လံာ်မးသဲ 5
5
တၢ်လူၢ်ဒီခိၣ်အတၢ်စံၣ်တဲၤတဲလီၤ
1ယ့ၣ်ၡူးထံၣ်ပှၤဂီၢ်မုၢ်တဖၣ်သတးဒီး လဲၤထီၣ်ဝဲဆူတၢ်လူၢ်ဒီခိၣ်ဒီးဆ့ၣ်နီၤဝဲလီၤ. 2အပျဲၢ်အဘီၣ်တဖၣ်ဟဲအိၣ်ဖှိၣ်လၢအဃၢၤဒီးအဝဲစးထီၣ်အတၢ်သိၣ် လီၤသီလီၤဒီးစံးဝဲ,
တၢ်ဘၣ်ဆိၣ်ဂ့ၤနီၢ်နီၢ်
(လူၤ. ၆:၂၀-၂၃)
3“ပှၤလၢအဖှီၣ်လၢသူၣ်လၢသးတဖၣ်န့ၣ်,
မ့ၢ်ပှၤလၢအဘၣ်ဆိၣ်ဂ့ၤနီၢ်နီၢ်လီၤ.
အဂ့ၢ်ဒ်အံၤ, မူခိၣ်အဘီအမုၢ်မ့ၢ်ပှၤသ့ၣ်တဖၣ်န့ၣ်
အတၢ်လီၤ.
4ပှၤလၢအသူၣ်အုးသးအုးတဖၣ်န့ၣ်,
မ့ၢ်ပှၤလၢအဘၣ်ဆိၣ်ဂ့ၤနီၢ်နီၢ်လီၤ.
အဂ့ၢ်ဒ်အံၤ, ကဘၣ်တၢ်မၤမုာ်ထီၣ်က့ၤအီၤ
လၢကစၢ်ယွၤလီၤ.
5ပှၤလၢအသးစူၤဒီးဆီၣ်လီၤအသးတဖၣ်န့ၣ်,
မ့ၢ်ပှၤလၢအဘၣ်ဆိၣ်ဂ့ၤနီၢ်နီၢ်လီၤ.
အဂ့ၢ်ဒ်အံၤ, အဝဲသ့ၣ်ကဒိးန့ၢ်ဘၣ်တၢ်လၢ
ကစၢ်ယွၤစံးပာ်လၢကဟ့ၣ်ဝဲခဲလၢာ်လီၤ.
6ပှၤလၢအတၢ်ဆၢမိၣ်န့ၢ်သးလီတၢ်အဒိၣ်ကတၢၢ်
မ့ၢ်တၢ်တီတၢ်လိၤန့ၣ်,
မ့ၢ်ပှၤလၢအဘၣ်ဆိၣ်ဂ့ၤနီၢ်နီၢ်လီၤ.
အဂ့ၢ်ဒ်အံၤ, ကစၢ်ယွၤကမၤလၢပှဲၤအတၢ်မိၣ်န့ၢ်
သးလီအံၤလၢလၢပှဲၤပှဲၤလီၤ.
7ပှၤလၢအသူၣ်ကညီၤသးကညီၤပှၤဂၤန့ၣ်,
မ့ၢ်ပှၤလၢအဘၣ်ဆိၣ်ဂ့ၤနီၢ်နီၢ်လီၤ.
အဂ့ၢ်ဒ်အံၤ, အဝဲသ့ၣ်
ကဘၣ်တၢ်သးကညီၤအီၤလၢကစၢ်ယွၤလီၤ.
8ပှၤလၢအသးကဆှီတဖၣ်န့ၣ်,
မ့ၢ်ပှၤတဖၣ်လၢအဘၣ်ဆိၣ်ဂ့ၤနီၢ်နီၢ်လီၤ.
အဂ့ၢ်ဒ်အံၤ, အဝဲသ့ၣ်ကထံၣ်ဘၣ်ကစၢ်ယွၤလီၤ.
9ပှၤလၢအမၤဃူမၤဖိးတၢ်တဖၣ်န့ၣ်,
မ့ၢ်ပှၤလၢအဘၣ်ဆိၣ်ဂ့ၤနီၢ်နီၢ်လီၤ.
အဂ့ၢ်ဒ်အံၤ, ပှၤတဖၣ်န့ၣ်
ကစၢ်ယွၤကကိးအီၤလၢအဖိတဖၣ်လီၤ.
10ပှၤလၢအဘၣ်တၢ်မၤအၢမၤနးအီၤလၢ
တၢ်တီတၢ်လိၤအဃိတဖၣ်န့ၣ်,
မ့ၢ်ပှၤလၢအဘၣ်ဆိၣ်ဂ့ၤနီၢ်နီၢ်လီၤ.
အဂ့ၢ်ဒ်အံၤ, မူခိၣ်အဘီအမုၢ်မ့ၢ်
ပှၤတဖၣ်န့ၣ်အတၢ်လီၤ.
11တဘျီလၢ်လၢ်ဖဲပှၤကတိၤဒုၣ်ဒွဲၣ်သု, မၤအၢမၤနးသု, ဒီးစံးအၢစံးသီသုကဘျံးကဘျၣ်လၢသုမ့ၢ်ယပျဲၢ်ယဘီၣ်အဃိ န့ၣ်, သုမ့ၢ်ပှၤလၢအဘၣ်ဆိၣ်ဂ့ၤနီၢ်နီၢ်လီၤ. 12သူၣ်ခုသးခုဒီး သူၣ်ဖှံသးညီတက့ၢ်. အဂ့ၢ်ဒ်အံၤ, ယွၤကတီၤပာ်စၢၤတၢ်အဘူးအလဲအဒိၣ်အမုၢ်လၢမူခိၣ်လၢသုဂီၢ်လီၤ. ဝံလၢညါသ့ၣ်တဖၣ်စ့ၢ်ကီးဘၣ်တၢ်မၤအၢမၤနးတ့ၢ်အီၤဒ်န့ၣ် အသိးလီၤ.
အံသၣ်ဒီးတၢ်ကပီၤ
(မၢ်. ၉:၅၀; လူၤ. ၁၄:၃၄-၃၅)
13သုဝဲသ့ၣ်အံၤ သုမ့ၢ်ဒ်အံသၣ်အသိးလၢပှၤဟီၣ်ခိၣ်ဖိခဲလၢာ်အဂီၢ်လီၤ. ဘၣ်ဆၣ်ဒီး အံသၣ်မ့ၢ်တဟီလၢၤဘၣ်ဒီးတၢ်မၤဟီထီၣ်က့ၤအီၤတသ့ဘၣ်. အဘျုးတအိၣ်လၢၤဘၣ်ဒီးဂ့ၤဒၣ်ထဲလၢကဘၣ်တၢ်စူးကွံာ် အီၤလၢကျဲခိၣ်ကျဲလိၤဒီးဘၣ်တၢ်ယီၢ်အီၤခါအီၤအဂီၢ်လီၤ.
14သုဝဲသ့ၣ်အံၤသုမ့ၢ်ဒ်တၢ်ကပီၤအသိးလၢပှၤဟီၣ်ခိၣ်ဖိခဲလၢာ် အဂီၢ်လီၤ. ဝ့ၢ်တဝ့ၢ်လၢအဘၣ်တၢ်သူၣ်ထီၣ်အီၤလၢတၢ်လူၢ်ဒီခိၣ်န့ၣ်အိၣ် သဒၢတသ့ဘၣ်. 15ပှၤဒွဲၣ်ထီၣ်မ့ၣ်အူဒၢဒီးပာ်အီၤလၢနာ်အဖီလာ်န့ၣ်တအိၣ်ဘၣ် နီတဂၤဘၣ်. မ့မ့ၢ်ပာ်ဝဲလၢမ့ၣ်အူဒၢအလီၢ်အဖီခိၣ်ဒီးမ့ၣ်အူန့ၣ်ဟ့ၣ်ထီၣ်တၢ် ကပီၤလၢပှၤအိၣ်လၢဟံၣ်ပူၤခဲလၢာ်အဂီၢ်လီၤ. 16ဒ်မ့ၣ်အူလၢမ့ၣ်အူဒၢအလီၢ်အဖီခိၣ်အသိးန့ၣ်, ဟ့ၣ်ထီၣ်သုတၢ်ကပီၤလၢပှၤကိးဂၤဒဲးအမဲာ်ညါဒ်သိးအဝဲသ့ၣ် ကထံၣ်ဘၣ်သုတၢ်မၤအဂ့ၤတဖၣ်, ဒီးကစံးထီၣ်ပတြၢၤသုပၢ်အိၣ်လၢမူခိၣ်န့ၣ်တက့ၢ်.
တၢ်သိၣ်လီၤသီလီၤ ဘၣ်ထွဲဒီးတၢ်သိၣ်တၢ်သီ
17တဘၣ်ဆိကမိၣ်သုဝဲလၢယဟဲဒ်သိးယကမၤဟးဂီၤကွံာ်စီၤမိၤၡ့ အတၢ်သိၣ်တၢ်သီဒီးဝံတဖၣ်အတၢ်သိၣ်လီၤသီလီၤန့ၣ်တဂ့ၤ. ယဟဲတမ့ၢ်ဘၣ်လၢယကမၤဟးဂီၤကွံာ်တၢ်န့ၣ်တဖၣ်အဂီၢ်ဘၣ်. မ့ၢ်ဒ်သိးယကမၤလၢထီၣ်ပှဲၤထီၣ်အီၤအဂီၢ်တခီန့ၣ်လီၤ. 18ယစံးဘၣ်တဲဘၣ်သုတၢ်မ့ၢ်တၢ်တီအံၤလီၤ. တချုးဒံးဘၣ်လၢမူခိၣ်ဒီးဟီၣ်ခိၣ် အစိၤကတၢၢ်ဝဲဒီးတၢ်သိၣ်တၢ်သီခဲလၢာ်လၢထီၣ်ပှဲၤထီၣ်ဝဲန့ၣ်, လံာ်တၢ်သိၣ်တၢ်သီအလံာ်မဲာ်ဖျၢၣ်အဆံးကတၢၢ်ဖိတဖျၢၣ်, အနၢၣ်ဖိတနၢၣ်ဒၣ်လဲာ်တဘၣ်တၢ်မၤဟးဂီၤအီၤဘၣ်. 19လၢတၢ်န့ၣ်အဃိ, ပှၤတဂၤလၢ်လၢ်လၢအလုၣ်သ့ၣ်ခါပတာ်တၢ်မၤလိာ်အဆံးကတၢၢ်တဘီဒၣ် လဲာ်ဒီးသိၣ်လိပှၤဂၤဒ်သိးပှၤသုတပာ်ကဲတၢ်သိၣ်တၢ်သီတဂ့ၤန့ၣ်, ကမ့ၢ်မးပှၤအဆံးကတၢၢ်တဂၤလၢမူခိၣ်ဘီမုၢ်အပူၤလီၤ. ဘၣ်ဆၣ်ဒီးပှၤလၢအအိၣ်မူဒ်တၢ်သိၣ်တၢ်သီအသိးဒီးသိၣ်လိပှၤ ဂၤလၢကပာ်ကဲတၢ်သိၣ်တၢ်သီန့ၣ်, ကမ့ၢ်ပှၤလၢအဒိၣ်လၢမူခိၣ်ဘီမုၢ်အပူၤလီၤ. 20သုတၢ်တီတၢ်လိၤမ့ၢ်တဒိၣ်န့ၢ်အါန့ၢ်ပှၤသ့တၢ်ဘူၣ်တၢ်ဘါ အတၢ်သိၣ်တၢ်သီဒီးပှၤဖၤရံၤၡဲတဖၣ်အတၢ်တီတၢ်လိၤဘၣ်ဒီး, သုလဲၤနုာ်ဆူမူခိၣ်အဘီအမုၢ်အပူၤတသ့လ့ၤတက့ၤဘၣ်.
တၢ်သိၣ်လီၤသီလီၤဘၣ်ထွဲဒီး တၢ်သူၣ်ဒိၣ်သးဖျိး
21သုသ့ၣ်ညါသုဝဲလၢပှၤယူဒၤဖိလၢပျၢၤတဖၣ်ဘၣ်တၢ်စံးပာ်တ့ၢ် အီၤ, ‘မၤသံပှၤကညီတဂ့ၤ. ဒီးပှၤတဂၤလၢ်လၢ်လၢအမၤသံပှၤကညီန့ၣ် ကဘၣ်တၢ်သမံသမိးအီၤလၢစံၣ်ညီၣ်ကွီၢ်လီၤ.’ 22မ့မ့ၢ်ခဲအံၤယစံးဘၣ်သုလၢပှၤတဂၤလၢ်လၢ်လၢအသူၣ်ဒိၣ်သး ဖျိးအဒီပုၢ်ဝဲၢ်ပှၤစူၢ်က့ၤနာ်က့ၤတၢ်န့ၣ်, ကဘၣ်တၢ်ဆှၢထီၣ်အီၤလၢစံၣ်ညီၣ်ကွီၢ်အတၢ်သမံသမိးအဂီၢ်, ဒီးပှၤတဂၤလၢ်လၢ်လၢအကတိၤဒုၣ်ဒွဲၣ်အဒီပုၢ်ဝဲၢ်ပှၤစူၢ်က့ၤ နာ်က့ၤတၢ်န့ၣ်, ကဘၣ်တၢ်ဆှၢထီၣ်အီၤဆူပှၤယူဒၤဖိအပှၤဒိၣ်ပှၤပှၢ်တဖၣ်အကီၣ် ကးလီၤ. ပှၤတဂၤလၢ်လၢ်လၢအကိးအဒီပုၢ်ဝဲၢ်ပှၤစူၢ်က့ၤနာ်က့ၤတၢ်လၢ ပှၤဟးဂီၤဖိန့ၣ်, ဂ့ၤဘၣ်တၢ်ဆှၢအီၤဆူလရာ်မ့ၣ်အူအပူၤလီၤ. 23လၢတၢ်န့ၣ်အဃိ, တုၤနကလုၢ်ထီၣ်တၢ်လၢကစၢ်ယွၤလၢတၢ်လုၢ်လီၢ် ဒီးသ့ၣ်နီၣ်ထီၣ်က့ၤလၢနဒီပုၢ်ဝဲၢ်တဂၤပာ်တၢ်ကမၣ်လၢနလိၤတမံၤ မံၤဒီး, 24ပာ်တ့ၢ်နတၢ်လုၢ်ဖဲတၢ်လုၢ်လီၢ်န့ၣ်ဒီးလဲၤမၤဘၣ်လိာ်က့ၤနသးဒီး အီၤလၢအဆိဝံၤအလီၢ်ခံဟဲက့ၤဒီးလုၢ်ထီၣ်နတၢ်လုၢ်န့ၣ်ဆူကစၢ်ယွၤ အအိၣ်တက့ၢ်.
25ပှၤတဂၤဂၤမ့ၢ်လိာ်ကွီၢ်နၤဒီးမၤဘၣ်လိာ်က့ၤနသးဒီးအီၤဖဲ တၢ်ဆၢကတီၢ်အိၣ်ဒံး, တချုးနလဲၤဘၣ်ဆူကွီၢ်ဘျီၣ်ပူၤန့ၣ်တက့ၢ်. နမ့ၢ်တုၤဆူကွီၢ်ဘျီၣ်ပူၤဒီးအဝဲကဟ့ၣ်လီၤနၤဆူပှၤစံၣ်ညီၣ်ကွီၢ်အစုပူၤ, ဒီးပှၤစံၣ်ညီၣ်ကွီၢ်ကဟ့ၣ်လီၤနၤဆူပှၤပၢၤကီၢ်အစုပူၤ, ဒီးနကဘၣ်တၢ်ဆှၢနၤဆူဃိာ်ပူၤန့ၣ်လီၤ. 26တုၤနလီၤလံလၢဃိာ်ပူၤဒီး, တချုးလၢနလိးတူာ်ကွံာ်တိၢ်တုၤလၢအကတၢၢ်တဘ့ၣ်ဒံးဘၣ်န့ၣ်, နတဟးထီၣ်ဘၣ်လၢဃိာ်ပူၤဘၣ်.
တၢ်သိၣ်လီၤသီလီၤဘၣ်ထွဲဒီး တၢ်အဲၣ်ဘၢမါအဲၣ်ဘၢဝၤ
27သုနၢ်ဟူတ့ၢ်တၢ်စံးဝဲ, ‘အဲၣ်ဘၢမါအဲၣ်ဘၢဝၤတဂ့ၤ.’
28ဘၣ်ဆၣ်ဒီးအခဲအံၤယစံးဘၣ်သုလၢပှၤတဂၤဂၤလၢ အကွၢ်ပိာ်မုၣ်အိၣ်ဒီးတၢ်သးကတၢန့ၣ်, အဲၣ်ဘၢတ့ၢ်လံတၢ်လၢအသးကံၢ်ပူၤလံ. 29နမဲာ်ချံအထွဲတခီမ့ၢ်ဒုးလီၤဃံၤနၤလၢတၢ်ဒဲးဘးအပူၤဒီး ခွဲးထုးထီၣ်အီၤဒီးစူးကွံာ်အီၤတက့ၢ်. နက့ၢ်နဂီၤတမံၤမံၤမ့ၢ်တအိၣ်လၢၤဘၣ်ဒီးနၤန့ၣ်, ဂ့ၤဒိၣ်န့ၢ်ဒံးနနီၢ်ကစၢ်ဒီဂၤညါဘၣ်တၢ်တ့ၢ်လီၤကွံာ်အီၤဆူ လရာ်အပူၤတက့ၢ်လီၤ. 30နစုအထွဲတခီမ့ၢ်ဒုးမၤနၤတၢ်ဒဲးဘးဒီးဒီၣ်တဲာ်ကွံာ်အီၤဒီးစူးကွံာ်အီၤ တက့ၢ်. နက့ၢ်နဂီၤတမံၤမံၤမ့ၢ်တအိၣ်လၢၤဘၣ်န့ၣ်, ဂ့ၤဒိၣ်န့ၢ်ဒံးနနီၢ်ကစၢ်ဒီဂၤညါလီၤဘၣ်လၢလရာ်အပူၤတက့ၢ် လီၤ.
တၢ်သိၣ်လီၤသီလီၤဘၣ်ထွဲဒီးတၢ်ပာ်မၢ်မါ
(မး. ၁၉:၉; မၢ်. ၁၀:၁၁-၁၂; လူၤ. ၁၆:၁၈)
31တၢ်စံးစ့ၢ်ကီးဝဲလၢပှၤတဂၤလၢ်လၢ်လၢအပာ်မၢ်ကွံာ်အမါန့ၣ်, မ်အကဟ့ၣ်ထွဲစ့ၢ်ကီးအီၤလၢလံာ်လီၤဖှၣ်တဘ့ၣ်တက့ၢ်. 32ဘၣ်ဆၣ်ဒီးယစံးဘၣ်သုဒ်အံၤ, မ့တမ့ၢ်ဘၣ်လၢပိာ်မုၣ်န့ၣ်အဲၣ်ဘၢ အဝၤဘၣ်ဒီး, ပိာ်ခွါလၢအပာ်မၢ်အီၤန့ၣ်မၤကမၣ်အီၤဒီးမၢအီၤလၢ ကအဲၣ်ဘၢအဝၤန့ၣ်လီၤ. ဒီးပှၤတဂၤလၢ်လၢ်လၢအဟံးန့ၢ်ပိာ်မုၣ်လၢအဘၣ်တၢ်ပာ်မၢ်ကွံာ် အီၤန့ၣ်, မ့ၢ်ပှၤလၢအမၤကမၣ်ပှၤအမါန့ၣ်လီၤ.
တၢ်သိၣ်လီၤသီလီၤဘၣ်ထွဲဒီး တၢ်ဆိၣ်လီၤပသး
33လၢအပူၤကွံာ်န့ၣ်, သုနၢ်ဟူစ့ၢ်ကီးတၢ်စံးဘၣ်ပှၤ, ‘မၤဟးဂီၤနတၢ်အၢၣ်လီၤတဂ့ၤ. မၤလၢထီၣ်ပှဲၤထီၣ်တၢ်လၢနဆိၣ်လီၤနသးလၢယွၤလၢနကမၤ န့ၣ်တက့ၢ်.’ 34ဘၣ်ဆၣ်ဒီးယစံးဘၣ်သုအခဲအံၤ, ဖဲနမၤတၢ်အၢၣ်လီၤအီလီၤ တမံၤမံၤန့ၣ်တဘၣ်ဆိၣ်လီၤနသးတဂ့ၤ. ဆိၣ်လီၤနသးခီဖျိမူခိၣ်တဂ့ၤ. အဂ့ၢ်ဒ်အံၤ, မူခိၣ်မ့ၢ်ကစၢ်ယွၤအလီၢ်ပစိာ်လီၤ. 35တဘၣ်ဆိၣ်လီၤစ့ၢ်ကီးနသးခီဖျိဟီၣ်ခိၣ်တဂ့ၤ. အဂ့ၢ်ဒ်အံၤ, ဟီၣ်ခိၣ်မ့ၢ်ယွၤအခီၣ်ယီၢ်အလီၢ်လီၤ. တဘၣ်ဆိၣ်လီၤစ့ၢ်ကီးနသးခီဖျိယရူၤၡလ့ၣ်တဂ့ၤ. အဂ့ၢ်ဒ်အံၤ, ယရူၤၡလ့ၣ်မ့ၢ်စီၤပၤဖးဒိၣ်အဝ့ၢ်လီၤ. 36တဘၣ်ဆိၣ်လီၤနသးခီဖျိနခိၣ်ဒၣ်နဲတဂ့ၤ. အဂ့ၢ်ဒ်အံၤ, နခိၣ်သူဖိတဘိဒၣ်လဲာ်နမၤဝါအီၤမၤသူအီၤတသ့ဘၣ်. 37တၢ်လၢနအၢၣ်လီၤအီလီၤအီၤမ်အကမ့ၢ်ဒၣ်ဝဲ, ‘မ့ၢ်’ မ့တမ့ၢ်ဘၣ်ဒီး ‘တမ့ၢ်ဘၣ်’ တက့ၢ်. အါန့ၢ်အန့ၣ်မ့ၢ်တၢ်ဟဲလၢတၢ်အၢတၢ်သီ တဂၤအအိၣ်လီၤ.
တၢ်သိၣ်လီၤသီလီၤဘၣ်ထွဲဒီးတၢ်မၤကၣ်တၢ်
(လူၤ. ၆:၂၉-၃၀)
38သုနၢ်ဟူတ့ၢ်လံလၢတၢ်စံးတ့ၢ်ဝဲ, ‘မဲာ်ချံတတိၣ်လၢမဲာ်ချံတတိၣ်အဂီၢ် ဒီးမဲတဘ့ၣ်လၢမဲတဘ့ၣ်အဂီၢ်လီၤ.’ 39ဘၣ်ဆၣ်ဒီးအခဲအံၤယစံးဘၣ်သု, လၢသုသုတမၤကၣ်ပှၤလၢအမၤအၢသုတဂၤတဂ့ၤ. ပှၤတဂၤဂၤမ့ၢ်ဒဲနမဲာ်လၢအထွဲတခီဒီးဃၣ်န့ၢ်အီၤလၢအစ့ၣ် တခီစ့ၢ်ကီးတက့ၢ်. 40ပှၤတဂၤဂၤမ့ၢ်လဲၤကိးနၤဆူပှၤစံၣ်ညီၣ်ကွီၢ်အအိၣ်ဒ်သိး ကန့ၢ်ဘၣ်နဆ့ကၤဖိဒီးဟ့ၣ်စ့ၢ်ကီးအီၤလၢနဆ့ကၤဖးထီတက့ၢ်. 41ပှၤမ့ၢ်မၢဆူၣ်နၤလၢနကစိာ်န့ၢ်အတၢ်ဝံတမံးလးကျဲဒီးလဲၤ ဒီးအီၤခံမံးလးတက့ၢ်. 42ပှၤတဂၤဂၤမ့ၢ်ဃ့တၢ်လၢနၤဒီးဟ့ၣ်အီၤတက့ၢ်. ဖဲပှၤတဂၤဂၤသးအိၣ်ဃ့လိၢ်တၢ်လၢနၤဒီးဟ့ၣ်လိၢ်အီၤတက့ၢ်.
တၢ်သိၣ်လီၤသီလီၤဘၣ်ထွဲဒီး တၢ်အဲၣ်ပဒုၣ်ပဒါ
(လူၤ. ၆:၂၇-၂၈,၃၂-၃၆)
43သုနၢ်ဟူတ့ၢ်လၢတၢ်စံးတ့ၢ်ဝဲ, ‘အဲၣ်နတံၤနသကိးတဖၣ် ဒီးသးဟ့နဒုၣ်နဒါတဖၣ်တက့ၢ်.’ 44ဘၣ်ဆၣ်ဒီး အခဲအံၤယစံးဘၣ်သု, အဲၣ်သုဒုၣ်သုဒါဒီးဃ့ထုကဖၣ် ယွၤလၢပှၤလၢအမၤနးမၤဖှီၣ်သုတဖၣ်အဂီၢ်တက့ၢ်. 45မၤတၢ်အံၤဒ်သိးဒီးသုကကဲထီၣ်သုပၢ်အိၣ်လၢမူခိၣ်အဖိတဖၣ် န့ၣ်တက့ၢ်. အဂ့ၢ်ဒ်အံၤ, အဝဲဒုးကပီၤထီၣ်အမုၢ်လၢပှၤအအၢဒီးပှၤအဂ့ၤတဖၣ်အဂီၢ်ဒီး ဒုးစူၤလီၤတၢ်လၢပှၤလၢအအိၣ်မူတီတီလိၤလိၤဒီးပှၤလၢ အအိၣ်မူတတီတလိၤဘၣ်တဖၣ်အဂီၢ်ဒ်သိးသိးလီၤ. 46သုမ့ၢ်အဲၣ်ဒၣ်ထဲပှၤလၢအအဲၣ်သုဒီး ကစၢ်ယွၤဟ့ၣ်ဘူးဟ့ၣ်လဲသုကသ့ဒ်လဲၣ်. ပှၤဃ့သွဲတဖၣ်ဒၣ်လဲာ်မၤဝဲဒ်န့ၣ်လီၤ. 47သုမ့ၢ်ကတိၤတၢ်ဒီးဆၢဂ့ၤဆၢဝါထဲသုဒီပုၢ်ဝဲၢ်ဒီးသုတၢ်မၤ တဖၣ်န့ၣ်တလီၤဆီဒီးပှၤဂၤဘၣ်. ပှၤတသ့ၣ်ညါယွၤတဖၣ်ဒၣ်လဲာ်မၤဝဲဒ်န့ၣ်လီၤ. 48လၢတၢ်န့ၣ်အဃိ, ဒ်သုပၢ်လၢမူခိၣ်လၢပှဲၤဝဲအသိးန့ၣ် လၢထီၣ်ပှဲၤထီၣ်သုဝဲဒ်န့ၣ်အသိးတက့ၢ်.
Currently Selected:
လံာ်မးသဲ 5: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.