ta̱mu̱, alali kar bo̱do̱k a̱ppwa̱ ngooti oroot. Iróng i̱bo̱ ngatu owo. Imma Tenneta e̱rki̱te̱ cu, een ci odoi looci. icima I̱i̱te̱ne̱ wa Yu̱bze̱nto̱. 21Eci a̱kku̱ atin zin piryanzet ci ommog veelek lo̱o̱c, a̱li̱be̱ne̱ atin Ce̱e̱z wa Ta̱mu̱ta̱dde̱no̱, ngati bali kanante ci lo̱o̱tu̱ rok i̱yo̱ko̱, iróng atin piryanzet necu a̱kku̱ bo̱do̱k. 22Ming iróng Ta̱mu̱ta̱dde̱n etted i̱i̱nya̱ ne̱ke̱ kizeto idice, iróng wo̱ye̱ da̱ e̱e̱ti̱ imma aruge lo̱o̱ce̱ cu. Abarik okko atin Ta̱mu̱ta̱dde̱n auturan i̱i̱nya̱ ne̱ke̱ zo̱ze̱ ci ol balik atahala enne ke̱. 23Ming a̱du̱wa̱ki̱ e̱e̱ti̱ imma azi ne, ‘Cinno, Ki̱ri̱sto̱ icu,’ icima ‘nonno ici,’ Ma edeconik elemi zoz neci. 24Eci a̱vvu̱ atin ol cik volongak azi ne ke̱e̱ggi̱nna̱ Ki̱ri̱sto̱, ovvo uggak azi ne ke̱e̱ggi̱nna̱ a̱ri̱tto̱k cik zoz ci Ta̱mu̱ta̱dde̱no̱, ovvo atin ogon kaal cik a̱vu̱la̱ abunna a̱lu̱t ol cik atahala Ta̱mu̱ta̱dde̱n, iróng zin uuta o̱o̱tti̱ cik ol ne̱ke̱. 25Izikto ju̱rru̱m, ku̱du̱wa̱u̱ng anna ming ngen zoz neci ki̱ki̱ya̱.
26“Ming a̱du̱wa̱kku̱ng e̱e̱ti̱ imma zoz cu: ‘I̱ki̱ya̱ Ki̱ri̱sto̱ baaza,’ icima ‘nonno icu, aave ce̱e̱ze̱ emani,’ ma elemnannu ovvoyyu nginati! 27Eci ming okko borowoci alanyit ta̱mu̱-kenga do̱o̱k, a̱kku̱nna̱k zin atin Ngerrti E̱e̱to̱ lo̱o̱c bu̱k niko ki lanyci ci borowoco. 28Ming ovvo u̱du̱va̱nna̱ alute ngamani, anyak kaal cik a̱da̱i̱to̱.”
Ming okko Ngerrti E̱e̱to̱ i̱ye̱la̱i̱
(Marko 13:24-27; Lu̱ka̱ 21:25-28)
29“Bo̱do̱k ataman niko vu̱rrte̱ ci i̱i̱nya̱ ne̱k piryenzeta ke̱,
“‘Ukce atin i̱i̱ kize gi̱da̱ng,
kar bo̱do̱k nyelowi bu̱k iróng alanyiti;
i̱i̱na̱k atin munyunya lo̱o̱c,
kar kaala cik eel ta̱mu̱-kenga omoti veelek.’#Isaya 13:10; 34:4
30“Kar zin vu̱rrta̱, i̱ye̱la̱i̱ zin gool ci a̱kku̱nne̱ Ngerrti E̱e̱to̱ ta̱mu̱-kenga, kar atin ol cik lo̱o̱tu̱ do̱o̱k ku̱tu̱lu̱zzo̱. Kar atin kicinnet Ngerrti E̱e̱to̱ a̱kku̱ di̱i̱za̱ ta̱mu̱-kenga komiza ki di̱ngdi̱ngo̱nte̱ ci a̱ddi̱ki̱re̱. 31Kar zin atin enne ki̱tto̱nna̱ anjilonya ciginnek kar nege ta̱mu̱-kenga kutubuwet tuuret, kar kulutet ol balik atahala Ta̱mu̱ta̱dde̱n lo̱o̱co̱we̱ do̱o̱k ki ta̱mu̱-kenga ke̱.”
De̱mzi̱ne̱t ci keet wa een munec
(Marko 13:28-31; Lu̱ka̱ 21:29-33)
32“A̱gga̱c zoz necu keete ci een munec ko̱. Ming ovvo niga acinnu gon i̱ti̱li̱za̱ vu̱rre̱na̱ izeto varany, a̱gga̱yyu̱ niga niko ize lomot ojon. 33Ming icinntu kaal cik ozozi anna ko̱ i̱ye̱ltta̱i̱, a̱gga̱c niko ize ojon oroot i̱i̱te̱ni̱ ci kar ki̱ki̱ya̱i̱ Ngerrti E̱e̱to̱. 34Ka̱du̱wa̱kku̱ng zoz ci een de̱de̱, iróng atin bu̱u̱l icu a̱da̱i̱ ming ngen kicinnet kaal ne̱ke̱ do̱o̱k ming ogone. 35Adittai atin ta̱mu̱-kengi ki lo̱o̱c, imma zoz cinanni abak atin udut.”
Iróng e̱e̱ti̱ imma a̱gga̱ i̱i̱te̱n ki i̱i̱
(Marko 13:32-37; Lu̱ka̱ 17:26-30,34-36)
36“I̱llo̱i̱ e̱e̱t co̱de̱ ci a̱gga̱ i̱i̱te̱n icima i̱i̱ ci ovvo kaala ne̱ke̱ ogonine, iróng anjilonya ta̱mu̱-kenga a̱gga̱ bu̱k icima Ngerinne bu̱k. Abarik Baatinna wa aave ta̱mu̱-kenga do̱ ci a̱gga̱. 37Ming okko Ngerrti E̱e̱to̱ obodak lo̱o̱c, ogon atin ki i̱i̱te̱ni̱ bali a̱ti̱ye̱ tawani ol e̱rki̱te̱ bali ngen a̱ri̱to̱i̱ti̱ ci zoz ci Ta̱mu̱ta̱dde̱no̱ een zara Nowa#24:37 Nowa: Aave ba̱li̱ye̱ enne i̱i̱te̱ne̱ bali ogone ol mu̱nye̱n cik meelek ke̱. Utu zin Ta̱mu̱ta̱dde̱n nonno kar kidiman i̱bo̱ ci a̱ddi̱ki̱re̱ kar abunna ming a̱ti̱ri̱z enne tatug cinne ki elegje u̱gge̱. Idita zin Ta̱mu̱ta̱dde̱n elegje u̱gge̱ ki ol tawane ci a̱ppwa̱ oroot. IkebKananet 5-9. ke̱ aruge. 38Imma i̱i̱nya̱we̱ ne̱ke̱ baling ngen tawani ki̱ki̱ya̱, adak ol kwo̱o̱rnya̱ ki ru̱we̱ne̱t rucenet rok i̱i̱te̱n bali okko Nowa i̱i̱zo̱ i̱bo̱ cinne ke̱. 39Iróng ol ba̱li̱ye̱ a̱gga̱ gi̱i̱ ci atin a̱kku̱, bak a̱kku̱ tawani ki̱ki̱ya̱ ki̱ti̱k nogo do̱o̱k. Ogon atin zin bo̱do̱k niko ming okko Ngerrti E̱e̱to̱ a̱kku̱nna̱k lo̱o̱c. 40E̱e̱vye̱ atin ol cik een rama ma̱ne̱ co̱de̱, engeryai co̱de̱, imma co̱de̱ ungnonik lo̱o̱c. 41Erekce atin ngaai cik een rama rabaza, engeryai atin co̱de̱, imma co̱de̱ ungnonik lo̱o̱c.
42“I̱yo̱ko̱ zin, icinnet ju̱rru̱m, eci iróng niga a̱gga̱yyu̱ i̱i̱te̱n ci atin a̱kku̱nne̱ Manyitinong. 43A̱gga̱c zoz cu ju̱rru̱m: ming a̱gga̱ manyi ce̱e̱z i̱i̱ ci a̱kku̱nne̱ ogoryaiti, e̱re̱ye̱ wo̱ye̱ enne ju̱rru̱m abunna ogoryaiti iróng a̱du̱l ce̱e̱z cinne. 44E̱re̱yyo̱ zin bo̱do̱k niga ju̱rru̱m i̱i̱nya̱ do̱o̱k, eci Ngerrti E̱e̱to̱ a̱kku̱ atin i̱i̱te̱ne̱ ci iróng niga a̱gga̱yyu̱.”
Zoz ci atubek Ye̱su̱ du̱ca̱i̱t ci abunna
(Lu̱ka̱ 12:35-48)
45“Ngene ci een du̱ca̱i̱t ci abunna elemi ngati a̱li̱ngli̱nge̱ zoz odohize kar bo̱do̱k kegeny, kar manyi ce̱e̱z kanyik nonno ka̱gga̱m kaal cik ce̱e̱zu̱ kar bo̱do̱k kadaiz ol ce̱e̱za̱? 46Ming okko manyi ce̱e̱z oboda amuda du̱ca̱i̱t neci u̱tu̱gu̱ kaal cik abunna, kar atin enne ka̱ma̱yu̱k nonno. 47Ka̱du̱wa̱kku̱ng zoz ci een de̱de̱, anyike atin manyi ce̱e̱z du̱ca̱i̱t neci ka̱gga̱m kaal ciginnek do̱o̱k. 48Ma̱i̱je̱ ming ogon du̱ca̱i̱ti̱ neci kaal cik gerzek kar bo̱do̱k ki̱no̱n kize ne, ‘Aave atin manyi ce̱e̱z reena u̱u̱mu̱c,’ 49kar gon enne kimice du̱cca̱k gonoggi, adak kaal cik e̱e̱t neci bak ibbakce ki ol cik een bba̱kco̱k. 50Okko zin atin manyi ce̱e̱z oboda lo̱mu̱k i̱i̱te̱n ci iróng du̱ca̱i̱ti̱ cinne a̱gga̱. 51A̱kku̱ atin manyi ce̱e̱z neci, okko a̱ru̱k du̱ca̱i̱t neci oroot kar kotowek du̱cca̱k wak a̱ru̱k talaben, nginti a̱lu̱we̱ atin nege nyigite cik lo̱o̱tu̱.”
Currently Selected:
Ma̱te̱yo̱ 24: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.