MATTHEW 9
9
Jesus Ɔkɔk Owo Ɔkɔdɔŋɔde Akpa Ubeŋ
(Mk 2.1-12; Lk 5.17-26)
1EKEM Enye ediere ke ubom ebe, edi ke obio Esiemɔ. 2Ndien sese mmɔ eda owo ɔdɔŋɔ-akpa-ubeŋ, emi ebiomde ke mbri, esɔk Enye: ndien ke ini Jesus okutde mbuɔtidem mmɔ, Enye ɔdɔhɔ ɔdɔŋɔ-akpa-ubeŋ oro ete, Eyen Mi, sɔŋ esit; emefen mme idiɔk-nkpɔ fo. 3Ndien sese, ndusuk mme scribe edɔhɔ ke esit mmɔ ete, Owo emi ke osuŋi Abasi. 4Edi Jesus ɔfiɔk ekikere mmɔ, onyuŋ ete mmɔ, Nsinam mbufo ekerede idiɔk ekikere ke esit mbufo? 5Koro ewe emem akan, mme ndidɔhɔ nte, Emefen mme idiɔk-ŋkpɔ fo; me ndidɔhɔ nte, Daha ke enyɔŋ, saŋa? 6Edi man mbufo efiɔk ete, Eyen Owo enyene odudu ke isɔŋ ndifen mme idiɔk-ŋkpɔ (Enye ɔdɔhɔ ɔdɔŋɔ-akpa-ubeŋ, ete), Daha ke enyɔŋ men mbri fo, nyɔŋ ufɔk. 7Owo oro adaha ke enyɔŋ, ɔnyɔŋ ufɔk. 8Edi ke ini mme otu owo ekutde ŋkpɔ emi, ndik anam mmɔ, mmɔ enyuŋ etoro Abasi emi akayakde oruk odudu emi ɔnɔ owo.
Jesus Okot Matthew
(Mk 2.13-17; Lk 5.27-32)
9Ekem nte Jesus otode do asaŋa ebe, Enye okut owo kiet, emi ekerede Matthew, etiede ke itie ubɔ-utomo; onyuŋ ɔdɔhɔ enye ete, Tiene Mi. Ndien Matthew adaha ke enyɔŋ, etiene Enye.
10Edikem, nte Jesus etiede ke itie-udia ke esit ufɔk, sese, ediwak mme publican ye mme idiɔk owo edi edisuhɔre etie ye Enye ye mbet Esie. 11Ke adaŋemi mme Pharisee ekutde ŋkpɔ emi, mmɔ edɔhɔ mbet Esie, ete, Nsinam Andikpep mbufo adiade ŋkpɔ ye mme publican ye mme idiɔk owo? 12Edi ke ini Jesus okopde, Enye ete, Mmɔ emi enyenede nsɔŋidem iyomke abia-ibɔk, edi mmɔ emi edɔŋɔde eyom. 13Edi eka ekekpep se ikɔ emi ɔwɔrɔde, Edi mbɔm ke nyom, idige uwa. Koro ŋkedige ndikot ndinen owo, edi mme idiɔk owo.
14Ekem mbet John edi ke ɔtɔ Esie ete, Nsidi ntak eke nnyin ye mme Pharisee iwakde nditre udia, edi mbet Fo mitreke? 15Ndien Jesus ɔdɔhɔ mmɔ ete, Nte nditɔ ufɔk-ndɔ emekeme ndifuhɔ adaŋa ini nte ebe-ndɔ odude ye mmɔ? Edi mme usen eyedi eke edibɔde mmɔ ebe-ndɔ; mmɔ eyetre udia adaŋoro. 16Edi baba owo kiet idaha ubak ɔfɔŋ eke midiɔŋke ikim idian ke akani ɔfɔŋidem; koro se edade esiri nde akabare awak ɔfɔŋidem, onyuŋ anam enye awaha ɔdiɔk akan. 17Owo inyuŋ insinke obufa wine ke ŋkani ikpa; ama anam ntre, ikpa asiaha, wine onyuŋ ɔduɔhɔ, ikpa enyuŋ etak. Edi esin obufa wine ke mbufa ikpa, ntem ke ekpeme mbiba.
Jesus Ɔkɔk Ŋwan Ɔdɔŋɔ Uwɔrɔ-iyip Ye Eyen Etubom Kiet
(Mk 5.21-43; Lk 8.40-56)
18Nte Enye etetiŋ ntem ye mmɔ, sese, ɔbɔŋ kiet edi edituak ibuot ɔnɔ Enye ete, Eyen mi aŋwan ama akpa kpa idem idahaemi; edi di didori enye ubɔk, ndien enye eyedu uwem. 19Ndien Jesus adaha etiene enye, mbet Esie enyuŋ esaŋa ye Enye.
20Ndien sese, ŋwan kiet, emi ɔkɔdɔŋɔdɔ eriwɔrɔ-iyip isua duop-eba, etiene Jesus ke edem edituk nnyeriye ɔfɔŋidem Esie: 21koro enye ɔdɔhɔde ke esit esie ete, Mma ŋkam ntotuk ɔfɔŋidem Esie, nyekop nsɔŋidem. 22Edi Jesus ɔwɔŋɔre idem okut ŋwan oro, onyuŋ ɔdɔhɔ enye ete, Eyen Mi, sɔŋ esit: mbuɔtidem fo amanam fi okop nsɔŋidem. Ndien idem ɔsɔŋ ŋwan oro tɔŋɔ ini oro.
23Ndien ke ini Jesus odukde ke ufɔk ɔbɔŋ oro, onyuŋ okutde mme efri-ifiom, ye nte owo enamde ndutime, Enye ete mmɔ, 24Edaha ke usuŋ; eyen-aŋwan ikpaha mkpa, edi edede. 25Ndien mmɔ esak Enye nsahi. Edi ke ini ema ekosioŋo otu owo ke ufɔk, Enye oduk omum eyen oro ke ubɔk; ndien enye adaha ke enyɔŋ. 26Ndien etop ŋkpɔ emi asuana ke ofuri edem oro.
27Ekem nte Jesus otode do asaŋa ebe, nnan iba etiene Enye, efiori ete, Eyen David, tua nnyin mbɔm. 28Edi ke adaŋemi Enye odukde ufɔk, mme nnan oro etiene Enye: ndien Jesus ete mmɔ, Nte mbufo emenim ke akpanikɔ ete, mmekeme ndinam ŋkpɔ emi? Mmɔ ete Enye, Nnyin imenim, Ɔbɔŋ. 29Ekem Enye otuk mmɔ ubɔk ke enyin, ete mmɔ, Yak osu ɔnɔ mbufo nte mbuɔtidem mbufo edide. 30Ndien enyin mmɔ etara. Jesus ɔsɔŋɔ owuk mmɔ ete, Etim ese ete owo baba kiet okufiɔk. 31Edi mmɔ ewɔŋɔ ekesuan etop Esie ke ofuri ŋkaŋ oro.
32Ekem nte mmɔ ewɔŋɔde, sese, eda owo imum kiet emi enyenede demon esɔk Enye. 33Ndien ke Enye ama ekebin demon ɔduɔk, owo imum etiŋ ikɔ: ndien enyene mme otu owo ndyɔ, mmɔ enyuŋ edɔhɔ ete Akananam owo ikwe oruk ŋkpɔ eke etiede ntem ke Israel. 34Edi mme Pharisee ete, Enye ada odudu ɔbɔŋ mme demon ebin mme demon ɔduɔk.
35Ndien Jesus asaŋa akanare kpukpru obio ye obio-inwaŋ, ekpep owo ŋkpɔ ke mme synagogue mmɔ, onyuŋ ɔkwɔrɔ gospel Ubɔŋ Heaven, onyuŋ anam kpukpru oruk udɔŋɔ ye kpukpru oruk mmemidem ekure.
36Edi ke adaŋemi Enye okutde mme otu owo, atua mmɔ mbɔm, koro mmɔ edude ke nnanenyin enyuŋ esuanade, nte erɔŋ eke minyeneke andikpeme. 37Ekem Enye ɔdɔhɔ mbet Esie, ete, Ke akpanikɔ idɔk okpon, edi mme anam-utom iwakke. 38Ebeŋe ndien Enyene-idɔk ete, Enye osio mme anam-utom ɔdɔŋ edi ke idɔk Esie.
Currently Selected:
MATTHEW 9: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.