ZEKHARIAH 12
12
Jerusalem Luatnak Tuk
1 Topa i nel pen Israel thu la cu hi bangin heng hi. Van a phalhtu Topa, leipi bawlin mihing nunnak a piatu Topa in, hi bangin hilh hi. 2Jerusalem cu khuat pa khat sung a ummi sabittui bangin bawl tung hi. A elkim um miphunte cu zu in haw tuk a, zukham misil bangin awn bawbuai haw tuk hi. Jerusalem a up haw ten Judah ngam khua dangte vang umcih khawng haw tuk hi. 3Mahnaven mah hun a hen ten Jerusalem cu a ngit zetmi suangtum bangin cang khawng haw tuk hi. Leihum miphun hempoh cu Jerusalem do tukin tang langkhat haw tuk hi. 4Mah hun ten a cipuhte thinsutik tung a, cipuh hum khungtu hempoh cu a lung haw amtik khawng tung hi. Judah mite cingkhawi tung, mahnaven a ngal tei cipuh mitcawtik khawng tung hi. 5Judah hinnamte cu Topa Cungnungbel Pathian in, Jerusalem a ummi, a mihing tei nelah ngilnak pia hi, tin pa khat le pa khat hilh un haw tuk hi.
6Mah hun ten Judah hinnamte cu hampa lak a, meikang bangin, ahimata vainim lo sung mei kang bangin bawl tung, a elkim miphun hempoh cu siatsuah khawng haw tuk hi. Jerusalem khua mite cu khua sungah himdamno in um haw tuk hi.
7David casuante le Jerusalem tei ngah tukmi minthannak cu Judah tei ngah tukmi sangin, a thupi saw ngawlnak tukin a masabelin Judah ngalkap tei nelah Topa keimah in nehnak pia tung hi. 8Mah hun ten Jerusalem a ummi cu Topa in panin, amu sung pen mi ngil ngawlbel cu David bangin ngil tuk hi. David casuan ten Topa i vancungmi bangin le amah Pathian bangin lampui haw tuk hi. 9Mah hun ten Jerusalem do a tumtu miphun hempoh cu keimah in siatsuah tung. 10David casuante le Jerusalem khua a midangte cu hehpihnak lungmu le thunget nuamnak lungmu tuah a lungmu haw dimtik tung hi. Mi a dawhhup sa mi cu zo lehin, a ca neihcalam haw thi in, a kah haw bangin kap haw tuk hi. A capa upabel haw thi in, lungleng khawngai tei umdan bangin um haw tuk hi.#Jn 19:37; Mang 1:7;#Mt 24:30; Mang 1:7; 11Mah hun ten Jerusalem khua sung a, kahnak cu Megiddo munlawn a, Hadad Rimmon#12:11 Hadad Rimmon hi Kanaan ngam le Siria ngamah anceh sawlbawk pathian hi tin um haw hi. ca in, a kahnak haw bangin nasezet tuk hi. 12-14Hi ngamsung innkua tekah amuhno thasia zetin um ten haw tuk hi. David casuan i innkuate, Nathan casuan i innkuate, Levi casuan i innkuate, Shimei casuan i innkuate le innkua dangte vang mahti bangin um haw tuk hi. Amu innkua tekah thasia zetin um haw tuk a, pano le numei cu mun dadangah kapin tau li haw tuk hi.
Currently Selected:
ZEKHARIAH 12: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.