1 BATHESALONIKA 4
4
Kgethego le leratano. Ba ba ithobaletšego
1Bana bešo, re sa le eletša re kgopela ka Morena, re re: Tiišang go swara ka tsela yeo re le laeditšego yona, mme la tšea ka yona yeo ya go kgahla Modimo. 2Gobane ditaelo tše re le filego tšona ka Morena Jesu, le a di tseba. 3Se Modimo a se ratago ke kgethego ya lena, gore le ile bootswa. 4Mang le mang e lego wa lena a tsebe mosadi e lego wa gagwe ka mokgwa wa kgethego le wa go mo godiša. 5A e se be ka phišego le kganyogo boka bantle ba ba sa tsebego Modimo. 6Mo go tše le di dirago go se ke gwa ba go jana le go forana; gobane Morena ke Molefetši wa dilo tše bjalo ka moka. Ke tše re le boditšego kwale ra tiiša go le hlatsela tšona. 7Gobane se Modimo a re bileditšego sona ga se dišhila, ke kgethego. 8Ke gona, monyatšamotho o nyatša Modimo, e a le neilego Moya wa gagwe wa ba mo go lena.
9Gomme e le tša go rata bana ba bolena, ga se tše le sa swanelago go ngwalelwa, gobane leratanong le barutwa ba Modimo. 10Ke tšona le di direlago ba bolena ka moka ba Matsedonia; sa rena ke go fo le eletša re re: Bana bešo! Išang pele go ya botlalong! 11Le phegelele go thwe: Le ba leago, le ba go dira tše di le lebanego, le ba go dira ka diatla tša lena, ka mo re le laetšego ka gona. 12Bantle ba le bone le swere tsela ka bothakga, gore le se hloke selo.
13Bana bešo! Ga ke rate ge le hloka tsebo tabeng ya ba ba ithobaletšego, gore le se ke la hlokofala boka ba bangwe bao ba hlokago kholofelo. 14Ge re dumela gore Kriste o hwile mme a tsoga, le ba ba ithobaletšego ka Jesu, Modimo o tlo ba iša le yena.
15Fao re le botša lentšu la Morena ge re re: Rena ba re phelago ra šadišetšwa maboo a Morena, re ka se ke ra raka bao pele ba ithobaletšego. 16Gobane Morena yena mong o tlo fologa legodimong ka mokgoši, ka kgowa ya Morongwamogolo, ka phalafala ya Modimo; ke mo bao ba hwetšego go Kriste ba tlogo tsoga pele. 17Gwa tlo latela rena ba re šetšego re phela, ra rotošetšwa marung gammogo le bona, ra yo gahlanetša Morena sebakeng sa godimo, ya tlo ba gona go yo ba le Morena go ya go ile. 18Homotšanang ka tšona ditaba tše.
Currently Selected:
1 BATHESALONIKA 4: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.