MATTHEW 10
10
Enyiŋ Mme Mbet Jesus Duopeba
(Mk 3.13-19; Lk 6.12-16)
1NDIEN Enye okot mbet Esie duopeba edi, ɔnɔ mmɔ odudu ndibin ndedehe spirit nduɔk, ndinyuŋ nnam kpukpru oruk udɔŋɔ ye kpukpru oruk mmemidem ekure.
2Enyiŋ mme apostle duopeba edi emi: akpa owo edi Simon, emi ekerede Peter, ye Andrew eyen-eka esie; ye James eyen Zebedee ye John eyen-eka esie; 3Philip ye Bartholomew; Thomas ye Matthew emi edide publican; James eyen Alphaeus ye Thaddaues; 4Simon emi edide Zealot, ye Judas Iscariot, emi onyuŋ adade Jesus ɔnɔ.
5Jesus osio owo duopeba emi ɔdɔŋ mmɔ utom, onyuŋ eteme mmɔ ete,
Ekuwaha eduk ke usuŋ mme Gentile, ekunyuŋ eduk ke obio mbon Samaria baba kiet; 6edi ekam etiene mme erɔŋ ufɔk Israel emi esopde. 7Edi nte mbufo ekade, ekwɔrɔ ete, Ubɔŋ Heaven ke ekpere. 8Enam mbon udɔŋɔ ekop nsɔŋidem, enam mme akpa-mkpa eset, enam mme ɔdɔŋɔ akpa-mfia esana, enyuŋ ebin mme demon eduɔk; mbufo ekebɔ ke ikpikpu, enɔ ŋko ke ikpikpu. 9Ekukama gold, me silver, me okpoho okuk ke ekpat okuk mbufo; 10ekunyuŋ ekama ekpat isaŋ, me ɔfɔŋidem iba, me ikpa-ukot, me esaŋ: koro eyen-utom odot udia esie. 11Ndien obio ekededi me obio-iŋwaŋ ekededi eke mbufo edidukde, eyom owo eke odotde ke esit; enyuŋ edaŋ ye enye tutu mbufo ewɔŋɔ enyɔŋɔ. 12Ke ini mbufo edukde ke ufɔk, enɔ ekɔm. 13Ndien edieke ufɔk oro odotde, yak emem mbufo odoro ke esit; edi edieke ufɔk oro midotke, yak emem mbufo afiak etiene mbufo. 14Owo ekededi eke minyimeke ndidara mbufo, nnyuŋ ŋkop ikɔ mbufo, ke ini mbufo ewɔŋɔde ke ufɔk me ke obio oro, ekeŋ ntan ikpat mbufo eduɔk. 15Ke akpanikɔ ke ndɔhɔ mbufo, Ŋkpɔ eyefɔn ye isɔŋ Sodom ye Gomorrah ke usen ikpe akan ye obio oro.
16 Sese, mmosio mbufo ndɔŋ nte mme erɔŋ ke ufɔt mme ekpe ikɔt; mmɔdo mbufo enyene ibuot nte urukikɔt, enyuŋ efure nte ibiom. 17Edi ekpeme idem ye owo; koro mmɔ eyeyak mbufo esin ke ubɔk mme esop, ndien eyemia mbufo ke mme synagogue mmɔ; 18eyenyuŋ eda mbufo ewɔrɔ ke iso mme andikara ye ndidem kabaŋa Mi, kpaŋ mbufo edi ntiense enɔ mmɔ ye mme Gentile. 19Edi ke ini ediyakde mbufo enɔ, ekutimere esit ekere, me edidɔhɔ didie, me editiŋ nso; koro kpa idaha oro ke eyenɔ mbufo se editiŋde. 20Koro idige mbufo etiŋ ikɔ, edi Spirit Ete mbufo esine mbufo ke esit etiŋ. 21Eyen-eka enyeyuŋ ada eyen-eka ɔnɔ mkpa, ete eyenyuŋ ɔnɔ eyen esie: nditɔ eyenyuŋ edaha eŋwana ye mme ete ye mme eka mmɔ, enyuŋ esin ewot mmɔ. 22Ndien kpukpru owo eyesua mbufo ke abaŋa enyiŋ Mi: edi eyeŋyaŋa owo eke edimede ime tutu osim akpatre. 23Edi ke ini mmɔ ekɔbɔde mbufo ke obio emi, efehe eduk ke obio efen: koro ke akpanikɔ ke ndɔhɔ mbufo, nte, Ke mbufo mika-isaŋake ke kpukpru mme obio Israel ibe kaŋa, Eyen Owo eyedi.
24 Eyen ukpep-ŋkpɔ ikponke ikan andikpep enye: asaŋa-utom inyuŋ ikponke ikan ete-ufɔk esie. 25Ekem eyen ukpep-ŋkpɔ nditie nte andikpep enye, asaŋa-utom ndinyuŋ ntie nte ete-ufɔk esie. Edieke mmɔ ema ekot ete-ufɔk ete, Beelzebub, ŋwaŋwaediso ke mmɔ edikot nditɔ ufɔk esie ntre. 26Ekufehe mmɔ ndien; koro ŋkpɔ iduhe eke efukde fuk emi midiyarakere; ŋkpɔ inyuŋ iduhe eke edipde dip emi owo midifiɔkke. 27Se ndɔhɔde mbufo ke ekim, emen etiŋ ke uŋwana; se mbufo enyuŋ ekopde ke utɔŋ, ekwɔrɔ ke ɔkɔm ufɔk. 28Ekunyuŋ efehe mmɔ emi ewotde ikpɔhidem, edi mikemeke ndiwot ukpɔŋ: edi ekam efehe Enye emi ekemede ndisobo ukpɔŋ ye ikpɔhidem ke hell. 29Nte inyamke ŋkpri inuen iba ke obubit okuk kiet? ndien baba mmɔ kiet iduɔhɔ ke isɔŋ ke mitoho Ete mbufo: 30edi emabat kpa kpukpru idet ibuot mbufo. 31Ekufehe ndien; mbufo emesɔŋ urua ekan ediwak ŋkpri inuen. 32Mmɔdo owo ekededi eke edinyimede ke iso owo ete, idi okim, Ami nyenyuŋ nnyime enye ke iso Ete Mi emi odude ke heaven. 33Edi owo ekededi eke edikaŋde Mi ke iso owo, ete, idige okim, Ami nyenyuŋ ŋkaŋ enye ke iso Ete Mi emi odude ke heaven.
34 Ekuse ete ŋkedi ndisin emem ke isɔŋ: ŋkedige ndisin emem, edi ofut. 35Koro ŋkedi ndinam owo aŋwana ye ete esie, ndinyuŋ nnam eyen-aŋwan aŋwana ye eka, nnyuŋ nnam ŋwan eyen aŋwana ye eka ebe: 36ndien mme asua owo eyedi mbon ufɔk esie. 37Owo eke amade ete me eka akan Mi idotke ye Ami: owo eke onyuŋ amade eyen eren esie me eyen esie aŋwan akan Mi idotke ye Ami. 38Ndien owo eke mimenke cross esie itiene Mi idotke ye Ami. 39Owo eke anyaŋade uwem esie eyeduɔk enye; edi owo eke ɔduɔkde uwem esie ke abaŋa Mi eyenyaŋa enye.
40 Owo eke onyimede mbufo onyime Mi, ndien owo eke onyimede Mi onyime Andidɔŋ Mi. 41Owo eke onyimede prophet ke enyiŋ prophet eyebɔ utip prophet; owo eke onyimede edinen owo ke enyiŋ edinen owo eyenyuŋ ɔbɔ utip edinen owo. 42Ndien owo ekededi eke edidade cup mbit-mbit mmɔŋ ɔnɔ kiet ke otu ŋkpri owo emi ɔŋwɔŋ ke enyiŋ mbet Mi, ke akpanikɔ ke ndɔhɔ mbufo, enye iditreketre ndibɔ utip esie.
Currently Selected:
MATTHEW 10: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.