ZEKHARIAH 10
10
Topa i Patnak Thutiam
1 Topa i nelah ha thak ten nguahzu tuk ngen un. Mi hempoh tei lo ngam hingtiktu, nguahtui le meingo a umtiktu cu Topa hi. 2Mihing ten milim le mipolte thudong haw naven a hilhmi haw cu phukthongin, zolthu ngeh poh hi. Mi khenkhat ten manglet bok haw naven zolthu tuah hawhpih haw hi; lungmu nemnak tuah a ot haw mi cu nemcuamnak imah nei ma hi. Mah hangin mipite cu a paimi tuu bangin vakvai haw hi. Puitu a neih haw ngawl hangin haksatnak tawk haw hi.#Mt 9:36; Mk 6:34;
3 Topa in, hi bangin ti hi. Ka mihingte a uktu ngamdang tei humah ka thinuk ing. Mah hangin dantat tung hi. Judah mite cu keima ta a hih haw hangin, Cungnungbel Topa keimah in cingkhawi tung. Amuh cu a ngil zetmi ka ngaldonak cipuh hi haw tuk hi. 4Amu sung pen mi uktute, mi puitute le ngal bawite suak haw tuk a, ka mihingte uk haw tuk hi. 5Lampi cinciak lakah a ngalte a tanpek litu ngalkapte bangin Judah cu nehtu hi haw tuk hi. Topa cu amu nelah a um hangin ngaldo haw tuk a, ngal tei cipuh ngalkapte vang neh haw tuk hi.
6Judah mite cu mi ngil zetin
bawl tung a;
Israel mite pan suak tung hi.
Amu humah
hehpihnak nei in,
amu khua le ngamah
pui kikleh khawng tung.
Ka lawl awng ngawlmi
miphun bangin
ngaisung tung hi.
Kei mah cu a Topa Pathian
ka hih hangin,
a thu ngetnak haw cu ngai tung hi.
7Israel mite cu ngalkap bangin
ngil zetin, sabittui in bangin
a lung haw nop tuk hi.
A casuan ten hi nehnak cu
cing leleng haw tuk a,
Topa i thil bawlmi
hangin a lung haw dam tuk hi.
8“Ka mihingte sam tung a,
munkhatah
cawm khawm tung hi.
Pan suakin, amasa bangin
mi tam zetin pungzaileh
haw tuk hi.
9Miphun dang tei lakah
lengkek zo haw naven
ngam khawlapi cawng pen
keimah cu thei haw tuk hi.
Amuh le a cate vang suakca in,
a khua le a ngam tekah
kikleh ten haw tuk hi.
10Izipt ngam le Assiria ngam pen
pui kiklehin,
amu ngam sungah
cennak tuk mun
bawlsak tung hi.
Gilead le Lebanon ngamah
cengtik tung a,
ngam buppi ah
mihing dim haw tuk hi.
11Haksatnak tuipi a kaltan haw ten
Topa keimah in
tuihualpi cu vat tung a,
Nail ngun thukpi cu
kang khawng tuk hi.
A pualthau zetmi
Assiria cu zakca zetin,
a ngil zetmi Izipt cu
a huham bo tuk hi.
12Ka mihingte ngil zetin bawl tung a;
keimah bia in,
ka thu zui haw tuk hi.”
Topa in hilh zo hi.
Currently Selected:
ZEKHARIAH 10: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.