ZEKHARIAH 11
11
Uktu Pha Ngawl Tei Siatnak
1Lebanon aw, na kongkate
hong inna,
na sidar thingkungte cu
mei in kang khawng tahen.
2Tupi a, cak thingte,
kapin au li un,
sidar thingkungte tu khawng
zo haw hi;
Thing manphate siatsuah tawk
khawng zo haw hi.
Bashan ngam a, khil thingte kapin
tau li poh un.
A cam zetmi tupi cu phuh pial
tawk zo hi!
3Ngam uktute thasia le
khawngai in
kap haw;
A sunloihnak haw bo zo hi.
Kiosa tei hawk lih cu
ngai ten un!
Jordan ngun mawk,
tupi sung a, innte cu
siatsuah khawng zo hi.
Tuucing Pa Nih
4 Topa ka Pathian in ka nelah, “Ngawh tuk laihmi tuute a cingtu pa i nundan khi cung un. 5A neitu ten tuu cu ngo li haw naven kuamah in dantat haw ma hi. Tuu cik zuak thahin, ‘Topa cu thangphatin um tahen! Hauzet zo hung ngei!’ Tuu neitute hei in, a tuu tei humah hehpihnak nei haw ma ti hi.”
6 Topa in, “Leihumah kuamah hehpihleh tukma toh ing. Keimah loli in, mi hempoh cu a uktu tei khut sungah than tum khawng tung. Mah uktu ten leipi cu siatsuah khawng haw tuk naven a thil tihtheihnak huham sung pen kuamah pan tuk mang,” ti hi.
7Tuu a leitute le a zuaktu ten a nadektu tukin keimah cu cial haw a, ngawh tuk laihmi tuute cingtu in cang ing. Thiangkhut pa nih la ing: pa khat cu “Hehpihnak,” tin samin, a dang pa khat cu “Pumkhat hihnak,” tin sam ing. Mahmi tuah tuuhon cu cing ing. 8Keimah a huatu tuucing pa thum humah ka thinsau thei ngawl toh hangin ha khat sungin, a pa thum haw hawlvawk ing. 9tuuhon lakah, “Nangmuh cingtu hi tukma toh ing. A thi tukte thi ta un,” tin ti ing. 10Mahten hehpihnak tihmi thiangkhut cu la in, Topa i miphun hempoh tuah a bawlmi thutiamnak cu siatsuah tukin ek tuah ing. 11Mah ni-in, thutiam bawlsa mi cu siatsuah hi zo hi. Tuu a leitu le a zuaktu ten zocik leng haw hi; ka thil bawlmi hi Topa i hilhmi hi tih cu thei haw hi. 12Amu nelah, “Na lung uh a kim tale ka thaman pia unna, na lung uh a kim ngawl vang poi ma poh ti ing.” ka thamanin ngun tangka sawm thum pia haw hi.#Mt 26:15;#Mt 27:9-10;
13 Topa in ka nelah, “Hi tangka cu Biakinn tangka ah koihin hi.” Mah hangin ngun tangka sawm thum, keimah i man tin a ngaihsut haw mi tangka sunglawizet cu la in, Biakinn tangka koihnakah koih ing. 14Mahceng ten a pa nihnak thiangkhut “Pumkhat hihnak”, tihmi cu ektuah leleu ing hi: Mah ni-in Judah le Israel pumkhat hihnak cu phiat ing.
15 Topa in ka nelah, “Tutum cu imah nemcuam ngawlmi tuucing pa i nuncakdan cungin hi. 16Ka tuuhon cingtu tukin tuucing pa khat koih naveng a thi kuanmi tuute hei bawm ngawlin le a paite hei zei ngawlin, a mei ma neite hei tuamlawm ngawlin a tang calam tuute hei an pia ma hi. A thaubelmi tuu i cik ei in, a ke tinte khawh sak laih hi. 17Mahtibang tuucingpa cu a lampi bingin, a bo hi toh hi. A tuute zamsan zo hi. A huham hempoh ngal ten siatsuah khawng haw tuk hi. A baan zawng tuk a, a taklam mit caw tuk hi.”
Currently Selected:
ZEKHARIAH 11: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.