လံာ်မးသဲ 4
4
ယ့ၣ်ၡူးဘၣ်တၢ်လ့ပစီအီၤ
(မၢ်. ၁:၁၂-၁၃; လူၤ. ၄:၁-၁၃)
1တၢ်န့ၣ်ဝံၤအလီၢ်ခံယွၤအသးဆှၢယ့ၣ်ၡူးဆူပှၢ်မုၢ်ကနၢဒ်သိး အကဒိးဘၣ်တၢ်လ့ပစီအဂီၢ်လီၤ. 2အဝဲဒုၣ်တၢ်အီၣ်အနံၤလွံၢ်ဆံအနၤလွံၢ်ဆံဝံၤဒီးတၢ်သၣ်ဝံၤ အသးလီၤ. 3အန့ၣ်တဘျီမုၣ်ကီၤလံၢ်ဟဲဝဲဒီးစံးဘၣ်အီၤ, “နမ့မ့ၢ်ကစၢ်ယွၤအဖိခွါဒီးခါလီၤနကလုၢ်လၢလၢၢ်သ့ၣ်တဖၣ် အံၤကကဲထီၣ်လၢကိၣ်အလိၣ်တဖၣ်တက့ၢ်.”
4ဘၣ်ဆၣ်ဒီး ယ့ၣ်ၡူးစံးဆၢအီၤ, “တၢ်ကွဲးအသးစံးဝဲ, ‘ပှၤကညီတမူဝဲထဲလၢအအီၣ်ကိၣ်အဃိဧိၤဘၣ်. မ့မ့ၢ်မူဝဲလၢတၢ်အကလုၢ်ကထါလၢအထီၣ်ဖျဲးလၢကစၢ်ယွၤအထးခိၣ် ကိးထံၣ်ကိးဘီဒဲးလီၤ’ ” (သိၣ်သီ. ၈:၃).
5မုၣ်ကီၤလံၢ်ဆှၢကဒီးယ့ၣ်ၡူးဆူဝ့ၢ်စီဆှံလၢအမ့ၢ်ဝ့ၢ်ယရူၤၡ လ့ၣ်ဒီးဒုးဆၢထၢၣ်အီၤလၢတၢ်လုၢ်ဟံၣ်အခိၣ်စိၣ် 6ဒီးစံးဝဲဒၣ်, “နမ့မ့ၢ်ကစၢ်ယွၤအဖိခွါန့ၣ်တ့ၢ်လီၤနသးတက့ၢ်. အဂ့ၢ်ဒ်အံၤ တၢ်ကွဲးအသးစံးဝဲ,
‘ကစၢ်ယွၤကမၤလိာ်အကလူးတဖၣ်လၢ
ကသူၣ်ဒဲဝးတရံးနၤ
ဒီးလၢအကစိာ်ထီၣ်နၤလၢအစုလိၤ,
ဒ်သိးနခီၣ်ဒၣ်လဲာ်အသုတဘၣ်တိၢ်ဘၣ်ထံးဒီးလၢၢ်တဖၣ်တဂ့ၤ န့ၣ်လီၤ’ ” (စံး. ၉၁:၁၁-၁၂).
7ယ့ၣ်ၡူးကတိၤဆၢအီၤ, “တၢ်ကွဲးအသးစံးစ့ၢ်ကီးဝဲ, ‘သုတလ့ပစီယွၤနကစၢ်ယွၤတဂ့ၤ’ ” (သိၣ်သီ. ၆:၁၆).
8အန့ၣ်ဝံၤဒီး မုၣ်ကီၤလံၢ်ဆှၢထီၣ်ယ့ၣ်ၡူးဆူကစၢၢ်လၢအထီမးတဖျၢၣ် အလိၤဒီးဒုးနဲၣ်အီၤလၢဟီၣ်ခိၣ်အဘီမုၢ်တဖၣ်ဃုာ်ဒီးအလၤကပီၤခဲ လၢာ်လီၤ. 9ဒီးမုၣ်ကီၤလံၢ်စံးဘၣ်အီၤ, “နမ့ၢ်တီၤလီၤကဒွံကျိာ်လၢယမဲာ်ညါဒီးဘါထီၣ်ယၤန့ၣ်ယကဟ့ၣ် နၤလၢတၢ်သ့ၣ်တဖၣ်အံၤခဲလၢာ်လီၤ.”
10တုၤနုၤတစုယ့ၣ်ၡူးစံးဆၢအီၤ, “ဟးဖးဒီးယၤတက့ၢ်မုၣ်ကီၤလံၢ်ဧၢ, အဂ့ၢ်ဒ်အံၤ, တၢ်ကွဲးအသးစံးဝဲ, ‘နဘၣ်ဘူၣ်ထီၣ်ဘါထီၣ် ဒီးမၤထဲယွၤနကစၢ်ယွၤတဂၤဧိၤအတၢ်မၤလီၤ’ ” (သိၣ်သီ. ၆:၁၃).
11အန့ၣ်ဒီးမုၣ်ကီၤလံၢ်ဟးဖးဒီးယ့ၣ်ၡူးဒီးကလူးတဖၣ်ဟဲ ဒီးမၤတၢ်အခ့အပှၤအတၢ်မၤလၢအဂီၢ်လီၤ.
ယ့ၣ်ၡူးစးထီၣ်အတၢ်ဖံးတၢ်မၤ လၢကီၢ်ကၤလံၤလါ
(မၢ်. ၁:၁၄-၁၅; လူၤ. ၄:၁၄-၁၅)
12တုၤယ့ၣ်ၡူးနၢ်ဟူဝဲလၢစီၤယိၤဟၣ်ဘၣ်တၢ်ဖီၣ်အီၤဝံၤဒၢနုာ် အီၤလၢဃိာ်ပူၤလံဒီးအဝဲဒၣ်က့ၤဝဲဆူကီၢ်ကၤလံၤလါလီၤ. 13အဝဲတအိၣ်ဝဲဖဲဝ့ၢ်နစၤရ့းဘၣ်. မ့မ့ၢ်လဲၤအိၣ်ဝဲဆိးဝဲလၢဝ့ၢ်ကပ့းရနီၣ် လၢအသူၣ်လီၤအသးလၢပီၣ်လဲၣ်ကၤလံၤလါအနံၤလၢကီၢ်ဆၣ်စဘူလိၣ် ဒီးနးသၤလံအဃၢၤ, 14ဒ်သိးဒီးတၢ်လၢယွၤစံးတ့ၢ်ဝဲခီဖျိဝံယၡါယၤန့ၣ်ကလၢထီၣ် ပှဲၤထီၣ်အဂီၢ်လီၤ.
15“ကီၢ်ဆၣ်စဘူလိၣ်ဒီးကီၢ်ဆၣ်နးသၤလံ
လၢအအိၣ်သူၣ်လီၤအသးလၢကျဲလဲၤဆူပီၣ်လဲၣ်ကၤလံၤလါအ လိၤလၢထံကျိယၢ်ဒ့ၣ်ဝၢ်ဘးခီ,
လၢအမ့ၢ်ပှၤကလုာ်ဂၤတဖၣ်အကီၢ်ဧၢ,
16ပှၤတဖၣ်လၢအအိၣ်ဆိးလၢတၢ်ခံးကျါ
ထံၣ်ဘၣ်တၢ်ကပီၤဖးဒိၣ်လံ.
တၢ်ကပီၤထီၣ်လၢပှၤတဖၣ်လၢအအိၣ်ဝဲလၢ
တၢ်သံအကီၢ်အဂီၢ်လံ” (ၡါ. ၉:၁-၂).
17စးထီၣ်ဖဲန့ၣ်ယ့ၣ်ၡူးစံၣ်တဲၤတဲလီၤတၢ်ဒီးစံး, “ပီၢ်ယၢ်လီၤက့ၤဒီးဃၣ်လိၤက့ၤသုသးတက့ၢ်. အဂ့ၢ်ဒ်အံၤမူခိၣ်အဘီအမုၢ်ကသူၣ်လီၤအသးဘူးထီၣ်လံ.”
ယ့ၣ်ၡူးကိးန့ၢ်ပှၤမၤညၣ်ဖိလွံၢ်ဂၤ
(မၢ်. ၁:၁၆-၂၀; လူၤ. ၅:၁-၁၁)
18ယ့ၣ်ၡူးဟဲဝဲလၢပီၣ်လဲၣ်ကၤလံၤလါအနံၤဒီးထံၣ်န့ၢ်ပှၤမၤညၣ် ဖိဒီပုၢ်ဝဲၢ်ခံဂၤလၢအမ့ၢ်စီၤၡံမိၣ်လၢအဘၣ်တၢ်ကိးစ့ၢ်ကီးအီၤလၢ စီၤပ့းတရူးဒီးစီၤအၣ်ဒရ့း ဖဲအဝဲသ့ၣ်ကွံာ်လီၤစၤလၢပီၣ်လဲၣ်ပူၤ အခါန့ၣ်လီၤ. 19ဒီးယ့ၣ်ၡူးစံးဘၣ်အဝဲသ့ၣ်, “ဟဲဒီးကဲထီၣ်ယပျဲၢ်ယဘီၣ်တက့ၢ်. ယကသိၣ်လိသုဒ်သိးသုကမၤန့ၢ်ပှၤကညီလၢကကဲထီၣ်ယပျဲၢ်ယဘီၣ်ဒ် သုမၤန့ၢ်ညၣ်တဖၣ်အသိးလီၤ.” 20တဘျီဃီအဝဲသ့ၣ်ပာ်တ့ၢ်ကွံာ်အစၤတဖၣ်ဒီးပိာ်ထီၣ်ယ့ၣ်ၡူးအခံ လီၤ.
21လဲၤကဒီးဆူညါဒီးယ့ၣ်ၡူးထံၣ်န့ၢ်ဝဲပှၤဒီပုၢ်ဝဲၢ်အဂၤခံဂၤ, စီၤယၤကိာ်ဒီးစီၤယိၤဟၣ်လၢအမ့ၢ်စီၤစ့းဘ့းဒဲအဖိခွါတဖၣ် လီၤ. အဝဲသ့ၣ်အိၣ်လၢချံပူၤဃုာ်ဒီးအပၢ်ဒီးကတဲာ်ကတီၤဆးက့ၤ အစၤတဖၣ်လီၤ. ယ့ၣ်ၡူးကိးအဝဲသ့ၣ်, 22ဒီးတဘျီဃီအဝဲသ့ၣ်ပာ်တ့ၢ်အချံဒီးအပၢ်ဝံၤပိာ်ထီၣ်အခံလီၤ.
ယ့ၣ်ၡူးသိၣ်လီၤသီလီၤတၢ်, စံၣ်တဲၤတဲလီၤတၢ်ဒီး မၤဘျါက့ၤပှၤဆူးပှၤဆါ
(လူၤ. ၆:၁၇-၁၉)
23ယ့ၣ်ၡူးဟးဝ့ၤဝီၤသကုၤကီၢ်ကၤလံၤလါ, သိၣ်လီၤသီလီၤတၢ်လၢဘူၣ်ဘျီၣ် လၢအမ့ၢ်တၢ်ဘါလီၢ်တဖၣ်အပူၤ, စံၣ်တဲၤတဲလီၤတၢ်သးခုကစီၣ်ဘၣ်ဃးယွၤအဘီအမုၢ် ဒီးမၤဘျါက့ၤပှၤဘၣ်ဆူးဘၣ်ဆါလၢကယဲၢ်မ့ၢ်တၢ်ဆူးတၢ် ဆါခဲလၢာ်လီၤ. 24ယ့ၣ်ၡူးအကစီၣ်ဟူထီၣ်သါလီၤလၢကီၢ်ဒီဘ့ၣ်ညါပၢၢ်တုၤလၢကီၢ် စူၤရံဒီးပှၤဟဲကိးန့ၢ်အီၤလၢပှၤဆူးပှၤဆါလၢအတူၢ်ဘၣ်တၢ်ဆူး တၢ်ဆါအကလုာ်ကလုာ်လၢအတူၢ်ဘၣ်တၢ်နးနးကျံၤကျံၤတဖၣ်, ဒ်ပှၤလၢတၢ်နါဒိးအီၤ, ပှၤလၢအပျုၢ်ထိးတဖၣ်ဒီးပှၤသံတခီပၤတဖၣ်, ဒီးယ့ၣ်ၡူးမၤဘျါက့ၤအဝဲသ့ၣ်ခဲလၢာ်လီၤ. 25ပှၤဂီၢ်မုၢ်ဖးဒိၣ်လၢကီၢ်ကၤလံၤလါ, လၢဝ့ၢ်ဆံဆဲၣ်ဝ့ၢ်အတၢ်ပၢ, လၢဝ့ၢ်ယရူၤၡလ့ၣ်, လၢကီၢ်ယူဒၤဒီးယၢ်ဒ့ၣ်ကျိအမုၢ်ထီၣ်, ပိာ်ထီၣ်ယ့ၣ်ၡူးအခံလီၤ.
Currently Selected:
လံာ်မးသဲ 4: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.