ATÜTSAR 26
26
Isaac Jerar vü Kürho
1Abraham tsothovü mpa mükünyu atükhuwa vünüh küpa küsükümkhuoji küsü azhih jüla ru le. Jükenüh Isaac tü Filistinra kajiwa Abimelek Jerar anyu vü tewa. 2Thinü Vüwa tü ma sie jüle nü, “Egypt vü müwa tümluo; thitü hi nüh noh vü küza na küsa azhie vü peh luo. 3#Atü 22.16-18.Azhie hala anyilieri kümjie peh luo, hi nüh noh sietse naveh thi tsia noh tsü naveh ünüh; küpakenühnyunü hi nüh noh thi noh küshukürari vü azhie hamari aveh tsü naveh thi hi nüh noh pa Abraham vü küshietsü küsawa sajutsü naveh. 4Hi nüh noh tsatori tü thajüwu vü awutsiri zake saküzhitsü naveh, thi azhie hamari aveh hi nüh noh tsatori vü tsü naveh; jüti sanü noh tsatori vünüh azhih vü akuoküji aveh nga mari mpa kütsia küngura sanaveh, 5küpakenühnyunü Abraham nüh eh zhü küna, hi nüh küüzari müzhethi hi nüh azhükütsüri sa, eh wulehri thi eh khonyori kümzhekenüh,” ti küza. 6Jükenüh Isaac tü Jerar vü rho. 7#Atü 12.13; 20.2.Jüti küsa vü azhie jüma nyiri nüh ma vüvüh küna, thinü ma nüh mari vü, “Ma tü eh tsehvü lie,” ti küza, küpakenühnyunü ma tü, “Ma nü eh vüvüh lie,” ta küüza kükrü kenüh, ma nüh müshe taji, “Azhie hama nyiri nüh Rebekah kenüh hi küfethem üsü ti küsa kenüh,” ti sa, küpakenühnyunü Rebekah tü nozü küm kenüh. 8Isaac tü tsotho küsuo jüla pehtewa ünü Filistinri kajiwa Abimelek tü mürhülehpie vünüh noküüze vü Isaac vüvüh Rebekah ngukera. 9Thinü Abimelek nüh Isaac ji nü, “Halie, ma tü noh vüvüh nü; mokümjie vünüh ma tü eh tsehvüwa ti küzavehlo?” ti küza. Thinü Isaac nüh ma vü, “Küpakenühnyunü hi nüh kümshe, hi tü ma kenüh süm üsü ti küsa kenüh,” ti rületsü. 10Abimelek nüh ma vü, “Noh tü hiri vü mowa samthuoh lo? Nyi küsü nüh kürüzi vünüh noh vüvüh siezeh mhieveh lo,” ti küza. 11Jüti sanü Abimelek nüh anyiri aveh vü hamna tsü taji, “Thawa nüh anyi hama nyutü ma vüvüh pa naveh ünüh küüsünaveh,” ti küza.
12Thinü Isaac tü mahtsü thse ünü jüma mahvi tü ma nüh küzhuh nyiehvü nüh müzakeri zhi nü mahwiera. KüpakenühnyunüVüwa nüh tsia ma kütsü kenüh, 13Thi Isaac tü nyirhieteru, jüti sanü ma tü müjie künyirhiesheh küju nü kütsarhie küzhiküzhi wa wie. 14Ma tü khieloti anyihzhü peh thi mieshümiesa peh, thi asiepe nga khieloti peh, thinü Filistinri tü ma noküjizhiteru. 15Jüti küsa vü ma pa Abraham tsotho vü ma sieperi nüh juhkhre chühküsa aveh Filistinri nüh khekhehmtü thi azhih nüh vüphohm tü. 16Jüti küsa vü Abimelek nüh Isaac vü, “Hiri vünüh tewaluo; küpakenühnyunü noh tü hiri nyieh vünüh müzho sheh kümkenüh,” ti küza.
17Thinü Isaac tü jüla nüh tewa nü Jerar nyuo vünüh azheh sanü jüla rhotewa. 18Thi Isaac tü ma pa Abraham tsotho vü juhkhre küchühri küzhiephie le, küpakenühnyunü Abraham süküm sevü Filistinri nüh khekümtü kenüh; jüti sanü Abraham nüh juhkhre jümara nyo thohkütsü kümjie thoh le. 19Thitü Isaac sieperi nüh anyuo vü juhkhre chüh nü ajuh küshu juhkhre phahra ünü, 20Jerar nyihzhükühuori nüh Isaac nyihzhükühuori sie saluo taji, “Ajuh hamatü eh zhiri,” ti müka. Jükenüh ma nüh juhkhre jüma nyo tü Küüjakünya ti ji, küpakenühnyunü mari nüh ma sie müka nü küsa kenüh. 21Jüma sevü nga mari tü juhkhre küpa chühle, thinü jüma kenüh nga saluo lehü; jükenüh Isaac nüh jüma juhkhre nyotü, Mükünoluongü, ti ji. 22Jüma sevü nga ma tü jüma jam le nü wa küpavü chüh lehü, thitü jüla nü mari tü müküraluo, jükenüh ma nüh juhkhre jüma nyo, Zhiekümza nyutü küüjakünya mükünyie, ti thohtsü nü ma nüh, “Küpakenühnyunü khinyi thuoüji Vüwa nüh hiri kenüh azhie saphietsümthuoh, thi hiri tü azhie hala nüh nyirhiera nathuoh,” ti küza.
23Jüla nüh Isaac tü Beersheba vü tewa. 24Thinü jüma rüzavü Vüwa tü ma sie jüle taji, “Hi thuoüji noh pa Abraham Saküüwuowa; tinü mükrü tümluo, küpakenühnyunü hi nüh noh sietse thi eh siepewa Abraham nyo vünüh noh vü nga thi noh tsatori vü nga tsiatsünaküvehkenüh,” ti küza. 25Jüti küsa vü Isaac tü jüla kükhurüpe küsü sanü Vüwa nyo ji nü ma tü jüla juhthsüzheh shohta. Jüti sanü masieperi nüh jüla nüh juhkhre phie.
Isaac thi Abimelek Masü Azhievü Kütsathuozhü Küsa
26 #
Atü 21.22. Jüti küsa vü Abimelek tü ma shikekütsüwa Ahuzat thi ma thopahiri sierhüwa Fhikol masü sie nü Jerar vünüh Isaac siemütu nti wa. 27Thinü Isaac nüh mari vü, “Nohri tü mokenüh hi vü tselo, nohri nüh hi mürhü mta küsa ngu thi nohri vünüh hi tü zhejamthuoh nü?” ti küza. 28Thinü mari nüh, “Hiri nüh küthsütora thuoüji, Vüwa tünoh sietseveh; jükenüh hiri nüh küüza ngü thuoüji, noh thi hiri azhievü küüshiekütsa küsü küüpeh luo, thi hiri tü noh sienü kütsathuozhü küsü küüsaluo, 29Jüta thuoüji hiri nüh noh vü zanyoküsü nga müsa thi aküpanga müpa nüh kümhie kümjie thi zazhüküka vünüh küüze kümjie noh nga hiri vü kümsü müsanüh sana nü. Khinyi thuoüji noh tü Vüwa kütsia küvüri wiethuoh ta küsa hiri nüh thsüveh thuoh,” ti rületsü. 30Jüti küsa vü Isaac nüh mari sie kütsaküzhu sanü mari tütsa thi zhu ti sa. 31Jüti sanü mari tü rüne kümto süra nü mari küsü nüh küsü vü küüshie nü Isaac nüh mari küzem; thi mari tü luoveh kürüzi ti ma vünüh poriem. 32Jüma rülovü Isaac sieperi tü ma vü ru nü mari nüh juhkhre chühküsawa azhü viru ma vü küza taji, “Juhkhre lovü ajuh tüla nü nguthuoh,” ti küza. 33Thinü Isaac nüh juhkhre jüma nyo Küüshie, ti ji; jükenüh khinyi küju nga anyuji hama nyo tü Küüshie juhkhre ta jiveh.
Esau Vüvüh Alieri
34Esau tü mahvi zürake khruom ünü Hitri Beri tsavühwa Judit thi Hitri Elon tsavühwa Basemat masü za; 35Jüti sanü Isaac thi Rebekah masü sakükho sheh tsü.
Currently Selected:
ATÜTSAR 26: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.