Mathliyu 3
3
Ngkər Labar Ar Yahwana Mdər Hara Baptizma
(Mar 1:1-8; Luk 3:1-18; Yah 1:19-28)
1Akwa saka ndaga antə Yahwana na mdər hara baptizma ku si akwa mtakər Yahudiya, tə tsa baɗitə ngkər labar ka pəla, 2“Ka giri tubi diya, ka kamnyar kuthlikur na amtazi ku hara kudzəha.”#Mat 4:17; Mar 1:15 3Kamnyar ngəni an mdə tə naɓi Ishaya ngkər labar ata kərari abbər,
“Kuraka mda akwa kəga akwa mtaku abbər,
‘Namtə gir laku aka Mthlaku,
namtə gir alari laku ni dwaɗu.’ ”
4Tsuwa Yahwana hatə ləptu tə mdə nam ka shishir dləkəmau, ka mbwi kusarari ka sur mbwadzi tə mdə nam ka kəsəm. Tsuwa susəmərni an hawa ka cirməma na akwa mtaku. 5Antə mji ku thlata ahar Urushalima, ka shanga tsəɗi Yahudiya, ka shanga mji na ata mnya Thlyagha Jodan, ka si adzə ni, 6akwa jikaɓəla bikər ɗa. Antə tsa ku hara ala ɗa baptizma akwa Thlyagha Jodan ni.
7Sakatə Yahwana wutə mjir Farisi ka mjir Saddukiya hang akwa si adzə ni kamnyar ka tsa hara ala ɗa baptizma, antə tsa pəla ala ɗa, “Giri na pwapwayeri, wan tsaktə giri abbər ka giri hwi ta bwani na akwa si nə ri? 8Ka giri hara kəthlərayeri na ata ncanta abbər giri ku tubi ata kəra bikər giri. 9Tsuwa giri aɗiya pəla abbər giri ata msər ta bwani ni atar pəla abbər Ibrahim an baba' giri wa. Kamnyar I akwa pəla ala giri abbər Hyel ata mzhi namtə maɗa' aka Ibrahim ka pelayeri ngəni. 10Kulini ma mdə ku kurtə vətə kəma ata nggilanga nfwayeri, antə kəlara nfu na aɗi ata ya na ɓɗakɓɗaku wa, mda ata nthləmta ni, ka psəmta ni akwa u'u. #Mat 7:19 11I ana hara ala giri baptizma ka yimi kamnyar ncanta abbər giri ku tubi, amma mda aɗi na ata si aghəli na ku təramta ra ka dunar kuthlikur, natə ɓɗakkurərna aɗi mzhi wala kəi kəsi ɓaɓiyirni wa. Tsa ata hara ala giri baptizma ka Mambəl na Ɓɗakkarkara, ka u'u tsuwa. 12Tsa ka sur puha akwa tsiyari, antə tsa ata puhəɓəla su na ata laliyirni, ka tsa tsapta alkama arni akwa bi, amma tsa ata mbamta cwangcwangari ka u'u na amtə wa.”
Yahwana Ku Hara Baptizma Aka Yesu
(Mar 1:9-11; Luk 3:21-22)
13Sakanda antə Yesu thlata ahar Galili ka si adzə Yahwana akwa Jodan, kamnyar ka Yahwana hara alari baptizma. 14Amma Yahwana ku bara ngkatə ni, tə tsa pəla alari, “I na akwa bara ka ga an hara ali baptizma ni, antə ga an ata si adzə ra ya tsuwa?”
15Amma Yesu pəla alari, Zhari ka tsa ndzi apani, kamnyar apani antə mwa ata nghyaɓəla shanga ɓɗakkur tə Hyel akwa barari. Antə tsa ku kələngkər alari.
16Təkəma sakatə Yesu ku dlu baptizma, tə tsa səɓəla akwa yimi ni, antə vəi na amtazi ku kəlardzi, tə tsa wutə Mambələr Hyel səghəi apa bukəl ka pwa ata kərari. 17Antə kuraku laga ku thlata amtazi akwa pəla, “Ngəni an Ɓzərna natə hira! I akwa nggatə msərakurərni ka duna.” #Mat 12:18; 17:5; Mar 1:11; Luk 9:35
Currently Selected:
Mathliyu 3: KNB
Highlight
Share
Copy
Want to have your highlights saved across all your devices? Sign up or sign in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.