Mathliyu 2
2
Mji Ɗəɗu Na Thlata Abwar Raghəi
1Mdə ku yaɓəla Yesu ahar Bethlelehem akwa tsəɗi Yahudiya, akwa zaman ar Kuthli Hirudus. Aghəla tə mdə ku yaɓəla ni antə mji laga ɗəɗu suɗa, na ka sənda ata kəra sasəlka, ku thlata abwar raghəi ka si ahar Urushalima, ka yu abbər, 2“Ama ɓzəngkyar tə mdə yaɓəla na kuthlir mjir Yahudi nə ri? Kamnyar yeru ku wutə sasəlkarni akwa raghəi, antə yeru ku si kamnyar vəngkər səli alari.”
3Sakatə Kuthli Hirudus ku nggata apani antə hangkalari ku thlata, kəga shanga mji na ahar Urushalima. 4Antə tsa tsaptə shanga pristayeri na olˈola ka maləmayeri, ka yu ɗa abbər, “Ama vəi tə mdə yaɓəla Kristi ata ri?”
5Antə da pəla alari, “Ahar Bethlelehem akwa tsəɗi Yahudiya, kamnyar apani antə naɓi ku rəbuta abbər,
6“ ‘Gə na Bethlelehem akwa tsəɗi Yahudiya,
ga aɗi raka akwa nca mjir kuthlikur ar Yahuda wa.
Kamnyar akwa ga antə mdər kuthlikur ata səɓəla,
mdə na ata sə ndzi mdər ɓəla mjirna Israila.’ ”
7Antə Hirudus ku kəga mji na ɗəɗu ni, akwa ɗuwari, kamnyar ka tsa nggaɓəla akəla ɗa sakatə da wutə sasəlka ni. 8Antə tsa thlentə ɗa ahar Bethlelehem, ka pəla ala ɗa, “Mwar giri ka giri ra nggaɓəla labar ata kəra ɓzəngkyar ngəni ka hangkal. Ma sakatə giri ku wutə ni, ka giri sənta ali labar, kamnyar wala I ma, kəi ra vəngkər səli alari.”
9Sakatə da ku nggatə su tə kuthli pəla ni antə da psi laku ka təra. Tsuwa sasəlka natə da wuta abwar raghəi ni akwa mwa akəma ɗa, har tar tə tsa si ka thləthlata abwa kəra vəi tə ɓzər ni ata. 10Sakatə da wutə sasəlka ni antə da hara kucali ka duna. 11Sakatə da ləvəi akwa kəi ni, ka wutə ɓzəngkyar ni ka mama'ni Maryamu, antə da ku zuzuri ka vəngkər səli alari. Antə da kəlar sur pwi gənar ɗa ka hamta alari cauta ar dinar, ka tulari ar luban, ka mur.
12Amma kamnyar tə Hyel ku tsaktə ɗa akwa suni abbər da aɗiya nuwa atar Hirudus kəra wa, antə da ku ngka akwa tsəɗiyir ɗa ata laku damwa.
Mdə Ku Hwi Ka Ɓzəngkyar Yesu Ka Mwantə Ni Ahar Masar
13Sakatə da ku təra antə mdərthlentərhyel laga wutədzi aka Yusuf akwa suni, ka pəla, “Thlatə kara kətə ɓzəngkyar ni ka mama'ni, kara hwi ləhar Masar. Ka giri ndzi anda har tar ma sakatə I ku pəla ala gə ka gə thlata anda, kamnyar Hirudus akwa bara ɓzəngkyar ni ka tsa tsi ni.”
14Antə Yusuf ku thlata, ka kətə ɓzəngkyar ni ka mama'ni, ka təra aviri ka mwantə ni ahar Masar. 15Antə da ku ndzi anda tar sakatə Hirudus ku mti. Su ngəni hara apani ni kamnyar nghyaɓəla su tə Mthlaku pəla atar naɓi abbər, “I ku kəgaɓəla ɓzərna akwa Masar.”
Mdə Tsəgəi Maɗankyar Na Akwa Tsəɗi Yahuda
16Sakatə Hirudus ku nggaɓəla abbər mji na ɗəɗu ni ku pwaktəmta ni, antə ɗəffari ku ɓzi ka duna, tə tsa tsawa abbər ka mji tsəgəi shanga maɗankyar na maɗashili ahar Bethlelehem, ka shanga kauyayeri na kalaktə Bethlelehem ni, baɗitə ka maɗankyar na ku hara məva suɗa, ka na aɗi mzhitə məva suɗa wa, kalkal ka sakatə mji na ɗəɗu ni pəla alari su ata kəra ɓzər ni.
17Akwa saka ngəni antə su tə naɓi Irmiya pəla ni ku nghyaɓəladzi, abbər,
18Mthlaku akwa pəla,
“Mdə ku nggatə kuraku ahar Rama,
kurakər tuwa na mwavər.
Rahila akwa tuwa kamnyar maɗa'ni,
ka nggəlar shiktədzi kamnyar maɗa'ni aɗi kəra wa.”
Yusuf Ku Ngka Ahar Nazareth
19Aghəla tə Hirudus ku mti, antə mdərthlentərhyel ku gari aka Yusuf akwa suni ahar Masar, ka pəla, 20“Thlata, kara kətə ɓzəngkyar ni ka mama'ni, ka giri ngka akwa tsəɗi Israila, kamnyar mji na akwa bara tsi ɓzəngkyar ni ku mtəgəi.” 21Antə Yusuf ku thlata, ka kətə ɓzəngkyar ni ka mama'ni, ka ngka akwa tsəɗi Israila.
22Amma sakatə Yusuf ku nggata abbər Arkilawus ku ndzi kuthlir Yahudiya ata vəya Hirudus na baba'ni, antə tsa ku thlivər mwari anda. Antə Hyel ku gari alari akwa suni, tə tsa ku ngka ka mwari akwa tsəɗi Galili. 23Tsa mwari ka ndzəndzi akwa di laga ka thləmari Nazareth, kamnyar ka su tə naɓiyayeri pəla ni nghyantədzi, abbər, “Ka mda kəga ni Mdər Nazareth.”#Mar 1:24; Luk 2:39; Yah 1:45
Currently Selected:
Mathliyu 2: KNB
Highlight
Share
Copy
Want to have your highlights saved across all your devices? Sign up or sign in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.