ATÜTSAR 27
27
Isaac nüh Tsia Jacob Kütsü
1Isaac tü khruo nü ma notha müngu nüh küphrühküm vü ma tsa kükhruowa Esau ji nü ma vü, “Eh tsa,” ti ji, thinü ma nüh, “Hitü hala pehveh,” ti küza. 2Jüti küsa vü Isaac nüh Esau vü, “Halie, hi tü khruomthuoh; hi tü eh küsü rülo müthsü. 3Jükenüh noh senyuseviri vi luo, noh shüchuku thi noh lawih viluo, ti sanü reza vü wa nü eh kenüh müsü sa viru hi tsüluo, 4Thi hi nüh kümngu kümjie vünüh shu nü viru hi küütsanü hi müjie küsü atüvü nüh hi nüh tsia noh küütsüluo,” ti küza. 5Jüti Isaac nüh Esau vü küza küveh vü Rebekah tü künapehveh. Jüti küsa vü Esau tü asa küzhu nü viru na küsakenüh reza vü tewa, 6Thinü Rebekah nüh ma tsa Jacob vü, “Noh pa nüh noh jie Esau vü küüza, 7‘Hi müjie küsü tüvü Vüwa atüvü nüh tsia noh tsü na küsakenüh noh wa nü asa küzhu nü shuküüngu nü hi küütsaluo,’ ta küzaveh! 8Tinü eh tsa hi nüh noh vü mowa küza naveh ünüh eh zhü künaluo. 9Nyihzhüza vü wa nü nyihzhüzah atsa künyi küruoru luo, noh pa külotsatsa vünüh hi nüh shuküüngu nü ma tsü naveh ünüh; 10Jüti sanü noh nüh viwa ma kütsanü ma müjie küsü atüvünüh tsia noh küütsü naveh ünüh,” ti küza. 11Thitü Jacob nüh ma zah Rebekah vü, “Halie, eh jie Esau thuoüji ma satsa vü aküneh küshori, thitü hi thuoüji jüütanyu nüh asatsa rünyim. 12Tinü eh pa nüh hi thsütewa naveh, jüta sanü hi tü ma müraküveh kümjie sam naveh, thi hi tü kütsia küngu nyunü hi mpa hi vü küümzü samü naveh nüh,” ti küza. 13Thitü ma zah nüh ma vü, “Noh kümzüwa tü hi vü küürumluo,” ti rületsü. 14Thinü Jacob tü wa nü nyihzhüzah künyi küruo nü viru mazah tsü nü ma pa külotsatsa vünüh shuküüngu ke. 15Jüti sanü Rebekah nüh ma tsa kükhruowa Esau kruzhu kümhietsawa azheh lovü ma kütuoh vü küpehwa vi nü ma tsa kürünguowa Jacob küüzhu; 16Thi nyihzhüzah sahu vi ma pievü thi ma ke asakürünyi künehmüküshope vü thsetü; 17Jüti sanü ma nüh asa shuküngu küsawa thi lohse vi nü ma tsa Jacob ke vü tsü.
18Jüti sanü ma tü ma pa vü tu nü, “Eh pa,” ti ji, thinü ma pa nüh, “Hi hala pehveh; noh thawa lo, eh tsa?” ti küna. 19Thinü Jacob nüh ma pa vü, “Hi tü Esau noh tsa küwuokhuwa. Noh nüh mokümjie hi vü küza nüh jükümjie vünüh müsü sa vitsethuoh, tinü sühra shupeh nü hi nüh küzhuküru asa tsanü tsia hi tsüluo,” ti küza. 20Thinü Isaac nüh ma tsa vü, “Mota hakümjie kümto nguralo?” ti küna. Jüti küüna vü Jacob nüh ma vü, “KüpakenühnyunüVüwa noh Saküüwuowa nüh küsara vünüh satsü lie,” ti rületsü. 21Thinü Isaac nüh Jacob vü, “Noh tü eh tsa Esau tsa ünü nyunüh thsütoh na küsa kenüh hi vü shehnyi raluo, eh tsa,” ti küza. 22Jüti küüza vü Jacob tü ma pa Isaac vü shehnyi wa ünü ma pa nüh ma pa vü, “Ajikhi nü Jacob jikhi kümjie wiethuoh, thitü ma ke künyi thuoüji Esau ake wiethuoh,” ti sa. 23Jükenüh ma pa tü ma müthsü tohra nüh sam, küpakenühnyunü make künyi thuoüji ma jie Esau kümjie aküneh mpa, ti sanü tsia ma tsü. 24Ma pa nüh Jacob vü, “Noh tü eh tsa Esau tsa wiethuoh ülo?” ti küna. Thinü Jacob nüh, “Ah wiethuoh,” ti rületsü. 25Jüti rülekütsü vü Isaac nüh, “Vira hi tsüluo, thi hi tü eh tsa nüh münga küru tsanü tsia noh küütsüluo,” ti küza. Jüti sanü Jacob nüh asa viru ma tsü nü matü tsa; thi akhah nga viru nü ma tü zhu, ti sa. 26Jüti sanü ma pa Isaac nüh ma vü, “Eh kütuoh vü ra nü hi kümetsüluo, eh tsa,” ti küza. 27#Ebr 11.20. Jükenüh ma tü ma pa vü shehnyiwa, thinü ma pa nüh makü me, jüti küsa vü ma tü ma tsa kruzhu rhe kürhekera nü tsia ma tsü nü ma vü, “No eh tsa rhe tü Vüwa nüh tsiakütsü reza rhe wiethuoh! 28Saküüwuowa nüh tülü küzo vi noh kütsüwa saluo, azhih küthü vi ma kütsüwa saluo, thi luohshü thi akhah hozake vi noh kütsüwa saluo. 29#Atü 12.3.Nyiri nüh noh kütsü küsawa saluo, thi anyi kürhori tü noh tüvü küngie küruwa saluo. Noh jienüra nyiehvü avü saluo, thi noh zah atsari tü noh tüvü küngie küruwa saluo. Noh kümzüri vü kümzüwa waluo thi noh tsiakütsüri vü tsiatsüluo,” ti küza.
Isaac Kütsia Esau nüh Kükhuo
30Isaac nüh Jacob vü akütsiawa kütsüjum nü krüke nü ma tüvü nüh alievü kuoshuwa ünü ma jie Esau tü ma saküüzhu vünüh shele ru nü azheh lovü turu. 31Ma nga ashie küüngu shu nü ma pa Isaac vü viru nü ma pavü, “Eh pa tü sühra shuküüpeh nü ma tsa nüh asa müngaküruwa tsa, jüti sanü noh tü tsia hi tsüluo,” ti küza. 32Thinü ma pa nüh, “Noh tü thawa lo?” ti küna. Thinü Esau nüh ma vü, “Hi noh tsa küwuokhuwa Esau,” ti rületsü. 33Jüti rülekütsü vü Isaac tü khieloti khekheti küshüh taji, “Thinü noh müjie küru tüvü thawa nüh müsüsa müngaviru nü hi küütsanü hi nüh tsia küütsümthuoh lo?” ti sa. 34Thinü Esau nüh ma pa zhü küünara vü ma tü khieloti zienü krie taji ma pa vü, “Hi nga tsiatsüluo, O eh pa,” ti sa. 35Thitü ma pa nüh, “Noh nü nüh kümramizhi aro viru nü noh kütsiawa vitewathuoh ünüh,” ti rületsü. 36#Atü 25.29-34. Thinü Esau nüh ma pa vü, “Ma nyo Jacob ta ji küsatü mazhünyo khemta küsa vünüh jimsatü ülo? Küpakenühnyunü ma tü eh suope künyi keri vitewathuoh. Apokhuwa eh kükhruo suopewa vitewa, thi akünyiawa halie, eh kütsiawa vitewa lethuoh,” ti küza. Jüti sanü ma nüh shele, “Noh tü eh kenüh akütsia küsü nga satümveh wiethuoh ülo?” ti küna. 37Isaac nüh Esau vü rüle taji, “Halie, hi nüh ma tü noh vüwa küüsamthuoh, thi ma nüri aveh vi ma siepe küüsamthuoh, aluoshü thi akhah aveh hi nüh ma vü phrakemthuoh nü. Jükenüh, eh tsa, hi nüh noh kenüh küsara mowa pehveh thuohlo?” ti rületsü. 38#Ebr 12.17. Thinü Esau nüh ma pa vü, “Eh pa, noh tü kütsia küsü mpa wiethuoh ülo? O, eh pa hi nga tsiatsümo, hi nga tsiatsü üti, eh pa,” ti sa. Jüti sanü Esau tü ma jikhi zie kümsie sheh nü krietewa.
39 #
Ebr 11.20. Jüti küsa vü ma pa Isaac nüh rüle taji, “Halie, noh nüh küpeh azhih thuoüji kümhiehwa nyuthuoh, thi noh nüh küpeh azhih thuoüji atülü vünüh aküzo kütsatüwa nyuthuoh. 40#Atü 36.8; 2 Kaj 8.20. Noh tü noh nyuchuwa vünüh rho naveh, tü noh nü siepe sanaveh; thitü noh nüh prethuotewa thuoüji ma thsohkhuonyiwa noh kuvünüh küprethuora sanaveh,” ti küza.
41Jüti küüzavü Esau tü Jacob mürhütewa, küpakenühnyunü ma pa nüh kütsiawa vi ma nü tsiatsü küm kenüh, jükenüh Esau tü ma mpa ma jüle taji, “Eh pa kenüh küsü tsotho tü shehnyitsethuoh, tinü eh pa sümthuoüji hi nüh eh nü Jacob fethe naveh,” ti sa. 42Thinü Esau azhü tü Rebekah nüh thsütera nü wa Jacob matsa kürünguowa küüji nü ma vü, “Noh jie Esau tü noh fethe nta müshe nü ma mpa müshe pehvehthuoh. 43Jükenüh eh tsa, eh zhü küna nü sühra taji zhü eh jie Laban Haran vü tewaluo, 44Thi rülo pike peh nü noh jie rükümtho küükrie chih luo; 45Ma rüküshu thi noh nüh ma vü mowa sanüh müjie küüma küjunü jüla pehla luo, hi nüh anyi wuori küze nü ru noh küüsienaveh ünüh. Mokenüh eh tsa künyikhürü rülo küsü vünüh küümie na lo?” ti küza.
Isaac nüh Laban vü Jacob Küüze
46Thinü Rebekah nüh Isaac vü, “Hi tü Hitvühwa hama kenüh ehkürho münokemthuoh. Mükütüküzü Jacob nga hakümjie küsa Hitvüh, azhih hama vühri za thuoüji, eh kürho vü eh kenüh mowa kümhie pehvehthuoh lo?” ti küza.
Currently Selected:
ATÜTSAR 27: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.