Marko 5
5
Ɔŋɛ Lalahɛ Gya Lɛ Ogbedepʋtɔ
(Mateo 8:28-34; Luka 8:26-39)
1Brɛá Yesu mʋa mʋ akasɩpʋ amʋ bowie Galilea ɔpʋ amʋ ɔbɩn Gerasefɔ#5:1 Gadarafɔ bʋ nwʋlʋ dada amʋ akʋtɔ. ɔsʋlʋsʋ a, 2olenya kplɩ dalɩ ɔklʋntɔ alɩ, oyin ɔkʋá ɔŋɛ lalahɛ bʋ mʋtɔ lɛdalɩ tsu afuli opulakpa befia mʋ. 3Oyin anfɩ lapʋ afuli opulakpa ɩnʋ bwɛ mʋ otsiakpa. Ɔhɩɛ ɔbʋ ɩyɩn. Mʋ́ sʋ ɔhaa tamatra talɩ bwɛ mʋ otsia diin, ntɛ wa mʋ ɩkan. 4Tsufɛ tɛkɩ betsia wa mʋ ayabi pʋ́ mʋ ɩbɩ ɩkan, tamɛ oletsia tɩn mʋ́, biabia ɩkan amʋ tsalɩfwɩ. Ɔhaa ɛ má ɔwʋnlɩn ánɩ́ ɔbɛ́talɩ pɔn mʋ. 5Ekekegyiɛkɛ ɔpa mʋ́a onye fɛ́ɛ́ a, ɔbʋ afuli opulakpa ɩnʋ mʋ́a abʋsʋ, ɔdɛ okitikiti; ɔdɛpʋ abwi tsantsan ɩwɩ.
6Olenya wun Yesu sɩsɩ alɩ, ɔlɛsrɩ yɛda akpawunu mʋ ayabitɔ. 7Mʋʋ ɔlɔsʋra okitikiti kʋklʋkʋʋ ɔbɛɛ, “Ɔsʋsʋʋsʋ Bulu mʋ Bi Yesu, amansʋ igyi? Tanʋ Bulu ánɩ́ fʋmɛ́ɛpɩtɩ mɩ atɔ!” 8Ɔlɛblɩ asʋn anfɩ, tsufɛ Yesu lɛbla mʋ ɔbɛɛ, “Ɔŋɛ lalahɛ, dalɩ oyin anfɩtɔ.”
9Ɩnʋ Yesu lɛfɩtɛ mʋ ɔbɛɛ, “Nkalɩ bʋtɛtɩ fʋ?”
Ɔlɛlɛ mʋ́ ɔnɔ ɔbɛɛ, “Mɩ ɩda gyi, ‘Ɔdɔm>, tsufɛ anɩhɩɛ anɩ tsɔ.” 10Ɩnʋ ɔŋɛ lalahɛ amʋ bɛhɩɛ kokoli mʋ bɛɛ, ɔmagya amʋ́ lɛ Gerasefɔ ɔsʋlʋ amʋsʋ.
11Mprakuo tsɔtsɔɔtsɔ akʋ bʋdegyi okuku kʋsʋ ɩnʋ fʋn. 12Ɔŋɛ lalahɛ amʋ bokokoli mʋ bɛɛ, ɔha amʋ́ abʋyewie mprakuo amʋtɔ. 13Mʋʋ ɔlɛha amʋ́ ɔkpa. Bɛdalɩ oyin amʋtɔ yowie mprakuoá bɔ́bwɛ fɛ mpɩm-anyɔtɔ (2,000). Amʋ́ fɛ́ɛ́ bɛsrɩ kplɩ okuku amʋ wie ɔpʋ amʋtɔ wuwu.
14Mprakuo amʋ akpapʋ bɛsrɩ yɛblɩ asʋn anfɩ ɩlaba anfɩ awulusʋ pʋ́ nkudasɩ fɛ́ɛ́. Aha bɛdalɩ bɛɛ, bɛba bɛkɩ tɔá ɩlaba. 15Brɛá bɛba bowie Yesu wa a, bowun ánɩ́ oyin amʋʋ ɔŋɛ lalahɛ betsia mʋtɔ amʋ ansɩtɔ ladɩ, alawa atadɩɛ otsie. Ɩlɔwa amʋ́ ifu. 16Aha amʋʋ bowun tɔá ɩlɛba oyin amʋʋ tɛkɩ ɔŋɛ lalahɛ tsie mʋtɔ amʋ pʋ́ mprakuo amʋsʋ amʋ bɛbla amʋ́ tɔá ɩlaba fɛ́ɛ́.
17Ɩnʋ bokokoli Yesu bɛɛ, ɔdalɩ amʋ́ ɔsʋlʋsʋ.
18Brɛá olowie ɔklʋn amʋtɔ a, oyin amʋʋ tɛkɩ ɔŋɛ lalahɛ tsie mʋtɔ amʋ lokokoli mʋ ɔbɛɛ, ɔha amʋbuo mʋ natɩ.
19Tamɛ Yesu mɛha mʋ ɔkpa. Mboun ɔlɛbla mʋ ɔbɛɛ, “Yinki yɔ fʋ apio wa woyitɔ, afʋyɛbla amʋ́ ɩtɔ yileá anɩ Wie Bulu labwɛ ha fʋ, pʋ alɩá alawun fʋ nwɛ.”
20Mʋ́ sʋ oyin amʋ lɛnatɩ tsʋntsʋn, ɔdɛ itoyile amʋʋ Yesu labwɛ ha mʋ amʋ blɩ Dekapoli#5:20 Dekapoli asɩ gyi awulu du. awulu amʋ fɛ́ɛ́tɔ. Ɔnɔ lobwie aha amʋ fɛ́ɛ́.
Ɔhandɛ Ɔkʋ Mʋ Bi Mʋa Ɔtsɩ Ɔkʋ Ɩlɔ Tsa
(Mateo 9:18-26; Luka 8:40-56)
21Yesu lɛla fa ɔpʋ amʋ yɔ mʋ́ ɔbɩn. Brɛá ɔbʋ ɔpʋ ɔnɔ ɩnʋ a, ɔdɔm kpɔnkpɔɔnkpɔntɩ bɛba bobomli mʋ. 22Ɩnʋ Yudafɔ ofiakpa ɔhandɛ ɔkʋá bʋtɛtɩ mʋ Yairo lɛba ɩnʋ. Brɛá olowun Yesu a, ɔlɛda akpawunu mʋ ayabitɔ, 23kokoli mʋ ɔbɛɛ, “Mɩ bi tsɩhɛ dewu. Ba afʋbɔpʋ ɩbɩ dɩnka mʋsʋ, mʋ awutɔ ɩwa mʋ ɔnlɩn, onya nkpa.”
24Mʋʋ mʋa Yesu bɛnatɩ bɔyɔ a. Ɔdɔm kpɔnkpɔɔnkpɔntɩ bɛkpla buo mʋ, kpa puta mʋ.
25Ɔtsɩ ɔkʋ ɛ bʋ aha amʋtɔ, obugya dɛ mʋ wʋlɩ nfi duanyɔ nɩ. 26Alahɩɛ wun ipian ɩlɔ atsapʋ tsɔtsɔɔtsɔ ɩbɩtɔ, hʋlɩ mʋ ɩwɩsʋ atɔ fɛ́ɛ́, tamɛ ɩlɔ amʋ ɩmɛkala bwɛ mʋ. Ɩyɩn ɩdɛwa tsɩa. 27Brɛá ɔtsɩ anfɩ lonu Yesu nka a, ɔlɔtsʋn yɔ mʋ ɔma, fifitiwie ɔdɔm amʋtɔ yɔpʋ ɩbɩ da Yesu atadɩɛ. 28Tsufɛ ɔlɛblɩ wa mʋ nwuntɔ ɔbɛɛ, “Nɩ nɔpʋ ɩbɩ da mʋ atadɩɛ kpan a, ɩlɔ amʋ ibési mɩ.”
29Olenya pʋ ɩbɩ da mʋ atadɩɛ amʋ alɩ, obugya amʋ lɛka itin. Olonu mʋ́ nka mʋ awutɔá ɩlɔ amʋ lasi mʋ. 30Ɩnʋ Yesu lonu mʋ́ nka mʋ awutɔ mʋ ɛ ánɩ́ ɔŋɛ kʋ ladalɩ mʋtɔ. Ɩnʋnʋ ɔlɛdamli kɩ ɔdɔm amʋ, ɔlɛfɩtɛ amʋ́ ɔbɛɛ, “Ma lapʋ ɩbɩ da mɩ atadɩɛ?”
31Mʋʋ mʋ akasɩpʋ amʋ bɛfɩtɛ mʋ bɛɛ, “Fʋ onuto fawun ánɩ́ ɔdɔm bakpa puta fʋ. Mʋʋ fʋtra fʋdɛfɩtɛ fɛɛ, ‘Ma lapʋ ɩbɩ da mɩ?> ”
32Yesu lɔwa ansɩ kɩ amʋ́tɔ fɛ́ɛ́, ɔdɛ ɔha ánɩ́ ɔlɔpʋ ɩbɩ da mʋ dunka. 33Ifu lɛkɩta ɔtsɩ amʋ. Mʋ́ sʋ ɔlɔwa kpɩnkɩ kpakpakpakpa bɩ, tsufɛ oyin tɔá alanya. Ɩnʋ ɔlɛba bɛda akpawunu Yesu ayabitɔ, bla mʋ ɔnɔkwalɩ amʋ fɛ́ɛ́. 34Yesu lɛbla mʋ ɔbɛɛ, “Mɩ bi, fʋ hogyi lahɔ fʋ nkpa. Natɩ iwilwiitɔ. Fʋ ɩlɔ amʋ ɩta.”
35Brɛá Yesu bʋ mʋ́sʋ ɔdɛtɔɩ a, aha akʋ botsu ofiakpa ɔhandɛ amʋ woyitɔ ba bɛbla mʋ bɛɛ, “Ɔhandɛ, fʋ bi tsɩhɛ amʋ ɔdɩkpa mɔwa alɛ. Mátepi tra wa osunapʋ tɔɩ.”
36Yesu mɛkpla asʋn amʋʋ bʋdɛblɩ amʋ. Mboun ɔlɛbla mʋ ɔbɛɛ, “Mánya ifu. Fʋ mʋ́ hogyi wʋlɛ.” 37Ɔmɛha ɔhaa ɔkpa obuo mʋ dʋn Petro pʋ́ Yakobo mʋa mʋ pio Yohane nkʋlɛ. 38Brɛá bowie ɔhandɛ amʋ woyitɔ a, Yesu lowun ánɩ́ aha babʋla ɩnʋ, bʋdesu, bʋdɛ okitikiti. 39Olowie ɩnʋ fɩtɛ amʋ́ ɔbɛɛ, “Ntogyi sʋ mlɩdɛ ipian wun, mlɩdɛ okitikiti alɩ? Otsibi amʋ mɔkʋwu, dɩdɩ ɔdɛ.”
40Aha amʋ bɔmɔsɩ mʋ. Mʋʋ olegya amʋ́ fɛ́ɛ́ dalɩ ba wunsɩnɛ, ɔlɛkpa obi amʋ akwɩɩpʋ pʋ́ mʋ akasɩpʋ amʋʋ bʋbuo mʋ amʋ bebitiwie obu amʋʋ otsibi amʋ da mʋ́tɔ amʋtɔ. 41Ɩnʋ ɔlɛkɩta otsibi amʋ ɩbɩ, bla mʋ amʋ́ ɔblɩtɔ ɔbɛɛ, “Talita kuum!” (Mʋ́ asɩ gyi, “Obitebi, kʋsʋ!”)
42Ɩnʋnʋ ɔlɔkʋsʋ ɔna. (Otsibi amʋ lahɔ nfi duanyɔ.) Ilobwie aha amʋ fɛ́ɛ́ ɔnɔ dafa. 43Mʋʋ ɔlɛda amʋ́ ɔla kinkiinkin ɔbɛɛ, bʋmábla ɔhaa asʋn anfɩ. Ɩnʋ ɔlɛbla amʋ́ ɔbɛɛ, bʋha kebi amʋ atɔ ogyi.
Currently Selected:
Marko 5: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation