ATÜTSAR 28
28
1Thinü Isaac tü Jacob ma vü jike nü tsia ma tsü taji ma vü azhühzho tsü nü, “Noh thuoüji Kananvühri müküvira. 2Jükenüh süra nü tse Padanaram noh zah apa Bethuel zheh vü waluo; jüti sanü noh zah ajie Laban tsavüh küsü vi nü noh vüvüh saluo. 3Saküüwuowa Kükhratsawa nüh tsiakütsüwa saluo, thi avi saküüpesheh tsüluo thi noh saküzhitsüluo; jüti sanü nohtü anyiri kürho hozake refü küüsaluo. 4#Atü 17.4-8. Ma nüh Abraham kütsiawa vi noh vü nga thi noh sekünyi noh tsatori vü nga kütsüwa saluo, thi Saküüwuowa nüh azhihvi Abraham kütsü noh nüh anyilieri küsü kümjie vünüh rhoküvehwa tü noh nüh müka naveh,” ti küza. 5Jüti sanü Isaac tü Jacob küzem, thi Jacob tü tse Padanaram vü Laban, Aramea atsa Bethuel, Rebekah aprah, Jacob ajie thi Esau azah zheh vü tewa.
Esau nüh Vüvüh Küpa Küvi
6Jacob tü Isaac nüh tsiatsü nü Padaram vünüh avüvüh küüvinti küzemthuoh ta küsa Esau nüh thsüra, thi ma nüh tsiakütsüvü ma vü azhühzho tsü taji, “Noh tü Kananvühri küviwa nyu,” ta nga thsüra, 7Jüti sanü Jacob tü ma pa thi ma zah azhü küna nü Padaramvü tewa. 8Jüti küsa vü ma pa Isaac tü Kananvühri mülo ta küsa Esau nüh küthsüra vü, 9Ma tü Ishmael, Abraham atsa vü wa nü ma tsa Mahalat, Nebaioth za.
Bethel vü Jacob Amoh
10Jüti küsa vü Jacob tü Beersheba jam nü Haran wuovü tewa. 11Ma tü azhie küsü vü ru nü jüma rüza vü jüla zeh, küpakenühnyunü rünyi tekütu kenüh. Ape jüla nüh ma tü aloh küsü khuh vi ma lüche sanü zeh. 12#Jhn 1.51. Thinü ma moh vünüh apahti küsü roke nü azhih vünüh atülü wa küju moh; thi halie, Saküüwuowa zhüleri tü apahti jüla nüh kütsuokükhru sa peh! 13#Atü 13.14,15. Thinü halie, Vüwa tü ma kütuoh vü tsie nü, “Hi tüVüwa, noh pa Abraham Saküüwuowa thi Isaac Saküüwuowa; noh nüh zehpehküveh azhihwa tü hi nüh noh thi noh tsatori vü tsünaveh; 14#Atü 12.3; 22.18. Thi noh tsatori tü azhih vü azhitho zake sanaveh, thi noh tü kükrazhu nü zhietu thi zhieshu, thi zhietü thi zhieseh küju wa naveh; jüti sanü noh thi noh tsatori vünüh azhih vü atharuo aveh mari mpa nüh kütsia ngu naveh. 15Halie, hi nüh noh sietse wie naveh, thi noh khiekhievü wa naveh ünüh hi nüh rükiete naveh, thi hi nüh noh sie azhie hala rule wie naveh; küpakenühnyunü hi nüh noh vü mowaküza nüh jüma müjie küsaju nü noh küjawanyu,” ti küza. 16Jüti küsa vü Jacob tü ma küzeh vünüh sühra nü, “Vüwa tü azhie hala pehtsaveh; hi tü müthsü nüh saveh ünü,” ti sa. 17Jüti sanü ma tü krü taji, “Hamatü mowa kükrüküngoküsiake azhiethuoh lo! Hatü azhie küpa nyuthuoh nü Saküüwuowa azheh wiethuoh, thi atülü kheriwa wie thuoh,” tisa.
18Jüti sanü Jacob tü arüne kümto sühra nü aloh ma lüchesaküzehwa vi nü alokhuo tovüh küsü shie nü jüma rügi vü avüjuh züke. 19Thi ma nüh azhie jüma anyo, Saküüwuowa azheh, ti ji; thitü atükhuvü thuoüji anyuji jüma anyo tü Luz ta jila. 20Jüti sanü Jacob tü küphrahzhuzhü küsü sataji, “Mükütüküzü Saküüwuowa nüh hi sietse thuoüji thi hi nüh wanakütse lehkhuji vü hi rükieriewu tsü, kütsaküzhu thi thsümnyi vi hi tsü, 21ti sanü eh luoveh rüzih nü eh pa zheh vü shelerura thuoüjiVüwa tü eh Saküüwuowa sanaveh, 22Thi aloh hama hi nüh tovüh shieküsawa tü Saküüwuowa zheh sanaveh; thi noh nüh momowa vi hi tsü naveh ünüh türake sanü küsü noh tsü naveh,” ti küza.
Currently Selected:
ATÜTSAR 28: POCHBSI
Highlight
Share
Copy
Want to have your highlights saved across all your devices? Sign up or sign in
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.