MATTHEW 8
8
Jesus Ɔkɔk Mme Owo Udɔŋɔ
(Mk 1.40-45; Lk 5.12-16)
1KE ini Enye otode ke obot ɔsuhɔre, ediwak otu owo etiene Enye. 2Ndien sese, owo akpa-mfia kiet asaŋa ekpere Enye, edituak ibuot ɔnɔ Enye, ete, Ɔbɔŋ, edieke onyimede, emekeme ndinam mi nsana. 3Ndien Jesus anyan ubɔk, otuk enye, ete, Mmonyime, sana. Ndien ndo-ndo oro owo oro asana ɔbɔhɔ akpa-mfia esie. 4Edi Jesus ete enye, Kpeme, kutiŋ unɔ baba owo kiet; edi nyɔŋ ke owut oku idem fo, nyuŋ wa enɔ eke Moses eketemede, man edi ŋkpɔ-ntiense ɔnɔ mme owo.
Jesus Ɔkɔk Eyen Ufɔk Centurion Kiet
(Lk 7.1-10)
5Edi ke adaŋemi Enye odukde ke Capernaum, centurion kiet etiene Enye edikpe Enye ubɔk 6ete, Ɔbɔŋ, owo mi ke ana ke ufɔk ɔdɔŋɔ akpa-ubeŋ, odu ke ata ndutuhɔ. 7Jesus ɔdɔhɔ enye ete, Nyedi ndinam udɔŋɔ okure enye. 8Centurion oro ɔbɔrɔ ete, Ɔbɔŋ, ndotke nte Afo okpodukde ke idak ɔkɔm mi; kam tiŋ suk ikɔ, ndien owo mi eyekop nsɔŋ-idem. 9Koro ami ke idem mi ndu ke idak erikara, mmonyuŋ nnyene mbon-ekɔŋ eke esinede mi ke idak; nnyuŋ ndɔhɔ owo emi nte ka, ndien enye aka; nnyuŋ ndɔhɔ owo efen, nte, Di, ndien enye edi; nnyuŋ ndɔhɔ owo mi, nte, Nam emi, ndien enye anam. 10Ke adaŋemi Jesus okopde ikɔ emi, enyene Enye nyɔ; Enye onyuŋ ɔdɔhɔ mmɔ emi etienede Enye, ete, ke akpanikɔ ke ndɔhɔ mbufo, akanam ŋkwe mbuɔtidem eke okponde ntem, kpa ke Israel. 11Edi ndɔhɔ mbufo nte, Ediwak owo eyeto ke edem usiaha-utin ye edem usop-utin, edisuhɔre etetie ye Abraham, ye Isaac, ye Jacob, ke Obio Ubɔŋ Heaven: 12edi eyeduɔk nditɔ Obio Ubɔŋ ke ekim ke aŋwa-aŋwa: do ke eritua eyet ye erita edet eyedu. 13Ekem Jesus ɔdɔhɔ centurion, ete, Nyɔŋ okuo: yak osu ɔnɔ fi adaŋa nte onimde ke akpanikɔ. Ndien udɔŋɔ okure owo esie kpa ke ini oro.
Jesus Ɔkɔk Ediwak Owo
(Mk 1.29-34; Lk 4.38-41)
14Ekem ke ini Jesus odukde ke ufɔk Peter, Enye okut eka ŋwan esie nte anade ɔdɔŋɔ ufiop-idem. 15Ndien otuk enye ke ubɔk, ufiop-idem onyuŋ ɔkpɔŋ enye, enye onyuŋ adaha ke enyɔŋ anam ŋkpɔ ɔnɔ Enye. 16Edi ke ini osimde mbubreyo, eda ediwak owo eke enyenede demon esɔk Enye: Enye onyuŋ ada ikɔ inua Esie ebin mme demon ɔduɔk, onyuŋ anam kpukpru mbon udɔŋɔ ekop nsɔŋ-idem: 17man osu nte prophet Isaiah ɔkɔdɔhɔde, ete, Enye ke Idem esie ɔbɔ mmemidem nnyin ada, onyuŋ obiom mme udɔŋɔ nnyin.
Mme Mbet Jesus
(Lk 9.57-62)
18Edi ke ini Jesus okutde nte ediwak otu owo ekande Enye ekuk, enye ɔnɔ uyo ete mme imɔ idaha ika ke edem oko. 19Ndien scribe kiet edi edidɔhɔ Enye ete, Andikpep, nyetiene Fi ŋka ebiet eke Afo edikaka. 20Ndien Jesus ete enye, Ebua-ikɔt enyene ndudu, inuen enyɔŋ enyuŋ enyene mme efɔk; edi Eyen Owo inyeneke ɔtɔ eke odoride ibuot Esie. 21Owo efen ke otu mbet ete Enye, Ɔbɔŋ, yak mbem iso ŋka ŋkobuk ete mi. 22Edi Jesus ete enye, Tiene Mi; nyuŋ yak mme akpa-mkpa ebuk mme akpa-mkpa mmɔ.
23Ekem Enye ediere ke ubom, mbet Esie enyuŋ etiene Enye. 24Ndien sese, akwa oyobio otibe ke inyaŋ, tutu mbufut ke ofofuk ubom: edi Enye ɔduɔ idap. 25Ndien mmɔ edi edidemere Enye, ete, Ɔbɔŋ, nyaŋa nnyin; imɔŋ itak. 26Enye ete mmɔ, Nsinam mbufo efehede ndik, O mbufo nditɔ ekpri mbuɔtidem? Ekem Enye adaha ke enyɔŋ, asua ɔnɔ ofim ye inyaŋ; inyaŋ onyuŋ ana suŋ. 27Edi enyene mbon oro nyɔ, mmɔ enyuŋ ete, Nso oruk owo edi emi, emi kpa ofim ye inyaŋ ekopde uyo Esie.
28Ekem ke adaŋemi Enye osimde ke edem oko ke idut mme Gadarene, owo iba emi enyenede demon ewɔŋɔ ke mme udi edisobo ye Enye; mmɔ edama eti-eti, tutu baba owo kiet ikemeke ndisaŋa ke usuŋ oro mbe. 29Ndien sese, mmɔ efiori ete, Nnyin isaŋa nso ye Afo, Afo Eyen Abasi? Nte emedi ndituhɔre nnyin ke ini mikemke kaŋa ini? 30Otu ediwak edi edu do nsan-nsan edia ŋkpɔ. 31Ndien mme demon ekpe Enye ubɔk, ete, Edieke edibinde nnyin iwɔrɔ, dɔŋ nnyin ika ikoduk otu edi ke idem. 32Enye ete mmɔ, Eka. Ntre ke mmɔ ewɔŋɔ ekoduk ke idem mme edi: ndien sese, ofuri otu edi ebumere efeŋe esuhɔre ke ebedeŋ, eduɔŋɔ ke inyaŋ, ekpaŋa ke mmɔŋ. 33Edi mme andibɔk edi efeŋe eka ke obio, ekobuk ofuri ŋkpɔ, ye se ikotibede ye mmɔ oro ekenyenede mme demon. 34Ndien sese, ofuri obio ewɔŋɔ edi ndisobo ye Jesus; ndien ke adaŋemi mmɔ ekutde Enye, mmɔ ekpe Enye ubɔk, ete adaha ɔkpɔŋ edem mme imɔ.
Currently Selected:
MATTHEW 8: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.