ATÜTSAR 25
25
Abraham Küshuküra küpari
(1 Kkz 1.32-33)
1Jüsevü Abraham tü vüvüh küpa Ketura ti küsawa vi le. 2Ma nüh Zimran, Jokshan, Medan, Midian, Ishbak thi Shua wuo nü Abraham tsü. 3Jokshan tü Sheba thi Dedan apa. Dedan atsari thuoüji Ashurim, Letushim thi Leumim. 4Midian atsari thuoüji Ef a, Efer, Hanok, Abida thi Elda. Hamari aveh Ketura atsa kheh. 5Abraham tü ma zhi küpeh aveh vi Isaac tsü kheh. 6Thitü ma müsüra tsari vü thuoüji zanyo vi aküte mpa sa; thi ma rhoküveh vünüh atsa jümari thuoüji zhieshu wuovü anyu zhieshu vü küpehri vü küze nü Isaac vünüh küükietuom.
Abraham Küsü thi Küchohwu
7Abraham kürho mahvi tü müzake rürake nü münga rho. 8Abraham tü khruo kümhie mahvi vünüh ma rütho küsah sehkhe sanü khruomze nü süm, thi ma nyiri vü ma kümowa tü küüngu kheh. 9Jüti sanü ma tsa Isaac thi Ishmael masü tü Hitri Zohar atsa Efron azhuh Mamre zhieshu wuovü Makpela lopie vünüh ma chohwum, 10Azhuh jüma tü Abraham nüh Hitri vünüh sü. Abraham tü jüla nüh ma vüvüh Sara masü chohwum. 11Abraham süküm sevü Saküüwuowa nüh tsia Isaac tsü, thi Isaac tü Berlahairoi vü rho.
Ishmael Küshukürari
12Hamari tü Egyptvühwa Hagar, Sara tükhavüh rülavüwa, atsa Abraham vü wuokütsüwa Ishmael küshukürari. 13#1 Kkz 1.29-31. Hamari tü Ishmael tsara nyo, aküwuo vünüh müzhe nü küji: Nebaioth, Ishmael atsa küwuokhuwa; thi Kedar, Adbel, Mibsam, 14Mishma, Duma, Masa, 15Hadad, Tema, Jetur, Nafish, thi Kedema. 16Hamari tü Ishmael atsari thi manyori, manyuri thi mari kürünape, mari kuoh müzhe nü kajitsa türakünyi küvizhu. 17Ishmael kürho mahvi tü müzake cherake nü türü sanü ma rütho küsah sehkhe sanü süm nü ma kümowa tü ma jienürivü küüngu kheh. 18Ma jienüri tü Havila vünüh Shur küju Egypt wiejie nü Assiria wuovü rho kheh; ma tü ma nyiri aveh sie porie nü rho.
Esau thi Jacob Küwuo
19Hamari tü Abraham atsa Isaac küshukürari: Abraham tü Isaac apa. 20Isaac tü ma vüvüh küvi vü ma mahvi zürake thuoh, Betguel atsa Laban tsehvüwa, Padanaram vü anyu Aramean vü kürhori. 21Isaac tü ma vüvüh Rebekah kenüh Vüwa vü kükhuo sa, küpakenühnyunü ma tü vükre küm kenüh; thinü Vüwa nüh ma kükhuo künatsü nü ma vüvüh Rebekah tü atsamohra. 22Rebekah tü atsa künyi morhie; thinü atsa künyi tü mavolovü nüh khieloti saluopeh; jüti küsa vü Rebekah nüh, “Hakümjie sana küsanü hi tü mokenüh rhoveh lo?” ti sa. Jükenüh ma tü Vüwa vü küna nti wa. 23#Rom 9.12. Thinü Vüwa nüh ma vü, “Noh shiekuo lovü akuoküji künyi tüveh, noh vünüh nyi künyi wuona küsa künyi tü küsuom naveh; küsüwa tü küpawa nyieh vünüh khra naveh, kükhruowa nüh rünguowa kütsü sanaveh,” ti küza.
24Jüti sanü Rebekah tü küwuo leh tsotho teru nü wuo ünü, halie, ma shiekuo lovü tü küwushie tüla. 25Küwuo khuwa thuoüji ma satsa mürumwuo, ma satsa aveh tü athsü küneh küpewa kümjie; jükenüh mari nüh ma nyo tü Esau, mazhünyo, (aküneh küzhuluo) ti vünüh thoh. 26Jüsevü nüh ma nü wuoturu, thi küturu vü ma ke tü Esau mütseh küjehphoke nü turu; thi ma nyo thuoüji Jacob, amütseh nyutü nyura müthoh, ti ji. Rebekah nüh masü küwuo vü Isaac tü mahvi rorakethuoh.
Esau nüh Küwuokhu Wuleh Zhukütsa
27Atsa hamasü khruoküsüra vü Esau thuoüji asa zhethsü sheh, reza vü küüzhu lotewa, thitü Jacob thuoüji tsüke nü juhthsüzheh lovü küpeh sa. 28Isaac tü Esau lomü, küpakenühnyunü ma nüh küzhu nü asa vüru kütsatsa tiküsa kenüh; thitü Rebekah thuoüji Jacob küülo sa.
29Küsükeri Jacob tü awih shu pehveh ünü azhuh wataji avorümake nü ru. 30Thinü ma nüh Jacob vü, “Hi tü rümakem wiethuoh, tinü noh nüh awih kürü wuo shuküveh pike rakütsa jie,” ti khuo. (Jükenüh ma nyo tü Edom, kürüwuo ti ji). 31Thinü Jacob nüh ma vü, “Pokhuwa noh kükhruo suopewa hivü zhu tsüluo,” ti khuo. 32Jüti kükhuo vü Esau nüh, “Halie, hi tü sü nta savehthuoh nü, tinü eh kenüh kükhruo suope tü mowa sana lo?” ti sa. 33#Ebr 12.16. Thinü Jacob nüh, “Apokhu sa hi vü küshietsü chih luo,” ti khuo. Jüti kükhuo vü Esau tü küshie nü ma kükhruo suopewa Jacob vü zhutsam. 34Jüti sanü Jacob nüh lohse thi wihjuh khe matsü, thi ma tü jüma tsa thi müzho ti sanü sühra nü tewa. Jüti küsa vünüh Esau tü ma kükhruo suopewa kulem.
Currently Selected:
ATÜTSAR 25: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.