လံာ်မးသဲ 6
6
တၢ်သိၣ်လီၤသီလီၤဘၣ်ထွဲဒီးတၢ်ဟ့ၣ်
သးကညီၤတၢ်
1လၢတၢ်မၤတၢ်ဘူၣ်တၢ်ဘါအမူအဒါလၢအလီၤဘၣ်သုအပူၤန့ၣ်, ပလီၢ်သုသးဒ်သိးသုသုတမၤအီၤလၢပှၤကညီကထံၣ်အီၤအဂီၢ် တဂ့ၤ. သုမ့ၢ်မၤအီၤလၢပှၤကညီကထံၣ်အီၤအဂီၢ်ဒီး, သုတဒိးန့ၢ်ဘၣ်တၢ်အဘူးအလဲလၢသုပၢ်အိၣ်လၢမူခိၣ်အအိၣ်နီ တမံၤဘၣ်.
2လၢတၢ်န့ၣ်အဃိ, ဖဲသုဟ့ၣ်သးကညီၤတၢ်န့ၣ်, တဘၣ်မၤအီၤဒ်သိးပှၤအါဂၤကထံၣ်သ့ၣ်ညါအဂီၢ်, ဒ်ပှၤပာ်မၤအသးတဖၣ်မၤဝဲလၢဘူၣ်ဘျီၣ်လၢအမ့ၢ်တၢ်ဘါလီၢ် အပူၤဒီးလၢကျဲအပူၤလၢပှၤကညီကစံးထီၣ်ပတြၢၤအီၤအဂီၢ် အသိးန့ၣ်တဂ့ၤ. နာ်ယၤတက့ၢ်. အဝဲသ့ၣ်ဒိးန့ၢ်လံတၢ်အဘူးအလဲလၢလၢပှဲၤပှဲၤလံ. 3မ့မ့ၢ်တုၤသုဟ့ၣ်သးကညီၤတၢ်ဒီးတၢ်လၢသုစုထွဲမၤန့ၣ် တဘၣ်ဒုးသ့ၣ်ညါသုစုစ့ၣ်တဂ့ၤ. 4တုၤနုၤတစုသုတၢ်ဟ့ၣ်သးကညီၤတၢ်ကစုဒုအံၤတဖျါဘၣ်လၢပှၤ ကညီအမဲာ်ညါဘၣ်ဒီးသုပၢ်လၢအထံၣ်သုတၢ်မၤကစုဒုန့ၣ်, ကဟ့ၣ်သုတၢ်အဘူးအလဲလီၤ.
တၢ်သိၣ်လီၤသီလီၤဘၣ်ထွဲဒီးတၢ်ထုကဖၣ်
(လူၤ. ၁၁:၂-၄)
5တဘျီလၢ်လၢ်ဖဲသုဃ့ထုကဖၣ်ယွၤန့ၣ်, တဘၣ်မၤသုသးဒ်ပှၤပာ်မၤအသးတဖၣ်မၤဝဲအသိးန့ၣ်တဂ့ၤ. အဝဲသ့ၣ်အဲၣ်ဒိးဂဲၤဆၢထၢၣ်ဒီးဘါထုကဖၣ်ယွၤလၢဘူၣ်ဘျီၣ် လၢအမ့ၢ်တၢ်ဘါလီၢ်အပူၤဒီးလၢကျဲသဂၢၢ်လိာ်သးအလီၢ်တဖၣ် ဒ်သိးပှၤကထံၣ်ဘၣ်အီၤကိးဂၤဒဲးအဂီၢ်လီၤ. နာ်ယၤတက့ၢ်. အဝဲသ့ၣ်ဒိးန့ၢ်လံတၢ်အဘူးအလဲလၢလၢပှဲၤပှဲၤလံ. 6ဘၣ်ဆၣ်တုၤသုဘါထုကဖၣ်ယွၤဒီး က့ၤနုာ်လၢသုဒၢးပူၤ, ကးတံာ်ဃာ်သုတြဲၤဒီးဘါထုကဖၣ်တၢ်ဆူသုပၢ်လၢပှၤတထံၣ်အီၤ တဂၤအအိၣ်ဒီးသုပၢ်လၢအထံၣ်တၢ်လၢတၢ်ကစုဒုအပူၤတဂၤန့ၣ်, ကဟ့ၣ်သုတၢ်အဘူးအလဲလီၤ.
7ဖဲသုဃ့ဘါထုကဖၣ်ယွၤန့ၣ်တဘၣ်စံးဝံၤစံးက့ၤတၢ်လၢအခီပညီ တအိၣ်ဘၣ်ဒ်ပှၤတသ့ၣ်ညါယွၤတဖၣ်မၤဝဲအသိးန့ၣ်တဂ့ၤ. အဂ့ၢ်ဒ်အံၤအဝဲသ့ၣ်ဆိကမိၣ်ဝဲလၢယွၤကနၢ်ဟူအီၤလၢအဃ့ဘါထုကဖၣ်တၢ်ထီထီအဃိန့ၣ်လီၤ. 8တဘၣ်ဘါထုကဖၣ်ယွၤဒ်အဝဲသ့ၣ်အသိးတဂ့ၤ. အဂ့ၢ်ဒ်အံၤ တချုးလၢသုဃ့ဒံးတၢ်ဘၣ်န့ၣ်, သုပၢ်သ့ၣ်ညါတၢ်လၢသုန့ၢ်ဘၣ်အလီၢ်အိၣ်တဖၣ်လီၤ. 9ဃ့ဘါထုကဖၣ်သုဝဲဒ်အံၤတက့ၢ်.
‘အိၣ်လၢမူခိၣ်ပပၢ်ဧၢ,
မ်နမံၤဘၣ်တၢ်ပာ်စီဆှံအီၤတက့ၢ်.
10နဘီနမုၢ်န့ၣ်မ်အဟဲတက့ၢ်.
မ်တၢ်ဘၣ်နသးန့ၣ်, ဘၣ်တၢ်မၤအီၤလၢဟီၣ်ခိၣ်ချၢ ဒ်အဘၣ်တၢ်မၤအီၤလၢမူခိၣ်အသိးန့ၣ်တက့ၢ်.
11တနံၤဘၣ်တနံၤအတၢ်အီၣ်လၢပဒိးန့ၢ်ဘၣ်အလီၢ်အိၣ်န့ၣ်, ဟ့ၣ်လီၤလၢ်ဘၣ်ပှၤတနံၤအံၤတက့ၢ်.
12ပျၢ်လၢ်ကွံာ်ဘၣ်တၢ်လၢပမၤကမၣ်ဘၣ်နၤ
ဒ်ပပျၢ်ကွံာ်တၢ်ကမၣ်လၢပှၤဂၤမၤဘၣ်ပှၤတဖၣ်အသိးန့ၣ်တက့ၢ်.
13သုတဒုးလဲၤနုာ်ပှၤဆူတၢ်လ့ပစီအပူၤတဂ့ၤ.
မ့မ့ၢ်ထုးထီၣ်ဖျဲးကွံာ်ပှၤလၢတၢ်အၢတၢ်သီအပူၤတက့ၢ်.
(အဂ့ၢ်ဒ်အံၤ, ဘီမုၢ်, တၢ်စိတၢ်ကမီၤဒီး
တၢ်လၤကပီၤန့ၣ်မ့ၢ်နတၢ်အစိၤစိၤအဃၣ်ဃၣ်လီၤ. အၤမ့ၣ်)’
14အဂ့ၢ်ဒ်အံၤ, သုမ့ၢ်ပျၢ်တၢ်ကမၣ်လၢပှၤဂၤမၤဘၣ်သုဒီး သုပၢ်အိၣ်လၢမူခိၣ်ကပျၢ်စ့ၢ်ကီးသုတၢ်ကမၣ်န့ၣ်လီၤ. 15ဘၣ်ဆၣ်သုမ့ၢ်တပျၢ်ပှၤဂၤအတၢ်ကမၣ်ဘၣ်ဒီးသုပၢ် တပျၢ်စ့ၢ်ကီးသုတၢ်ကမၣ်ဘၣ်.
တၢ်သိၣ်လီၤသီလီၤဘၣ်ထွဲဒီးတၢ်ဒုၣ်တၢ်အီၣ်
16တုၤသုဒုၣ်တၢ်အီၣ်တၢ်အီဒီး, တဘၣ်မၤအုၣ်သပှီၤသုမဲာ်သၣ်ဒ် ပှၤပာ်မၤအသးတဖၣ်မၤဝဲအသိးန့ၣ်တဂ့ၤ. အဝဲသ့ၣ်မၤအုၣ်သပှီၤအမဲာ်သၣ်ဒ်သိးပှၤကညီကထံၣ်သ့ၣ်ညါလၢ အဒုၣ်တၢ်အီၣ်အဂီၢ်လီၤ. နာ်ယၤတက့ၢ်. အဝဲသ့ၣ်ဒိးန့ၢ်လံတၢ်အဘူးအလဲလၢလၢပှဲၤပှဲၤလံ. 17တုၤသုဒုၣ်တၢ်အီၣ်ဒီးပျၢ်သုမဲာ်, ဖှူသုခိၣ်လၢသိဒီး ခွံသုခိၣ်, 18ဒ်သိးပှၤဂၤအသုတသ့ၣ်ညါလၢသုဒုၣ်တၢ်အီၣ်တဂ့ၤ, မ့မ့ၢ်ထဲသုပၢ်လၢပှၤတထံၣ်အီၤတဂၤဧိၤကထံၣ်ဒီးသ့ၣ်ညါဝဲ အဂီၢ်န့ၣ်တက့ၢ်. ဒီးသုပၢ်လၢအထံၣ်တၢ်လၢတၢ်ကစုဒုအပူၤတဂၤန့ၣ်, ကဟ့ၣ်သုတၢ်အဘူးအလဲလီၤ.
တၢ်ထူးတၢ်တီၤလၢမူခိၣ်
(လူၤ. ၁၂:၃၃-၃၄)
19တဘၣ်ပာ်ဖှိၣ်တၢ်ထူးတၢ်တီၤလၢသုဂီၢ်လၢဟီၣ်ခိၣ်ချၢ ဖဲတၢ်ဖိဃၢ်ဒီးထးဃံၣ်မၤဟးဂီၤတၢ်, ဒီးတၢ်ဘျၣ်ဘၢၣ်ဖျိတၢ်, ဒီးဟုၣ်န့ၢ်တၢ်အလီၢ်န့ၣ်တဂ့ၤ. 20မ့မ့ၢ်ပာ်ဖှိၣ်တၢ်ထူးတၢ်တီၤလၢသုဂီၢ်လၢမူခိၣ်, ဖဲတၢ်ဖိဃၢ်ဒီးထးဃံၣ် မၤဟးဂီၤတၢ်တသ့ဘၣ်ဒီးတၢ်ဘျၣ်ဘၢၣ်ဖျိတၢ်ဒီးဟုၣ်န့ၢ်တၢ်တသ့ ဘၣ်အလီၢ်န့ၣ်တက့ၢ်. 21အဂ့ၢ်ဒ်အံၤ ဖဲသုတၢ်ထူးတၢ်တီၤအိၣ်အလီၢ်န့ၣ်သုသးကအိၣ်ဝဲဖဲန့ၣ်စ့ၢ် ကီးလီၤ.
နီၢ်ခိအတၢ်ကပီၤ
(လူၤ. ၁၁:၃၄-၃၆)
22ပှၤကညီအမဲာ်ချံမၤသးဒ်မ့ၣ်အူဒၢတဖျၢၣ်လၢအနီၢ်ခိအဂီၢ် လီၤ. အမဲာ်ချံမ့ၢ်ဆးဒီးအနီၢ်ခိဒီဂၤညါကပှဲၤဒီးတၢ်ကပီၤလီၤ. 23ဘၣ်ဆၣ်ဒီးသုမဲာ်ချံမ့ၢ်ယုာ်ဒီးသုနီၢ်ဒီဂၤညါကပှဲၤဒီး တၢ်ခံးတၢ်နၤလီၤ. တၢ်ကပီၤလၢအအိၣ်လၢသုပူၤမ့မ့ၢ်တၢ်ခံးတၢ်နၤဒီး, တၢ်ခံးတၢ်နၤန့ၣ် ကနးဝဲဆံးဒိၣ်လဲၣ်.
ကစၢ်ယွၤဒီးကျိၣ်စ့
(လူၤ. ၁၆:၁၃; ၁၂:၂၂-၃၁)
24ပှၤမၤတၢ်အခ့အပှၤအတၢ်မၤလၢကစၢ်ခံဂၤအဂီၢ်တသ့နီတဂၤဘၣ်. ကအဲၣ်ဝဲတဂၤဒီးကသးဟ့ဝဲတဂၤလီၤ. ကတီဝဲဒီးကစၢ်တဂၤဒီးကကွၢ်တလီၤဝဲအတဂၤန့ၣ်လီၤ. သုမၤကစၢ်ယွၤအတၢ်မၤဒီးကျိၣ်စ့အတၢ်မၤခံမံၤလၢာ်တသ့ဘၣ်.
25လၢတၢ်န့ၣ်အဃိ ယစံးဘၣ်သု, သုတဘၣ်ယိၣ်တၢ်လၢတၢ်အီၣ်တၢ်အီလၢ သုသးသမူအဂီၢ်မ့ၢ်ဂ့ၤ, တၢ်ကူတၢ်သိးလၢသုနီၢ်ခိအဂီၢ်မ့ၢ်ဂ့ၤန့ၣ်တဂ့ၤ. နီၢ်နီၢ်တခီသးသမူန့ၣ်အကါဒိၣ်န့ၢ်တၢ်အီၣ်တၢ်အီဒီးနီၢ်ခိအကါဒိၣ်န့ၢ် တၢ်ကူတၢ်သိးတက့ၢ်တမ့ၢ်ဘၣ်ဧါ. 26ကွၢ်ထိၣ်ဖိလံာ်ဖိလၢတၢ်ဖးဖီတဖၣ်တက့ၢ်. အဝဲသ့ၣ်တဖှံတၢ်ချံဘၣ်. တကူးတၢ်ဘၣ်ဒီးတဂၢ်ဖှိၣ်တၢ်လၢသိၣ်ပူၤဖီပူၤဘၣ်. ဘၣ်ဆၣ်ဒီးသုပၢ်အိၣ်လၢမူခိၣ်အံးထွဲကွၢ်ထွဲလုၢ်အီၣ်လုၢ်အီအဝဲသ့ၣ်လီၤ. သုဝဲဒၣ်အံၤသုလုၢ်ဒိၣ်ပှ့ၤဒိၣ်အါန့ၢ်အဝဲသ့ၣ်တမ့ၢ်ဘၣ်ဧါ. 27မ့ၢ်မတၤလၢသုကျါလၢအဘၣ်ယိၣ်တၢ်အဃိထုးထီထီၣ်အနံၣ် အလါသ့တဂၤလဲၣ်.
28ဘၣ်မနုၤလၢသုဘၣ်ယိၣ်တၢ်လၢတၢ်ကူတၢ်သိးအဂီၢ်လဲၣ်. ဖီဒ့ၣ်ညါလၢတၢ်ပျီပူၤတဖၣ်မဲထီၣ်ဒိၣ်ထီၣ်ဒ်လဲၣ်ဒ်လဲၣ်န့ၣ်ကွၢ်ဆိ ကမိၣ်တက့ၢ်. အဝဲသ့ၣ်တမၤတၢ်ဘၣ်. တမၤကူမၤကၤစ့ၢ်ကီးဘၣ်. 29ဘၣ်ဆၣ်ဒီးယစံးဘၣ်သု, စီၤပၤၡလိၤမိၤလၢအအိၣ်ဒီးအကဟု ကညီၢ်အတၢ်ထူးတၢ်တီၤခဲလၢာ်န့ၣ်တကူတသိးဘၣ်ဂ့ၤထဲသိး ဒီးဖီဒ့ၣ်ညါဖိအံၤတဖိးဒၣ်လဲာ်ဘၣ်. 30ကစၢ်ယွၤမ့ၢ်ဒုးကူဒုးသိးနီၣ်ဧိၤမံၤဧိၤလၢအမူဝဲတနံၤ အံၤဒီးလၢခံတနံၤဘၣ်တၢ်ဆူးကဲၤကွံာ်အီၤလၢဖၣ်ကပူၤန့ၣ်ဒီး, ပှၤနာ်တၢ်စှၤသ့ၣ်ဧၢ, မ့ၢ်ယွၤအံၤတဒုးကူဒုးသိးသုအါန့ၢ်အဝဲသ့ၣ်ဘၣ်ဧါ.
31လၢတၢ်န့ၣ်အဃိ, တဘၣ်ဘၣ်ယိၣ်ဘၣ်ဘီတၢ်ဒီးစံး, ‘ပကအီၣ်ဘၣ်မနုၤလဲၣ်.’ ‘ပကအီဘၣ်မနုၤလဲၣ်.’ ‘ပကကူဘၣ်သိးဘၣ်မနုၤလဲၣ်.’ န့ၣ်တဂ့ၤ. 32(ပှၤလၢအတသ့ၣ်ညါယွၤတဖၣ်ဘၣ်ယိၣ်ဝဲလၢတၢ်တဖၣ်အံၤအဂ့ၢ်ထီဘိ လီၤ.) ဒီးလၢသုန့ၢ်ဘၣ်တၢ်တဖၣ်အံၤခဲလၢာ်အလီၢ်အိၣ်ဝဲန့ၣ်, သုပၢ်လၢမူခိၣ်သ့ၣ်ညါဝဲလီၤ. 33မ့မ့ၢ်ဃုဆိကစၢ်ယွၤအဘီအမုၢ်ဒီးအတၢ်တီတၢ်လိၤတက့ၢ်. ဒီးကစၢ်ယွၤကဟ့ၣ်လီၤသုလၢတၢ်တဖၣ်န့ၣ်ခဲလၢာ်လီၤ. 34မၤသးဒ်န့ၣ်ဒီး, ဘၣ်ယိၣ်တၢ်လၢခဲဂီၤအဂီၢ်တဂ့ၤ. အဂ့ၢ်ဒ်အံၤ, ခဲဂီၤကအိၣ်ဒီးအတၢ်ဘၣ်ယိၣ်ဘၣ်ဘီဒၣ်ဝဲလီၤ. အလီၢ်တအိၣ်လၢပကပာ်ဖှိၣ်အါထီၣ်မုၢ်တနံၤအတၢ်ကိၢ်တၢ်ဂီၤဘၣ်. မုၢ်တနံၤအတၢ်ကိၢ်တၢ်ဂီၤန့ၣ်အါလံလၢအဂီၢ်ဒၣ်ဝဲလံ.
Currently Selected:
လံာ်မးသဲ 6: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.