Marko 6
6
Bʋmɔhɔ Yesu Mʋ Wulutɔ
(Mateo 13:53-58; Luka 4:16-30)
1Yesu mʋa mʋ akasɩpʋ bɛdalɩ ɔmá amʋtɔ yinki yɔ mʋ wulutɔ. 2Ɔkpʋnʋ ɔdakɛ lenya fʋn alɩ ɔlɔyɔ ɔdɛ atɔ suna Yudafɔ ofiakpa. Mʋ atosunahɛ lɛha ɔnɔ lobwie aha tsɔtsɔɔtsɔá bonu mʋ́. Mʋ́ sʋ bɛfɩtɛ aba bɛɛ, “Nkʋnʋ olenya nyansa mʋ́a ofulabwɛ tumi anfɩ ɛ tsu? 3Megyi atɔ osrepʋ amʋ nɩ. Megyi mʋ yin gyi Maria, mʋ apio yinhɛ gyi Yakobo, Yosef, Yuda pʋ́ Simon? Yɛ anɩa mʋ apio tsɩhɛ ɛ tsie nfɩ a?” Benya ɔblɔ mʋsʋ.
4Yesu lɛbla amʋ́ ɔbɛɛ, “Aha bʋtobu Bulu ɔnɔsʋ ɔtɔɩpʋ ɔtɩnɛgyiɔtɩnɛ. Tamɛ mʋ wulutɔfɔ, mʋ abusuanfɔ pʋ́ mʋ woyitɔ aha mʋ́ bʋtamabu mʋ.”
5Ɩnɩá bʋmɔhɔ mʋ gyi sʋ a, ɔmɛtalɩ bwɛ ofula kʋkʋ, dʋn aha kpalobi akʋsʋ ɔlɔpʋ ɩbɩ dɩnka tsa amʋ́ ɩlɔ. 6Ɩlɔwa mʋ ifu ánɩ́ bʋmɔhɔ mʋ gyi.
Akasɩpʋ Duanyɔ Amʋ Sumbiwa
(Mateo 10:5-15; Luka 9:1-6)
Yesu leki nkuda ánɩ́ ɩbʋ bomli ɩnʋ asɩ, ɔdɛ atɔ suna. 7Ɩnʋ ɔlɛtɩ akasɩpʋ duanyɔ amʋ ba mʋ ɩwɩ wa. Mʋʋ ɔlɔwa amʋ́ sumbi abanyɔ-abanyɔ. Ɔlɛha amʋ́ tumiá bɔ́pʋgyi ɔŋɛ lalahɛsʋ. 8Ɔlɛda amʋ́ ɔla ɔbɛɛ, “Mlɩmátsu tɔtɔ kɩta yɔ ɔkpa amʋ, dʋn mlɩ oyi yiahɛ! Mlɩmátsu atogyihɛ ntɛ akpankogyo, ntɛ kɔba kɩta! 9Mlɩwa ntʋkʋta, tamɛ mlɩmátsu atadɩɛ nyɔsɩ kɩta! 10Woyigyiwoyiá mlɔ́swɩɩ mʋ́tɔ a, mlɩtsia ɩnʋ yɔfʋn brɛá mlɛdalɩ wulu amʋtɔ. 11Nɩ mlɔyɔ wulu kʋsʋ, bʋmɔhɔ mlɩ ntɛ bʋmekleá bónu mlɩ atosunahɛ, mlɩdɛdalɩ mʋ́tɔ mlɔyɔ a, mlɩkpakpa mlɩ ayabitɔ-ɩsɩ wʋlɩ ɩnʋ, isuna ánɩ́ bʋmɛbɩ bwɛ.”
12Mʋ́ sʋ bɔyɔ yɛda asʋn amʋ ɔkan bɛɛ, aha bʋdamli klʋntɔ. 13Begya ɔŋɛ lalahɛ tsɔtsɔɔtsɔ lɛ ahatɔ, bɛkpa alɔpʋ tsɔtsɔɔtsɔ ɛ ofobi, tsa amʋ́ ɩlɔ.
Asu Ɔbɔpʋ Yohane Lowu
(Mateo 14:1-12; Luka 9:7-9)
14Galilea ɔmásʋ ogyipʋ Herode lonu Yesu ɩwɩ asʋn anfɩ, tsufɛ mʋ ɩdayile dɛ ɔtɩnɛgyiɔtɩnɛ. Akʋ bʋdɛblɩ bɛɛ, “Asu Ɔbɔpʋ Yohane lakʋsʋ tsu afulitɔ. Mʋ́ sʋ ɔdɛ ofula anfɩ odu bwɛ nɩ.”
15Tamɛ akʋ ɛ bɛɛ, “Bulu ɔnɔsʋ ɔtɔɩpʋ dada Elia nɩ.”
Akʋ ɛ bɛɛ, “Bulu ɔnɔsʋ atɔɩpʋ dada amʋtɔ ɔkʋ nɩ.”
16Brɛá Herode lonu asʋn amʋ a, ɔlɛblɩ ɔbɛɛ, “Yohane amʋʋ nɛha bɛtɩn amʋ latsinki tsu afulitɔ.” 17-18Herode lɛha bɛkɩta Yohane wa mʋ ɩkan, wa mʋ obu. Tsufɛ oletsia bla Herode ɔbɛɛ, mbla mɛha ɔkpa ánɩ́ obétsia mʋ pio Filipo mʋ ka Herodia amʋʋ otsia amʋ.
19Mʋ́ sʋ Herodia lɔhɔ Yohane asʋn wa ɩwɩtɔ. Ɔlɔbwɛ agywɩɩn ánɩ́ ɔbɔ́mɔ mʋ, tamɛ ɔmɛtalɩ, tsufɛ Herode mɛha mʋ́ ɔkpa. 20Herode yin ánɩ́ Yohane asʋn da ɔkpa, ogyi ɔha wankɩhɛ. Mʋ́ sʋ olenya mʋ ifu, ɔlɛkɩ mʋsʋ wanklaan ánɩ́ tɔtɔ mɔ́ɔbwɛ mʋ. Ɩbʋ mʋ́tɔá Yohane asʋn blɩhɛ tɛhan Herode, tamɛ otekle mʋ́ nu.
21Tɔá Herodia dedunka lɛba mʋ́tɔ ha mʋ. Ɛkɛ ɔkʋá Herode dɛ mʋ ɔkwɩɩkɛ gyi a, ɔlɔtswɩ ɔpʋnʋ, tɩ ahandɛ, ɩsa akɔpʋ dɛhɛn pʋ́ Galileafɔ ahandɛ ba atɔ amʋ ogyikpa. 22Brɛá Herodia mʋ bi tsɩhɛ lobowie ɔbʋntɔ tsa a, ɩlɔwa Herode mʋa ahandɛ amʋ fɛ́ɛ́ ansigyi. Herode lɛbla mʋ ɔbɛɛ, “Fɩtɛ mɩ togyitɔá fʋdekle, nɛ́ha fʋ.” 23Ɩnʋ ɔlɛka ntam ha mʋ ɔbɛɛ, “Nɛ́ha fʋ togyitɔá fɛfɩtɛ mɩ. Nɩ igyi mɩ iwie ogyikpa ɩfʋn kʋraa.”
24Otsibi amʋ lɛdalɩ yɛfɩtɛ mʋ yin ɔbɛɛ, “Ntɔ nfɩtɛ?”
Mʋ yin lɛbla mʋ ɔbɛɛ, “Fɩtɛ Asu Ɔbɔpʋ Yohane nwun.”
25Ɔsasʋ otsibi amʋ lɛba bɛbla Herode ɔbɛɛ, “Ndekleá fʋpʋ Asu Ɔbɔpʋ Yohane nwun dɩnka ɩlɩnsʋ ha mɩ seseesei.”
26Asʋn anfɩ lɛhɩɛ han owie amʋ, tamɛ mʋ ntam amʋʋ ɔlɛka, pʋ́ aha amʋʋ bʋbʋ ɩnʋ amʋ sʋ omekleá ɔbɔ́tʋn ntam amʋ. 27Ɩnʋnʋ ɔlɔwa mʋ aha ɔtɩnpʋ ɔbɛɛ, ɔyɛtɩn Yohane nwun ba mʋ. Ɔlɔyɔ yɛtɩn Yohane nwun obu ɔdɩkpa ɩnʋ. 28Mʋʋ ɔlɔpʋ nwun amʋ dɩnka ɩlɩnsʋ ba otsibi amʋ, mʋ ɛ ɔlɔpʋya mʋ yin Herodia. 29Brɛá Yohane akasɩpʋ bonu asʋn anfɩ a, bɛba botsu mʋ satin yopula.
Aha Mpɩm-nu Atogyihɛ Ha
(Mateo 14:13-21; Luka 9:10-17; Yohane 6:1-14)
30Yesu sumbi ayɔpʋ amʋ beyinki ba bɛbla mʋ tɔá bayɛbwɛ pʋ́ mʋ́á bayesuna fɛ́ɛ́. 31Mʋ́ ɔma a, aha bʋna amʋ́ wa alɩɩ, bʋmenya ɔkpa gyi atɔ kʋraa. Mʋ́ sʋ ɔlɛbla amʋ́ ɔbɛɛ, “Mlɩha ayɔ ɩtsɛtɔ flɛɛn, ayɛda ɔkpʋnʋ.” 32Ɩnʋ bowie ɔklʋntɔ, pʋ ɔkpa bɔyɔ ɩtsɛtɔ ɔtɩnɛkʋ.
33Tamɛ aha tsɔtsɔɔtsɔ bowun amʋ́, bɩ ɔtɩnɛá bɔyɔ. Mʋ́ sʋ botsu awulu amʋ fɛ́ɛ́sʋ, tsii ɔsrɩ gyankpa yowie ɔtɩnɛ amʋʋ Yesu aná bɔyɔ amʋ. 34Brɛá Yesu lɛkplɩ dalɩ ɔklʋn amʋtɔ, wun ɔdɔm kpɔnkpɔɔnkpɔntɩ amʋ a, amʋ́ asʋn lɔwa mʋ nwɛ, tsufɛ bʋgyi fɛ akufa ánɩ́ bʋma ɔkpapʋ. Mʋ́ sʋ olosuna amʋ́ atɔ tsɔtsɔɔtsɔ. 35Owi lɔpɔn a, akasɩpʋ amʋ bɛba mʋ wa bɛbla mʋ bɛɛ, “Ɩtsɛtɔ nfɩ gyi, owi ɛ lata. 36Ha amʋ́ abʋyɔ nkuda mʋ́a awuluá ɩbʋ bomli nfɩ asɩ yodunka tɔkʋ gyi.”
37Tamɛ Yesu lɛlɛ mʋ́ ɔnɔ ɔbɛɛ, “Mlɩdunka atɔ ha amʋ́ abʋgyi.”
Mʋʋ bɛfɩtɛ mʋ bɛɛ, “Abɛ́talɩ nya sika#6:37 Sika anfɩ igyi sika fututu lafanyɔ (200), igyi ɔha nkɛ lafanyɔ (200) ɩkɔka. hɔ atɔ ha aha anfɩ fɛ́ɛ́ bégyi?”
38Yesu lɛfɩtɛ amʋ́ ɔbɛɛ, “Bodobodo apin afɩnɩ mlɩbʋ? Mlɩyɔ amlɩyɛkɩ!”
Beyinki bɛbla mʋ bɛɛ, “Bodobodo apin anu pʋ́ ntsutso iye bwahɛ anyɔ bʋ ɩnʋ.”
39Yesu lɛbla amʋ́ ɔbɛɛ, “Mlɩha amʋ́ abʋtsiatsia ɩfa bɔbwɛ amʋsʋ.” 40Betsia asɩ akusʋ-akusʋ, akʋ lafa (100), akʋ ɛ aduenu (50). 41Ɩnʋ olotsu bodobodo anu pʋ́ ntsutso iye bwahɛ anyɔ amʋ. Mʋʋ olotsu ansɩ fʋa kɩ ɔsʋsʋ, ɔlɛda Bulu ɩpan. Ɩnʋ olebiabia bodobodo amʋ ha mʋ akasɩpʋ amʋ ɔbɛɛ, bʋye ha amʋ́. Oleye iye bwahɛ anyɔ amʋ ɛ ha amʋ́, bɔpʋha aha amʋ. 42Amʋ́ fɛ́ɛ́ begyi mwɛ sian. 43Akasɩpʋ amʋ bɔtɔsɩ bodobodo mʋ́a iye sianhɛ amʋ a, ɩlɔbʋla alakpa duanyɔ. 44Ayin ánɩ́ begyi atɔ amʋ nkʋlɛ bʋgyi mpɩm-nu (5,000).
Ɔpʋsʋ Natɩ
(Mateo 14:22-33; Yohane 6:15-21)
45Benya gyi atɔ amʋ ta alɩ, Yesu lɛbla akasɩpʋ amʋ ɔbɛɛ, bʋwie ɔklʋntɔ abʋgyankpa fa ɔpʋ amʋ yɔ Betsaida wulutɔ. Mʋ mʋ́ olesin ɔma si ɔdɔm amʋ ɔkpa. 46Brɛá olesi amʋ́ ɔkpa ta a, ɔlɔdʋ yɔ ɩbʋsʋ yɔbɔ mpaɩ. 47Brɛá owi lɛta, ɔklʋn amʋ lawie ntsu nsɩnɛ a, ilesi Yesu nkʋlɛ ɩbʋ amʋsʋ. 48Ɩnʋ olowun ánɩ́ ɔklʋn amʋ pla dɛ ɔnlɩn wa wa akasɩpʋ amʋ, tsufɛ afu kpɔnkpɔntɩ dɛtsʋn fia amʋ́. Bakɛ-bakɛ a, Yesu lɛnatɩ ntsu amʋsʋ ayabitɔ buo amʋ́, odekle ɔtsʋn amʋ́sʋ. 49Tamɛ brɛá bowun mʋ a, bʋkɩ bɛɛ fuli ogyi. Mʋ́ sʋ bɔsʋra okitikiti. 50Opuni letsii amʋ́ fɛ́ɛ́.
Tamɛ ɔlɔwa ɔsa bla amʋ́ ɔbɛɛ, “Mlɩwa klʋn. Mɩ nɩ, mlɩmánya ifu.” 51Mʋʋ ɔlɔdʋ wie ɔklʋn amʋtɔ, afu amʋ lɛka itin a. Asʋn anfɩ lɔwa amʋ́ wanwan. 52Amʋ́ klʋntɔ-odwin sʋ bʋmɔkʋnya nu bodobodo ɩwɩ asʋn amʋ asɩ.
Genesaretfɔ Alɔpʋ Tsa
(Mateo 14:34-36)
53Yesu mʋa amʋ́nyɔ bɛfa ɔpʋ amʋ yesi Genesaret otsubunɔ, bɔwa ɔfɛ kɩta ɔklʋn amʋ. 54Benya kplɩ dalɩ ɔklʋn amʋtɔ alɩ aha bowun Yesu, bɩ mʋ ɔtsawʋlɛ pɛ. 55Mʋ́ sʋ bɛsrɩ yotsu amʋ́ alɔpʋ sʋra akpasʋ, tsu ntɩnɛ-ntɩnɛ bɔtʋ mʋ ɩnʋ. 56Ɔtɩnɛgyiɔtɩnɛá Yesu lɔyɔ, igyi wulutɔ ntɛ akuda o a, bɔpʋ amʋ́ alɔpʋ bɔtswɩ brɔnʋsʋ, kokoli mʋ bɛɛ, ɔha alɔpʋ amʋ abʋpʋ ɩbɩ da mʋ atadɩɛ ɔdanʋ kpan. Amʋ́á bɔpʋ ɩbɩ da mʋ́ fɛ́ɛ́ benya ɩlɔtsa.
Currently Selected:
Marko 6: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation