Marko 7
7
Atɩtɩfɔ Amandɩɛ
(Mateo 15:1-9)
1 Farisifɔ pʋ́ Mose mbla asunapʋ akʋ botsu Yerusalem ba befia Yesu wa. 2Mʋʋ bowun ánɩ́ mʋ akasɩpʋ amʋ akʋ bʋmɔfwɩ ɩbɩ amandɩɛ ɔkpasʋ asa bʋdɛ atɔ gyi.
3(Tsufɛ Yudafɔ, titriu Farisifɔ bʋmɔkʋsi amʋ́ anain amandɩɛtɔ. Mʋ́ sʋ nɩ bʋmɔkʋfwɩ ɩbɩ amandɩɛ ɔkpasʋ a, bʋtamagyi atɔ. 4Alɩ kɛn nɩ bʋmɔkʋgyʋra ɩwɩ a, bʋtamagyi tɔá bɔpʋtsua biasʋ ba nɩ. Amandɩɛ bamba kʋ aná ɛ bʋ ɩnʋ, bʋtra bʋdɛ mʋ́tɔ tsu nwɛ-nun-ntsu, nlɔ́ pʋ́ nlanka ɩwɩ.)
5Mʋ́ sʋ amʋ́a Mose mbla asunapʋ bɛfɩtɛ Yesu bɛɛ, “Ntogyi sʋ fʋ akasɩpʋ amʋ bʋtamagyi anɩ anain amandɩɛsʋ, bʋmɔfwɩ ɩbɩ amandɩɛ ɔkpasʋ asa abʋgyi atɔ?”
6Yesu lɛlɛ mʋ́ ɔnɔ ɔbɛɛ, “Ɔnɔkwalɩ Bulu ɔnɔsʋ ɔtɔɩpʋ Yesaia lɛblɩ tswɩ tsu mlɩ apinabwɛbi abwɛpʋ anfɩ ɩwɩ ɔbɛɛ,
‘Aha anfɩ bʋdɛpʋ amʋ́ ɔnɔ bu mɩ,
tamɛ amʋ́ klʋn bʋ ɩfɔ mɩ wa.
7Kpaalɩ bʋdɛ mɩ sum,
tsufɛ basi Bulu mbla tswɩ,
yɔ bʋdɛ anyankpʋsa mbla suna.>
8“Mlɩlasi Bulu mbla amʋ tswɩ, mlɩdɛ mlɩ anain amandɩɛtɔ.”
9Ɩnʋ ɔlɛbla amʋ́ ɔbɛɛ, “Mlɩlapina si Bulu mbla amʋ tswɩ nyansatɔ, mɛnɩ mlégyi mlɩ onuto amandɩɛsʋ. 10Tsufɛ Mose lɔwanlɩn wa Bulu mbla amʋtɔ ɔbɛɛ, ‘Bu fʋ sɩ mʋ́a fʋ yin.> Ɔlɛtra wanlɩn ɔbɛɛ, ‘Nɩ ɔkʋ lɛblɩ asʋkpan tsu mʋ sɩ ntɛ mʋ yin ɩwɩ a, bʋmɔ mʋ.> 11Tamɛ mlɩ mʋ́ mlɩaa, ɔha ɔbɛ́talɩ bla mʋ sɩ ntɛ mʋ yin ɔbɛɛ, ‘Tɔá tɛkɩ nɔ́pʋha fʋ a, napʋbwɛ Koban.>#7:11 Koban asɩ gyi, napʋkie Bulu. 12Mlɩlaha aha bʋmɛdɛ tɔtɔ bwɛ ha amʋ́ akwɩɩpʋ. 13Mlɩ anain amandɩɛ sʋ mlɩtra mlɩmɛdɛ Bulu mblasʋ gyi. Ntobi tsɔtsɔɔtsɔ ɛ bʋ ɩnʋá mlɩtra mlɩdɛbwɛ tsɩa ɩnɩtɔ.”
Tɔá Ɩtɔkpɔɩ Ɔha Bulu Ansɩtɔ
(Mateo 15:10-20)
14Yesu lɛtra tɩ ɔdɔm amʋ ba mʋ ɩwɩ wa, ɔlɛbla amʋ́ ɔbɛɛ, “Mlɩ fɛ́ɛ́ mlɩyaa asʋ amlɩnu ɩnɩ asɩ! 15-16Megyi tɔá ɔha tegyi tɔkpɔɩ mʋ Bulu ansɩtɔ. Mboun mʋ́á ɩtɛdalɩ tsu mʋ ɔnɔ.#7:16 Mʋ́tɔ ye 16 bʋ nwʋlʋ dada amʋ akʋtɔ: Ɔhagyiɔha ánɩ́ ɔbʋ asʋ, onu!”
17Brɛá ɔlɛnatɩ si ɔdɔm amʋ yɔ woyitɔ a, mʋ akasɩpʋ amʋ bɛfɩtɛ mʋ yebi anfɩ asɩ. 18Ɔlɛlɛ mʋ́ ɔnɔ ɔbɛɛ, “Mlɩ ɛ mlɩtamanu asʋn asɩ? Mlɩmeyin ánɩ́ tɔá itowie ɔha ɔnɔ tamakpɔɩ mʋ Bulu ansɩtɔ? 19Tsufɛ megyi mʋ klʋntɔ itowie, mboun mʋ iputɔ itowie, ɔtɛyɛlɛ mʋ́ wa ɔkpʋntɔ.” (Yesu lɛlɛ mʋ́tɔ pʋsuna ánɩ́ atogyihɛ kugyikʋ ɩwɩ lɛtɩn.)
20Ɩnʋ ɔlɛbla amʋ́ ɔbɛɛ, “Tɔá ɩtɛdalɩ tsu ɔha klʋntɔ tɔkpɔɩ mʋ Bulu ansɩtɔ. 21Tsufɛ ɔha klʋntɔ agywɩɩn lalahɛ kugyikʋ tɛdalɩ tsu. Mʋ́tɛha mʋ ɔtɔwa atsɩ mʋ́a ayin asʋn, otowi atɔ, ɔtɔmɔ ɔha, ɔtɔtɔ mbʋa, 22ɔtɔwa ɔnsɩpɛ, ɔtɔbwɛ lalahɛ, ɔtɛmlɛ aha, ɔtɔwa hakpan, ɔtɔwa olu, otetsii ɔha, ototsu ɩwɩ, ɔtɔbwɛ mimlala. 23Ɔha klʋntɔ, atɔ lalahɛ anfɩ fɛ́ɛ́ tɛdalɩ tsu. Mʋ́tɔkpɔɩ mʋ nɩ.”
Ɔtsɩ Ɔkʋá Omegyi Yudayin Hogyi
(Mateo 15:21-28)
24Yesu lɛnatɩ ɩnʋ yɔ Tiro nsaɩntɔ, ɔlɔyɔswɩɩ woyi kʋtɔ. Omedekle ɔbɛɛ aha bʋbɩá maba ɩnʋ, tamɛ ɔmɛtalɩ ŋain mʋ ɩwɩ. 25Ɔŋɛ lalahɛ bʋ ɔtsɩ ɔkʋ mʋ bi tsɩhɛtɔ. Olenya nu Yesu nka alɩ, ɔlɔwa ɔsa bɛda akpawunu mʋ ayabitɔ. 26Grikiyintse ɔtsɩ anfɩ gyi. Bɔkwɩɩ mʋ Siro Foenike ɔsʋlʋsʋ. Olokokoli Yesu ɔbɛɛ, ogya ɔŋɛ lalahɛ amʋ lɛ mʋ bi amʋtɔ. 27Tamɛ Yesu lɛbla mʋ ɔbɛɛ, “Ha nyebi amʋ abʋmwɛ asa, tsufɛ ɩma alɛá fɔ́swɩɩ nyebi atogyihɛ pʋha akɩaɩ.”
28Ɔtsɩ amʋ lɛlɛ mʋ́ ɔnɔ ɔbɛɛ, “Owie, ɩbʋ mʋ́tɔ alɩ, tamɛ akɩaɩ ánɩ́ bʋda ɔpʋnʋ amʋ asɩ ɛ bʋtegyi nyebi atogyihɛ mpupubiá ɩtɛkpakpa bun amʋ́ ɔpʋnʋasɩ.”
29Mʋʋ Yesu lɛbla mʋ ɔbɛɛ, “Fabɩ lɛ mʋ́ ɔnɔ. Mʋ́ sʋ natɩ, ɔŋɛ lalahɛ amʋ ladalɩ fʋ bi tsɩhɛ amʋtɔ.”
30Brɛá ɔtsɩ amʋ lɔyɔ woyitɔ a, olowun ánɩ́ ɔŋɛ lalahɛ amʋ ladalɩ mʋ bi amʋtɔ, alasi ɔda mpasʋ.
Ɩsʋtin Ɔkʋá Ɔtamatɔɩ Wanklaan Tsa
31Yesu lɛnatɩ Tiro ɩnʋ yɔ Sidon yobomli kplɩ ba Dekapoli#7:31 Dekapoli asɩ gyi awulu du. awulu amʋ nsaɩntɔ asa ɔlɛladʋ yɔ Galilea ɔpʋ ɔnɔ. 32Bɔpʋ ɩsʋtin ɔkʋ ba mʋ, ɔtamatalɩ tɔɩ wanklaan. Bokokoli mʋ bɛɛ, ɔpʋ ɩbɩ dɩnka mʋsʋ. 33Mʋʋ ɔlɛkpa oyin amʋ ya ɩfʋntɔ, pʋ mʋ asrebi wa oyin amʋ asʋtɔ, olotu atsʋnɔ dɩnka mʋ osrebisʋ, pʋda oyin amʋ ɔdandʋsʋ. 34Ɩnʋ olotsu ansɩ fʋa kɩ ɔsʋsʋ, lʋn ɔŋɛ fʋ. Mʋʋ ɔlɛblɩ ɔbɛɛ, “Hefata.” Hebri ɔblɩtɔ. Mʋ́ asɩ gyi, “Finki.”
35Ɩnʋnʋ mʋ asʋ lefinki, mʋ ɔdandʋ ɛ lɛsankɩ; ɔlɔtɔɩ wanklaan. 36Mʋʋ Yesu lɛda aha amʋ ɔla kpakpaakpa ɔbɛɛ, bʋmábla ɔhaa. Tamɛ tse dʋdʋʋdʋá ɔlɛda amʋ́ ɔla a, alɩ kɛn bɛda asʋn amʋ ɔkan nɩ. 37Ɔnɔ lɛhɩɛ bwie amʋ́, bɛblɩ bɛɛ, “Alabwɛ togyitɔ wanklaan. Alaha asʋtin bʋdɛ asʋn nu, amumu ɛ bʋdɛtɔɩ.”
Currently Selected:
Marko 7: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation