Marko 8
8
Aha Mpɩm-na Atogyihɛ Ha
(Mateo 15:32-39)
1Nkɛ amʋtɔ a, ɔdɔm kpɔnkpɔɔnkpɔntɩ bɛtra befia Yesu wa. Amʋ́ atogyihɛ lɛta. Mʋ́ sʋ Yesu lɛtɩ mʋ akasɩpʋ, bla amʋ́ ɔbɛɛ, 2“Aha anfɩ asʋn dɛ mɩ nwɛ wa. Ndɛ ɛkɛ sasɩ ɔpá bʋbuo mɩ. Bʋtra bʋma tɔtɔá bégyi. 3Nɩ nɛ́ha amʋ́ bɔpʋ akʋn natɩ bɔyɔ woyi a, ansɩtɔ béyebi amʋ́ ɔkpatɔ, tsufɛ amʋ́tɔ akʋ ɔkpa bʋ ɩfɔ.”
4Mʋʋ akasɩpʋ amʋ bɛfɩtɛ mʋ bɛɛ, “Nkʋnʋ abénya atogyihɛ ha aha anfɩ fɛ́ɛ́ bégyi mwɛ ɔsʋlʋkpan anfɩsʋ.”
5Yesu lɛfɩtɛ amʋ́ ɔbɛɛ, “Bodobodo afɩnɩ mlɩbʋ?”
Bɛlɛ mʋ́ ɔnɔ bɛɛ, “Asienɔ.”
6Yesu lɛha ɔdɔm amʋ betsia ɔsʋlʋtɔ. Mʋʋ olotsu bodobodo asienɔ amʋ, da Bulu ɩpan, olebiabia mʋ́tɔ ha akasɩpʋ amʋ beye mʋ́ ha amʋ́. 7Bʋbʋ ntsutso iye bwahɛ kpalobi kʋ ɛ. Yesu loyula mʋ́sʋ, ɔlɔpʋ mʋ́ ɛ ha akasɩpʋ amʋ beye ha amʋ́. 8Amʋ́ fɛ́ɛ́ begyi mwɛ. Akasɩpʋ amʋ bɔtɔsɩ isianhɛ bʋla alakpa yile asienɔ. 9Aha amʋ bɔ́bwɛ fɛ mpɩm-na (4,000), Yesu lesi amʋ́ ɔkpa. 10Ɩnʋnʋ mʋa mʋ akasɩpʋ bɔdʋ wie ɔklʋntɔ ba Dalmanutafɔ ɔsʋlʋsʋ.
Farisifɔ Bodunka Ofula
(Mateo 12:38-42; 16:1-4)
11Farisifɔ bonuá Yesu laba ɩnʋ, bɛba bʋdɛ mʋ asʋn fɩtɛ. Bɛbla mʋ bɛɛ, ɔbwɛ osuna pʋsuna amʋ́ ánɩ́ lɛlɛ otsu Bulu wa. 12Yesu lɔlʋn ɔŋɛ fʋ. Mʋʋ ɔlɛfɩtɛ amʋ́ ɔbɛɛ, “Ntogyi sʋ mlɩ ndɛmba-abi mlɩdɛ osuna dunka amlɩwun? Mbla mlɩ ɔnɔkwalɩ. Mmɔ́ɔbwɛ osuna kʋkʋ suna mlɩ!”
13Ɩnʋ ɔlɛnatɩ si amʋ́ yɔ dʋ wie ɔklʋntɔ, fa ɔpʋ amʋ yɔ mʋ́ ɔbɩn.
Farisifɔ Pʋ́ Owie Herode Bodobodotu-afa
(Mateo 16:5-12)
14Yesu akasɩpʋ amʋ bʋmɛkaɩn tsu bodobodo kɩta. Ipin kʋlɛ pɛ bʋ ɔklʋn amʋtɔ. 15Brɛá bʋdɩn ntsu amʋsʋ bɔyɔ a, Yesu lɛda amʋ́ ɔla ɔbɛɛ, “Mlɩkɩ wanklaan Farisifɔ pʋ́ ɔmásʋ ogyipʋ Herode bodobodotu-afasʋ.”
16Akasɩpʋ amʋ bɛfɩtɛ aba bɛɛ, “Bodobodo amʋʋ anɩmɛdɛ amʋ sʋ ɔdɛ asʋn anfɩ blɩ loo?”
17Yesu lonu asʋn ánɩ́ bʋdɛblɩ. Mʋʋ ɔlɛfɩtɛ amʋ́ ɔbɛɛ, “Ntogyi sʋ mlɩdɛblɩ mlɩaa, mlɩmɛdɛ bodobodo? Mʋ́ sʋ ɩklʋntɔ bʋ mlɩ odwin mlɩ ɛ? 18Mlɩ ansibi tamawun atɔ, mlɩ asʋ ɛ tamanu asʋn? Mlɩtamakaɩn asʋnsʋ? 19Brɛá neye bodobodo apin anu ha aha mpɩm-nu (5,000) a, isianhɛ alakpa afɩnɩ mlɩlɔtɔsɩ?”
Bɛlɛ mʋ́ ɔnɔ bɛɛ, “Duanyɔ.”
20“Bodobodo apin asienɔ amʋʋ neye ha aha mpɩm-na amʋ ɛ mɛ, isianhɛ alakpa yile afɩnɩ mlɩlɔtɔsɩ?”
Bɛlɛ mʋ́ ɔnɔ bɛɛ, “Asienɔ.”
21Ɩnʋ Yesu lɛfɩtɛ amʋ́ ɔbɛɛ, “Ɩmɔkʋwankɩ mlɩ kɩ?”
Ansibi Obwiepʋ Ɔkʋ Ansibi Bwii
22Yesu mʋa mʋ akasɩpʋ bɛba Betsaida wulutɔ. Aha akʋ bɛkpa ansibi obwiepʋ ɔkʋ ba. Bobwii ɩpa ha mʋ bɛɛ, ɔpʋ ɩbɩ da mʋ, ɔtsa mʋ ɩlɔ. 23Yesu lɛkɩta ansibi obwiepʋ amʋ ɩbɩ, kpa mʋ dalɩ wulu amʋtɔ. Ɩnʋ olotu atsʋnɔ dɩnka oyin amʋ ansibisʋ, pʋ ɩbɩ dɩnka mʋsʋ. Mʋʋ ɔlɛfɩtɛ mʋ ɔbɛɛ, “Fʋdɛ atɔ wun?”
24Ansibi obwiepʋ amʋ lotsu nwun fʋa kɩ, ɔlɛblɩ ɔbɛɛ, “Ndɛ anyankpʋsa wun, tamɛ bʋgyi fɛ nyi bʋna.”
25Ɩnʋ Yesu lɛtra pʋ ɩbɩ dɩnka mʋ ansibisʋ. Oyin amʋ lobwii ansibi kɩ a, mʋ ansibi lawa alɛ, ɔdɛ togyitɔ wun wanklaan ngya. 26Yesu leyinkia mʋ sɩsɩ woyitɔ ɔbɛɛ, “Natɩ laa yɔ woyi. Mátepi wie wulu amʋtɔ kʋraa.”
Ɔha Ánɩ́ Yesu Gyi
(Mateo 16:13-20; Luka 9:18-21)
27Yesu mʋa mʋ akasɩpʋ amʋ bɛnatɩ ɩnʋ bɔyɔ Kaesarea Filipi awulusʋ. Brɛá bʋna ɔkpatɔ a, ɔlɛfɩtɛ amʋ́ ɔbɛɛ, “Ma aha bɛɛ ngyi?”
28Bɛlɛ mʋ́ ɔnɔ bɛɛ, “Akʋ bɛɛ, fʋgyi Asu Ɔbɔpʋ Yohane. Akʋ bɛɛ, Bulu ɔnɔsʋ ɔtɔɩpʋ Elia. Akʋ ɛ bɛɛ, Bulu ɔnɔsʋ atɔɩpʋ amʋtɔ ɔkʋ.”
29Mʋʋ ɔlɛfɩtɛ amʋ́ ɔbɛɛ, “Mlɩ ɛ mɛ? Mlɩaa, mɩgyi ma?”
Petro lɛlɛ mʋ́ ɔnɔ ɔbɛɛ, “Fʋgyi Kristo, (ɔha amʋʋ Bulu lada mʋ ofuli amʋ) nɩ.”
30Ɩnʋ ɔlɛda amʋ́ ɔla ɔbɛɛ, “Mlɩmábla ɔhaa mɩ ɩwɩ asʋn anfɩ.”
Yesu Ɩwɩɔsɩn Pʋ́ Mʋ Lowu Ɩwɩ Asʋn Blɩ
(Mateo 16:21-28; Luka 9:22-27)
31Ɩnʋ Yesu lefi asɩ ɔdɛ asʋntɔ lɛ suna amʋ́ ɔbɛɛ, “Ilehian ánɩ́ mɩ, Nyankpʋsa-Mʋ-Bi anfɩ nɛhɩɛ wun ɩwɩɔsɩn tsɔtsɔɔtsɔ. Yudafɔ ahandɛ, Bulu igyi ahapʋ dɛhɛn pʋ́ Mose mbla asunapʋ fɛ́ɛ́ békina mɩ bɛɛ, megyi mɩgyi Kristo amʋ. Bɔ́mɔ mɩ, tamɛ Bulu ɔbɛ́lakʋsʋa mɩ tsu afulitɔ nkɛnsa ɔma.” 32Ɔmɔpʋ asʋn anfɩ ŋain amʋ́. Mʋ́ sʋ Petro lɛtɩ mʋ ya ɩtsɛtɔ yɛka mʋ itin ɔbɛɛ, ɔmátra blɩ alɩ. 33Ɩnʋ ɔlɛdamli kɩ akasɩpʋ amʋ, ɔlɔkplʋn wa Petro ɔbɛɛ, “Satan, natɩ tɛɩ mɩsʋ! Megyi tɔá Bulu dɛgywɩɩn fʋdɛgywɩɩn, anyankpʋsa klɛ fʋdɛgywɩɩn.”
34Ɩnʋ ɔlɛtɩ ɔdɔm amʋ pʋ́ mʋ akasɩpʋ ba mʋ ɩwɩ wa. Mʋʋ ɔlɛbla amʋ́ ɔbɛɛ, “Nɩ ɔkʋ dekleá obóbuo mɩ a, osi tɔá otekle bwɛ, otsu mʋ oyikpalihɛ bobuo mɩ. 35Tsufɛ nɩ ɔkʋ lɛprɩ mʋ nkpa a, ɔbɔ́hʋlɩ mʋ́. Nɩ ɔkʋ ɛ lɔhʋlɩ mʋ nkpa mɩa Bulu asʋn wanklaan amʋsʋ a, Bulu ɔbɔ́hɔ mʋ nkpa. 36Nɩ ɔkʋ onya ɔyɩtɔ atɔ fɛ́ɛ́, tamɛ ɔhʋlɩ mʋ ɔkla a, labi mɔmʋ ɩlɔwa ha mʋ? 37Ntɛ ntɔ ɔha ɔbɛ́talɩ pʋtsɛ mʋ nkpa? 38Tsufɛ nɩ ɔkʋ onya mɩa mɩ atosunahɛ pɛlɩ ndɛmba-abi lalahɛá badamli ɔma ha Bulu ansɩtɔ a, mɩ, Nyankpʋsa-Mʋ-Bi anfɩ ɛ nénya mʋ pɛlɩ brɛá mɩa Bulu-abɔpʋ wankɩhɛ amʋ anɩna mɩ Sɩ numnyamtɔ aba.”
Currently Selected:
Marko 8: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation